Imibuzo Evela Kubafundi
Kuyophela nini ukukhethwa kwamaKristu anethemba lokuphila ezulwini?
IBhayibheli aliyinikezi impendulo eqondile yalo mbuzo. Siyazi ukuthi ukugcotshwa kwabafundi bakaJesu ngenjongo yokuba bathole ifa lasezulwini kwaqala ngo-33 C.E. (IzEnzo 2:1-4) Siyazi nokuthi ngemva kokufa kwabaphostoli, ‘ukolweni’ ongamaKristu agcotshwe ngokweqiniso ‘wakhula ndawonye’ namaKristu mbumbulu, “ukhula.” (Mathewu 13:24-30) Kwabe sekuthi ngasekupheleni kwawo-1800, amaKristu agcotshiwe aphinde aba matasa ngendlela ephawulekayo. Ngo-1919 kwaqala ukuba kuvunwe “isivuno somhlaba,” esihlanganisa ukubuthwa kwabokugcina babagcotshiweyo.—IsAmbulo 14:15, 16.
Kusukela ngasekupheleni kwawo-1800 kuze kube ngo-1931, injongo eyinhloko yomsebenzi wokushumayela kwakuwukubutha amalungu asele omzimba kaKristu. Ngo-1931 abaFundi BeBhayibheli baqala ukubizwa ngegama elisekelwe eBhayibhelini elithi oFakazi BakaJehova, futhi kuyi-Nqabayokulinda yesiNgisi ka-November 15, 1933, kwavezwa umbono wokuthi leli gama eliyingqayizivele ‘laliwudenariyu’ okubhekiselwe kuwo emfanekisweni kaJesu okuMathewu 20:1-16. Amahora angu-12 okukhulunywa ngawo kulowo mfanekiso kwakucatshangwa ukuthi avumelana neminyaka engu-12 eyaqala ngo-1919 yaphela ngo-1931. Kwaphela iminyaka eminingi ngemva kwalokho oFakazi bekholelwa ukuthi ukubizelwa eMbusweni wasezulwini kwakuphele ngo-1931 nokuthi labo ababizelwa ukuba izindlalifa kanye noKristu ngo-1930 nango-1931 ‘kwakungabokugcina.’ (Mathewu 20:6-8) Nokho, ngo-1966 kwalungiswa ukuqondwa kwalowo mfanekiso, futhi kwacaca ukuthi wawungahlobene nakancane nokuphela kokukhethwa kwabagcotshiwe.
Ngo-1935 “isixuku esikhulu” okukhulunywa ngaso kusAmbulo 7:9-15 kwaqondwa ukuthi sakhiwa “ezinye izimvu,” amaKristu anethemba lasemhlabeni ayeyoqoqwa “ezinsukwini zokugcina” futhi njengeqembu ayosinda e-Armagedoni. (Johane 10:16; 2 Thimothewu 3:1; IsAmbulo 21:3, 4) Ngemva kwalowo nyaka, umsebenzi wokwenza abafundi wagxila ekubuthweni kwesixuku esikhulu. Ngakho, oFakazi ikakhulu kusukela ngo-1966 bákholelwa ukuthi ubizo lwasezulwini lwaphela ngo-1935. Lokhu kwabonakala kuqinisekiswa lapho cishe bonke ababebhapathizwa ngemva kuka-1935 bethi banethemba lasemhlabeni. Ngemva kwalokho, bonke ababebizelwa ethembeni lasezulwini kwakucatshangwa ukuthi bangena ezikhundleni zamaKristu agcotshiwe angathembekanga.
Akungabazeki ukuthi uma umuntu ogcotshiwe ehlubuka futhi engaphenduki, uJehova ukhetha omunye ukuba angene esikhundleni sakhe. (Roma 11:17-22) Nokho, inani labagcotshwe ngeqiniso elingazange lithembeke cishe lincane. Ngakolunye uhlangothi, njengoba isikhathi sihamba, amanye amaKristu abhapathizwa ngemva kuka-1935 aye aba nobufakazi bokuthi anethemba lasezulwini. (Roma 8:16, 17) Ngakho, kuyacaca ukuthi ngeke sikwazi ukumisa usuku oluqondile lokuphela kobizo lwamaKristu anethemba lasezulwini.
Kufanele abhekwe kanjani umuntu oqinisekayo enhliziyweni yakhe ukuthi manje usengogcotshiwe bese eqala ukudla izifanekiselo eSikhumbuzweni? Akufanelele ahlulelwe. Le ndaba iphakathi kwakhe noJehova. (Roma 14:12) Nokho, amaKristu agcotshwe ngeqiniso awafuni ukuqashelwa okukhethekile. Awakholelwa ukuthi ukugcotshwa kwawo kuwenza abe “nokuqonda” okukhethekile, okungaphezulu ngisho nokokwamanye amalungu esixuku esikhulu angomakad’ ebona. Awakholelwa ukuthi anomoya ongcwele kakhulu kunabangane bawo bezinye izimvu; futhi awalindele ukuphathwa ngendlela ekhethekile noma acabange ukuthi ukudla kwawo izifanekiselo kuwenza abe ngcono kunabadala abamisiwe ebandleni. Ngokuthobeka ayakhumbula ukuthi amanye amadoda agcotshiwe angekhulu lokuqala awazange akufanelekele ukukhonza njengabadala noma izinceku ezikhonzayo. (1 Thimothewu 3:1-10, 12, 13; Thithu 1:5-9; Jakobe 3:1) Amanye amaKristu agcotshiwe ayeze ebuthakathaka ngokomoya. (1 Thesalonika 5:14) Futhi nakuba odade abathile babegcotshiwe, babengafundisi ebandleni.—1 Thimothewu 2:11, 12.
Ngakho, amaKristu agcotshiwe kanye nabangane bawo bezinye izimvu balwela ukuhlala beqinile ngokomoya, behlakulela isithelo somoya futhi bethuthukisa ukuthula ebandleni. Wonke amaKristu, kungakhathaliseki ukuthi agcotshiwe noma angawezinye izimvu, ayazikhandla ekushumayeleni izindaba ezinhle nasekwenzeni abafundi ngaphansi kokuqondisa kweNdikimba Ebusayo. AmaKristu agcotshiwe ayakujabulela lokhu uma nje kuseyintando kaNkulunkulu ukuba aqhubeke esemhlabeni njengezinceku zakhe.