‘Kumelwe Nibe Ngcwele Ngoba Mina Ngingcwele’
“Niyakuba-ngcwele, ngokuba mina-Jehova uNkulunkulu wenu ngingcwele.”—LEVITIKUSI 19:2.
1. Yibaphi abanye abantu izwe elibabheka njengabangcwele?
ININGI lezinkolo ezinkulu zezwe linalabo elibabheka njengabangcwele. UMother Teresa wodumo eNdiya ngokuvamile ubhekwa njengongcwele ngenxa yokuzidela kwakhe ngabampofu. Upapa ubizwa ngokuthi “UBaba Ongcwele.” Umsunguli wenhlangano yesimanje yamaKatolika i-Opus Dei, uJosé María Escrivá, ubhekwa amanye amaKatolika “njengesibonelo sobungcwele.” UbuHindu bunama-swami abo, noma amadoda angcwele. UGandhi wayehlonishwa njengendoda engcwele. UbuBuddha bunezindela zabo ezingcwele, iNkolo YamaSulumane inabaprofethi bayo abangcwele. Kodwa kusho ukuthini ngempela ukuba ngcwele?
2, 3. (a) Asho ukuthini amagama athi “ngcwele” nelithi “ubungcwele”? (b) Yimiphi eminye imibuzo edinga ukuphendulwa?
2 Igama elithi “ngcwele” liye lachazwa ngokuthi “1. . . . okuhlobene namandla aphezulu; okungcwele. 2. Okubhekwa njengokufanele noma okufanelwe ukukhulekelwa noma inhlonipho . . . 3. Ukuphila ngokuvumelana nesimiso esingokwenkolo noma esingokomoya esiqinile noma esinezimiso eziphakeme zokuziphatha . . . 4. Ukubekelwa noma ukuhlukaniselwa injongo engokwenkolo.” Emongweni weBhayibheli, ubungcwele busho “ukuhlanzeka okungokwenkolo noma ubumsulwa; ubungcwele.” Ngokwencwadi yeBhayibheli okubhekiselwa kuyo i-Insight on the Scriptures, “[igama] lesiHeberu sokuqala elithi qoʹdhesh lidlulisela umqondo wokuhlukaniswa, ukukhetheka, noma ukungcweliselwa uNkulunkulu, . . . isimo sokuhlukaniselwa inkonzo kaNkulunkulu.”a
3 Isizwe sakwa-Israyeli sayalwa ukuba sibe ngcwele. UMthetho kaNkulunkulu wawuthi: “NginguJehova uNkulunkulu wenu; ngalokho zingcweliseni, nibe-ngcwele, ngokuba mina ngingcwele.” Ubani owayenguMthombo wobungcwele? Ama-Israyeli angaphelele ayengaba kanjani angcwele? Futhi yiziphi izifundo esingazithola ekufuneni kukaJehova ubungcwele?—Levitikusi 11:44.
Indlela U-Israyeli Ayehlobene Ngayo NoMthombo Wobungcwele
4. Ubungcwele bukaJehova baboniswa kanjani kwa-Israyeli?
4 Konke okwakuhlobene nokukhulekela kuka-Israyeli uJehova uNkulunkulu kwakumelwe kubhekwe njengokungcwele futhi kuphathwe kanjalo. Kungani kwakunjalo? Ngoba uJehova ngokwakhe ungumsunguli nomthombo wobungcwele. Ukulandisa kukaMose ngokulungiselelwa kwetabernakele elingcwele nemvunulo nezinto zokuhlobisa kuphetha ngalamazwi: “Benza ungcwecwe womqhele ongcwele ngegolide elicwengekileyo, babhala kuye umbhalo njengokuqoshwa kwendandatho wokuthi: Wahlukaniselwe uNkulunkulu [“Ubungcwele ngobukaJehova,” NW].” Longcwecwe ocwebezelayo wegolide elicwengekileyo wawubekwa esigqokweni sompristi ophakeme, futhi wawubonisa ukuthi wayehlukaniselwe inkonzo engcwele ngokukhethekile. Lapho ebona lolu phawu olubhaliwe lukhazimula elangeni, ama-Israyeli ayekhunjuzwa njalo ngobungcwele bukaJehova.—Eksodusi 28:36; 29:6; 39:30.
