Imibuzo Evela Kubafundi

◼ Kungani u-29 C.E. ebhekwa njengosuku olubaluleke kakhulu emlandweni weBhayibheli kuno-14 C.E., owukuqala kokubusa kukaTiberiyu Kesari, okukhulunywa ngaye kuLuka 3:1?

Ukuqala kokubusa kukaTiberiyu akuthintwanga eBhayibhelini, ngaphandle kwesenzakalo esenzeka engxenyeni yokugcina yonyaka wakhe ka-15. Lokhu kwenza abafundi beBhayibheli bakwazi ukubona isenzakalo njengesenzeka ngo-29 C.E., ongabhekwa njengosuku olubaluleke kakhulu ngokweBhayibheli.

Ukubusa kombusi wesibili waseRoma, uTiberiyu Kesari, kwamukelwa kakhulu emlandweni. INew Encyclopædia Britannica ithi: “Ngo-AD 14, ngoAugust 19, uAwugustu [umbusi wokuqala] wafa. UTiberiyu, manje owayesemkhulu, wasidonsa ngekhala iSigele ngokwezombangazwe futhi wangasivumela ukuba simmise njengombusi cishe isikhathi esingangenyanga, kodwa ngoSeptember 17 walandela ekubeni isikhulu.”a

Lesisikhathi sokuqala kokubusa kukaTiberiyu siyahambisana neBhayibheli ngoba ngokuphathelene nenkonzo kaJohane uMbhapathizi uLuka 3:1-3 uthi: “Kwathi ngomnyaka weshumi nanhlanu wokubusa kukaTiberiyu Kesari, uPontiyu Pilatu engumbusi waseJudiya, . . . kwafika izwi likaNkulunkulu kuJohane indodana kaZakariya ehlane. Weza ezweni lonke laseJordani eshumayela umbhapathizo wokuphenduka, kube-ngukuthethelelwa kwezono.”

UJohane akazange aqale ukushumayela nokubhapathiza lapho uTiberiyu eba umbusi kodwa wenza kanjalo “ngomnyaka weshumi nanhlanu wokubusa kukaTiberiyu Kesari.” Lowonyaka ka-15 waqala ekwindla ka-28 C.E. waphela ekwindla, ka-29 C.E. Nokho, ukwazi lokhu akwenzi umuntu akwazi ukuthola ngokuthé ngqo ukuthi yaqala nini inkonzo kaJohane phakathi nalowonyaka noma ukubala izenzakalo ezihlobene nayo.

Kodwa iBhayibheli lisinikeza ukwaziswa okubalulekile okunezelayo. Ngokwesibonelo, isiprofetho sikaDaniyeli ‘samasonto angamashumi ayisikhombisa’ sakhomba ekubonakaleni kukaMesiya ngo-29 C.E. Sabonisa futhi ukuthi inkonzo kaJesu yayiyoba iminyaka emithathu nengxenye ubude. (Daniyeli 9:24-27) Nezela kulokhu lemininingwane engokweBhayibheli: uJesu wazalwa ezinyangeni eziyisithupha ngemva kukaJohane; lapho uJesu ebhapathizwa, “wayeneminyaka engaba-ngamashumi amathathu”; futhi uJesu wafa entwasahlobo ka-33 C.E. (isikhathi sePhasika), lapho eneminyaka engu-33 1/2 ubudala.—Luka 1:24-38; 3:23; 22:14-16, 54.b

Benalokhu kwaziswa okunembile okungokweBhayibheli, kuhlanganise nosuku olungokomlando wezwe lokubusa kukaTiberiyu, abafundi beBhayibheli bangabala ukuthi inkonzo kaJohane yaqala entwasahlobo ka-29 C.E. nokuthi ezinyangeni eziyisithupha kamuva, ekwindla ka-29 C.E., uJohane wabhapathiza uJesu. Ngakho-ke, akuyena u-14 C.E. kodwa u-29 C.E. obhekwa njengosuku olubaluleke kakhulu ngokweBhayibheli.

[Imibhalo yaphansi]