“Izwi Elikhulunywa Ngesikhathi Esiyiso”
1 Ingabe ukuthola kuyinselele ukuhlanganyela nabanye isigijimi sokuphila? Ingabe unomuzwa wokuthi kufanele usho okuthile okukhulu ukuze uhlabe izilaleli zakho umxhwele? Lapho uJesu ethuma abafundi bakhe, wathi kubo: “Njengoba nihamba, nishumayele, nithi, ‘Umbuso wamazulu ususondele.’” (Math. 10:7) Isigijimi sakhe sasingeyona inkimbinkimbi futhi kulula ukuxoxa ngaso. Nanamuhla akukashintshi.
2 Ngokuvamile kudingeka amazwi ambalwa nje ukuze uqale ingxoxo. Lapho uFilipi ehlangana nomthenwa waseTopiya, wambuza: “Ingabe uyakwazi lokho okufundayo?” (IzE. 8:30) Yeka ingxoxo ezuzisayo eyaba umphumela “wezwi elikhulunywa ngesikhathi esiyiso”!—IzAga 25:11.
3 Ungase usebenzise indlela efanayo enkonzweni yakho. Kanjani? Ngokuba oqaphelisisayo futhi ukhethe amazwi afanelana nezimo. Buza umbuzo, ulalele impendulo.
4 Eminye Imibuzo Eyisisekelo: Ukuze uqale ingxoxo, ungase uzame ukusebenzisa noma imuphi kule mibuzo:
◼ “Ingabe uyawusho uMthandazo weNkosi (noma, UBaba Wethu) ekukhulekeleni kwakho?” (Math. 6:9, 10) Yisho ingxenye yawo, bese uthi: “Abanye bayabuza, ‘Lingubani igama likaNkulunkulu uJesu athi kufanele lingcweliswe?’ Abanye babuza ukuthi, ‘Uyini uMbuso uJesu athi kufanele siwukhulekele?’ Ingabe uye wazithola izimpendulo ezanelisayo kule mibuzo?”
◼ “Wake wazibuza ukuthi: ‘Iyini injongo yokuphila?’” Bonisa ukuthi ihlobene nokwazi ngoNkulunkulu.—UmSh. 12:13; Joh. 17:3.
◼ “Ingabe ucabanga ukuthi ukufa kuyoke kuphele?” Sebenzisa u-Isaya 25:8 nesAmbulo 21:4 ukuze unikeze impendulo enokwethenjelwa.
◼ “Ingabe likhona ikhambi elilula lokuqeda iziyaluyalu emhlabeni?” Bonisa ukuthi uNkulunkulu usifundisa ukuthi “uthande umakhelwane wakho.”—Math. 22:39.
◼ “Ingabe ngelinye ilanga umhlaba wethu uyobhujiswa yinhlekelele yendawo yonke?” Xoxa ngesithembiso seBhayibheli sokuthi umhlaba uyohlala phakade.—IHu. 104:5.
5 Yethula izindaba ezinhle ngendlela elula, eqondile nenomusa. UJehova uyoyibusisa imizamo yakho yokuhlanganyela “izwi” leqiniso nabanye.