Uyamsiza Yini Umntanakho Ukuba Akhethe UJehova?

“NGANGINOMUZWA wokuthi ukutadisha iBhayibheli kuyisicefe ngempela futhi kuyisidina. Enhliziyweni yami ngazitshela ukuthi ngeke ngize ngibe omunye woFakazi BakaJehova uma sengikhulile,” kusho enye insizwa. Nakuba kwethenjwa ukuthi iningi labantwana emakhaya amaKristu bayogcina bekhethe ukuba ngasohlangothini lukaJehova, abasha abanjengalensizwa bangadlula esikhathini esinzima bezama ukukhetha uJehova njengoNkulunkulu wabo.

Abazali ngezinye izikhathi bazizwa bengaqiniseki ukuthi bangabaqondisa kanjani abantwana babo ngokuphumelelayo. Bazibuza beziphendula njengomunye ubaba okhathazekile owake wathi: “Uma ngikhuluma iqiniso, kukhona izikhathi lapho ngangibuka ubuso bezingane zami zilele, izihlathi zazo zisenezinyembezi zendumalo, bese ngizibuza ukuthi bekungamelwe yini ngithi ukuthambisa isandla.” Amadodana akhe amabili akhula akhetha ukukhonza uJehova.

Nokho kukhona intsha emshiyayo uJehova iphume esibayeni sobuKristu iye ezweni likaSathane. Ngakho-ke abazali bangaphumelela kanjani ekusizeni abantwana babo ukuba bakhethe uJehova? Ukuze siphendule lowombuzo, ake siqale sithole isizathu sokuba enye intsha imshiye uJehova kanti abazali bayo bafuna kangaka ukuba ihlale naye.

Okwenza Enye Intsha Ishiye UJehova

Esinye sezici ezivame kakhulu siwukuthi enye intsha ayifinyeleli ngempela ekumazini uJehova noma izindlela zakhe. Nakuba ibilokhu iya emihlanganweni yobuKristu kusukela ebuntwaneni, imane nje iyalandela, futhi ayimfunisisi ngempela uJehova. (Isaya 55:6; IzEnzo 17:27) Umfana okukhulunywe ngaye ngenhla wayedineka emihlanganweni yobuKristu ngoba wayengakuqondi okwakushiwo izikhulumi endaweni yesikhulumi.

Imbewu yeqiniso iyatshaleka kwabanye abantwana, kodwa bavumela izinhliziyo zabo ziyengwe indlela yokuphila ebonakala ikhululekile, yokuthanda izinto ezibonakalayo yezwe likaSathane. Abanye bayehluleka ukumelana nesifiso esinamandla kakhulu sokuzihlanganisa nontanga nesokufana nabo.—1 IziKronike 28:9; Luka 8:12-14; 1 Korinte 15:33.

Nokho, emhlabeni wonke, abantwana abaningi emakhaya amaKristu baye bakhetha ukuba ngasohlangothini lukaJehova. Kukhona yini okungafundwa ezinyathelweni eziqondile ezathathwa abazali babo?

Sheshe Uqale

Isihluthulelo esibalulekile ekusizeni abantwana bakho ukuba bakhethe uJehova ukusheshe uqale. Ezimweni eziningi, amathonya nezifundo okutholwa ngesikhathi inhliziyo isathambile futhi isamukela izinto kalula kuyohlala ukuphila konke. (IzAga 22:6) Ngakho sheshe uqale ukutshela abantwana bakho ngobuhle bukaJehova, uthando nokwesabeka kwakhe, uzame ukwakha ezinhliziyweni zabo uthando ngoJehova nokwazisa ngalokho uJehova aye wabenzela khona. Ukuze bafeze lokhu, abazali abaningi baye basebenzisa ngokuphumelelayo insada yezihloko eziphathelene nendalo kaJehova ezitholakala ezincwadini ze-Watchtower Society.

Ukulalela nokuhlonipha uJehova nokukhulekelwa kwakhe kuphakathi kwezimfanelo okumelwe zisheshe zigxiliswe ekuphileni. Emihlanganweni yobuKristu kuyajabulisa ukubona abantwana abasafunda enkulisa bezama ukubhala amaphuzu amafushane futhi bebheka imibhalo emaBhayibhelini abo noma behamba nabazali babo beya endlini yangasese beyogeza ubuso ngamanzi abandayo uma sebozela. Lezi yizinto ezincane, kodwa yeka ukuthi zibaluleke kanjani ekugcizeleleni kulengqondo encane ukuthi uJehova kumelwe aboniswe inhlonipho futhi alalelwe!

