Thembela KuJehova, ‘UNkulunkulu Wenduduzo Yonke’
“Makadunyiswe uNkulunkulu noYise weNkosi yethu uJesu Kristu, uYise wesihe noNkulunkulu wenduduzo yonke.”—2 KOR. 1:3.
1. Isiphi isidingo abantu babo bonke ubudala abanaso?
KUSUKELA sizalwa kuqhubeke, sinesidingo senduduzo. Umntwana uyakhala ukuze sazi ukuthi udinga induduzo. Mhlawumbe ufuna ukugonwa noma ulambile. Ngisho nalapho sesibadala, ngokuvamile siyaba naso isidingo sokududuzwa. Siyayidinga induduzo ikakhulu lapho sibhekene nezimo ezinzima.
2. Isiphi isiqinisekiso uJehova asinikezayo sokuthi uyobaduduza labo abathembela kuye?
2 Amalungu omkhaya nabangane bangasiduduza ngezinga elithile. Nokho, ngezinye izikhathi izimo ezisenza sicindezeleke azinakuxazululwa umuntu. UNkulunkulu kuphela ongasiduduza kungakhathaliseki ukuthi isimo esibhekene naso singesicindezela kangakanani. IZwi lakhe liyasiqinisekisa: “UJehova useduze nabo bonke abambizayo, . . . nokukhalela kwabo usizo uyokuzwa.” (IHu. 145:18, 19) Yebo, “amehlo kaJehova akwabalungile, nezindlebe zakhe zisekukhaleleni kwabo usizo.” (IHu. 34:15) Kodwa ukuze uNkulunkulu asisekele futhi asiduduze, kumelwe sethembele kuye. Umhubi uDavide wakucacisa lokhu lapho ehlabelela: “UJehova uyoba yindawo ephakeme elondekile yanoma ubani ochotshoziwe, indawo ephakeme elondekile ngezikhathi zokucindezeleka. Labo abalaziyo igama lakho bayothembela kuwe, ngoba ngokuqinisekile ngeke ubashiye labo abakufunayo, Jehova.”—IHu. 9:9, 10.
3. UJesu walucacisa kanjani uthando uJehova analo ngabantu baKhe?
3 Abakhulekeli bakaJehova bayigugu kuye. UJesu wakucacisa lokhu lapho ethi: “Ondlunkulu abahlanu bathengiswa ngezinhlamvu zemali ezimbili zenani elincane, akunjalo? Nokho akukho nowodwa kubo olibalekayo phambi kukaNkulunkulu. Kodwa ngisho nezinwele zamakhanda enu zibaliwe zonke. Ningesabi; nina nibaluleke ngaphezu kondlunkulu abaningi.” (Luka 12:6, 7) Esebenzisa umprofethi uJeremiya, uJehova watshela abantu bakhe basendulo: “Ngikuthandé ngothando olungenasiphelo. Yingakho ngikudonse ngomusa wothando.”—Jer. 31:3.
4. Kungani singathembela ezithembisweni zikaJehova?
4 Ukuthembela kuJehova nasekugcwalisekeni kwezithembiso zakhe kungasiduduza ezikhathini zokucindezeleka. Ngakho-ke, kufanele simethembe uNkulunkulu ngendlela efana naleyo eyashiwo uJoshuwa, owathi: “Akukho nelilodwa izwi kuwo wonke amazwi amahle uJehova uNkulunkulu wenu awakhulumile kini eliye laphutha. Agcwaliseke wonke kini. Akuphuthanga nezwi elilodwa kuwo.” (Josh. 23:14) Ngaphezu kwalokho, singaqiniseka ngokuthi ngisho noma izimo ezinzima zingasichoboza okwesikhashana, “uNkulunkulu uthembekile” futhi akasoze azishiye izinceku zakhe ezithembekile.—Funda eyoku-1 Korinte 10:13.
