Masigcine Indawo Yethu Yokukhulekela Isesimweni Esihle
1. IHholo LoMbuso lifeza yiphi injongo?
1 Emhlabeni wonke kunamabandla oFakazi BakaJehova angaphezu kuka-94 000. Amaningi awo ahlangana eHholo LoMbuso, eliyindawo yebandla yokukhulekela okumsulwa, ukuze afunde iBhayibheli futhi ahlangane namanye amaKristu. Nokho, amanye amabandla asahlangana ezindaweni eziqashiwe, njengasezikoleni nasezakhiweni zesikhashana.
2. Kungani kubalulekile ukugcina iHholo LoMbuso lihlanzekile futhi lisesimweni esihle?
2 Ukuhlanza Ihholo Njalo: Umsebenzi wokugcina iHholo LoMbuso lisesimweni esihle uyingxenye ebalulekile yenkonzo yethu engcwele. Incwadi ethi Ukuhlelelwa, emakhasini 61-2, ithi: “Abazalwane kumelwe bakucabangele njengokuyilungelo hhayi nje kuphela ukusekela iHholo LoMbuso ngokwezimali kodwa futhi nokuzinikela ngokuzithandela ekuligcineni lihlanzekile, libukeka futhi lisesimweni esikahle. Kokubili ngaphakathi nangaphandle, iHholo LoMbuso kumelwe libe ngeliyimelela kahle inhlangano kaJehova.” Njengoba iHholo LoMbuso lisetshenziswa kaningi isonto ngalinye, kudingeka lihlanzwe futhi linakekelwe njalo. Ngokuvamile lokhu kwenziwa izisebenzi zokuzithandela ezisebenzisa lelo Hholo LoMbuso. Njengasezikhathini zeBhayibheli, izinceku zikaJehova namuhla kufanele zikhuthale ‘ekuvuseleleni nasekulungiseni’ indawo yethu yokukhulekela.—2 IziKr. 34:10.
3. Kuhlelwa kanjani ukuhlanzwa kweHholo LoMbuso, futhi obani abangenza le nkonzo?
3 Isimiso sokuhlanzwa kweHholo LoMbuso masonto onke kufanele sixhonywe ebhodini lezaziso. Wonke amaqembu esifundo sencwadi kufanele ashintshane ngokuhlanza ihholo isonto ngalinye, alandele uhlu lwezinto okumelwe zenziwe. Bonke abakwaziyo kudingeka bahlanganyele kuleli lungelo lamasonto onke lokugcina iHholo LoMbuso lihlanzekile futhi lisesimweni esihle. Abantwana nabo bangaba khona lapho kuhlanzwa, uma beqondiswa abazali babo, ngaleyo ndlela bebafundisa ukubonisa ukulazisa leli lungelo. Kubalulekile ukubambisana, ikakhulukazi uma engaphezu kwelilodwa amabandla asebenzisa iHholo LoMbuso, ukuze ukufezwa kwalesi sici esibalulekile sokukhulekela kwethu kungabi semahlombe abambalwa. Loku kusebenza nakulawo mabandla asebenzisa izindawo eziqashiwe noma izakhiwo zesikhashana.
4. Yini okufanele yenziwe ukuze ibandla lazi ukuthi misebenzi mini okudingeka yenziwe lapho kuhlanzwa iHholo LoMbuso?
4 Uhlu lwezinto okumelwe zenziwe lungachonywa lapho kugcinwa khona izinto zokusebenza. Lolu hlu kufanele luchaze imisebenzi okumelwe yenziwe isonto ngalinye, kuhlanganise nokuhlanza ukhaphethi namafasitela, ukudasida amakhabethe, ukuchitha imigqomo yezibi, ukukolobha phansi nokwesula izibuko. Eminye imisebenzi ingase ingadingi ukwenziwa njalo, njengokupholisha impahla yokhuni nokuhlanzisisa izihlalo, amakhethini nezibani. Yonke imithi yokuhlanza kufanele igcinwe kude nezingane futhi kufanele ibhalwe ngokucacile. Kufanele kubhalwe kafushane indlela umuthi ngamunye osetshenziswa ngayo.
5. Kubaluleke kangakanani ukuphepha, futhi iziphi izici ezidinga ukuhlolwa njalo ngezikhathi ezithile? (Bheka ibhokisi elisekhasini 4.)
5 Ukuphepha eHholo LoMbuso kubaluleke kakhulu. (Dut. 22:8) Ngokuqondene nalokhu, ibhokisi elisekhasini 4 linohlu lwezici okudingeka zihlolwe njalo ngezikhathi ezithile, lezo ezinithintayo, ukuze kuvinjelwe izingozi.
