Ukubambisana Njengomkhaya Kuletha Izinzuzo
1 Iqembu lomkhaya lingelidala kuzo zonke izinhlangano zabantu. Liyigugu kuJehova, ngoba ‘yethiwa ngaye imindeni yonke ezulwini nasemhlabeni.’—Efe. 3:15.
2 Ngezikhathi zeBhayibheli, ubaba wayenomthwalo wemfanelo oyinhloko wokuqikelela ukuthi umkhaya wawunezimiso zasezulwini ngokugcwele. Kunjalo nanamuhla. (Josh. 24:15; Efe. 6: 1-4) Ukunakekela zonke izindaba ezidingekile zomkhaya kuyinselele. Kungafezwa kanjani lokhu? Ngokubambisana njengomkhaya nangokuhlela.—1 Kor. 14:40.
NJENGENHLOKO, HOLA
3 Ingokomoya labo bonke libaluleke ngokuyinhloko. Isifundo somkhaya kufanele siqhutshwe njalo futhi sivunyelaniswe nezidingo zomkhaya. Lokhu kufanele kube njalo nangokucatshangeIwa kwetekisi losuku. Yeka ukuthi kuyinto enhle kanjani ukuqala usuku ngokuxoxa ngeZwi likaNkulunkulu! Ukuzindla ngalo phakathi nosuku kuyosisiza ukuba ‘sihlale sizindla ngezinto ezimhlophe, ezithandekayo, nezitusekayo.’ (Fil. 4:8) Ingabe ungathuthuka kulokhu?
4 Ngaphezu kwesifundo somkhaya, isimiso sesifundo somuntu siqu sibalulekile. Amazwi akuJoshuwa 1:8 asebenza ngamandla alinganayo kithina ngabanye: “Lencwadi yomthetho mayingasuki emlonyeni wakho, kepha wozindla ngayo imini nobusuku ukuba uqaphele ukwenza njengakho konke okulotshwe kuyo, ngokuba lapho uyakuhlahlamelisa indlela yakho, uphumelele kahle.”
5 Kuyinselele ukufika ngesikhathi emihlanganweni yebandla. Nakho lokhu kudinga ukubambisana. Ukuqondisa kwenhloko yomkhaya kuyoqiniseki sa ukuthi kunikezwa usizo lapho ludingeka khona. Lokhu kuyokwenza ukuba bonke bafike ngesikhathi ukuze bahlanganyele engomeni nasemthandazweni wokuvula.
6 Njengoba kunezici eziningi kangaka ezimelene nobunye belungiselelo lomkhaya, kubalulekile ukuba inhloko yomkhaya ihole emthandazweni. (2 Thim. 3:1-5) Ukuthi “ekukhulekeni niqinisele” kuyiseluleko sikaPawulu esikweyabaseRoma 12:12. Ukwenza lokhu njalo kungasiza ekuhlanganiseni umkhaya ndawonye. Lomthandazo kufanele ube owenezelwa emithandazweni yelungu ngalinye emkhayeni.
LUNGISELELA
7 Ukukhulekela kwethu uJehova kuhlanganisa nokwenza igama lakhe laziwe. Izikhathi zokulungiselela emkhayeni ziyosiza bonke ukuba balungele inkonzo. Ithuluzi elihle esingalisebenzisa incwadi Ukubonisana. Izingeniso zingakhethwa kusukela emakhasini 9-15 ukuze ziphumelelise iSihloko Sengxoxo. Inhloko yomkhaya ingenza ukusikisela okufanelekile ukuze bonke bathuthuke.
8 Ingabe kungenzeka ukuba oyedwa noma abengeziwe emalungwini omkhaya babe senkonzweni yesikhathi esigcwele? (1 Kor. 16:9) Lokhu kuyodinga ukubambisana okuhle nokuhleleka kubo bonke emkhayeni. Ngokwenza indlela yayo yokuphila ibe lula nangokusebenzisa amakhono, imikhaya eminingi ijabulela lenjabulo nalelilungelo.
9 Nakuba ubaba noma inhloko yomkhaya kufanele ihole, ilungu ngalinye lidinga ukukhumbula ukuthi linomthwalo wemfanelo wokusiza umkhaya ekukhulekeleni uJehova. Ukunakekela izithakazelo zabo bonke kuyophumela emkhayeni ojabulayo nonobunye.