5. Ama-Israyeli angaphelele ayengabhekwa kanjani njengangcwele?
5 Kodwa ama-Israyeli ayengaba ngcwele kanjani? Kuphela ngobuhlobo bawo obuseduze noJehova nangokumkhulekela kwawo okumsulwa. Ayedinga ulwazi olunembile ‘loNgcwele’ ukuze amkhulekele ngobungcwele, ehlanzekile emzimbeni nasemoyeni. (IzAga 2:1-6; 9:10) Ngakho-ke, ama-Israyeli kwakumelwe akhulekele uNkulunkulu ngesisusa esimsulwa nangenhliziyo emsulwa. Noma yiluphi uhlobo lokukhulekela olunobuzenzisi lwaluyoba olucasulayo kuJehova.—IzAga 21:27.
Okwenza UJehova Alahle U-Israyeli
6. AmaJuda osuku lukaMalaki aliphatha kanjani itafula likaJehova?
6 Lokhu kwaboniswa ngokucacile lapho ama-Israyeli, ngokugcina icala, eletha ethempelini imihlatshelo esezingeni eliphansi, ekhubazekile. Ngomprofethi wakhe uMalaki, uJehova wayilahla iminikelo yawo esezingeni eliphansi: “Angithokozi ngani, usho uJehova-Sebawoti, angiyikwamukela iminikelo ezandleni zenu. . . . Kepha niyalihlambalaza ngokusho kwenu ukuthi: Itafula leNkosi lingcolile lona, nesithelo salo, ukudla kwalo, sidelelekile. Nisho futhi ukuthi: Bheka ukuhlupheka! besenilincimfela, usho uJehova-Sebawoti, niletha okuthathwé ngobudlova, nokuqhugayo, nokugulayo, niletha kanjalo umnikelo; bengiyakwamukela lokhu esandleni senu na? usho uJehova.”—Malaki 1:10, 12, 13.
7. Yiziphi izenzo ezingengcwele ezazenziwa amaJuda ekhulwini lesihlanu B.C.E.?
7 UMalaki wasetshenziswa uNkulunkulu ekulahleni imikhuba yamanga yamaJuda, cishe phakathi nekhulu lesihlanu B.C.E. Abapristi babebeka isibonelo esibi, futhi ukuziphatha kwabo kwakungengcwele neze. Abantu, belandela lokho kuhola, babeyekethisa ezimisweni zabo, behlukanisa nokuhlukanisa namakhosikazi abo, cishe ukuze bathathe amakhosikazi asemasha angamaqaba. UMalaki wabhala: “UJehova wayengufakazi phakathi kwakho nomfazi wobusha bakho omkhohlisile wena,b noma engumngane wakho nomfazi wesivumelwano sakho. . . . Ngalokho qaphelani umoya wenu ukuba ningamkhohlisi umfazi wobusha benu. Ngokuba ngiyazonda ukwahlukana, usho uJehova uNkulunkulu kaIsrayeli.”—Malaki 2:14-16.
8. Abanye ebandleni lobuKristu baye bathonywa kanjani umbono wanamuhla ngesehlukaniso?
8 Ezikhathini zanamuhla, emazweni amaningi lapho isehlukaniso sitholakala kalula khona, izinga lokuhlukanisa liye lakhuphuka. Ngisho nebandla lobuKristu liye lathinteka. Esikhundleni sokufuna usizo lwabadala ukuze banqobe izithiyo futhi bazame ukwenza umshado wabo uphumelele, abanye baye bawuchitha ngokushesha. Ngokuvamile izingane zisala zinobuhlungu obukhulu obungokomzwelo okumelwe zibuzwe.—Mathewu 19:8, 9.
9, 10. Kufanele sikubheke kanjani ukukhulekela kwethu uJehova?
9 Njengoba sibonile ngenhla, ngenxa yesimo esidabukisayo esingokomoya osukwini lukaMalaki, uJehova wakulahla ngokucacile ukukhulekela kukaJuda kokugcina icala, wabonisa ukuthi wayeyokwamukela ukukhulekelwa okumsulwa kuphela. Akufanele yini lokhu kusenze sicabange ngezinga lokukhulekela kwethu uJehova uNkulunkulu, iNkosi enguMbusi wendawo yonke, uMthombo wobungcwele beqiniso? Ingabe ngempela sinikeza uNkulunkulu inkonzo engcwele? Ingabe sizigcina sisesimweni esihlanzekile ngokomoya?