6. Uxhunyaniswa kanjani umsebenzi wokugcinwa kweHholo LoMbuso lisesimweni esihle?
6 Ukugcina IHholo LoMbuso Lisesimweni Esihle: Kungumthwalo wendikimba yabadala ukuqondisa ukugcinwa kweHholo LoMbuso lisesimweni esihle. Ngokuvamile kumiswa umdala noma inceku ekhonzayo ukuba abe umxhumanisi womsebenzi. Uhlela ukusetshenziswa kweHholo LoMbuso kwansuku zonke, eqinisekisa ukuthi ligcinwa lihlanzekile futhi lisesimweni esihle nokuthi zikhona ngokwanele izinto ezidingekayo. Kubalulekile ukuba zingabi khona izimo ezingadala ingozi ehholo noma emagcekeni alo. Uma ihholo lisetshenziswa amabandla amabili noma ngaphezulu, izindikimba zabadala zimisa ikomiti yokusetshenziswa kwehholo ukuba yenze amalungiselelo okunakekelwa kwesakhiwo nendawo. Le komiti iqondiswa izindikimba zabadala.
7. (a) Yini eyenziwayo unyaka ngamunye ukuze kuqinisekwe ukuthi iHholo LoMbuso lihlala lisesimweni esihle? (b) Iziphi izinto ezidinga ukuhlolwa njalo ngezikhathi ezithile? (Bheka ibhokisi ekhasini 5.)
7 IHholo LoMbuso liyahlolisiswa kanye ngonyaka. Ngemva kwalokho abadala benza amalungiselelo okulungisa konke okudinga ukulungiswa. Abamemezeli bangacelwa ukuba basize ekwenzeni umsebenzi wokulungisa nokugcina iHholo LoMbuso lisesimweni esihle. Bonke kufanele baqikelele ukwenza ngisho nezinto ezincane futhi zisheshe ukwenziwa. Isakhiwo sesikhashana okuhlanganwa kuso naso kufanele sinakekelwe.
8. Kunini lapho abadala bengathinta khona iKomiti Yokwakha Yesifunda ngezindaba zokunakekelwa kweHholo LoMbuso?
8 Uma abadala bebona ukuthi badinga iseluleko noma usizo ekunakekeleni iHholo LoMbuso, bangase bathinte iKomiti Yokwakha Yesifunda. Lokhu kungahlanganisa nezindaba ezifana nokunakekelwa kukakhaphethi nokuxazulula izinkinga zomswakama ehholo.
9. Iyiphi inqubo okufanele ilandelwe uma kukhona isidingo sokuqasha inkontileka?
9 Ukusebenzisa Izimali Zebandla Ngokuhlakanipha: Umsebenzi omningi owenziwa eHholo LoMbuso nasemagcekeni alo wenziwa izisebenzi zokuzithandela. Imizamo yazo yokuzidela iwuphawu oluhle lothando futhi izinciphisa kakhulu izindleko. Uma kuba nesidingo sokuqasha inkontileka ezokwenza umsebenzi othile, njengokuqeda izinambuzane noma ukulungisa ugesi, abadala kufanele bafune ezowenza kahle ngemali ekahle. Lokhu bakwenza ngokuqale babhale incazelo eningilizayo yomsebenzi okudingeka wenziwe noma yezinto ezifunekayo. Amakhophi alolu hlu anikezwa izinkontileka ezincintisanayo ukuze zonke ziqhudelane zinolwazi olufanayo lwalokho okudingekayo. Ngemva kokuthola izimpendulo ezibhaliwe ezivela ezinkontilekeni ezihlukahlukene, abadala sebengakhetha engcono kunazo zonke. Le nqubo kufanele ilandelwe ngisho noma kukhona umzalwane othi angawenza lowo msebenzi noma angabathengisela lezo zinto ngenani elithile.
10. Yini eyenziwayo ukuze kuqinisekwe ukuthi izimali zebandla zisetshenziswa kahle?
10 Abadala futhi bathatha izinyathelo ezifanele zokuthola imvume yokubonelelwa ngentela yendawo, uma imvume enjalo itholakala. Uma iHholo LoMbuso lisetshenziswa amabandla angaphezu kwelilodwa, ikomiti yokusetshenziswa kweHholo LoMbuso iba ne-account yasebhange eseceleni, kuthi inyanga ngayinye inikeze indikimba ngayinye yabadala umbiko wezimali obhaliwe, ngaleyo ndlela igcine abadala bazi ukuthi zisetshenziswa kanjani izimali. Kungumthwalo wabadala ukubona ukuthi izimali zisetshenziswa ngendlela efanele.