Imfundo eqinile engokweBhayibheli nayo kufanele isheshe iqale. Lapho abafanyana bawo ababili sebeneminyaka emibili, omunye umbhangqwana waqala ukufunda nabo incwadi ethi Ukulalela UMfundisi Omkhulu.a Kamuva, lapho labafana sebefunda esikoleni, babesheshe bavuke futhi njalo ekuseni batadishe nonina incwadi ethi INcwadi Yami Yezindaba ZeBhayibheli nethi Ungaphila Phakade EPharadesi Emhlabeni.* Lokhu kwakulandelwa ingxoxo yetekisi losuku elaliqhutshwa uyise ngaphambi kokudla kwasekuseni. Imizamo yalababazali yavuzwa ngokucebile lapho amadodana abo muva nje ekhetha ukukhonza uJehova, ebonakalisa ukuzinikezela kwawo ngobhapathizo lwamanzi eneminyaka engu-10 nengu-11.

Enye insizwa enhle ekhonza ehhovisi legatsha le-Watch Tower Society eJapane ikhumbula ukuthi lapho isencane kakhulu, unina wayisiza ukuba yakhe ubuhlobo noJehova ngokuhlala eduze kwayo ebusuku, ayisize ukuba ithandaze. Ayizange isikhohlwe isifundo eyasifunda lapho—kungakhathaliseki ukuthi iya kuphi noma yenzani, uJehova wayehlala eseduze futhi ekulungele ukuyisiza.

Abazali abaphumelelayo bafunda ukuqaphela ukuthambekela okungalungile okubangelwa ukungapheleli kwabantwana babo okuzuzwe njengefa, bese labobazali beqala ngokushesha ukusiza abantwana babo ukuba bakulungise. (IzAga 22:15) Ukuthambekela ebugovwini, inkani, ukuzazisa, ukugxeka abanye ngokweqile, kumelwe kusheshe kuthathelwe isinyathelo. Uma kungenjalo, ngokuhamba kwesikhathi leyombewu iyokhula ize ifinyelele ezingeni lokuhlubuka kuNkulunkulu nasezindleleni zakhe. Ngokwesibonelo, abazali abanezinhloso ezinhle kodwa abeqisayo ngokuvamile bavumela abantwana babo babe nesimo sengqondo sokuzicabangela. Lababantwana bakuthola kunzima ukuhlonipha abazali babo noma uJehova, babe ‘abangabongiyo’ okukhulunywe ngabo eBhayibhelini. (IzAga 29:21) Ngakolunye uhlangothi, abantwana abanikezwa imisebenzi yasekhaya futhi abafundiswa ukuphaphamela izidingo zabanye bathambekele kakhudlwana ekubeni ngababongayo kokubili kubazali babo nakuJehova.

Okunye okusemqoka ukusheshe uqale ukumisa imigomo engokwasezulwini umntwana angayifinyelela ngokunengqondo. Uma lokhu kungenziwa ngokushesha nangokungaguquguquki, abanye abantu bangase bafake engqondweni nasenhliziyweni yakhe imigomo ehlukile. Ukulifunda lonke iBhayibheli, ukuzifundela izincwadi ze-Watchtower Society, ukubhalisa eSikoleni SeNkonzo EsingokwaseZulwini, ukuba ummemezeli wezindaba ezinhle, nokubhapathizwa kufanele kuhlanganiswe kulemigomo.

UTakafumi ukhumbula ukuthi unina wamfaka emkhubeni wokufunda omagazini INqabayokulinda ne-Phaphama! ngokuhlela imibuzo elula bese emshiyela yona phezu kwetafula lasekhishini ukuze ayithole uma ebuya esikoleni. UYuri ukhumbula ukuthi ukuhlala izinsukwana namaphayonab akhonza lapho indingeko yezikhonzi ezingamaKristu inkulu khona, ukuhamba nawo enkonzweni, ukuwabona epheka ukudla okumnandi, nokubona injabulo nentshiseko yawo kwasithonya kakhulu isifiso sakhe sokuba naye akhonze uJehova ngendlela efanayo. Intsha eningi ikhumbula ukuthi abazali bayo babeyiyisa njalo eBethel, njengoba indlunkulu namagatsha e-Watch Tower Society ebizwa kanjalo, lapho yayingabona khona ezinye izinsizwa nezintombi zikhonza uJehova ngenjabulo. Iningi laleyo eyayivakashiswa isengabantwana manje isikhonza emaBethel emhlabeni wonke.

