U-Enoke—Wayenesibindi Naphezu Kobunzima

NGENDODA elungile, kwakuyisikhathi esibi kunazo zonke. Ukungamhloniphi uNkulunkulu kwakugubuzele umhlaba. Kwakunokwehla okuqhubekayo esimweni sokuziphatha kwesintu. Eqinisweni, kwase kuzothiwa: “UJehova wabona ukuthi ububi bomuntu bukhulu emhlabeni nokuthi zonke izizindlo zemicabango yenhliziyo yakhe zimbi njalo.”—Genesise 6:5.

U-Enoke, umuntu wesi-7 ohlwini lozalo olusuka ku-Adamu, wayenesibindi sokuba ohlukile. Wakumelela ngokuqinile ukulunga kungakhathaliseki ukuthi imiphumela iyini. Isigijimi sika-Enoke sasizikhathaza izoni ezingamhloniphi uNkulunkulu kangangokuthi wayesezulelwa amanqe, futhi uJehova kuphela owayengamsiza.—Jude 14, 15.

U-Enoke Nempikiswano Yendawo Yonke

Esikhathini eside ngaphambi kokuzalwa kuka-Enoke, kwaphakama impikiswano yobukhosi bendawo yonke. Ingabe uNkulunkulu wayenelungelo lokubusa? Empeleni, uSathane uDeveli wathi akunjalo. Wagomela ngokuthi izidalwa ezihlakaniphile zaziyophila kangcono uma zazingaqondiswa uNkulunkulu. USathane wazama ukwakha ubufakazi bokuphikisa uJehova uNkulunkulu ngokuyengela abantu ngasohlangothini lwakhe ngobuqili. U-Adamu, umkakhe u-Eva, nezibulo labo, uKayini, banedumela elibi lokuthatha uhlangothi lukaSathane ngokukhetha ukuzibusa kunokubuswa uNkulunkulu. Umbhangqwana wokuqala ongabantu wenza lokhu ngokudla isithelo uNkulunkulu ayesenqabele, futhi uKayini wenza kanjalo ngokubulala ngenhloso umfowabo olungile, u-Abela.—Genesise 3:4-6; 4:8.

U-Abela wayemé ngasohlangothini lukaJehova ngesibindi. Njengoba ubuqotho buka-Abela babukhuthaze ukukhulekela okuhlanzekile, akungabazeki ukuthi uSathane wakujabulela ukubona uKayini embulala ngentukuthelo. Kusukela ngaleso sikhathi kuqhubeke, uSathane uye wasebenzisa ‘ukwesaba ukufa’ njengesikhali sokwesabisa. Ufuna ukufaka uvalo enhliziyweni yanoma ubani othambekele ekukhulekeleni uNkulunkulu weqiniso.—Heberu 2:14, 15; Johane 8:44; 1 Johane 3:12.

Ngesikhathi sokuzalwa kuka-Enoke, cishe umbono kaSathane wokuthi abantu babengeke babusekele ubukhosi bukaJehova wawubonakala usekelwa kahle. U-Abela wayesefile, futhi isibonelo sakhe sokukholeka sasingalandelwa. Nokho, u-Enoke wazibonakalisa ehlukile. Wayenesisekelo esiqinile sokholo, ngoba wayejwayelene kahle nalokho okwenzeka ensimini yase-Edene.a Yeka ukuthi kumelwe ukuba wayesazisa kanjani isiprofetho sikaJehova esibonisa ukuthi iNzalo ethenjisiwe yayiyoqeda uSathane namacebo akhe!—Genesise 3:15.

Njengoba leli themba lalilokhu liphambi kwakhe, u-Enoke akazange ethuswe umlando wokubulawa kuka-Abela okwakushoshozelwe uDeveli. Kunalokho, waqhubeka ehamba noJehova, ephishekela inkambo yokulunga kukho konke ukuphila kwakhe. U-Enoke wazigcina ehlukile ezweni, egwema umoya walo wokuzibusa.—Genesise 5:23, 24.

Ngaphezu kwalokho, u-Enoke wakhuluma ngesibindi futhi wakwenza kwacaca ukuthi imisebenzi emibi kaDeveli yayingeke iphumelele. Eshukunyiswa umoya ongcwele kaNkulunkulu, noma amandla asebenzayo, u-Enoke waprofetha ngokuqondene nababi: “Bheka! UJehova wafika namashumi akhe ezinkulungwane angcwele, ukuzokhipha isahlulelo kubo bonke, nokubalahla ngecala bonke abangamhloniphi uNkulunkulu ngokuphathelene nazo zonke izenzo zabo zokungamhloniphi uNkulunkulu abazenza ngendlela yokungamhloniphi uNkulunkulu, nangokuphathelene nazo zonke izinto ezishaqisayo izoni ezingamhloniphi uNkulunkulu ezazikhuluma ngaye.”—Jude 14, 15.

