Ukuthuthukisa Amakhono Ethu Enkonzweni—Ukubeka Isisekelo Sempindelo

Okwenza Kubaluleke: Lapho sithola umuntu obonisa isithakazelo, sifuna ukuphindela kuye ngesikhathi azobe esekhaya ngaso ukuze sinisele imbewu yeqiniso esiyitshalile. (1 Kor. 3:6) Ngokuvamile lokhu kudinga ukuba ngaphambi kokuba sihambe, sibeke isisekelo sempindelo ngokumbuza ukuthi singabuya nini futhi. Ngaphezu kwalokho, kuhle ukubuza umbuzo esizowuphendula lapho sibuya. Lokhu kuzokwenza umninikhaya akulangazelele ukuba sibuye, futhi uma impendulo yombuzo isencwadini esimshiyele yona, cishe uzoyifunda. Ukubeka isisekelo sengxoxo elandelayo kwenza kube lula ukwenza impindelo ngoba kakade seniyikhethile indaba enizokhuluma ngayo futhi umninikhaya uyazi ukuthi nizoxoxa ngani. Lapho siphinde simbona, singamchazela ukuthi sizophendula umbuzo esawubuza ngokudlule bese siyaqhubeka.

Indlela Yokukwenza:

Lapho ulungiselela intshumayelo yakho, lungiselela nombuzo ozowuphendula lapho uphindela. Kungaba umbuzo osencwadini ozomnika yona ngalelo langa noma umbuzo ophendulwa kwezinye zezincwadi zethu esiqhuba ngazo izifundo, ongambonisa yona lapho uphindela.
Lapho uphetha ingxoxo yakho nomuntu obonise isithakazelo, mtshele ukuthi uyafisa ukuphinde uxoxe naye bese umbuza umbuzo owulungiselele. Kwamanye amasimu abantu bamatasa kakhulu futhi bayanqikaza ukubeka isikhathi enizophinde nixoxe ngaso. Ezimweni ezinjalo, ungase uthi: “Ingabe vele utholakala ngalezi zikhathi? [Lindela impendulo.] Ngesonto elizayo, ngingathanda ukukuvakashela isikhashana ngizophendula lo mbuzo . . . Uma ngikuthola umatasa kakhuIu, ungitshele.”
Uma utshela umninikhaya ukuthi uzobuya ngesikhathi esithile, sigcine leso sikhathi. (Math. 5:37) Ekuphetheni kwempindelo yakho, beka isisekelo sempindelo elandelayo.

Zama Lokhu Phakathi Nenyanga:

Lapho ulungiselela intshumayelo yakho, lungiselela nombuzo ozowubuza ekugcineni ukuze uwuphendule lapho uphindela. Xoxela nabanye abamemezeli oshumayela nabo.