Lokho UMbuso KaNkulunkulu Ongakusho Kuwe

UJESU KRISTU wafundisa abalandeli bakhe ukuba bathandaze: “Mawufike umbuso wakho.” (Mathewu 6:10) Yeka ukuthi lawomazwi aye aqondiswa kaningi kangakanani kuNkulunkulu yilabo abathi bangabalandeli bakaJesu!

Nokho, uJesu wenza okungaphezu kokufundisa abalandeli bakhe ukuba bathandazele uMbuso kaNkulunkulu. Wenza uMbuso waba isihloko esikhulu somsebenzi wakhe wokushumayela. Eqinisweni, iEncyclopædia Britannica ithi uMbuso kaNkulunkulu “ngokuvamile ubhekwa njengesihloko esiyinhloko sokufundisa kukaJesu.”

Lapho abalandeli bakaKristu bethandazela uMbuso, yini ngempela abayithandazelayo? Yini uMbuso kaNkulunkulu ongayisho kubo nakuwe? Futhi uJesu wawubheka kanjani?

Umbono KaJesu NgoMbuso

Kaningi uJesu wayezibiza ngokuthi “iNdodana yomuntu.” (Mathewu 10:23; 11:19; 16:28; 20:18, 28) Lokhu kusikhumbuza ngokubhekisela komprofethi uDaniyeli ‘endodaneni yomuntu.’ Ngokuqondene nesenzakalo sasezulwini sesikhathi esizayo, uDaniyeli wathi: “Ngabona emibonweni ebusuku; bheka, kwafika namafu ezulu onjengendodana yomuntu; yafika komdala wezinsuku, yasondezwa phambi kwakhe. Yanikwa ukubusa, nobukhosi, nombuso, ukuze bonke abantu, nezizwe, nezilimi bayikhonze.”—Daniyeli 7:13, 14.

Ekhuluma ngesikhathi ayeyokwamukela ngaso lokhu kubusa, uJesu watshela abaphostoli bakhe: “Lapho iNdodana yomuntu isihlezi esihlalweni senkazimulo yayo, nani niyakuhlala ezihlalweni zobukhosi eziyishumi nambili.” UJesu wabuye wathi: “Kepha nxa iNdodana yomuntu iza ngenkazimulo yayo, . . . kuzakubuthelwa phambi kwayo izizwe zonke, ibahlukanise abanye kwabanye, njengomalusi ahlukanisa izimvu nezimbuzi . . . Laba [abangalungile] bayakumuka, baye ekujezisweni okuphakade, kodwa abalungileyo baye ekuphileni okuphakade.”—Mathewu 19:28; 25:31, 32, 46.

Lokhu kubhekisela okungokwesiprofetho ezihlalweni zobukhosi nakuwo wonke amaqembu ezizwe kubonisa ukuthi uMbuso uwuhulumeni lowo uJesu nabanye babalandeli bakhe abayoba ngababusi kuwo phezu kwesintu. Lowohulumeni uyoba namandla okususa abangalungile ngokufa. Nokho, ngaphansi kokubusa koMbuso, labo abathambekele ekulungeni bayokwamukela isipho sikaNkulunkulu sokuphila okuphakade.

Ngakho, ngokusobala uMbuso kaNkulunkulu uwuhulumeni wasezulwini omiswe ngokwaphezulu. UMbuso awulona isonto, futhi imiBhalo ayinikezi sisekelo sombono ongokwezwe ngawo. Ngaphezu kwalokho, uhulumeni uNkulunkulu awunikezayo ngeke umane ube okuthile okusenhliziyweni yomuntu. Njengoba uMbuso kaNkulunkulu uwuhulumeni, awubi okuthile okuba senhliziyweni yethu lapho samukela ubuKristu. Kodwa kungani abanye becabanga ukuthi uMbuso uyisimo esihilela inhliziyo?

Ingabe UMbuso Ungaphakathi Kithi?

Abanye banomuzwa wokuthi uMbuso usezinhliziyweni zethu ngenxa yendlela abahumushi abathile beBhayibheli abaye bahumusha ngayo uLuka 17:21. NgokweNew International Version, uJesu lapho wathi: “Umbuso kaNkulunkulu ungaphakathi kini.”

Mayelana nalokhu i-Interpreter’s Dictionary of the Bible ithi: “Umqondo wokuthi umbuso kaNkulunkulu uyisimo sangaphakathi sengqondo, noma sensindiso yomuntu siqu, uphambene nomongo walelivesi, kanye nako konke ukuvezwa kwalomqondo kuT[estamente] E[lisha].”

