Ukuphila Ngokuvumelana Nokuzinikezela Kwethu
1 Kungakhathaliseki ukuthi ubhapathizwe muva nje noma emashumini eminyaka adlule, cishe uyasikhumbula leso senzakalo esiyingqopha-mlando ekuphileni kwakho. Ukubhapathizwa kwethu akusona isiphetho, kunalokho kuyisiqalo senkonzo yokuzinikezela yokuphila kwethu konke engaqhubeka phakade. (1 Joh. 2:17) Yini ehilelekile ekuphileni ngokuvumelana nokuzinikezela kwethu?
2 Landela Isibonelo SikaKristu: Ngemva kokubhapathizwa kwakhe, uJesu ‘waqala umsebenzi wakhe,’ ukumemezela “izindaba ezinhle zombuso kaNkulunkulu.” (Luka 3:23; 4:43) Nathi, ngemva kokubonakalisa ukuzinikezela kwethu kuJehova ngobhapathizo, saba izikhonzi ezimisiwe zezindaba ezinhle. Nakuba kungase kudingeke isikhathi nomzamo ukuze sithole izidingo zokuphila, umsebenzi wethu oyinhloko yinkonzo yobuKristu. (Math. 6:33) Kunokuba bazikhandlele ukuthola ingcebo noma udumo, labo abazinikezele kuNkulunkulu bafuna ‘ukukhazimulisa inkonzo yabo,’ njengoba kwenza umphostoli uPawulu. (Rom. 11:13) Ingabe liyigugu kuwe ilungelo lakho lokukhonza uJehova futhi ulisebenzisa ngokugcwele?
3 Njengoba kwenza uJesu, kumelwe ‘simelane noDeveli.’ (Jak. 4:7) USathane walinga uJesu ngemva kokuba ebhapathiziwe, nanamuhla uhlasela izinceku zikaJehova ezibhapathiziwe. (Luka 4:1-13) Njengoba sizungezwe yizwe likaSathane, kumelwe sizithibe, sigweme noma yini engase ingcolise izingqondo zethu noma yonakalise izinhliziyo zethu. (IzAga 4:23; Math. 5:29, 30) AmaKristu alulekwa ngokuthi ‘awanakudla “etafuleni likaJehova” ebe edla etafuleni lamademoni.’ (1 Kor. 10:21) Lokhu kudinga ukuba sixwaye ukuzilibazisa okungcolile, ukuzihlanganisa nababi nezingozi ze-Internet. Kudinga nokuba sigweme izincwadi zezihlubuki. Ukuqaphela la macebo kaSathane kanye namanye kuyosisiza ukuba siphile ngokuvumelana nokuzinikezela kwethu.
4 Sebenzisa Amalungiselelo KaNkulunkulu: Ukuze asisize siphile ngokuvumelana nokuzinikezela kwethu, uJehova usinikeze usizo ngeZwi lakhe nangebandla lobuKristu. Yenza ukufunda iBhayibheli nokuthandaza kuJehova kube yingxenye yesimiso sakho sansuku zonke. (Josh. 1:8; 1 Thes. 5:17) Yijabulele imihlangano. (IHu. 122:1) Jwayelana nalabo abesaba uJehova futhi ugcine imiyalo yakhe.—IHu. 119:63.
5 Ngosizo lukaJehova, ungaphila ngokuvumelana nokuzinikezela kwakho kuJehova futhi ujabulele ukumkhonza phakade.—IHu. 22:26, 27; Fil. 4:13.