Ngenxa yezimemezelo zika-Enoke ayezenza ngesibindi, umphostoli uPawulu, lapho ebhalela amaKristu angamaHeberu, wamfaka ohlwini ‘lwefu elikhulu lofakazi’ elabeka isibonelo esivelele sokholo olunemisebenzi.b (Heberu 11:5; 12:1) Njengendoda yokholo, u-Enoke waphikelela enkambweni yobuqotho iminyaka engaphezu kuka-300. (Genesise 5:22) Yeka ukuthi kumelwe ukuba ukukholeka kuka-Enoke kwazicasula kanjani izitha zikaNkulunkulu ezisezulwini nezisemhlabeni! Isiprofetho sika-Enoke esintinyelayo savusa inzondo kaSathane, kodwa saletha isivikelo sikaJehova.

UNkulunkulu Wamthatha U-Enoke—Kanjani?

UJehova akazange avumele ukuba uSathane noma izinceku zakhe zasemhlabeni zimbulale u-Enoke. Kunalokho, umbhalo ophefumulelwe uthi: “UNkulunkulu wamthabatha.” (Genesise 5:24) Umphostoli uPawulu uyichaza ngalendlela lendaba: “Ngokholo u-Enoke wadluliswa ukuze angakuboni ukufa, futhi akatholakalanga ndawo ngoba uNkulunkulu wayemdlulisile; ngoba ngaphambi kokudluliswa kwakhe wafakazelwa ukuthi wayemjabulise kahle uNkulunkulu.”—Heberu 11:5.

U-Enoke ‘wadluliswa kanjani ukuze angakuboni ukufa’? Noma, ngokwendlela okuhunyushwe ngayo enguqulweni kaR. A. Knox, u-Enoke ‘wathathwa kanjani ngaphandle kokubhekana nokufa’? UNkulunkulu waqeda ukuphila kuka-Enoke ngokuthula, emphephisa eminjunjwini yokufa ngokugula noma ngobudlova ezandleni zezitha zakhe. Yebo, uJehova wanqamula ukuphila kuka-Enoke eneminyaka engu-365—esemncane uma kuqhathaniswa nabantu ababephila ngesikhathi sakhe.

U-Enoke ‘wafakazelwa kanjani ukuthi wayemjabulise kahle uNkulunkulu’? Wayenabuphi ubufakazi? Kungenzeka ukuthi uNkulunkulu wenza ukuba u-Enoke amukelwe ingqondo, njengoba nje nomphostoli uPawulu “athathwa,” noma adluliswa, ngokusobala emukela umbono wepharadesi elingokomoya lesikhathi esizayo lebandla lamaKristu. (2 Korinte 12:3, 4) Ubufakazi bokuthi u-Enoke wayemjabulisa uNkulunkulu kungenzeka ukuthi babuhlanganisa umbono wePharadesi lasemhlabeni lesikhathi esizayo lapho bonke abayobe bephila beyosekela khona ubukhosi bukaNkulunkulu. Mhlawumbe kwakungesikhathi u-Enoke ebona lowo mbono ovusa amadlingozi lapho uNkulunkulu amthatha khona ngokufa okungenazinhlungu ukuze alale kuze kube usuku lokuvuswa kwakhe. Kubonakala sengathi, njengakuMose, uJehova wasingcwaba isidumbu sika-Enoke, ngoba “katholakalanga ndawo.”—Heberu 11:5; Duteronomi 34:5, 6; Jude 9.

Ukugcwaliseka Kwesiprofetho

Namuhla, OFakazi BakaJehova bamemezela lokho okuqukethwe isiprofetho sika-Enoke. Ngokusekelwe emiBhalweni, babonisa indlela esiyogcwaliseka ngayo lapho uNkulunkulu ebhubhisa abantu abangamhloniphi esikhathini esizayo esiseduze. (2 Thesalonika 1:6-10) Isigijimi sabo sibenza bangathandwa, ngoba sihluke kakhulu emibonweni nasemigomweni yalelizwe. Ukuphikiswa ababhekana nakho akubamangazi, ngoba uJesu waxwayisa abalandeli bakhe: “Niyoba izinto zokuzondwa abantu bonke ngenxa yegama lami.”—Mathewu 10:22; Johane 17:14.

Nokho, njengo-Enoke, amaKristu osuku lwanamuhla aqinisekiswa ngokuthi ekugcineni ayokhululwa ezitheni zawo. Umphostoli uPetru wabhala: “UJehova uyayazi indlela yokukhulula ekulingweni abantu abanokuzinikela kokuhlonipha uNkulunkulu, kodwa agcinele abantu abangalungile usuku lokwahlulelwa ukuze banqunywe.” (2 Petru 2:9) UNkulunkulu angase akubone kufaneleka ukuba asuse inkinga noma isimo esithile esivivinyayo. Lungase luphele ushushiso. Nokho, uma kungenjalo, uyakwazi ‘ukwenza indlela yokuphuma’ ukuze abantu bakhe bakwazi ukukhuthazelela uvivinyo lwabo ngokuphumelelayo. UJehova uze anikeze “amandla angaphezu kwavamile” lapho kudingekile.—1 Korinte 10:13; 2 Korinte 4:7.