Umbhalo waphansi kaLuka 17:21 kuyiNew International Version ubonisa ukuthi amazwi kaJesu angahunyushwa ngokuthi: “Umbuso kaNkulunkulu uphakathi kwenu.” Ezinye izinguqulo zeBhayibheli zifundeka kanje: “Umbuso kaNkulunkulu uphakathi kwenu” noma “unani.” (New English Bible; Jerusalem Bible; Revised Standard Version) NgokweNew World Translation of the Holy Scriptures, uJesu wathi: “Umbuso kaNkulunkulu uphakathi kwenu.” UJesu wayengasho ukuthi uMbuso wawusezinhliziyweni zabaFarisi abaqhoshayo ayekhuluma nabo. Kunalokho, njengoMesiya owayelindelwe isikhathi eside neNkosi Emisiwe, uJesu wayephakathi kwabo. Kodwa kwakuzodlula isikhathi esithile ngaphambi kokuba uMbuso kaNkulunkulu ufike.

Isikhathi Owawuyofika Ngaso

Abathile babalandeli bakaJesu Kristu baye bakhethwa njengababusi abakanye naye eMbusweni wobuMesiya wasezulwini. NjengoJesu, bafa bethembekile kuNkulunkulu futhi bavuselwa ekuphileni komoya ezulwini. (1 Petru 3:18) Bancane ngenani uma kuqhathaniswa, bayoba ngamakhosi nabapristi abangu-144 000 abathengwe phakathi kwesintu. (IsAmbulo 14:1-4; 20:6) Ababusi abakanye noJesu bahlanganisa nabaphostoli bakhe abathembekile.—Luka 12:32.

Ekhuluma nabalandeli bakhe ngesinye isikhathi, uJesu wathembisa: “Bakhona abanye kwabemi lapha abangayikuzwa ngempela ukufa, baze bayibone iNdodana yomuntu iza embusweni wayo.” (Mathewu 16:28) Ngokuthakazelisayo, ivesi elilandelayo libonisa ukuthi isithembiso sikaJesu sagcwaliseka ezinsukwini ezimbalwa nje kamuva. Wabe esethatha abathathu babafundi bakhe wakhuphukela nabo entabeni lapho aphenduka khona esinye isimo phambi kwabo, futhi bambona esenkazimulweni yoMbuso embonweni. (Mathewu 17:1-9) Kodwa uMbuso awuzange umiswe ngalesosikhathi. Kwakuyokwenzeka nini lokho?

Omunye wemifanekiso kaJesu ubonisa ukuthi wayengeke amiswe ngokushesha njengeNkosi yobuMesiya. KuLuka 19:11-15, siyafunda: “Walandisa umfanekiso, ngokuba abeseduze neJerusalema nangokuba bebethi umbuso kaNkulunkulu uzakubonakala masinyane. Wathi-ke: Umuntu othile wohlanga olukhulu waya ezweni elikude eyozithathela umbuso, abuye. Wayesebiza izinceku eziyishumi, wazinika omina abayishumi, wathi kuzo: Hwebani ngabo, ngize ngibuye. . . . Kwathi esebuyile ekuthatheni umbuso, wathi azibizelwe kuye lezozinceku abeziniké imali ukuba azi ukuthi yileyo naleyo izuzeni ngokuhweba.”

Ngalezozinsuku kwakuthatha isikhathi eside ngomuntu ukuba asuke kwaIsrayeli aye eRoma, alinde kulelodolobha kuze kube yilapho esethole amandla ombuso, bese ephindela ezweni lakubo njengenkosi. UJesu wayengumuntu “wohlanga olukhulu.” Wayeyokwamukela amandla njengeNkosi kuYise ezulwini kodwa wayengeke amiswe ngokushesha njengeNkosi yobuMesiya. Abalandeli bakhe babeyohweba ngokuqhubeka nomsebenzi wokumemezela izindaba ezinhle zoMbuso isikhathi esithile ngaphambi kokuba abuye njengeNkosi.

Indlela UMbuso Oza Ngayo

Yini abathanda uNkulunkulu abayicelayo lapho bethandazela ukuba uMbuso wakhe uze? Empeleni bacela ukuba uMbuso wasezulwini uthathe isinyathelo esiwujuqu ngokubhubhisa izimiso zohulumeni ezenziwe abantu eziye zehluleka ukugcwalisa isithembiso sazo sokuletha ukuthula kweqiniso nokuchuma. Ebhekisela kulesenzakalo, umprofethi uDaniyeli wabhala: “Ezinsukwini zalawomakhosi uNkulunkulu wasezulwini uyakumisa umbuso ongasoze wachithwa nobukhosi bawo bungayikushiyelwa kwabanye abantu, kepha uyakuchoboza, uqede yonke lemibuso, wona uqobo ume phakade.” (Daniyeli 2:44) Kwakuyokwenzeka nini lokhu?

