Ukushumayela Ezweni Elishintsha Njalo
1 Yeka indlela izinto ezingashintsha ngokushesha ngayo! Ngokuphazima kweso, kungenzeka inhlekelele yemvelo, ezomnotho zingawohloka, kungaba khona ukuvukelana kwezombusazwe, noma inhlekelele esakazwe kabanzi ingaba yindaba esematheni. Nokho, ngokushesha okunjalo futhi, izingqondo zabantu zingaphendukela kwezinye izinto. (IzE. 17:21; 1 Kor. 7:31) Kuleli zwe elishintsha njalo, singasibamba kanjani isithakazelo sabantu ukuze bakwazi ukulalela isigijimi soMbuso?
2 Zibone Izinto Ezikhathaza Abantu: Enye indlela yokubamba isithakazelo sabantu ukukhuluma ngezenzakalo zangaleso sikhathi. Ngesinye isikhathi lapho uJesu ekhuthaza izilaleli zakhe ukuba zicabangisise ngesimo sazo ngakuNkulunkulu, wakhuluma ngezinhlekelele ezazisanda kwenzeka ezazisezingqondweni zazo. (Luka 13:1-5) Ngendlela efanayo, lapho sikhuluma ngezindaba ezinhle, siyobe senza kahle uma sifaka udaba olusematheni noma isimo esithinta ukuphila komphakathi ensimini yethu. Nokho, lapho sikhuluma ngezinto ezinjalo, kufanele siqaphele singathathi uhlangothi ezindabeni zombusazwe noma zomphakathi.—Joh. 17:16.
3 Singakwazi kanjani lokho abantu abacabanga ngakho ngaleso sikhathi? Mhlawumbe indlela engcono kunazo zonke ukubuza umbuzo bese silalela. (Math. 12:34) Ukuba nesithakazelo kubantu kuyosenza siyinake imibono yabo futhi siqhubeke sibuza ngendlela engacunuli. Okuthile okungase kuphawulwe nje umninikhaya kungaveza into abantu abaningi endaweni abakhathazeke ngayo futhi kungakunika ithuba lokufakaza.
4 Ukulungiselela Intshumayelo: Lapho silungiselela ukwenza inkonzo ezweni elishintsha njalo, singasebenzisa incwadi ethi Ukubonisana. Emakhasini 10-11, ngaphansi kwesithi “Ikusasa/Ukulondeka” nesithi “Izenzakalo Zangalesosikhathi” kukhona ukusikisela okuwusizo mayelana nendlela yokufaka izenzakalo zangaleso sikhathi entshumayelweni yethu. Ukwaziswa okufanayo kungatholakala kuyi-Nkonzo Yethu YoMbuso ka-September 2000 ekhasini 3. Lapho ulungiselela intshumayelo yakho, qiniseka ukuthi uyawufaka nombhalo ofanelekayo.
5 Njengoba siziphawula izimo ezishintshayo zabantu abasensimini yethu, kudingeka siyishintshe nentshumayelo yethu ifanelane nezimo. Uma senza kanjalo, siyobe sixoxa nabantu ngezinto ezibathintayo. Ngaleyo ndlela, siyosiza abaningi bamazi Lowo onezimfanelo nezindinganiso ezingashintshi.—Jak. 1:17.