Bakhonza Abazalwane AbangamaKristu Kwamanye Amazwe

INGABE wake wawezwa amagama athi “izikhonzi zakwamanye amazwe” nathi “izisebenzi zokuzithandela zakwamanye amazwe”? OFakazi BakaJehova abakha la maqembu banikela ngesikhathi sabo nangamakhono abo ukuze basize ekwakheni izakhiwo zokunyathelisa nokusakaza umyalezo weBhayibheli woMbuso. Lezi zisebenzi zokuzithandela zisiza nasekwakheni amaHholo OMhlangano namaHholo OMbuso, okuyizindawo zokufundisa iBhayibheli. Njengamanje, lezi zisebenzi zokuzithandela zisiza ezakhiweni emazweni angu-34, ikakhulukazi emazweni anezimali ezilinganiselwe. Iziphi izinselele nezibusiso ezikhethekile lezi zikhonzi ezizitholayo njengoba zikhonza abazalwane abangamaKristu kwamanye amazwe? Zizizwa kanjani ‘ngenkonzo engcwele’ eziyenzayo? (IsAmbulo 7:9, 15) Ukuze sithole, ake sixoxe nezinye izisebenzi zokuzithandela ezakhonza eMexico.

Ukufika kwezisebenzi zokuzithandela eMexico zivela kwamanye amazwe kwaqala ngo-May 1992. Ngemva nje kwalokho, zahola emsebenzini wokwandisa igatsha, eliqondisa umsebenzi woFakazi BakaJehova eMexico. Kulo msebenzi wokwandisa kwakuzokwakhiwa izakhiwo ezintsha ezingu-14, ezihlanganisa izindawo zokuhlala izisebenzi zokuzithandela ezisebenza ehhovisi legatsha, isakhiwo sokunyathelisa, kanye nesakhiwo esinamahhovisi.

Ukuze zisize kulo msebenzi wokwakha, izisebenzi zokuzithandela ezingaphezu kuka-730 ezivela eCanada, eGreat Britain, e-United States nakwamanye amazwe zasebenza ngokubambisana namakhulu ezisebenzi zokuzithandela ezivela kuzo zonke izingxenye zeMexico. Ngaphezu kwalokho, oFakazi abangaphezu kuka-28 000 abakhonza emabandleni angaba ngu-1 600 aseduze nehhovisi legatsha babesiza emsebenzini wokwakha ngezimpela-sonto. Bonke babesebenza ngomoya wokuzithandela benikela ngamakhono abo ngesihle. Babekubheka njengelungelo ukukhonza uJehova ngale ndlela. Phakathi nawo wonke umsebenzi wokwakha, babekhumbula amazwi aphefumulelwe akumaHubo 127:1, athi: “Ngaphandle kokuba uJehova ngokwakhe eyakha indlu, akusizi ngalutho ukuthi abakhi bayo basebenzé kanzima kuyo.”

Izinselele Ababhekana Nazo

Iziphi izinselele izisebenzi zokuzithandela zakwamanye amazwe ezihlangabezana nazo lapho zikhonza ezabelweni zazo? Nakhu okunye ezikuphawulayo. UCurtis noSally, umbhangqwana ovela e-United States, uye wasiza emsebenzini wokwakha eJalimane, eMexico, eNdiya, eParaguay, eRomania, eRussia, eSenegal, naseZambia. UCurtis uthi: “Inselele yokuqala kwakuwukushiya indodakazi yethu, eyayiyiphayona [isikhonzi sesikhathi esigcwele], nebandla lakithi eMinnesota. Kwase kuyiminyaka engu-24 mina nomkami sihlanganyela kulelo bandla, futhi sasizizwa sisekhaya lapho.”

USally uphawula athi: “Ukuphila ezimweni ezingajwayelekile kuyinselele, mhlawumbe kuyinselele nakakhulu kumuntu wesifazane kunakowesilisa, kodwa ngafunda ukuthi umuntu angazivumelanisa nezimo. Ngifunde nokubekezelela izinambuzane, eziningi!” Unezela athi: “Kwelinye izwe, thina zisebenzi zokuzithandela sasihlala siyishumi endlini engenalo ikhishi futhi enezindlu zokugeza ezimbili kuphela. Lapho, ngafunda ukubekezela kakhulu.”

Ukufunda ulimi olusha kungenye inselele edinga umzamo nokuthobeka. USharon, osekhonze nomyeni wakhe emisebenzini yokwakha emazweni ahlukahlukene, uthi: “Ukungalwazi ulimi lwasezweni okhonza kulo kuyinselele. Ekuqaleni, kunzima ukusondelana nabafowenu nodadewenu abangokomoya uma ungakwazi ukuveza imizwa yakho ngokukhululekile. Kuyakhungathekisa lokho. Kodwa abazalwane esihlangana nabo ezabelweni zethu zakwamanye amazwe bayasibekezelela futhi bayikhathalela ngokujulile inhlalakahle yethu. Kuthi kungakabiphi sibe sesikwazi ukuxoxa ngandlela-thile.”

