Ukuthuthukisa Amakhono Ethu Enkonzweni—Ukuphendula Umninikhaya Othukuthele

Okwenza Kubaluleke: Abantu abaningi esihlangana nabo enkonzweni banomusa. Nokho, uJesu waprofetha ukuthi abanye babeyosizonda. (Joh. 17:14) Ngakho-ke, akufanele kusimangaze ukuthola umninikhaya othukuthele. Lapho lokhu kwenzeka, sifuna ukusabela ngendlela ejabulisa lowo esimmelele, uJehova. (Roma 12:17-21; 1 Pet. 3:15) Cishe lokho kuyokwenza isimo sibe ngcono. Kuyonikeza nobufakazi kumninikhaya nakunoma ubani obukele, kubenze bathambekele nakakhulu ekulaleleni oFakazi BakaJehova uma befika ngokulandelayo.—2 Kor. 6:3.

Indlela Yokukwenza:

Hlale uzolile futhi unobungane. Lokhu kuyosidambisa isimo. Ungamcasukeli umninikhaya. (UmSh. 7:9) Kungenzeka uthukutheliswe izinkinga zakhe noma ufike ngesikhathi esibi. Ngisho noma ethukutheliswe isigijimi sethu, ngokuvamile lokhu kusuke kungenxa yokudukiswa.—2 Kor. 4:4.
Phendula ngamazwi amnene nanomusa. (IzAga 15:1) Ingabe umvuse esalele noma umphazamise enza okuthile? Nakuba singaxolisi ngenxa yomsebenzi wethu, ungase ngokuzithoba uxolise ngokufika ngesikhathi esingafanele. Ingabe uthukutheliswe amahemuhemu awatshelwe ngathi? Uma kunjalo, ungase uthi: “Ngiyaqonda ukuthi kungani lokho kungakuthukuthelisa. Nokho, kubonakala sengathi akulona iqiniso okuzwile ngathi. Ngingakuchazela?” Ingabe akavumelani nenye yezimfundiso zethu, mhlawumbe ephathelene nokususwa noma negazi? Ungase uthi: “Ngiyakuzwa. Nabanye baye bazizwa ngendlela efanayo. Ngingakubonisa isisekelo saleyo mfundiso eBhayibhelini?”
Uma umuntu ethukuthele kakhulu, kungakuhle uhambe ngaphandle kokuzama ukumphendula. Uma ethi akafuni oFakazi BakaJehova baphinde beze kwakhe, ungamqinisekisa ngokuthi sizosihlonipha isifiso sakhe.

Zama Lokhu Phakathi Nenyanga:

Yibani nezikhathi zokuprakthiza phakathi nokukhulekela komkhaya.
Ngemva kokushiya umninikhaya othukuthele, xoxa nohamba naye ngendlela engcono obungaphendula ngayo.