Imibuzo Evela Kubafundi

Njengoba iBhayibheli ngokuvamile likhuluma ‘ngomfana ongenayise,’ ingabe lokhu kubonisa ukungawakhathaleli amantombazane?

Lutho neze.

I-New World Translation of the Holy Scriptures isebenzisa igama elithi “umfana ongenayise” emavesini amaningi abonisa ukukhathalela kukaNkulunkulu abantwana abangenamzali. UNkulunkulu wenza lokhu kukhathalela kwakhanya emithethweni ayinikeza u-Israyeli.

Ngokwesibonelo, uNkulunkulu wathi: “Aniyikuhlupha-mfelokazi [nomfana ongenayise, NW]. Uma ubahlupha nakanjani, bakhale kimi nakancane, ngiyakuzwa nokuzwa ukukhala kwabo; ulaka lwami luyakuvutha, ngikubulale ngenkemba, omkenu babe-ngabafelokazi, abantwana benu babe [ngabafana abangenayise, NW].” (Eksodusi 22:22-24) “UJehova uNkulunkulu wenu unguNkulunkulu wawonkulunkulu, neNkosi yamakhosi, uNkulunkulu omkhulu onamandla nowesabekayo, ongakhethi-buso bamuntu, nongamukeli-mvuzo. Uyenza ukwahlulela [komfana ongenayise, NW] nokomfelokazi.”—Duterenomi 10:17, 18; 14:29, NW; 24:17, NW; 27:19, NW.

Izinguqulo eziningi zeBhayibheli zisebenzisa elithi “umntwana ongenayise” noma “intandane” kulamavesi, kanjalo zihlanganisa abafana namantombazane. Nokho, izinguqulo ezinjalo azisinaki isici esitholakala egameni lesiHeberu eliyisisekelo elithi (ya·thohmʹ), elisebulilini besilisa. Kunalokho, i-New World Translation of the Holy Scriptures isebenzisa ukuhumusha okunembile okuthi “umfana ongenayise (abafana abangenayise),” njengakumaHubo 68:5, afundeka kanje: “Uyise [wabafana abangenayise, NW], umahluleli wabafelokazi, uNkulunkulu endlini yakhe engcwele.” Ngokusekelwe ekusabeleni okufanayo esiHeberwini esiyisisekelo, ubulili besifazane besenzo esikumaHubo 68:11 butusa ukuba lombhalo uhunyushwe kanje: “Abesifazane ababika indaba ejabulisayo bayisixuku esikhulu.”a

Nakuba igama elithi “umfana ongenayise” liwukuhunyushwa okuyinhloko kwegama elithi ya·thohmʹ, lokhu akufanele kubhekwe njengokusikisela ukungawakhathaleli amantombazane angenamzali. Izindima ezicashuniwe nezinye zibonisa ukuthi abantu bakaNkulunkulu babekhuthazwa ukuba banakekele abesifazane, nabafelokazi. (IHubo 146:9; Isaya 1:17; Jeremiya 22:3; Zakariya 7:9, 10; Malaki 3:5) EMthethweni, uNkulunkulu wahlanganisa nendaba ephathelene nesinqumo sokwahlulela esasiqinisekisa ifa lamadodakazi angenayise kaSelofehadi. Lesosinqumo saba umthetho wokusingatha izimo ezifanayo, kanjalo sisekela amalungelo amantombazane angenayise.—Numeri 27:1-8.

UJesu akazange akhethe ngokusekelwe ebulilini ekuboniseni umusa kubantwana. Kunalokho, sifunda ukuthi: “Baletha kuye abantwanyana ukuba abaphathe; kepha abafundi babakhuza. Kodwa uJesu ekubona wathukuthela, wathi kubo: Vumelani abantwana beze kimi, ningabenqabeli, ngokuba umbuso kaNkulunkulu ungowabanjalo. Ngiqinisile ngithi kini: Yilowo nalowo ongamukeli umbuso kaNkulunkulu njengomntwana kasoze angena kuwo. Wabagona, wababusisa.”—Marku 10:13-16.

Igama lesiGreki lapha elihunyushwe ngokuthi “abantwanyana” alinabo ubulili. Incwadi yesiGreki edumile eyisichazamazwi ithi leligama “lisetshenziswa kubafana nakumantombazane.” UJesu wayebonisa isithakazelo esifanayo nesiboniswa uJehova kubo bonke abantwana, abafana namantombazane. (Heberu 1:3; qhathanisa noDuteronomi 16:14; Marku 5:35, 38-42.) Ngaleyondlela kufanele kuqashelwe ukuthi iseluleko esisemiBhalweni YesiHeberu esiphathelene nokunakekela “abafana abangenayise” siyafana neseluleko esibonisa indlela okufanele sibakhathalele ngayo bonke abantwana abangenamzali noma abangenabazali.

[Umbhalo waphansi]