10 Lokhu akusho ukuthi kumelwe sibe abaphelele, okuyinto engenakwenzeka, noma ukuthi kufanele siziqhathanise nabanye. Kodwa kusho ukuthi umKristu ngamunye kufanele anikeze uNkulunkulu ukukhulekela okungcono kakhulu kuleso simo akuso. Lokhu kubhekisela ezingeni lokukhulekela kwethu. Inkonzo yethu engcwele kufanele kube engcono kakhulu esingayenza—inkonzo engcwele. Kufezwa kanjani lokhu?—Luka 16:10; Galathiya 6:3, 4.
Izinhliziyo Ezimsulwa Ziholela Ekukhulekeleni Okumsulwa
11, 12. Ukuziphatha okungengcwele kusukaphi?
11 UJesu wafundisa ngokucacile ukuthi okusenhliziyweni yomuntu kuyobonakala ngalokho akushoyo nakwenzayo. UJesu wathi kubaFarisi ababezibona belungile, kodwa bengengcwele: “Nzalo yezinyoka ezinesihlungu, ningazikhuluma kanjani izinto ezinhle, nibe nibabi? Ngoba umlomo ukhuluma ngokuchichima kwenhliziyo.” Kamuva wabonisa ukuthi izenzo ezimbi zibangelwa imicabango emibi esenhliziyweni, noma kumuntu ongaphakathi. Wathi: “Izinto eziphuma emlonyeni zivela enhliziyweni, lezozinto ziyamngcolisa umuntu. Ngokwesibonelo, enhliziyweni kuphuma imicabango emibi, ukubulala ngokungemthetho, ukuphinga, ubufebe, ukweba, ubufakazi obungamanga, ukuhlambalaza. Yilezizinto ezingcolisa umuntu.”—Mathewu 12:34; 15:18-20.
12 Lokhu kusisiza ukuba siqonde ukuthi akukhona ukuthi izenzo ezingengcwele azizenzekeli nje, noma ukuthi azibi nasisekelo sangaphambili. Ziyimiphumela yemicabango engcolile ebilokhu isenhliziyweni—izifiso ezifihlekile futhi mhlawumbe amaphupho. Kungakho uJesu athi: “Nezwa ukuthi kwathiwa, ‘Akumelwe uphinge.’ Kodwa mina ngithi kini wonke umuntu oqhubeka ebuka owesifazane ukuze amkhanuke usephingile naye kakade enhliziyweni yakhe.” Ngamanye amazwi, ubufebe nokuphinga busuke sebugxilile kakade enhliziyweni ngaphambi kokuba kube khona isenzo. Khona-ke, uma ithola ithuba, imicabango engengcwele iba ukuziphatha okungengcwele. Ubufebe, ukuphinga, ubungqingili, ukweba, ukuhlambalaza, nokuhlubuka kuba eminye yemiphumela ebonakalayo.—Mathewu 5:27, 28; Galathiya 5:19-21.
13. Yiziphi ezinye zezibonelo zendlela imicabango engengcwele engaholela ngayo ezenzweni ezingengcwele?
13 Lokhu kungaboniswa ngezindlela ezihlukahlukene. Kwamanye amazwe, izindawo zokugembula ziqhibuka njengamakhowe, okwandisa amathuba okugembula. Umuntu angase alingeke ukuba aphendukele kulokhu okubonakala kuyikhambi ukuze azame ukuxazulula izinkinga zakhe zemali. Ukucabanga okukhohlisayo kungase kuyengele umzalwane ekubeni alahle noma abukele phansi izimiso zakhe zeBhayibheli.c Kokunye, ukutholakala kalula kwezinto ezivusa inkanuko, kungaba nge-TV, ama-video, ama-computer, noma izincwadi, kungaholela umKristu ekuziphatheni okungengcwele. Uma nje engadebeselela isambatho sakhe esingokomoya sokuzivikela, ngokuphazima kweso, angawela ekuziphatheni okubi. Kodwa ngokuvamile ukuwela esonweni kuqala engqondweni. Yebo, ezimweni ezinjengalezi, kugcwaliseka amazwi kaJakobe: “Yilowo nalowo ulingwa ngokuhehwa nangokuhungwa isifiso sakhe siqu. Khona-ke isifiso, lapho sesivundile, sizala isono.”—Jakobe 1:14, 15; Efesu 6:11-18.
