Lapho Kugadla Abaphangi Abahlomile

E-IKOYI, indawo enhle yasedolobheni laseNtshonalanga Afrika, amanxuluma asephenduke izinqaba. Amaningi anezindonga ezingamamitha amathathu ubude, ezinezinsimbi ezicijile phezulu, amabhodlela afile, noma ucingo olusongiwe oluhlabayo. Onogada baqapha amasango amakhulu avikelwe ngamabhawodi, izinsimbi, amaketanga nezingidi. Amafasitela anezinsimbi. Amasango ensimbi ahlukanisa amakamelo okulala nendlu iyonke. Ebusuku, izinja ezinkulu—ama-Alsatian nama-Rottweiler—ziyadedelwa. Amalambu akhanya bhá axosha ubumnyama, futhi izimiso zokugada ngama-computer zenza umsindo omncane lapho konke kusahamba kahle.

Abekho abangabaza isidingo sokwenza amakhaya abo alondeke. Izihloko ezinkulu zamaphephandaba zithi: “Abaphangi Abahlomile Baphanga Umphakathi”; “Izingane Ezingabaphangi Zivuka Inj’Ebomvu”; nesithi “Ingebhe, Njengoba Izigilamkhuba Zasezitaladini Zibhozomela [Ilokishi].” Amazwe amaningi abhekene nalesi simo. Njengoba iBhayibheli labikezela, siphila ezikhathini ezinzima ngempela.—2 Thimothewu 3:1.

Izibalo zobugebengu, kuhlanganise nokuphanga kuhlonyiwe, ziyanda emhlabeni wonke. Ukuhluleka noma ukungazimiseli kohulumeni ukuvikela izakhamuzi zabo kuyanda. Kwamanye amazwe amaphoyisa mancane, futhi awanazibhamu ezanele, awahlonyiselwe ukusabela lapho kudingeka usizo lwawo. Abantu ababukele bamadolonzima ukungenela.

Izisulu, njengoba zingenakuthembela osizweni lwamaphoyisa noma lomphakathi, kudingeka zizivikele ngokwazo. Omunye umdala ongumKristu ezweni elisathuthuka wathi: “Uma uhlaba umkhosi, abaphangi bazokulimaza noma bakubulale. Khohlwa ngosizo lwangaphandle. Uma lufika usizo, kuhle, kodwa ungalulindeli noma ulucele ngoba ukucela usizo kungase kube ukuzidonsela amanzi ngomsele.”

Isivikelo NeZwi LikaNkulunkulu

Nakuba amaKristu engeyona ingxenye yezwe, asezweni. (Johane 17:11, 16) Ngakho njengabo bonke abanye abantu, enza amalungiselelo alinganiselayo ukuze alondeke. Nokho, ngokungafani nabaningi abangamkhonzi uJehova, abantu bakaNkulunkulu bafuna isivikelo esingazeqi izimiso zobuKristu.

Ngokuphambene, abantu basemazweni athile ase-Afrika basebenzisa umlingo ukuze bazivikele ekuphangweni. Inyanga ingase isike isihlakala, isifuba noma umhlane womuntu. Bese kugcotshwa inxeba ngomuthi, kushiwo amazwi athile okuloya, futhi lowo muntu kufanele angabe esahlaselwa abaphangi. Abanye babethela ngemithi yemilingo emakhaya abo, bekholelwa ukuthi “isiqinisekiso” esinjalo siyokwenza ukuba abaphangi bahambe bengabahluphanga.

AmaKristu eqiniso awazihlanganisi nanoma yiluphi uhlobo lomlingo. IBhayibheli lizilahla zonke izinhlobo zemimoya, futhi kufanele, ngoba izenzo ezinjalo zingahlanganisa abantu namademoni, okuyiwona akhuthaza ubudlova emhlabeni. (Genesise 6:2, 4, 11) IBhayibheli lisho ngokucacile: “Ningenzi imilingo.”—Levitikusi 19:26.

Abanye abantu bakufuna ngempela ukulondeka ngokuhloma ngezibhamu. Nokho, amaKristu awathatha ngokungathi sína amazwi kaJesu, owathi: “Labo abaphatha inkemba bayobhubha ngenkemba.” (Mathewu 26:52) Abantu bakaNkulunkulu baye ‘bakhanda izinkemba zabo zaba ngamakhuba’ futhi abazithengi izibhamu ukuze bazivikele ekuphangweni noma ekuhlaselweni.—Mika 4:3.