Ukuhlanganyela Ensimini Kudinga Isibindi

Nakuba lezo zisebenzi zokuzithandela ezizidelayo zisiza kakhulu ekuqhubekiseleni phambili umsebenzi wokwakha, ziyaqaphela ukuthi, ngaphezu kwakho konke zingabashumayeli bezindaba ezinhle zoMbuso kaNkulunkulu. Ngakho, ziwusekela ngokugcwele umsebenzi wokushumayela owenziwa amabandla ezihlanganyela kuwo. U-Åke no-Ing-Mari, umbhangqwana oye wasiza emsebenzini wokwakha eGuadeloupe, eMalawi, eMexico, naseNigeria, bayavuma ukuthi kudinga isibindi ukukhuluma olunye ulimi lapho usenkonzweni yasensimini kwelinye izwe.

U-Ing-Mari uthi: “Ekuqaleni sasingahlanganyeli ngokugcwele, ngoba sasihamba noFakazi bendawo njalo, futhi ngenxa yokwesaba ukuphoxeka, siyekele bona njalo bakhulume. Nokho, ngelinye ilanga ekuseni sanquma ukuba sihambe sodwa ensimini. Sasuka amadolo eshayisana nezinhliziyo zibhakuza. Sahlangana nowesifazane osemusha owayilalela intshumayelo engangiyilungiselele. Ngafunda umbhalo ngahambisa incwadi ethile. Lona wesifazane wabe esethi: ‘Ake ungitshele. Nginesihlobo esifunda iBhayibheli noFakazi BakaJehova. Ngingenze njani ukuze nami ngifunde?’ Koma amathe emlonyeni kimi. Ngabuye ngaziqoqa ngase ngicela ukufunda naye iBhayibheli.”

U-Ing-Mari unezela athi: “Cabanga nje ngenjabulo yami nokubonga kwami uJehova ngokubusisa umzamo wethu nesifiso sethu sokutshela abanye iqiniso.” Lona wesifazane wathuthuka kahle futhi wabhapathizwa waba nguFakazi emhlanganweni wesigodi eMexico City. U-Åke no-Ing-Mari bayifingqa ngala mazwi inkonzo yabo: “Sizazisa kakhulu izabelo zethu emsebenzini eyahlukahlukene yokwakha, kodwa akukho okudlula injabulo nokwaneliseka okutholakala ngokusiza umuntu ukuba amukele iqiniso.”

Umoya Wokuzidela

Kuyiqiniso ukuthi izisebenzi zokuzithandela ezishiya imindeni nezihlobo ziyazidela ukuze zikhonze abafowabo kwamanye amazwe, kodwa futhi zithola injabulo engenakuqhathaniswa. Iyini?

UHoward, oye wakhonza nomkakhe, uPamela, e-Angola, eColombia, e-Ecuador, e-El Salvador, eGuyana, eMexico, nasePuerto Rico uchaza athi: “Kuyilungelo ukuhlangana nabafowethu nodadewethu emazweni ahlukahlukene nokuzizwela mathupha isibopho sothando esikhona kubazalwane bethu emhlabeni wonke. Sivame ukufunda ngaso, kodwa lapho uhlala futhi ukhonza nabanye abanamasiko nezizinda ezihlukahlukene, ubazisa ngisho nakakhulu ubuzalwane bethu obuyigugu.”

UGary, oye wasiza emsebenzini wokwakha eColombia, eCosta Rica, e-Ecuador, eMexico, naseZambia, naye unomuzwa wokuthi lolu hlelo lumzuzise kakhulu. Ulandisa athi: “Ukuqeqeshwa engikuthole eminyakeni edlule ngokuba nobudlelwane nabazalwane abavuthiwe abakhonza emagatsheni asemazweni ebengabelwe kuwo kuye kwangisiza ukuba ngikuhlomele kangcono ukubhekana nezinselele ezabelweni zami. Bekuqinisa ukholo ngoba kunikeza ithuba lokubona ubunye obuwuphawu lwenhlangano kaJehova yomhlaba wonke—ubunye obunqoba ukuhlukana ngolimi, uhlanga, noma isiko.”

Phakathi naleso sikhathi, umsebenzi wokwakha eMexico waphela, futhi izakhiwo zegatsha ezandisiwe ziye zanikezelwa kulo nyaka. Zishukunyiswa uthando ngoNkulunkulu, izisebenzi zakwamanye amazwe nezisebenzi zokuzithandela zakwamanye amazwe ziye zaba nesandla kakhulu ekuthuthukiseni ukukhulekela kweqiniso eMexico nakwezinye izindawo. OFakazi BakaJehova emhlabeni wonke bawazisa kakhulu umoya wazo wokuzithandela nowokuzidela ukuze zikhonze abazalwane bazo abangamaKristu kwamanye amazwe.

[Isithombe ekhasini 25]

E-Ecuador

[Isithombe ekhasini 25]

EColombia

[Isithombe ekhasini 25]

E-Angola

[Isithombe ekhasini 26]

Umsebenzi wezakhiwo ezintsha uyaqala egatsheni laseMexico

[Isithombe ekhasini 26]

Ingadi esegatsheni

[Isithombe ekhasini 26]

Ngezansi: Amanye amalungu oMnyango Wezokwakha ngaphambi kwengxenye yezakhiwo ezintsha

[Isithombe ekhasini 27]

Izisebenzi zokuzithandela zokwakha zijabulela ukusekela umsebenzi wokushumayela namabandla endawo