Ukwenza Isikhathi Sezinto Ezibalulekile

“Isikhathi esesisele sinciphile.”—1 Korinte 7:29.

“UKUGXUMELA emanzini bese uzithela ngawo akusho ukuthi uyabhukuda,” kubhala uMichael LeBoeuf encwadini yakhe ethi Working Smart.

Ngamanye amazwi, kungaba nomehluko phakathi kokusebenza nje nokwenza okuthile okubaluleke ngempela. Ake ubheke leli sonto elidlule. Yini oye wazinika isikhathi sokuyenza? Yini obe matasa kakhulu wangakwazi ukuyenza? Uyasibona yini isidingo sokuzinika isikhathi esithé xaxa sokwenza izinto ezibaluleke ngempela?

Cabanga ngalokho uJesu akubikezela mayelana nezikhathi zethu eziphuthumayo. Wathi njengoba lesi simiso siya ekupheleni futhi kusondela izwe elisha likaNkulunkulu lokulunga, abafundi bakhe babeyoba matasa. Benzani? Beshumayela ‘izindaba ezinhle zombuso kaNkulunkulu.’ UJesu wabuye wathi abantu abaningi babeyoba matasa kakhulu bengafuni ukulalela. Babeyoba magange bephishekela izinto zokuphila ezivamile. Wanezela nokuthi labo abamatasa kakhulu bengasinaki isigijimi soMbuso babeyobhujiswa.—Mathewu 24:14, 37-39; Luka 17:28-30.

Namuhla, oFakazi BakaJehova bashumayela izindaba ezinhle zoMbuso kaNkulunkulu emazweni angaphezu kwangu-230. Njengoba nje uJesu ayebikezele, abaningi ababalaleli, bathi “bamatasa kakhulu.” Kodwa sikumema ukuba uzinike isikhathi ekuphileni kwakho okumatasa sokuhlola lokho iBhayibheli elikufundisayo ngoMbuso kaNkulunkulu. Sinethemba lokuthi lapho ufunda ngezibusiso uNkulunkulu azigcinele isintu, uyovuma ukuthi ukuzwa nokulalela isigijimi seBhayibheli kuyinto ebaluleke ngempela, okuthile okufanele uzinike isikhathi sokukwenza.a

[Umbhalo waphansi]