Kuthiwani ngokuhlela abaqaphi abahlomile? Nakuba lokhu kuyindaba yesinqumo somuntu siqu, khumbula ukuthi ukwenza kanjalo kubeka isibhamu ezandleni zomunye umuntu. Umqashi angalindelani kubaqaphi uma kufika umphangi? Ingabe angalindela ukuba abaqaphi badubule isela uma kudingekile ukuze kuvikelwe abantu nempahla egadiwe?

Ukuma okuthathwa amaKristu ekunqabeni umlingo nezikhali njengamathuluzi okuzivikela kungabonakala kuwubuwula emehlweni alabo abangamazi uNkulunkulu. Nokho, iBhayibheli liyasiqinisekisa: “Owethemba uJehova uyalondeka.” (IzAga 29:25) Nakuba uJehova evikela bonke abantu bakhe, akangeneli esimweni ngasinye ukuze avikele izinceku zakhe ekuphangweni. UJobe wayethembeke ngokuphawulekayo, nokho uNkulunkulu wavumela abaphangi ukuba baphange imfuyo kaJobe, futhi kwafa izikhonzi zakhe. (Jobe 1:14, 15, 17) UNkulunkulu wavumela nomphostoli uPawulu ukuba ahlangabezane ‘nezingozi ezinswelaboyeni.’ (2 Korinte 11:26) Nakuba kunjalo, uNkulunkulu ufundisa izinceku zakhe ukuba ziphile ngezimiso ezinciphisa ingozi yokuba ziphangwe. Futhi uzihlomisa ngolwazi oluzisiza ukuba zisabele ngendlela eyonciphisa amathuba okuba zilimale lapho ziphangwa.

Ukunciphisa Ingozi Yokuphangwa

Endulo indoda ehlakaniphile yaphawula: “Ukusutha kocebileyo akumvumeli ukuba alale.” (UmShumayeli 5:12) Ngamanye amazwi, labo abanezinto eziningi bangase bakhathazeke kakhulu ngokuthi zingabalahlekela kangangokuba baqwashe ngenxa yalokho kukhathazeka.

Ngakho enye indlela yokunganciphisi ukukhathazeka nje kuphela kodwa nengozi yokuphangwa iwukugwema ukuqongelela inqwaba yempahla ebizayo. Umphostoli ophefumulelwe wabhala: “Konke okusezweni—isifiso senyama nesifiso samehlo nokugabisa ngokokuziphilisa komuntu—akusuki kuBaba, kodwa kusuka ezweni.” (1 Johane 2:16) Izifiso ezishukumisela abantu ukuba bathenge izinto ezibizayo yizo kanye futhi ezishukumisela abanye ukuba bebe. Futhi ‘ukuzigabisa ngokokuziphilisa komuntu’ kungaheha labo abathambekele ekuphangeni.

Ngaphandle kokungazikhukhumezi, okunye okungasivikela ekuphangweni ukubonisa ukuthi ungumKristu weqiniso. Uma ubonisa abanye uthando, uthembekile ezenzweni zakho, futhi umatasa enkonzweni yobuKristu, ungazenzela idumela lokuba umuntu olungile, ofanelwe yinhlonipho emphakathini wakini. (Galathiya 5:19-23) Idumela elinjalo lobuKristu lingaba isivikelo esikhulu kunesikhali.

Lapho Kutheleka Abaphangi Abahlomile

Nokho, yini okufanele uyenze uma abaphangi bekwazile ukungena endlini yakho futhi babhekane nawe? Khumbula ukuthi ukuphila kwakho kubaluleke kakhulu ukwedlula impahla. UKristu Jesu wathi: ‘Ningamelani nomubi; kodwa noma ubani okushaya ngempama esihlathini sangakwesokunene, mphendulele nesinye futhi. Futhi uma umuntu efuna ukukwamuka ingubo yakho yangaphakathi, dedela nengubo yakho yangaphandle iye kuye.’—Mathewu 5:39, 40.

Lesi iseluleko esinengqondo. Nakuba amaKristu engabophekile ukunikeza izigebengu ukwaziswa ngokuphathelene nempahla, abaphangi bangase babe nobudlova uma bebona ukuthi umelene nabo, awubambisani nabo noma uyabakhohlisa. Abaningi babo, njengoba ‘bengasenawo nhlobo umuzwa wokuziphatha okuhle,’ bangathambekela kalula ebudloveni nasekuboniseni unya.—Efesu 4:19.

