Woza EMhlanganweni Wesigodi “Wokholo EZwini LikaNkulunkulu”!
IZIGIDI eziningi ziyobe zikhona ezindaweni ezingamakhulu ngamakhulu emhlabeni wonke. ENingizimu Afrika lemihlangano ihlelelwe inyanga ka-December. Cishe omunye walemibuthano yezinsuku ezintathu—uLwesihlanu kuze kube iSonto—uyokuba sedolobheni eliseduze nakini.
Uyozuza enaleni yemfundo ewusizo yeBhayibheli. Ezindaweni eziningi isimiso siyoqala ngomculo ekuseni ngo-9:30. NgoLwesihlanu ekuseni, kuyoxoxwa imizuzu engu-25 nabantu abakuphila kwabo kuye kwathintwa ngokujulile ukholo lwabo eZwini likaNkulunkulu. Lengxenye yesimiso yokuqala iyophetha ngenkulumo eyisihluthulelo, ethi, “Ukuhamba Ngokholo, Hhayi Ngokubona.”
Inkulumo yokuqala ngoLwesihlanu ntambama iyocabangela ingxenye ebalulekile intsha enayo ebandleni lobuKristu. Inkulumo ewuchungechunge lwezingxenye ezintathu eyolandela ikhuluma ngezindinganiso zeBhayibheli eziphathelene nokuziphatha kwamaKristu ngokuqondene nokukhuluma, inhlonipho nokubukeka komuntu siqu. Ngemva kwalokho inkulumo ethi “Qaphela Ukuntula Ukholo” nethi “IZwi LikaNkulunkulu Liyaphila,” ziyogxila esixwayisweni esihle esikumaHeberu isahluko 3 no-4. Isimiso sangoLwesihlanu siyophetha ngenkulumo ethi “Incwadi Yabantu Bonke.”
Inkulumo yokuqala ngoMgqibelo ekuseni ithi “Ukholo Ngaphandle Kwemisebenzi Lufile.” Enye inkulumo ebalulekile ngalolo suku ekuseni ithi, “Yibani Abagxilile Nabaqinile Eqinisweni,” ichaza indlela ukukhula ngokomoya okungafinyelelwa ngayo. Lengxenye yesimiso iyophetha ngesici esivamile somhlangano, ngenkulumo ethi, “Ukholo EZwini LikaNkulunkulu Luholela Obhapathizweni,” ngemva kwalokho kuyoba nelungiselelo lokubhapathizwa kwabafundi abasha.
Inkulumo yokuvula ngoMgqibelo ntambama, ethi “Lulwele Kanzima Ukholo,” ikhuluma ngesiluleko sencwadi yeBhayibheli kaJude. Inkulumo ewuchungechunge ethatha ihora enesihloko esithi “Masiye Endlini KaJehova,” iyocabangela izinzuzo zemihlangano yobuKristu. Isimiso ngalolo suku siyophetha ngenkulumo ethi, “Isimo Sokholo Lwakho—Siyavivinywa Njengamanje.”
Isimiso sangeSonto ekuseni sinenkulumo ewuchungechunge enezingxenye ezintathu ekhuluma ngencwadi yeBhayibheli kaJoweli, kuhlanganise nokusebenza kwayo osukwini lwethu. Kuyobe sekulandela idrama yeBhayibheli enesihloko esithi “Gcina Iso Lakho Lilihle.” Isici esivelele somhlangano inkulumo yeningi yantambama, ethi “Ukholo Nekusasa Lakho.”
Impela uyocetshiswa ngokomoya ngokuba khona. Uyokwamukelwa ngenjabulo kuzo zonke izingxenye zesimiso. Hlela manje ukuba ube khona. Ukuze uthole indawo yomhlangano eseduze nakini, thintana neHholo LoMbuso LoFakazi BakaJehova elingakini noma ubhalele abashicileli balomagazini.