Baphe Isikhathi Sakho Abantwana Bakho

Isilinganiso sesikhathi osichitha nabantwana bakho cishe siyoba nethonya eliqondile ekutheni bakhetha ukumkhonza yini uJehova noma cha. Bayashesha ukubona ukuthi singakanani isikhathi nokulungiselela okwenzayo esifundweni seBhayibheli obaqhubela sona. Uma ungasakhumbuli ukuthi nanigcinephi esifundweni esidlule noma singabibikho isifundo ngezizathu ezingazwakali, udlulisela umyalezo wokuthi lesosifundo asibalulekile kangako. Nokho, uma bebona ukuthi abazali bayazidela ngenxa yalesosifundo, basilungiselela kahle futhi basiqhube njalo lesosifundo kungakhathaliseki ukuthi kwenzekani, bathola umyalezo ohluke ngokuphelele. Nakuba kungeyona imfuneko, abanye omama bagqoka kahle uma kuzoqhutshwa isifundo sabantwana babo, njengalapho beya emihlanganweni noma beyoqhuba isifundo kwamakhelwane. Umbono onikezwayo owokuthi ukukhulekelwa kukaJehova kubalulekile.

Siningi isikhathi nomzamo okuyodingeka ekwenzeni imfundo yabantabakho engokweBhayibheli ijabulise, ifinyelele izinhliziyo zabo. Abantwana abancane ikakhulu bahlabeka umxhwele uma bebona izinto abafunda ngazo zilingiswa phambi kwabo. Ngokwesibonelo, omunye ubaba wasiza abantwana bakhe ukuba balubone ngeso lengqondo uvuko ngokulingisa ukulandisa kweBhayibheli kovuko lukaLazaru. Wangena ekhabetheni lezingubo wayesephuma esenguLazaru ovusiwe.—Johane 11:17-44.

Njengoba abantwana besondela ebudaleni, kudinga isikhathi nekhono elengeziwe ukusingatha inqwaba yemizwelo, ukungabaza, nokukhathazeka ababhekana nakho. Isikhathi abazali abanothando nabanokuqonda abasibekela eceleni kulelizinga sibaluleke kakhulu ukuze umntwana athuthukise ukuthembela kuJehova. Omunye ubaba ophumelelayo onabantwana abane walandisa ukuthi lapho abantwana bakhe bebhekana nezinkinga ezihlukahlukene, wayehlola nabo ukwaziswa okuhlobene naleyondaba ezincwadini ze-Watchtower futhi axoxe nabo ngakho, nsuku zonke kuze kube yilapho lezozinkinga sezinqotshwe ngokuphelele.

Omunye umama omatasa oyiphayona onabantwana ababili waphawula ukuthi indodakazi yakhe yayisizehlukanisa futhi ingasayijabuleli imisebenzi engokwasezulwini. Ngakho lomama wazimisela ukuba njalo ntambama abe khona ekhaya lapho umntanakhe ebuya esikoleni, axoxe nendodakazi yakhe lapho bephunga inkomishi yetiye. Kulezozingxoxo zokuvulelana izifuba phakathi kukamama nendodakazi, lentombazane yathola usizo eyayiludinga. Manje, njengoba isiphothulile esikoleni, isihlanganyela nonina enkonzweni yobuphayona.—IzAga 20:5.

Abangane Abahle Nesibonelo

Ngaphezu kokunikela ngesikhathi sabo, abazali kufanele bazitholele abangane abahle izingane zabo. IzAga 13:20 zithi: “Ohamba nabahlakaniphileyo uyakuhlakanipha kepha umngane weziwula uyakushoshozelwa yizo.”

Abazali abaningi abaphumelelayo bayakuqaphela ukuba iqiniso kwalesosaga. Omunye ubaba onabantwana abane uthi: “Uma ngibheka emuva, ngicabanga ukuthi abangane babantwana bethu abaningi abaseqinisweni abasiza ekubashukumiseleni ukuba bakhonze uJehova. Ngabakhuthaza ukuba babe nabangane kwamanye amabandla kanye nakwelakithi futhi babulondoloze lobobungane.” Umdala ongumKristu osekhonze eBethel iminyaka eminingi uyakhumbula: “Lapho ngisemncane, sasihlala endlini encane, kodwa yayihlala ikulungele ukuhlalisa umbonisi wesifunda. Ngaphezu kwalokho, amaphayona akhethekile ebandleni lakithi ayedla nathi njalo. Ayegeza ekhaya futhi eba nobungane nathi. Ukuzwa okuhlangenwe nakho kwawo nokubona injabulo yawo kwangisiza ukuba ngihlakulele ukwazisa ngenkonzo yesikhathi esigcwele.”