USamuel uhlala oxhaxheni lwezakhiwo zokuhlala. Abaphangi bavimbezela isakhiwo futhi bangena endlini ngendlu, bephanga. USamuel wezwa ukuqhuma kwezibhamu, ukushaywa kweminyango nabantu bememeza, bekhala futhi bebangalasa. Wawungeke ukwazi ukubaleka. USamuel watshela umkakhe namadodana akhe amathathu ukuba baguqe phansi, baphakamise izandla zabo, bavale amehlo futhi balinde. Lapho abaphangi bengena nezicabha, uSamuel wakhuluma nabo ekhophozela, eqaphela ukuthi uma ebabheka ebusweni, bangase bacabange ukuthi uyokwazi ukubakhomba kamuva. Wathi: “Ngenani. Thathani konke enikufunayo. Nikhululekile ukuthatha noma yini. SingoFakazi BakaJehova, ngakho ngeke simelane nani.” Lokhu kwabamangaza abaphangi. Cishe isikhathi esingangehora, ingqikithi yamadoda ahlomile angu-12 yayingena ngamaqembu. Nakuba bahamba namatshe ayigugu, imali nemishini kagesi, lo mkhaya awuzange ushaywe noma ugencwe ngocelemba njengoba kwaba njalo ngabanye kuleso sakhiwo. Umkhaya kaSamuel wabonga uJehova ngokusindisa ukuphila kwawo.

Lokhu kubonisa ukuthi lapho kuziwa endabeni yemali nezinto ezibonakalayo, izisulu zokuphangwa ezingazami ukumelana nabaphangi zingase zinciphise amathuba okulimala.a

Ngezinye izikhathi ukunikeza komKristu ubufakazi kungaba isivikelo ekulinyazweni. Lapho abaphangi behlasela ikhaya lika-Ade, wabatshela: “Ngiyaqonda ukuthi ukuphila kwenu kunzima, futhi kungakho nenza lo msebenzi. NjengoFakazi BakaJehova, sikholelwa ukuthi ngolunye usuku wonke umuntu uyoba nokudla okwanele kwakhe nomkhaya. Bonke abantu bayohlala ngokuthula nangenjabulo ngaphansi koMbuso kaNkulunkulu.” Lokho kwehlisa imimoya yabaphangi. Omunye wabo wathi: “Siyaxolisa ngokuthi singene emzini wakho, kodwa kumelwe uqonde ukuthi silambile.” Nakuba baphanga impahla ka-Ade, abazange bamthinte yena kanye nomkhaya wakhe.

Ukuzigcina Uzolile

Akulula ukuzola esimweni esiyingozi, ikakhulukazi uma umgomo oyinhloko wabaphangi uwukwesabisa izisulu ukuba zilalele. Ukuthandaza kuyosisiza. Ukukhalela kwethu usizo, nakuba sikwenza buthule futhi kukufushane, uJehova angakuzwa. IBhayibheli liyasiqinisekisa: “Amehlo kaJehova akubo abalungileyo; izindlebe zakhe zikukho ukukhala kwabo.” (IHubo 34:15) UJehova uyasizwa kanti angisinika nokuhlakanipha kokubhekana ngokuzola nanoma yisiphi isimo.—Jakobe 1:5.

Ngaphandle kokuthandaza, okunye okungakusiza ukuba uzole ukunquma kusengaphambili ukuthi yini oyoyenza nongeke uyenze uma uphangwa. Yiqiniso, awukwazi ukwazi kusengaphambili ukuthi yisiphi isimo oyobhekana naso. Noma kunjalo, kuhle ukuba nezimiso engqondweni, njengoba nje kunengqondo ukwazi izinqubo zokuphepha uma kwenzeka uba sesakhiweni esishayo. Ukucabanga kusengaphambili kukusiza ukuba uzole, ugweme ukuphamazela futhi ungalimali.

Umbono kaNkulunkulu ngokuphanga uphawulwe ngokucacile: “Mina-Jehova ngithanda ukulunga, ngizonda ukuphanga kanye nokubi.” (Isaya 61:8) UJehova waphefumulela umprofethi wakhe uHezekeli ukuba afake ukuphanga ohlwini lwezono ezingathi sína. (Hezekeli 18:18) Nokho, incwadi efanayo yeBhayibheli ibonisa ukuthi uNkulunkulu uyomthethelela ngomusa umuntu ophendukayo abese ebuyisela izinto aziphanga.—Hezekeli 33:14-16.

Nakuba ephila ezweni eligcwele ubugebengu, amaKristu ayathokoza ethembeni lokuphila ngaphansi koMbuso kaNkulunkulu, lapho ukuphanga kuyobe kungasekho. Mayelana naleso sikhathi, iBhayibheli liyathembisa: “[Abantu bakaNkulunkulu] bayakuhlala, kube-yilowo nalowo phansi komvini wakhe naphansi komkhiwane wakhe; akakho oyakubesabisa, ngokuba umlomo kaJehova-Sebawoti ukhulumile.”—Mika 4:4.

[Umbhalo waphansi]