Ingabe Ungawethemba Unembeza Wakho?

NGAPHANSI kwezimo ezivamile, ikhampasi iyithuluzi elinokwethenjelwa. Uthi lwayo, oluqondiswa amandla kazibuthe womhlaba, njalo lukhomba enyakatho. Ngakho izihambi zingathembela kuyikhampasi ekuziboniseni indlela lapho zingekho izimpawu zezwe zokuziqondisa. Kodwa kwenzekani uma kubekwa into enozibuthe eduze kwekhampasi? Uthi luya ngakuzibuthe kunokuba lukhombe enyakatho. Isuke ingasesona isiqondiso esinokwethenjelwa.

Kungenzeka okufanayo nangonembeza womuntu. UMdali wasifakela leli khono ukuze libe isiqondiso esinokwethenjelwa. Njengoba senziwe ngomfanekiso kaNkulunkulu, unembeza kufanele uhlale usiqondisa kokufanelekile lapho kudingeka senze izinqumo. Kufanele usishukumisele ekubeni sibonise izindinganiso zokuziphatha zikaNkulunkulu. (Genesise 1:27) Kaningi, wenza kanjalo. Ngokwesibonelo, umphostoli uPawulu ongumKristu wabhala ukuthi ngisho nabathile abangenawo umthetho kaNkulunkulu owambuliwe “benza ngokwemvelo izinto zomthetho.” Ngani? Ngoba “unembeza wabo ufakazelana nabo.”—Roma 2:14, 15.

Noma kunjalo, unembeza awukhulumi ngaso sonke isikhathi lapho kufanele ukhulume. Ngenxa yokungapheleli kobuntu, sithambekele ekwenzeni izinto esaziyo ukuthi azilungile. UPawulu wavuma: “Ngiyajabula ngempela ngomthetho kaNkulunkulu ngokomuntu enginguye ngaphakathi, kodwa ngibona emalungwini ami omunye umthetho olwa nomthetho wengqondo yami futhi ongithumbela emthethweni wesono osemalungwini ami.” (Roma 7:22, 23) Uma sivama ukuvumela ukuthambekela okungalungile, onembeza bethu bangase bathuntubezeke kancane kancane futhi ekugcineni bayeke ukusitshela ukuthi ukuziphatha okunjalo akulungile.

Nokho, naphezu kokungapheleli singavumelanisa onembeza bethu nezindinganiso zikaNkulunkulu. Yebo, kubalulekile ukuba senze kanjalo. Unembeza ohlanzekile noqeqeshwe kahle awusiholeli kuphela ebuhlotsheni obufudumele nobomuntu siqu noNkulunkulu kodwa futhi ubalulekile ukuze sisindiswe. (Heberu 10:22; 1 Petru 1:15, 16) Ngaphezu kwalokho, unembeza omuhle uyosisiza senze izinqumo ezihlakaniphile ekuphileni, eziyoholela ekubeni sibe nokuthula nenjabulo. Umhubi wathi ngomuntu ononembeza onjalo: “Umthetho kaNkulunkulu wakhe usenhliziyweni yakhe; izinyathelo zakhe azisheleli.”—IHubo 37:31.

Ukuqeqesha Unembeza

Ukuqeqesha unembeza kuhilela okungaphezu kokumane ubambe ngekhanda uhlu lwemithetho bese unamathela kuyo ngokungaguquki. Yilokho okwenziwa abaFarisi bosuku lukaJesu. Laba baholi benkolo babewazi uMthetho futhi base benze nesiko eligcinwa ngokucophelela, okwakukholelwa ukuthi lizosiza abantu bagweme ukweqa uMthetho. Ngakho, bashesha ukukhononda lapho abafundi bakaJesu bekha izikhwebu ngeSabatha futhi bedla okusanhlamvu. Futhi babekela uJesu inselele lapho ephulukisa isandla esishwabene sendoda ethile ngeSabatha. (Mathewu 12:1, 2, 9, 10) Zombili lezi zenzo ngokwesiko labaFarisi, zaziwukweqa umyalo wesine.—Eksodusi 20:8-11.

