Jwayelana Nabantu Abathanda UJehova

Kungani kufanele sijwayelane nabantu abathanda uJehova? Yingoba abantu esijwayelene nabo bangaba nethonya elihle noma elibi. (IzA 13:20) Ngokwesibonelo, iNkosi uJehowashi yayenza “okulungile emehlweni kaJehova” ngesikhathi isajwayelene noMpristi Ophakeme uJehoyada. (2Kro 24:2) Ngemva kokufa kukaJehoyada, uJehowashi wamlahla uJehova ngenxa yokujwayelana nabantu ababi.—2Kro 24:17-19.

Ngekhulu lokuqala C.E., umphostoli uPawulu wafanisa ibandla lobuKristu ‘nendlu enkulu,’ wafanisa amalungu ebandla ‘nezitsha’ noma izinto ezisetshenziswa ekhishini. Siqhubeka ‘siyizitsha zenjongo enodumo’ uma sigwema ukujwayelana nanoma ubani owenza izinto ezingamjabulisi uJehova, ngisho noma kuyilungu lomndeni noma lebandla. (2Thim 2:20, 21) Kwangathi singaqhubeka sikhetha abangane abathanda uJehova nabasikhuthazayo ukuba simkhonze.

BUKELA IVIDIYO ETHI FUNDA UKWENQABA ABANGANE ABABI, BESE UPHENDULA LE MIBUZO ELANDELAYO:

• Iziphi ezinye zezindlela ezingasenza sizithole sesijwayelene nabantu ababi?

• Kule vidiyo, yini eyasiza amaKristu amathathu ayeka ukujwayelana nabantu ababi?

• Iziphi izimiso zeBhayibheli ezingakusiza ubakhethe kahle abantu ojwayelana nabo?