UJesu wabikezela ukuthi lokhu kwakuyokwenzeka phakathi nesizukulwane esasiyobona izinguquko ezingavamile ezindabeni zesintu. Ngokuqondene ‘nokuba khona’ kwakhe, uJesu wanikeza “isibonakaliso” esakhiwa izingxenye ezihlukahlukene esihlanganisa izenzakalo ezinjengezimpi ezinkulu, ukuzamazama komhlaba, indlala, ubhici lwezifo—yebo, nokushunyayelwa kwezindaba ezinhle zoMbuso kaNkulunkulu emhlabeni wonke.—Mathewu, izahluko 24, 25; Marku, isahluko 13; Luka, isahluko 21.

Isiprofetho sikaJesu sihilela izenzakalo ezenzeka manje—ekhulwini lethu lama-20 leminyaka. Ngakho, ngeke kube yisikhathi eside ngaphambi kokuba uMbuso kaNkulunkulu ulethe izibusiso ezinhle esintwini. Ungaba phakathi kwalabo abayojabulela izinzuzo zokubusa koMbuso. Kodwa uMbuso kaNkulunkulu uyosho ukuthini ngempela kuwe nabathandekayo bakho?

Izibusiso Zokubusa KoMbuso

Injabulo iyogcwala emhlabeni wonke. Ngaphansi ‘kwezulu elisha’—uMbuso wasezulwini—kuyoba “nomhlaba omusha,” umphakathi womhlaba wonke wezikhonzi zoMbuso ezilalelayo. “Yena uNkulunkulu abe-nabo,” kubhala umphostoli uJohane. “Azesule izinyembezi zonke emehlweni abo.” Ngalesosikhathi kuyoba nenjabulo kuphela, ngoba “ukudabuka, nokukhala, nobuhlungu akusayikuba-khona.”—IsAmbulo 21:1-4.

Ukufa akusayikuba-khona. Lembangela embi yosizi ngeke iphinde isephuce abangane kanye nabathandekayo. “Isitha sokugcina esiyakuchithwa singukufa.” (1 Korinte 15:26) Yeka injabulo eyoba khona lapho imingcwabo ithathelwa indawo uvuko lwalabo abasenkumbulweni kaNkulunkulu!—Johane 5:28, 29.

Impilo yobungqabavu iyothatha indawo yokugula nobuthakathaka. Imibhede yasesibhedlela ngeke iphinde igcwaliswe ngalabo abakhathazwa ukugula okungokomzimba nokwengqondo. UDokotela Omkhulu, uJesu Kristu, uyosebenzisa inani lomhlatshelo wakhe wesihlengo ‘ekuphulukiseni izizwe.’ (IsAmbulo 22:1, 2; Mathewu 20:28; 1 Johane 2:1, 2) Ukuphulukisa akwenza lapho esemhlabeni kwakumane kuyisibonelo salokho ayokwenza ngoMbuso.—Qhathanisa noIsaya 33:24; Mathewu 14:14.

Ukudla kuyoba yinala. Njengoba umhubi asho, “Kuyakuba-khona inala kakolweni ezweni esiqongweni sezintaba.” (IHubo 72:16) Kulokhu, isiprofetho sikaIsaya siyanezela: “UJehova-Sebawoti uyakwenzela abantu bonke idili lokukhulupheleyo kulentaba, idili lewayini elinenhlese, okukhulupheleyo okunomnkantsha, iwayini elinenhlese elicwengekileyo.” (Isaya 25:6) Ngokuqinisekile, indlala ngeke ikhathaze izakhamuzi zomhlaba ngaphansi kokubusa koMbuso.

Wonke umhlaba uyoba yipharadesi. Ngakho siyogcwaliseka lesithembiso sikaJesu kumenzi wobubi ophendukayo: “Uzakuba-nami eParadisi.” (Luka 23:43) Nawe ungakujabulela ukuphila okuphakade kulomhlaba, umhlaba ohlanziwe ebubini futhi washintshelwa ekubeni imbulunga ejabulisayo enjengepaki.—Johane 17:3.

Lamathemba amangalisayo abekwe phambi kwaso sonke isintu esilalelayo. Izwi likaJehova eliphefumlelwe, iBhayibheli, linikeza leziqinisekiso eziletha injabulo. Futhi konke lokhu kungaba yilokho uMbuso kaNkulunkulu ongakusho kuwe.

[Isithombe ekhasini 7]

Ingabe uyakukholelwa lokho uJesu akusho ngoMbuso kaNkulunkulu?