‘Njengomvuzi walabo abamfuna ngobuqotho,’ uJehova uyobusisa izinceku zakhe ezikholekile nangokuphila okumi phakade. (Heberu 11:6) Ngeningi lazo, lokhu kuyoba ukuphila okungunaphakade epharadesi elisemhlabeni. Khona-ke, njengo-Enoke, kwangathi singamemezela isigijimi sikaNkulunkulu ngesibindi. Ngokholo, masenze lokhu naphezu kobunzima.

[Imibhalo yaphansi]

[Ibhokisi ekhasini 30]

Ukungcoliswa Kwegama LikaNkulunkulu

Cishe emakhulwini amane eminyaka ngaphambi kuka-Enoke, kwazalwa umzukulu ka-Adamu u-Enoshe. UGenesise 4:26 uthi: “Ngalesosikhathi abantu baqala ukukhuleka egameni likaJehova.” Izazi ezithile zolimi lwesiHeberu zikholelwa ukuthi leli vesi kufanele lithi “baqala” ukubiza igama likaNkulunkulu “ngendlela engcolile” noma, “khona-ke ukungcolisa kwaqala.” Ngokuphathelene naleso sikhathi emlandweni, i-Jerusalem Targum ithi: “Leso kwakuyisizukulwane abaqala ngezinsuku zaso ukona, nokuzenzela izithombe, nokunika izithombe zabo izibongo zegama leZwi leNkosi.”

Ngesikhathi sika-Enoshe, ukusetshenziswa kabi kwegama likaJehova kwakusakazeke kabanzi. Kungenzeka ukuthi abantu babesebenzisa igama laphezulu kubo ngokwabo noma kubantu abathile ababenza sengathi bakhulekela uJehova uNkulunkulu ngabo. Noma kungenzeka ukuthi babesebenzisa igama laphezulu ezithombeni. Kungakhathaliseki ukuthi ikuphi, uSathane uDeveli wayeluthandele ngokuqinile uhlanga lwesintu ogibeni lokukhonza izithombe. Ngesikhathi sokuzalwa kuka-Enoke, ukukhulekela kweqiniso kwakuyivela kancane. Noma ubani onjengo-Enoke, owayephila ngeqiniso futhi eshumayela ngalo, wayengathandwa futhi ngenxa yalokho eyisisulu soshushiso.—Qhathanisa noMathewu 5:11, 12.

[Ibhokisi ekhasini 31]

Ingabe U-Enoke Waya Ezulwini?

“Ngokholo u-Enoke wadluliswa ukuze angakuboni ukufa.” Lapho zihumusha lengxenye yamaHeberu 11:5, ezinye izinguqulo zeBhayibheli zibonisa ukuthi u-Enoke akazange afe ngempela. Ngokwesibonelo, i-New Translation of the Bible, ka-James Moffatt, ithi: “Ngokholo u-Enoke wayiswa ezulwini ukuze angafi nanini.”

Nokho, eminyakeni engaba ngu-3 000 ngemva kwesikhathi sika-Enoke, uJesu Kristu wathi: “Akekho umuntu oye wanyukela ezulwini ngaphandle kwalowo owehla evela ezulwini, iNdodana yomuntu.” (Johane 3:13) I-New English Bible ifundeka kanje: “Akukho noyedwa owake wakhuphukela ezulwini ngaphandle kwalowo owehla evela ezulwini, iNdodana yoMuntu.” Lapho uJesu esho lawo mazwi, ngisho naye wayengakanyukeli ezulwini.—Qhathanisa noLuka 7:28.

Umphostoli uPawulu wathi u-Enoke nabanye abakha ifu elikhulu lofakazi bangaphambi kwesikhathi sobuKristu ‘bonke bafa’ futhi ‘abakutholanga ukugcwaliswa kwesithembiso.’ (Heberu 11:13, 39) Ngani? Ngoba bonke abantu, kuhlanganise no-Enoke, baye bazuza isono njengefa ku-Adamu. (IHubo 51:5; Roma 5:12) Ukuphela kwendlela yokusindiswa ingomhlatshelo wesihlengo kaKristu Jesu. (IzEnzo 4:12; 1 Johane 2:1, 2) Osukwini luka-Enoke leso sihlengo sasingakakhokhwa. Ngakho-ke, u-Enoke akazange aye ezulwini, kodwa ulele ekufeni ulindele uvuko lwasemhlabeni.—Johane 5:28, 29.

[Umthombo Wesithombe ekhasini 29]

Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s