5. Kungani singabaduduza abanye?
5 Umphostoli uPawulu ubhekisela kuJehova ngokuthi ‘uNkulunkulu wenduduzo yonke.’ “Ukududuza” kusho ukuthoba umuntu ocindezelekile noma ososizini. Lokhu kwenziwa ngokudambisa ubuhlungu noma usizi lwakhe kumenze aduduzeke. Yilokho kanye uJehova akwenzayo. (Funda eyesi-2 Korinte 1:3, 4.) Akekho umuntu futhi ayikho into engavimba uBaba wethu osezulwini, ngakho-ke angasebenzisa noma iziphi izindlela ezidingekayo ekududuzeni labo abamthandayo. Lokho kwenza nathi sikwazi ukududuza amanye amaKristu “akunoma yiluphi uhlobo losizi.” Singakwenza “ngenduduzo nathi ngokwethu esiduduzwa ngayo uNkulunkulu.” Yeka ukuthi lokhu kuwabonakalisa kahle kanjani amandla kaJehova angenakuqhathaniswa okududuza abadangele!
Ukubhekana Nezimbangela Zokucindezeleka
6. Nikeza izibonelo zezinto ezingase zibangele ukucindezeleka.
6 Sidinga induduzo ezicini eziningi zokuphila. Enye yezimbangela eziyinhloko zosizi ukushonelwa umuntu esimthandayo, ikakhulu umngane womshado noma umntwana. Umuntu angase adinge ukududuzwa lapho ecwaswa noma ebandlululwa. Impilo engeyinhle, ukuguga, ubumpofu, izinkinga zasemshadweni, noma izimo zezwe ezicindezelayo kungenza umuntu adinge induduzo.
7. (a) Ezimweni ezibuhlungu, hlobo luni lwenduduzo oludingekayo? (b) Yini uJehova angayenza ukuze aphulukise inhliziyo “ephukile nechobozekile”?
7 Ezikhathini zokucindezeleka, singase sidinge induduzo ethoba inhliziyo, ingqondo nemizwelo yethu futhi esithobayo ngokwenyama nangokomoya. Ngokwesibonelo, cabanga ngenhliziyo. IZwi likaNkulunkulu liyavuma ukuthi inhliziyo yethu ‘ingaphuka futhi ichobozeke.’ (IHu. 51:17) Ngokuqinisekile uJehova uyakwazi ukusilungisa lesi simo, ngoba “uphulukisa abanenhliziyo eyaphukile, abophe izindawo zabo ezibuhlungu.” (IHu. 147:3) Ngisho nalapho sibhekene nezimo ezinzima kakhulu, uNkulunkulu angaletha impumuzo enhliziyweni echobozekile uma sithandaza kuye ngokholo oluqinile futhi sigcina imiyalo yakhe.—Funda eyoku-1 Johane 3:19-22; 5:14, 15.
8. UJehova angasisiza kanjani lapho sicindezelekile ngokwengqondo?
8 Izingqondo zethu zivame ukudinga induduzo ngoba ubunzima obuhlukahlukene bungasibangela ukuba sicindezeleke kakhulu ngokwengqondo. Cishe ngamandla ethu, asinakukwazi ukubhekana nalolu vivinyo lokholo. Nokho, umhubi wahlabelela: “Lapho imicabango yami engincisha ukuthula iba miningi ngaphakathi kimi, induduzo yakho yaqala ukuwotawota umphefumulo wami.” (IHu. 94:19) Ngaphezu kwalokho, uPawulu wabhala: “Ningakhathazeki ngalutho, kodwa kukho konke izicelo zenu mazaziwe nguNkulunkulu ngomthandazo nangokunxusa kanye nokubonga; ukuthula kukaNkulunkulu okudlula konke ukucabanga kuyolinda izinhliziyo zenu namandla enu engqondo ngoKristu Jesu.” (Fil. 4:6, 7) Ukufunda nokuzindla ngemiBhalo kungasisiza kakhulu ekubhekaneni nokucindezeleka okungokwengqondo.—2 Thim. 3:15-17.
