Ukuqonda Okushiwo Izenzakalo Zamanje
1 “Isimo salelizwe [siyashintsha, NW].” (1 Kor. 7:31) Lokhu kubonakala ezenzakalweni zamanje ezenzeka ngokushesha. Kanye nakho konke lokho okwenzeka enhlanganweni kaJehova, lokhu kusho ukuthini kuwena siqu?—Luka 21:28.
2 Ukugcwaliseka kwesiprofetho seBhayibheli kulelikhulu lama-20 leminyaka kuqinisekisa ukuthi sonke isimiso esibi sezinto sisezinsukwini zaso zokugcina. (Math. 24:3-14; Luka 21:7-11) UJesu wathi “lesisizukulwane asiyikudlula, kungakenzeki konke.” (Luka 21:32) Ingabe uyaqonda ukuthi lokhu kusho ukuthini ngabantu abasensimini yakini abangakasithathi isinyathelo sokuma ohlangothini lukaJehova? Uma ukuqonda, lokhu kunamuphi umphumela enkonzweni yakho?—Luka 21:34-36.
3 Siza Abanye Kusenesikhathi: UJesu wanxusa abafundi bakhe ukuba bazisebenzise ngokunenzuzo izimo ezinhle ukuze benze izindaba ezinhle zaziwe. (Joh. 9:4) Umphostoli uPawulu wezwakalisa iseluleko esifanayo lapho enxusa abazalwane baseKolose ukuba ‘bahambe ngokuhlakanipha kubo abangaphandle, bathengisise isikhathi.’—Kol. 4:5.
4 Abanye baye basilalela iseluleko salomphostoli sokuthengisisa isikhathi futhi baye baba amaphayona avamile. Intsha eningi iye yathatha inkonzo yobuphayona obuvamile lapho isesesikoleni futhi iye yaba nempumelelo enhle ekwenzeni kanjalo. Intsha esesikoleni ingathengisisa isikhathi ukuze isize efunda nabo ekilasini ukuba baqonde okushiwo yilokho okwenzekayo namuhla nethemba elikhazimulayo lekusasa ngaphansi koMbuso kaNkulunkulu.—UmSh. 12:1.
5 Singasisebenzisa kahle isikhathi sethu enkonzweni yasensimini phakathi no-October ngokuhambisa umagazini wePhaphama! nganoma yiliphi ithuba esilitholayo. Lomagazini usenza siqonde lokho ngempela okushiwo izenzakalo zamanje. Uhambise kubantu abakhathazekile obathola lapho usebenza endlini ngendlu. Thatha isinyathelo sokuqala sokuwuhambisa kofunda nabo esikoleni noma kubantu osebenza nabo. Qokomisa izihloko ezingase zibathakazelise ngokukhethekile abantu obaziyo. Ngokwesibonelo, iPhaphama! kaOctober 8, 1991, inezihloko ezikhuluma ngokuxhashazwa kwabantwana. Lendaba ikhathaza abantu abaningi.
6 Singasetshenziswa kanjani iSihloko Sengxoxo senyanga? Ngemva kokuzethula, ungase ubuze umninikhaya: “Ucabanga ukuthi kwenziwa yini ukuba sibhekane nezimo eziningi ezikhungathekisa kangaka namuhla?” Ngemva kwempendulo yakhe, ungase wenezele: “IBhayibheli liyasho ukuthi ngabaningi, ukuphila akunathemba futhi kuyakhungathekisa. Phawula lokho okushiwo lapha kumShumayeli 2:17. [Ufunde.] Ingabe uyavumelana nalokho okushiwo lapha? [Lindela impendulo.] Ubungathi yini engaduduza umuntu obhekene nezinkinga eziningi? [Lindela impendulo.] Nanku umbhalo osinika umbono oqondile ngokuphila. [Funda iHubo 37:39, 40.] Lesi isizathu esenza ukuba oFakazi BakaJehova bakhuthaze imfundo engokweBhayibheli. Ngokwesibonelo, phawula indaba ecatshangelwa kumagazini wethu wePhaphama! wamuva.” Khona-ke hambisa isikhokhelo. Uma isikhokhelo singamukelwa, hambisa omagazini noma ushiye ipheshana.
7 Akukho kungabaza ngokuthi lezi izikhathi ezivusa amadlingozi zokuba sikhonze uJehova. Kwangathi leliqiniso lingasishukumisela ukuba siwasebenzise kahle amathuba kulenyanga ukuze sisize abantu abaqotho abengeziwe babone lokho ngempela okushiwo izenzakalo zamanje.