14. Abaningi baye babuya kanjani ekuziphatheni kwabo okungengcwele?
14 Ngokujabulisayo, amaKristu amaningi ona ngenxa yobuthakathaka abonisa ukuphenduka kweqiniso, futhi abadala bayakwazi ukuvuselela abanjalo ngokomoya. Ngisho nabaningi abasuswa ekuhlanganyeleni ngenxa yokungaphenduki, ekugcineni bayasanguluka futhi babuyiselwe ebandleni. Bayaqaphela ukuthi kube lula kanjani ukuba uSathane abathole ngokuvumela imicabango engengcwele ukuba igxile enhliziyweni.—Galathiya 6:1; 2 Thimothewu 2:24-26; 1 Petru 5:8, 9.
Inselele—Ukubhekana Nobuthakathaka Bethu
15. (a) Kungani kumelwe sibhekane nobuthakathaka bethu? (b) Yini engasisiza sivume ubuthakathaka bethu?
15 Kumelwe senze umzamo wokwazi inhliziyo yethu siqu njengoba injalo. Ingabe sizimisele ukubhekana nobuthakathaka bethu, sibuvume, bese silwela ukubunqoba? Ingabe sizimisele ukubuza umngane othembekile ukuthi singathuthukisa kanjani, bese silalela iseluleko? Ukuze sihlale singcwele kumelwe sinqobe ukushiyeka kwethu. Ngani? Ngoba uSathane wazi ubuthakathaka bethu. Uyosebenzisa amaqhinga akhe acashile ukuze asifake esonweni nasekuziphatheni okungengcwele. Ngezenzo zakhe zobuqili, uzama ukusihlukanisa nothando lukaNkulunkulu ukuze singabe sisaba ngcwele futhi sibe usizo ekukhulekelweni kukaJehova.—Jeremiya 17:9; Efesu 6:11; Jakobe 1:19.
16. Iyiphi impi uPawulu ayebhekene nayo?
16 Umphostoli uPawulu wayenezilingo zakhe siqu nokuvivinywa, njengoba akufakazela encwadini yakhe kwabaseRoma: “Ngiyazi ukuthi kimi, okuwukuthi, enyameni yami, akuhlali lutho oluhle; ngoba amandla okufisa akhona kimi, kodwa amandla okwenza okuhle awekho. Ngoba okuhle engikufisayo angikwenzi, kodwa okubi engingakufisi yikho engikwenza umkhuba. . . . Ngiyajabula ngempela ngomthetho kaNkulunkulu ngokomuntu enginguye ngaphakathi, kodwa ngibona emalungwini ami omunye umthetho olwa nomthetho wengqondo yami futhi ongithumbela emthethweni wesono osemalungwini ami.”—Roma 7:18-23.
17. UPawulu wanqoba kanjani ekulweni kwakhe nobuthakathaka?
17 Iphuzu elibalulekile-ke endabeni kaPawulu ukuthi wabuvuma ubuthakathaka bakhe. Nakuba bukhona, wakwazi ukuthi: “Ngiyajabula ngempela ngomthetho kaNkulunkulu ngokomuntu [ongokomoya] enginguye ngaphakathi.” UPawulu wayekuthanda okuhle futhi ekuzonda okubi. Kodwa noma kunjalo kwadingeka azabalaze, okuyimpi sonke esibhekene nayo—ukulwa noSathane, izwe, nenyama. Ngakho, singayinqoba kanjani impi yokuhlala singcwele, sihlukile kulelizwe nasekucabangeni kwalo?—2 Korinte 4:4; Efesu 6:12.
Singahlala Kanjani Singcwele?
