Imibuzo Evela Kubafundi

Ingabe uFaro washada ngempela noSara, umka-Abrahama, njengoba kubonakala kunjalo endleleni ezinye izinguqulo zeBhayibheli ezihumusha ngayo uGenesise 12:19?

Cha, uFaro wavinjwa ekubeni athathe uSara (uSarayi) abe njengomkakhe. Ngakho, udumo lukaSara nesithunzi akuzange kuhlaziswe.

Sisizwa ukuba sikubone lokhu ngokuhlola isimo emongweni waso. Indlala yaphoqelela uAbrahama (UAbrama) ukuba abalekele eGibithe okwesikhashana. Wayenovalo lokuthi ukuphila kwakhe kwakuyoba sengozini kuleyondawo ngenxa yomkakhe omuhle, uSara. UAbrahama wayengakabi nguyise wendodana ngoSara, ngakho ukuba wafa eGibithe, uhlu lozalo lweMbewu lwaluyonqamuka, iMbewu okwakuyobusiswa ngayo imindeni yonke yomhlaba. (Genesise 12:1-3) Ngakho uAbrahama watshela uSara ukuba azibize ngodadewabo, ngoba empeleni wayengudadewabo ngomzali oyedwa.—Genesise 12:10-13; 20:12.

Ayekusaba kwakunesisekelo. Isazi uAugust Knobel sachaza: “UAbrama wacela uSarayi ukuba azibize ngodadewabo eGibithe ukuze [yena Abrama] angabulawa. Uma wayebhekwa njengowesifazane oshadile, umuntu waseGibithe wayengamthola kuphela ngokuthi abulale umyeni noma umnikazi wakhe; uma ayebhekwa njengodadewabo, kwakunethuba lokuba azuzwe kumfowabo ngezindlela ezinokuthula.”

Nokho, izinduna zaseGibithe azizange zixoxe noAbrahama ngokuba uFaro ashade noSara. Zamane nje zayisa uSara omuhle endlini kaFaro, futhi umbusi waseGibithe wanikeza lowo okwakucatshangwa ukuthi ungumfowabo, uAbrahama, izipho. Kodwa ngemva kwalokhu, uJehova washaya indlu kaFaro ngezinhlupho. Lapho uFaro aziswa ngesimo okuyisona sona ngendlela engashiwongo, wathi kuAbrahama: “Kungani uthe, ‘Ungudadewethu,’ ngaze ngacishe ngamthatha waba umkami? Futhi manje nangu umkakho. Mthathe nihambe!”—Genesise 12:14-19, NW.

INew English Bible nezinye izinguqulo zeBhayibheli zihumusha ingxenye yalelivesi engenhla ebhalwe ngomalukeke ngokuthi “ngaze ngamthatha waba umkami” noma ngamazwi afana nalawa. Nakuba kungeyona ngempela indlela engalungile yokuhumusha, ukubekwa kwalamazwi ngalendlela kunganikeza umqondo wokuthi uFaro washada ngempela noSara, ukuthi umshado waba yisenzakalo esenziwa. Kungase kuphawulwe ukuthi kuGenesise 12:19 isenzo sesiHeberu esihunyushwe ngokuthi “thatha” sisesimweni esingaphelele, okubonisa isenzo esingakapheleliswa. INew World Translation ihumusha lesisenzo sesiHeberu ngokuvumelana nomongo nangendlela esibonisa ngokucacile isimo sesenzo—“ngaze ngacishe ngamthatha waba umkami.”a Nakuba uFaro ‘acishe wamthatha’ uSara waba umkakhe, wayengakenzi noma iyiphi inqubo noma umkhosi owawuhilelekile.

UAbrahama ngokuvamile uye wagxekwa ngendlela asingatha ngayo lendaba, kodwa wathatha lesinyathelo ngoba ekhathalela izithakazelo zeMbewu ethenjisiwe futhi ngalokho ekhathalela sonke isintu.—Genesise 3:15; 22:17, 18; Galathiya 3:16.

Esimweni esifana nalesi esasingaba yingozi, uIsaka wathi umkakhe, uRebeka, akugweme ukuveza ukuthi bashadile. Ngalesosikhathi indodana yabo uJakobe, olwaluyovela ngayo uhlu lozalo lweMbewu, yayisizelwe kakade futhi ngokusobala yayisiyinsizwa. (Genesise 25:20-27; 26:1-11) Nokho, isisusa salelisu lesibindi sasifana kakhulu nesika-Abrahama. Phakathi nendlala uIsaka nomkhaya wakhe babehlala endaweni yenkosi yamaFilisti okwakuthiwa uAbimeleki. Ukuba wazi ukuthi uRebeka wayeshade noIsaka, uAbimeleki wayengase athathe inkambo yokubulala wonke umkhaya kaIsaka, okwakungasho ukuthi noJakobe afe. Nakulesisimo, uJehova wangenela ukuze avikele izinceku zakhe nohlu lozalo lweMbewu.

[Umbhalo waphansi]