11. Yini okufanele yenziwe uma umkhulu umsebenzi wokunakekela noma wokulungisa okudingeka wenziwe?
11 Uma Kuzokwenziwa Umsebenzi Omkhulu Wokulungisa: Uma ikomiti yokusetshenziswa kweHholo LoMbuso iphawula ukuthi kukhulu okudingekayo ngokuphathelene nokusetshenziswa noma ukunakekelwa kwalo, ikomiti yethula indaba ezindikimbeni zabadala ukuze ithole isiqondiso. Uma kubonakala ukuthi mkhulu umsebenzi wokunakekela noma wokulungisa okuzodingeka wenziwe noma ukuthi kuzodingeka usizo lwangaphandle, abadala bathinta iKomiti Yokwakha Yesifunda. Laba bazalwane abafanelekayo abanolwazi banikeza amacebiso awusizo futhi bengamele umsebenzi. Uma kuzodla imali enkulu, kuyodingeka bathole ukulinganiselwa okunembile kwezindleko futhi babhale izwi lesinqumo ukuze ligunyazwe yibandla.—Bheka IBhokisi Lemibuzo le-Nkonzo Yethu YoMbuso ka-February 1994.
12. Singabonisa kanjani ukuthi siyalazisa ilungelo lethu lokuqhubela imihlangano eHholo LoMbuso?
12 Asive silazisa ilungelo esinalo lokuhlangana ndawonye eHholo LoMbuso! Asifuni neze ukuyidebeselela imihlangano yethu noma ukuyithatha kalula. Sonke singaba nesandla ekuphumeleleni kwaleli lungiselelo lokusikhuthaza ngokuba sihlanganyele ngokugcwele ekunakekeleni iHholo lethu LoMbuso. Lokhu kuphakamisa ukukhulekela okumsulwa futhi kudumisa igama likaJehova. Masizimisele ukugcina indawo yethu yokukhulekela isesimweni esihle.
[Ibhokisi ekhasini 4]
Uhlu Lwezici Zokuphepha
◻ Izicimamlilo, uma zikhona, kufanele zifinyeleleke kalula futhi zihlolwe minyaka yonke.
◻ Izindawo zokuphuma nezitebhisi kufanele ziphawulwe ngokucacile, zibe nokukhanya okwanele, zifinyeleleke kalula futhi izindawo zokubambelela ziqine.
◻ Amagumbi okugcina izimpahla, okugcina amajazi, izindlu zangasese, kufanele kuhlanzeke, kuhleleke futhi kungabi nezinto ezingasha kalula, izinto zomuntu siqu nezibi.
◻ Uphahla nama-gutter kufanele kuhlolwe futhi kuhlanzwe njalo.
◻ Izindawo zokuhamba nezokupaka kumelwe zibe nokukhanya futhi zingabi khona izinto ezingenza abantu bashelele noma bawe.
◻ Isimiso sikagesi, esokushisisa nesokungenisa umoya kufanele zihlolwe njalo futhi zigcinwe zisesimweni esisebenzayo.
◻ Noma iziphi izindawo ezivuzayo kufanele zilungiswe ngokushesha ukuze kugwenywe izinkinga ezibangelwa umswakama.
◻ Isakhiwo kufanele sihluthulelwe uma kungekho muntu.
[Ibhokisi ekhasini 5]
Ukunakekelwa Kwesakhiwo Nendawo
◻ Ngaphandle: Ingabe uphahla, izindonga, upende, amafasitela nophawu lweHholo LoMbuso kusesimweni esihle?
◻ Amagceke: Ingabe amagceke anakekelwe kahle? Izindawo zokuhamba, uthango nendawo yokupaka, ingabe kusesimweni esihle?
◻ Ngaphakathi: Ingabe okhaphethi, amakhethini, izihlalo, izinto ezisezindongeni, upende namakhabethe ezincwadi kuyabukeka?
◻ Okunye okungaphakathi: Ingabe izibani, isimiso se-sound, esokushisisa nesokungenisa umoya zisebenza kahle?
◻ Izindlu zangasese: Ingabe zihlanzekile futhi zisebenza kahle? Ingabe amathawula awashwa njalo?
◻ Amaphepha ebandla: Ingabe amaphepha obunikazi agcwalisiwe futhi anemininingwane enembile? Lapho kudingeka khona, ingabe amafomu okucela imvume yokubonelelwa ngentela yendawo ayagcwaliswa minyaka yonke?