Obani Abangaba Nesithakazelo Kulokhu?
1. Lapho sifunda eyethu INqabayokulinda ne-Phaphama! yini okufanele siyicabangele, futhi ngani?
1 Omagazini INqabayokulinda ne-Phaphama! balungiselelwa kucatshangwa ngensimu yomhlaba wonke. Ngakho-ke, izihloko zabo zikhuluma ngezinto ezihlukahlukene. Lapho sifunda isihloko ngasinye kwawethu amakhophi, kufanele sicabange ngomuntu okungenzeka simthakazelise leso sihloko, bese siqiniseka ukuthi siyamhambisela lowo muntu umagazini.
2. Iziphi izihloko ezikomagazini bethu ezingase zibakhange abanye?
2 Ingabe INqabayokulinda yamuva ikhuluma ngesihloko seBhayibheli enike naxoxa ngaso nomuntu osebenza naye? Ingabe kunesihloko esikhuluma ngokuphila komkhaya esingaba usizo esihlotsheni sakho? Ukhona yini umuntu ojwayelene naye ohlela ukuya ezweni i-Phaphama! eye yakhuluma ngalo? Ingabe omunye walabo magazini ungakhanga emkhakheni othile wamabhizinisi noma eminyangweni kahulumeni esensimini yenu? Ngokwesibonelo, umagazini okhuluma ngezinselele abantu abadala ababhekana nazo ungase ubakhange kakhulu labo abasemakhaya asebekhulile. Abezomthetho bangase bakhangwe umagazini okhuluma ngobugebengu.
3. Landisa okuhlangenwe nakho okubonisa ukubaluleka kokuhambisa omagazini abathile kubantu esinomuzwa wokuthi kungase kubakhange lokho abakuqukethe.
3 Imiphumela: Ngemva kokuba omunye umbhangqwana waseNingizimu Afrika uthole i-Phaphama! ka-October 2011 enesihloko esithi, “Ukukhulisa Izingane Ezikwazi Ukuzimela,” wathinta izikole ezingu-25 ezisensimini yawo ngocingo. Ezingu-22 zawamukela amakhophi alo magazini futhi zawanikeza abafundi. Omunye umbhangqwana kuleyo nsimu wenza okufanayo, nawo wahambisela izikole ezisensimini yawo amakhophi alo magazini. Kwesinye salezi zikole, othisha banquma ukusebenzisa lo magazini esimisweni sabo sokufunda samasonto onke. Lo mbhangqwana waxoxela umbonisi wesifunda ngalokhu. Yena wabe esekhuthaza amabandla asesifundeni sakhe ukuba ashumayele ezikoleni ezisensimini yawo. Ihhovisi legatsha lathola ama-oda amaningi omagazini abengeziwe, kangangokuba lo magazini kwadingeka ukuba uphinde unyatheliswe!
4. Kungani sifuna ukubasakaza kabanzi omagazini?
4 Omagazini bethu banikeza incazelo yangempela ngezenzakalo zamanje futhi badonsele ukunaka eBhayibhelini naseMbusweni kaNkulunkulu. Bawukuphela komagazini emhlabeni ‘abamemezela insindiso.’ (Isaya 52:7) Ngakho-ke, sifuna ukubasakaza kabanzi. Indlela enhle yokwenza lokhu iwukuzibuza, ‘Obani abangaba nesithakazelo kulokhu?’