Ngokusobala, abaFarisi babewufundile uMthetho. Kodwa ingabe onembeza babo babevunyelaniswe nezindinganiso zikaNkulunkulu? Lutho neze! Phela, ngemva nje kokugxeka lokho ababecabanga ukuthi kwakuwukweqiwa okushaqisayo komthetho weSabatha, abaFarisi bacebisana ngoJesu “ukuba bambhubhise.” (Mathewu 12:14) Cabanga—laba baholi benkolo ababezibona belungile bathukutheliswa umqondo wokudla izikhwebu ezisanda kukhiwa nokuphulukisa ngeSabatha; kodwa abazange bazizwe bengakhululekile ngokwakha ugobe lokubulala uJesu!

Abapristi abakhulu babonisa ukucabanga okufanayo okusontekile. La madoda onakele awazange azizwe enecala nakancane lapho enika uJuda izinhlamvu zesiliva ezingu-30 azikhiphe endaweni yengcebo yethempeli ukuze akhaphele uJesu. Kodwa lapho uJuda ngokungazelelwe ebuyisa leyo mali, eyiphonsa ethempelini, onembeza babapristi abakhulu babhekana nempicabadala engokomthetho. Bathi: “Akukhona okungokomthetho ukuzikhalakathisela endaweni yomcebo engcwele [lezi zinhlamvu], ngoba ziyinani legazi.” (Mathewu 27:3-6) Ngokusobala, abapristi abakhulu babekhathazwa ukuthi imali kaJuda manje yayingasahlanzekile. (Qhathanisa noDuteronomi 23:18.) Nokho, lona kanye leli qembu lamadoda lalingaboni lutho olubi ngokusebenzisa imali ukuze lithenge ukukhashelwa kweNdodana kaNkulunkulu!

Ukuzivumelanisa Nokucabanga KukaNkulunkulu

Izibonelo ezingenhla zibonisa ukuthi ukuqeqesha unembeza kudinga okungaphezu kokugcwalisa ingqondo ngohlu lokumelwe nokungamelwe kwenziwe. Kuyavunywa, kubalulekile ukwazi imithetho kaNkulunkulu, futhi ukuyilalela kuyadingeka ukuze umuntu asindiswe. (IHubo 19:7-11) Nokho, ngaphezu kokufunda imithetho kaNkulunkulu, kumelwe sihlakulele inhliziyo evunyelaniswe nokucabanga kukaNkulunkulu. Khona-ke singabona ukugcwaliseka kwesiprofetho sikaJehova ngo-Isaya, esithi: “Amehlo akho ayakubabona abafundisi bakho, nezindlebe zakho ziyakuzwa izwi emva kwakho, lithi: Nansi indlela; hambani ngayo, noma niphambuka ngakwesokunene, noma niphambuka ngakwesokhohlo.”—Isaya 30:20, 21; 48:17.

Yiqiniso, lokhu akusho ukuthi lapho sibhekene nesinqumo esinzima, izwi elingokoqobo liyositshela okufanele sikwenze. Nokho, lapho ukucabanga kwethu kuvunyelaniswe nokucabanga kukaNkulunkulu ezindabeni, onembeza bethu bayokuhlomela kangcono ukusisiza ekwenzeni izinqumo eziyomjabulisa.—IzAga 27:11.