Ubungane obuhle buyabasiza labo abasebunzimeni. Omunye umama owayenendodana eyayibhekene nesikhathi esinzima waxoxa ngalenkinga nombonisi ojikelezayo woFakazi BakaJehova. Watusa ukuba lomama aphume nendodana yakhe enkonzweni yasensimini. “Uma wenza kanjalo, ingokomoya layo nakho konke okunye kuzothuthuka,” kusho umbonisi wesifunda. Lomama uyabika: “Ebandleni lakithi kwakunelungiselelo lokufakaza kusihlwa, futhi abantwana abaningi abasafunda esikoleni, amaphayona avamile amaningana asemadala, okungenani nomdala oyedwa babehlanganyela kulo. Kwaqale kwaba nzima ukwenza indodana yami iphume njalo, kodwa akuthathanga isikhathi eside ngoba yayisibuya njalo ekhaya ijabule kakhulu futhi ikhuthazekile ngalobubungane obuhle. Lapho isafunda esikoleni esiphakeme, yabhapathizwa futhi yakhonza njengephayona elisizayo nyanga zonke, futhi lapho iphothula esikoleni, yaba iphayona elivamile.” Ubungane obuhle obuhambisana nokwenza intando kaJehova kwaletha imiphumela emihle.

Ingase ingabibikho endaweni yakini intsha engaba yithonya elihle kumntanakho, kodwa amazwi avame ukushiwo njalo intsha eningi eyakhetha ukukhonza uJehova aphathelene nesibonelo sabazali bayo. Intsha eningi yayibabaza abazali bayo futhi ifuna ukubalingisa. UYuri ukhumbula umoya kamama wakhe wokungenisa izihambi nendlela ayebanakekela ngayo abanye, ebashayela ucingo futhi ephekela abagulayo. UTatsuo, ovela emkhayeni onabafana abane, bonke asebekhulile futhi abakhonza uJehova, wathi: “Umama wayengakwazi ukusifundela njalo ngoba ubaba wayengakholwa futhi wayephikiswa kakhulu izihlobo. Kodwa ukubona ukumelela kwakhe iqiniso nenjabulo yakhe ekukhonzeni uJehova kwangithonya kakhulu. Wayezimisele futhi ukuhlala kuze kube sentathakusa esisiza ezinkingeni zethu.” Amazwi okuhlakanipha obuzali anamandla uma esekelwa imisebenzi yokwethembeka. UYoichiro wathi ngabazali bakhe: “Angikhumbuli besho amazwi ayiziswana ngabanye ebandleni; futhi abazange basivumele thina bantwana ukuba sihlebe ngamaphutha abanye.”—Luka 6:40-42.

Injabulo Yokubona Izingane Zikhetha UJehova

Ayikho indlela elula yokusiza abantwana bakho bakhethe uJehova. Ziyoba khona izikhathi eziningi zokukhathazeka. Kodwa ubaba owayekhathazekile okukhulunywe ngaye ekuqaleni wathi: “Njengabazali siye sazama njalo ngokwethembeka ukulandela ukusikisela kwenhlangano kaJehova ebonakalayo. Lokhu kwasisiza kakhulu ekunqobeni izinkinga.” Imizamo yabo yaphumelela.

Yebo, ngokwenza konke okusemandleni akho ekulandeleni iziqondiso zeBhayibheli, unika abantwana bakho izizathu eziqinile zokuthanda uJehova, kanye nesibonelo sakho sokwethembeka nemizamo eqotho yokusiza, nawe ekugcineni uyothola ukuthi imizamo yakho iyaphumelela. Uyamkhumbula yini umfana okukhulunywe ngaye ekuqaleni, owake wanquma ukungabi ngomunye woFakazi BakaJehova? Esikhathini eside ngemva kokuba unina emsize ngokuphumelelayo eminyakeni yakhe enzima, wathi: “Ngiyajabula ngokuthi akazange ayeke!” Nawe kungenzeka ube nemiphumela efanayo ngabantwana bakho.—Galathiya 6:9.

[Imibhalo yaphansi]

[Isithombe ekhasini 30]

Ungabheka yini emuva ekukhuliseni abantwana bakho unezinkumbulo ezijabulisayo?