9. Singabhekana kanjani nokucindezeleka okungokomzwelo?
9 Ngezinye izikhathi, singase sidumazeke kangangokuthi singaba sengozini yokuthonywa imizwelo engakhi. Mhlawumbe sinomuzwa wokuthi asikwazi ukufeza umthwalo wemfanelo othile ongokomBhalo noma ilungelo lenkonzo. Nalapha uJehova angasiduduza futhi asisize. Ngokwesibonelo: Lapho uJoshuwa eyalwa ukuba ahole ama-Israyeli ayezobhekana nezizwe eziyizitha ezinamandla, uMose watshela isizwe: “Yibani nesibindi niqine. Ungazesabi noma zikwethuse, ngoba uJehova uNkulunkulu wakho nguye ohamba nawe. Ngeke akulahle noma akushiye ngokuphelele.” (Dut. 31:6) Esekelwa uJehova, uJoshuwa wakwazi ukuholela abantu bakaNkulunkulu eZweni Lesithembiso futhi bazinqoba zonke izitha zabo. Ngaphambili lapho besoLwandle Olubomvu, uMose wayebone uJehova ebasekela ngendlela efanayo.—Eks. 14:13, 14, 29-31.
10. Uma ukucindezeleka kuthinta impilo yethu engokomzimba, yiluphi usizo esingaluthola?
10 Izimo ezicindezelayo zingayilimaza impilo yethu engokomzimba. Yiqiniso, ukudla ngendlela efanele, ukuphumula nokuvocavoca umzimba ngokwanele kanye nokuzigcina sihlanzekile kungaba nethonya elihle kithi. Isimo sengqondo esingokomoya esihle nesisekelwe eBhayibhelini singaba nethonya elihle emizimbeni yethu. Ngakho, lapho sibhekene nosizi oluthile kuyasiza ukuba sikhumbule okwenzeka kuPawulu namazwi akhe akhuthazayo: “Sicindezelwe ngazo zonke izindlela, kodwa asiminyene kangangokuthi asikwazi nokunyakaza; sisambathekile, kodwa asibona abangenayo nhlobo indlela yokuphuma; siyashushiswa, kodwa asishiywa dengwane; siphonswa phansi, kodwa asibhubhi.”—2 Kor. 4:8, 9.
11. Singakunqoba kanjani ukugula ngokomoya?
11 Obunye ubunzima bungalimaza impilo yethu engokomoya. Nalapha, uJehova angasisiza. IZwi lakhe liyasiqinisekisa: “UJehova usekela bonke abawayo, futhi uvusa bonke abakhotheme.” (IHu. 145:14) Ukuze sithole usizo lokunqoba ukugula ngokomoya, kufanele sifune usizo lwabadala abangamaKristu. (Jak. 5:14, 15) Ukuhlale sikhumbula ithemba elingokomBhalo esinalo lokuphila okuphakade kungasinika amandla lapho ukholo lwethu luvivinywa.—Joh. 17:3.
Izibonelo Zenduduzo Evela KuNkulunkulu
12. Chaza indlela uJehova amduduza ngayo u-Abrahama.
12 Umhubi ophefumulelwe wathi: “[Jehova,] khumbula izwi owalisho encekwini yakho, ongenze ngalilindela. Lena yinduduzo yami ekuhluphekeni kwami, ngoba izwi lakho lingilondile.” (IHu. 119:49, 50) Namuhla, sineZwi likaJehova elilotshiwe, elinezibonelo eziningi zenduduzo evela kuNkulunkulu. Ngokwesibonelo, kungenzeka ukuthi u-Abrahama wacindezeleka kakhulu lapho ezwa ukuthi uJehova uzobhubhisa iSodoma neGomora. Le nzalamizi ethembekile yabuza uNkulunkulu: “Ingabe ngempela uzokhukhula olungile kanye nomubi?” UJehova waduduza u-Abrahama ngokumqinisekisa ukuthi uma engathola abantu abangu-50 abalungile, wayengeke alibhubhise iSodoma. Nokho, u-Abrahama wabuza uJehova izikhathi ezinhlanu: Kuthiwani uma kungatholakala abantu abangu-45 kuphela abalungile? abangu-40? abangu-30? abangu-20? abangu-10? Isikhathi ngasinye, uJehova ngesineke esikhulu nangomusa wamqinisekisa ukuthi wayengeke alibhubhise iSodoma. Nakuba kwakungekho ngisho nabantu abayishumi abalungile kuleyo ndawo, uJehova wamsindisa uLoti namadodakazi akhe.—Gen. 18:22-32; 19:15, 16, 26.