Cabangela uJosefa, owayephila phakathi nekhulu le-18 leminyaka B.C.E. Lapho umkaPotifari emnxusa ukuba aphinge naye, uJosefa wenqaba, ethi: “Ngingenza kanjani lobobubi obungaka, ngone kuNkulunkulu, na?” (Genesise 39:9) Ngosuku lukaJosefa, kwakungekho mthetho olotshiwe ovela kuNkulunkulu olahla ukuphinga. Ngaphezu kwalokho, uJosefa wayehlala eGibithe, kude nesiyalo sasekhaya noma imithetho yezinzalamizi. Khona-ke, yini eyenza uJosefa wamelana naleso silingo? Kalula nje, kwakuwunembeza wakhe oqeqeshiwe. UJosefa wamukela umbono kaNkulunkulu wokuthi indoda nomfazi kwakumelwe babe “nyamanye.” (Genesise 2:24) Ngakho-ke wabona ukuthi kwakungaba okungalungile ukuthatha umfazi wenye indoda. Ukucabanga kukaJosefa kwakuvunyelaniswe nokucabanga kukaNkulunkulu kuleyo ndaba. Ukuphinga kwakungavumelani nomuzwa wakhe wokuziphatha okulungile.

Namuhla, bambalwa abantu abanjengoJosefa. Ukuziphatha okubi ngokobulili kudlangile, futhi abaningi abazizwa bebophekile kuMdali, kubo ngokwabo noma ngisho kubangane babo bomshado, ukuhlala behlanzekile ngokokuziphatha. Lesi simo sifana kakhulu naleso esichazwe encwadini kaJeremiya: “Akakho ozisola ngobubi bakhe, ethi: Ngenzeni na? Bonke baphendukela emisebenzini yabo njengamahashi aphulukundlela empini.” (Jeremiya 8:6) Ngakho, kunesidingo esikhulu kunanini ngaphambili sokuba sizivumelanise nokucabanga kukaNkulunkulu. Sinelungiselelo elihle kakhulu lokusisiza ukuba senze kanjalo.

Usizo Lokuqeqesha Unembeza

ImiBhalo ephefumulelwe “inenzuzo yokufundisa, yokusola, yokuqondisa izinto, yokuyala ekulungeni, ukuze umuntu kaNkulunkulu afaneleke ngokugcwele, ayihlomele ngokuphelele yonke imisebenzi emihle.” (2 Thimothewu 3:16, 17) Ukutadisha iBhayibheli kuyosisiza ukuba siqeqeshe lokho iBhayibheli elikubiza ngokuthi ‘amandla okuqonda,’ ukuze sihlukanise phakathi kokulungile nokungalungile. (Heberu 5:14) Kuyosenza sithande izinto ezithandwa uNkulunkulu futhi senyanye izinto azizondayo.—IHubo 97:10; 139:21.

Khona-ke, umgomo wokutadisha iBhayibheli uwukuthola umqondo nokubaluleka kweqiniso kunolwazi nje oluningiliziwe. Kumagazini ka-September 1, 1976, INqabayokulinda yathi: “Ekufundeni kwethu imiBhalo kufanele sizame ukuqonda ubulungisa, uthando nokulunga kukaNkulunkulu futhi sikufake lokho ngokujulile ezinhliziyweni zethu ukuze kukwazi ukuba ingxenye yethu njengoba kunjalo ngokudla nokuphefumula. Kufanele siphaphamele ngokugcwele ngokwengeziwe umuzwa wokuba nomthwalo wemfanelo wokuziphatha ngokuhlakulela ukuqaphela okujulile okulungile nokungalungile. Ngaphezu kwalokhu, kufanele senze onembeza bethu babe nomuzwa onamandla ngomthwalo wabo wemfanelo ngakuMniki-Mthetho noMahluleli ophelele. (Isaya 33:22) Ngakho-ke lapho sifunda izinto ngoNkulunkulu, kufanele sizame ukumlingisa kuzo zonke izici zokuphila.”

Ukuzuza “Umqondo KaKristu”

Ukutadisha iBhayibheli kuzosisiza futhi ukuba sizuze “umqondo kaKristu,” isimo sengqondo sokulalela nokuzithoba esaboniswa uJesu. (1 Korinte 2:16) Wayekujabulela ukwenza intando kaYise, kungeyona nje inqubo okufanele ilandelwe ngokuzenzakalelayo, ngaphandle kokucabanga. Isimo sakhe sengqondo sachazwa ngokwesiprofetho umhubi uDavide, owabhala: “Ngiyathanda ukwenza intando yakho, Nkulunkulu wami, nomthetho wakho usenhliziyweni yami.”a—IHubo 40:8.