18. Singahlala kanjani singcwele?
18 Ubungcwele abufinyelelwa ngokuthatha inkambo elula noma ngokuzitika. Umuntu onjalo ngaso sonke isikhathi ubeka izaba ngokuziphatha kwakhe futhi azame ukubeka icala komunye umuntu. Mhlawumbe kudingeka sifunde ukuthwala icala ngezenzo zethu futhi singabi njengabanye abagomela ngokuthi babedalelwe ukuba benze lokho ngenxa yesizinda somkhaya wakubo noma ngenxa yezakhi zofuzo. Indaba ilele enhliziyweni yomuntu ngamunye. Ingabe uyakuthanda ukulunga? ulangazelela ubungcwele? ufisa isibusiso sikaNkulunkulu? Umhubi wenza isidingo sobungcwele sacaca lapho ethi: “Deda kukho okubi, wenze okuhle; funa ukuthula, ukujonge.” Umphostoli uPawulu wabhala: “Uthando lwenu malungabi nabuzenzisi. Yenyanyani okubi, bambelelani kokuhle.”—IHubo 34:14; 97:10; Roma 12:9.
19, 20. (a) Singayakha kanjani ingqondo yethu? (b) Isifundo somuntu siqu esiphumelelayo sihlanganisani?
19 ‘Singabambelela kokuhle’ uma sibheka izinto ngombono kaJehova nalapho sinomqondo kaKristu. (1 Korinte 2:16) Kwenziwa kanjani lokhu? Ngokutadisha njalo nangokuzindla ngeZwi likaNkulunkulu. Yeka indlela osekukaningi ngayo kunikezwa lesi seluleko! Kodwa ingabe sisithatha ngokungathi sína ngokwanele? Ngokwesibonelo, uyawutadisha ngempela lomagazini, ubheke imibhalo yeBhayibheli, ngaphambi kokuba uze emhlanganweni? Ngokutadisha, asisho ukudwebela imisho embalwa nje esigabeni ngasinye. Isihloko esifundwayo singathiwa halamuzi futhi sidwetshelwe ngemizuzu engaba ngu-15. Ingabe lokho kusho ukuthi sisitadishile isihloko? Eqinisweni, kungase kuthathe ihora noma amabili ukutadisha nokuzuza ngokomoya esihlokweni ngasinye.
20 Mhlawumbe kudingeka sizifundise ukuvala i-TV amahora ambalwa isonto ngalinye futhi sigxile ngempela ebungcweleni bethu bomuntu siqu. Isifundo sethu sasikhathi sonke siyasakha ngokomoya, sishukumisela ingqondo ekwenzeni izinqumo ezifanele—izinqumo eziholela “ezenzweni zokuziphatha ezingcwele.”—2 Petru 3:11; Efesu 4:23; 5:15, 16.
21. Yimuphi umbuzo okusadingeka uphendulwe?
21 Umbuzo osele manje uwukuthi, Yimiphi eminye imikhakha yomsebenzi nokuziphatha thina njengamaKristu esingaba ngcwele kuyo, njengoba noJehova engcwele? Isihloko esilandelayo sizosinika okuthile kokukucabangela.
[Imibhalo yaphansi]
a Lencwadi okubhekiselwa kuyo eyimiqulu emibili ikhishwa i-Watchtower Bible and Tract Society of New York, Inc.
b Ukuze uthole ukukhulunyelwa okuphelele ngalokho okushiwo elithi “ukukhohlisa,” bheka i-Phaphama! ka-February 8, 1994, ikhasi 21, “Hlobo Luni Lokwehlukanisa UNkulunkulu Aluzondayo?”
c Ukuze uthole ukwaziswa okwengeziwe ngokuthi kungani ukugembula kuwukuziphatha okungengcwele, bheka i-Phaphama! ka-August 8, 1994, amakhasi 14-15, ekhishwa i-Watch Tower Bible and Tract Society of Pennsylvania.
Uyakhumbula?
◻ UMthombo wobungcwele wavezwa kanjani kwa-Israyeli?
◻ Kungaziphi izindlela ukukhulekela kwama-Israyeli kwakungengcwele ngosuku lukaMalaki?
◻ Ukuziphatha okungengcwele kuqalaphi?
◻ Ukuze sibe ngcwele, yini okumelwe siyiqaphele?
◻ Singahlala kanjani singcwele?