13. UHana wabonisa kanjani ukuthi wayethembele kuJehova?
13 UHana, inkosikazi ka-Elkana, wayefisa kakhulu ukuba nomntwana. Kodwa wayeyinyumba, futhi lokhu kwakumcindezela. Wathandaza kuJehova ngale ndaba, futhi umPristi Ophakeme u-Eli wathi kuye: “Kwangathi uNkulunkulu ka-Israyeli angakunika lokho okucelile kuye.” La mazwi amduduza uHana, futhi “akabange esakhathazeka.” (1 Sam. 1:8, 17, 18) UHana wathembela kuJehova, ngokuqiniseka washiyela zonke izinto ezandleni zaKhe. Nakuba ayengazi ukuthi wawuyoba yini umphumela, uHana wathola ukuthula kwangaphakathi. Ngokuhamba kwesikhathi, uJehova wawuphendula umthandazo wakhe. Wakhulelwa futhi wabeletha indodana, ayetha ngokuthi uSamuweli.—1 Sam. 1:20.
14. Kungani uDavide ayedinga induduzo, futhi wayifuna kubani?
14 UDavide, iNkosi yakwa-Israyeli yasendulo, ungesinye isibonelo somuntu owaduduzwa uNkulunkulu. Njengoba nje uJehova ‘ebona lokho inhliziyo eyikho,’ lapho ekhetha uDavide ukuba abe inkosi yakwa-Israyeli yesikhathi esizayo, wayazi ukuthi wayeqotho futhi ezinikele ekukhulekeleni kweqiniso. (1 Sam. 16:7; 2 Sam. 5:10) Nokho, kamuva uDavide waphinga noBhati-Sheba futhi wazama ukufihla isono sakhe ngokubulala umyeni wakhe. Lapho uDavide eqaphela ubukhulu besono sakhe, wathandaza kuJehova: “Sula izeqo zami ngokuvumelana nokuchichima kwesihe sakho. Ngigezisise esiphambekweni sami, ungihlanze ngisho nasesonweni sami. Ngoba mina ngiyazazi izeqo zami, nesono sami siphambi kwami njalo.” (IHu. 51:1-3) UDavide wayephenduke ngempela futhi uJehova wamthethelela. Nokho, kwadingeka ukuba abhekane nemiphumela yobubi bakhe. (2 Sam. 12:9-12) Noma kunjalo, isihe sikaJehova saba umthombo wenduduzo kule nceku yakhe ethobekile.
15. UJehova wamsiza kanjani uJesu ngaphambi nje kokuba afe?
15 Lapho esemhlabeni, uJesu wabhekana nezimo eziningi ezivivinyayo. UNkulunkulu waluvumela lolu vivinyo lokholo futhi uJesu wabugcina ubuqotho bakhe njengomuntu ophelele owayehlale ethembele kuJehova futhi wasekela ubukhosi baKhe. Lapho esezokhashelwa futhi abulawe, uJesu wathandaza kuJehova: “Makungenzeki intando yami, kodwa eyakho.” Ngemva kwalokho kwabonakala ingelosi kuye futhi yamqinisa. (Luka 22:42, 43) Ngaleso sikhathi, uNkulunkulu wanika uJesu induduzo, namandla ayewadinga futhi wamsekela.
16. Yini uNkulunkulu angayenza ngokucindezeleka esingaba nakho lapho sibhekene nokufa njengabagcini bobuqotho?
16 Ngisho noma thina singabhekana nokufa ngenxa yokuma kwethu njengamaKristu, uJehova angasisiza futhi uyosisiza ukuba sigcine ubuqotho kuye. Ngaphezu kwalokho, ithemba lovuko liyasiduduza. Yeka ukuthi silulangazelela kangakanani usuku lapho isitha sokugcina, ukufa, ‘sizokwenziwa ize’! (1 Kor. 15:26) Izinceku zikaNkulunkulu ezithembekile eziye zafa, kanye nabanye, basenkumbulweni kaJehova enokwethenjelwa futhi bayovuswa. (Joh. 5:28, 29; IzE. 24:15) Ukuqiniseka ngesithembiso sikaJehova sovuko kuyasiduduza futhi kusinika ithemba eliqinisekile lapho sishushiswa.