Kubalulekile ukuzuza “umqondo kaKristu” ekuqeqesheni unembeza. Lapho esemhlabeni njengomuntu ophelele, uJesu wabonisa izimfanelo nobuntu bukaYise ngezinga eligcwele ngangokunokwenzeka ekulinganiselweni kobuntu. Ngakho, wayengathi: “Lowo ongibonile mina umbonile noBaba futhi.” (Johane 14:9) Kuzo zonke izimo abhekana nazo emhlabeni, uJesu wenza kona kanye lokho uYise ayefuna akwenze. Ngakho-ke, lapho sifunda ngokuphila kukaJesu, siba nombono ocacile wokuthi uJehova uNkulunkulu unjani.

Sifunda ukuthi uJehova ‘ugcwele isihe, unomusa, uphuza ukuthukuthela, futhi uvamé ubumnene.’ (Eksodusi 34:6) Ngokuphindaphindiwe, uJesu wabonisa lezi zimfanelo ekusebenzelaneni nabaphostoli bakhe. Lapho bephikisana ngokuphindaphindiwe ngokuthi ubani omkhulu kubo, uJesu wabafundisa ngesineke ngamazwi nangesibonelo ukuthi “noma ubani ofuna ukuba mkhulu phakathi kwenu kumelwe abe isikhonzi senu, futhi noma ubani ofuna ukuba owokuqala phakathi kwenu kumelwe abe isigqila senu.” (Mathewu 20:26, 27) Lesi kumane kuyisibonelo esisodwa nje sokubonisa ukuthi singazivumelanisa nokucabanga kukaNkulunkulu ngokucabangela ukuphila kukaJesu.

Lapho sifunda ngokwengeziwe ngoJesu, siyoba abakuhlomele kangcono ukulingisa uBaba wethu osezulwini, uJehova. (Efesu 5:1, 2) Unembeza ovunyelaniswe nokucabanga kukaNkulunkulu uyosiqondisa endleleni efanele. UJehova uthembisa labo abathembela kuye: “Ngizakukufundisa, ngikubonise indlela ozakuhamba ngayo; ngizakukululeka ngeso lami.”—IHubo 32:8.

Ukuzuza Kunembeza Oqeqeshiwe

Njengoba ayazi ukuthi abantu abangaphelele bathambekele kokubi, uMose waxwayisa ama-Israyeli: “Bekani inhliziyo yenu kuwo onke amazwi engiwafakazela kini namuhla, eniyakuyala ngawo abantwana benu ukuba baqaphele ukuwenza amazwi onke alomthetho.” (Duteronomi 32:46) Nathi kumelwe silobe umthetho kaNkulunkulu ezinhliziyweni zethu. Uma senza kanjalo, onembeza bethu cishe bayoqondisa izinyathelo zethu futhi basisize ukuba senze izinqumo ezifanele.

Yiqiniso, kumelwe siqaphele. Isaga seBhayibheli sithi: “Kukhona indlela ebonakala sengathi ilungile kumuntu, kepha ukuphela kwayo kuyindlela yokufa.” (IzAga 14:12) Kungani kunjalo ngokuvamile? Kungoba, njengoba iBhayibheli likubeka: “Inhliziyo iyakhohlisa ngaphezu kwakho konke futhi imbi; ngubani ongayazi na?” (Jeremiya 17:9) Ngakho-ke, kunesidingo sokuba sonke silandele isiyalo sezAga 3:5, 6: “Themba kuJehova ngayo yonke inhliziyo yakho, ungenciki kokwakho ukuqonda. Mazise yena ezindleleni zakho zonke, uyakuqondisa imikhondo yakho.”

[Umbhalo waphansi]

[Izithombe ekhasini 7]

Njengekhampasi, unembeza oqeqeshwe iBhayibheli ungasiqondisa endleleni efanele

[Umthombo]

Compass: Courtesy, Peabody Essex Museum, Salem, Mass.