17. UJehova angasiduduza kanjani lapho umuntu esimthandayo efa?
17 Yeka ukuthi kududuza kanjani ukwazi ukuthi abantu esibathandayo manje abalele ethuneni laso sonke isintu banethemba lokuvukela ezweni elisha elimangalisayo elingenazo zonke izimbangela zanamuhla zokucindezeleka! Yeka ukuthi kuyoba ilungelo elingakanani futhi ‘ngesixuku esikhulu’ sezinceku zikaJehova eziyosinda ekupheleni kwalesi simiso sezinto esibi ukwamukela futhi zifundise labo abayobe bevuselwe emhlabeni!—IsAm. 7:9, 10.
Ngaphansi Kukhona Izingalo ZikaNkulunkulu Zaphakade
18, 19. Izinceku zikaNkulunkulu ziye zaduduzwa kanjani lapho zishushiswa?
18 Ngengoma enamazwi anamandla naduduzayo, uMose waqinisekisa abantu bakwa-Israyeli: “Uyindawo yokucasha uNkulunkulu wesikhathi sasendulo, futhi ngaphansi kukhona izingalo ezihlala kuze kube nini nanini.” (Dut. 33:27) Kamuva umprofethi uSamuweli watshela ama-Israyeli: “Ningaphambuki ekulandeleni uJehova, kumelwe nikhonze uJehova ngayo yonke inhliziyo yenu. . . . UJehova ngeke abalahle abantu bakhe ngenxa yegama lakhe elikhulu.” (1 Sam. 12:20-22) Uma nje sinamathela kuJehova ngokumkhulekela ngeqiniso, ngeke asilahle. Uyohlale esisekela lapho sikudinga.
19 UNkulunkulu uhlale esiza futhi eduduza abantu bakhe kulezi zinsuku zokugcina ezibucayi. Sekungaphezu kwekhulu leminyaka izinkulungwane zabakhulekeli esikanye nazo emhlabeni wonke zishushiswa futhi zigqunywa emajele ngenxa nje yokukhonza uJehova. Okuhlangenwe nakho kwazo kubonisa ukuthi ngempela uJehova uyaziduduza izinceku zakhe ngezikhathi zobunzima. Ngokwesibonelo, omunye wabafowethu ezweni elaliyiSoviet Union wagwetshwa iminyaka engu-23 ebhadla ejele ngenxa yokholo lwakhe. Noma kunjalo, yatholakala indlela yokuba athole ukudla okungokomoya ukuze aqiniswe futhi aduduzwe. Wathi: “Phakathi nayo yonke leyo minyaka, ngafunda ukwethembela kuJehova futhi wangiqinisa.”—Funda eyoku-1 Petru 5:6, 7.
20. Kungani singaqiniseka ngokuthi uJehova ngeke asishiye?
20 Kungakhathaliseki ukuthi sisazobhekana nani, siyobe senza kahle uma sikhumbula amazwi omhubi aduduzayo: “UJehova ngeke abashiye abantu bakhe.” (IHu. 94:14) Nakuba ngabanye sikudinga ukududuzwa, sibuye sibe nelungelo elikhulu lokududuza abanye. Njengoba sizobona esihlokweni esilandelayo, singaba nengxenye ekududuzeni abalilayo kuleli zwe elinezinkinga.
Ungaphendula Kanjani?
• Iziphi ezinye zezinto ezingasenza sicindezeleke?
• UJehova uziduduza kanjani izinceku zakhe?
• Yini engasiduduza lapho sibhekene nokufa?
[Ibhokisi/Izithombe ekhasini 25]
INDLELA YOKUBHEKANA NEZINTO EZINGATHINTA . . .
▪ inhliziyo yethu IHu. 147:3; 1 Joh. 3:19-22; 5:14, 15
▪ ingqondo yethu IHu. 94:19; Fil. 4:6, 7
▪ imizwelo yethu Eks. 14:13, 14; Dut. 31:6
▪ impilo yethu 2 Kor. 4:8, 9
▪ ingokomoya lethu IHu. 145:14; Jak. 5:14, 15