Usuku LukaNkulunkulu Lwempindiselo
NJENGOBA sibonile esihlokweni esandulelayo, kunezizathu eziningana zokuthi kungani kungalungile ngathi ukufuna ukuphindisela. Akulungile ngoba ekugcineni, akuxazululi lutho. Akulungile ngoba kuqinisa ubutha esikhundleni sokwakha izibopho zobungane. Futhi akulungile ngoba kuyalimaza kulowo ohlakulela imicabango yokuphindisela.
Nokho, isizathu esibaluleke kakhulu sokuthi kungani impindiselo yomuntu ingalungile sibonakala emazwini kaMose awasho kuIsrayeli: “UJehova uNkulunkulu wakho unguNkulunkulu onomusa [onesihe, NW].” (Duteronomi 4:31) Njengoba uNkulunkulu enesihe, kufanele sibe nesihe njengaye. UJesu watshela abalandeli bakhe: “Qhubekani niba nesihe, njengoba nje noYihlo enesihe.”—Luka 6:36, NW.
Nokho, iBhayibheli libuye lichaze uJehova ngokuthi “[u]Nkulunkulu wempindiselo.” (IHubo 94:1) Umprofethi uIsaya ukhuluma ‘ngonyaka womusa kaJehova’ kanye ‘nangosuku lokuphindisela lukaNkulunkulu wethu.’ (Isaya 61:2) UNkulunkulu angaba kanjani nesihe kodwa abe ngophindiselayo? Futhi uma kumelwe silingise isihe sikaNkulunkulu, kungani singenakumlingisa ekuphindiseleni?
Ekuphenduleni umbuzo wokuqala, uNkulunkulu unesihe ngoba uyasithanda isintu, futhi uthethelela kakhulu ngangokunokwenzeka isikhathi eside kangangokunokwenzeka ukuze anikeze abantu ithuba lokulungisa izindlela zabo. Abaningi, njengomphostoli uPawulu, baye babamba ithuba lalesisihe. Kodwa futhi uNkulunkulu uyaphindisela—ngomqondo wokwenza ubulungisa—ngoba isihe esinjalo singaqhubeka isikhathi esithile kuphela. Lapho abathile beye babonisa ukuthi abasoze bazishintsha izindlela zabo, uNkulunkulu uyokhipha isahlulelo ngalokho okubizwa ngokuthi usuku lwakhe lwempindiselo.
Ekuphenduleni umbuzo wesibili, cha, asithetheleleki ngokuziphindiselela ngoba uNkulunkulu okhipha impindiselo. UJehova uphelele ebulungiseni. Abantu abaphelele. UNkulunkulu ubona zonke izinhlangothi zendaba futhi ngaso sonke isikhathi wenza isinqumo esilungile. Thina asinakwethenjelwa ukuba senze okufanayo. Kungakho uPawulu eluleka: “Ningaziphindiseli nina-bathandwa, kodwa dedelani ulaka, ngokuba kulotshiwe ukuthi: Ngokwami ukuphindisela, ngiyakubuyisela mina, isho iNkosi.” (Roma 12:19) Ukuze kusizakale thina, kumelwe sishiyele impindiselo ezandleni zikaJehova.
Kungani Kunosuku Lwempindiselo?
Nokho, iBhayibheli ezindaweni eziningi liyasivuma isidingo sokulandisa kwabenzi bobubi abangaphenduki. Ngokwesibonelo, umphostoli uPawulu wabikezela ukuthi uNkulunkulu, ngoJesu, wayeyoletha ‘impindiselo kwabangamazi uNkulunkulu nakwabangalaleli izindaba ezinhle zeNkosi yethu uJesu.’ (2 Thesalonika 1:8, qhathanisa neNW.) Sinezizathu ezinhle zokuthatha lawomazwi ngokungathi sína. Ngani?
Phakathi kokunye, ngoba abantu abaningi namuhla bayaphikelela nokwedelela ubukhosi boMdali, abayinaki imithetho yakhe yokulunga. Kungakhathaliseki ukuthi bathi bayakholelwa kuNkulunkulu noma cha, ukuziphatha kwabo kubonisa ngokusobala ukuthi abanawo umuzwa wokulandisa phambi kukaNkulunkulu. Amazwi omhubi asebenza kubo bonke abanjalo: “Kungani ukuba omubi adelele uNkulunkulu, athi enhliziyweni yakhe: Awuyikukunaka, na?” (IHubo 10:13) Ngokuqinisekile, uJehova ngeke akuvumele phakade ukweyiswa ngalendlela. Nakuba enguNkulunkulu wothando, unguNkulunkulu futhi wobulungisa. Uyokulalela ukukhala kwalabo abanendaba ngempela nobulungisa: “Vuka, Jehova! Nkulunkulu, phakamisa isandla sakho, ungakhohlwa abahluphekileyo.”—IHubo 10:12.
Ngaphezu kwalokho, abantu abedelela umthetho bonakalisa wona kanye umhlaba esiphila kuwo. Bangcolisa umoya, izwe, namanzi; bagcwalisa umhlaba ngokungabi nabulungisa nangonya. Futhi banqwabelanisa izikhali zamakhemikhali, zenuzi, nezinye ezibulalayo ezanele ukuba zisongele ukuba khona kwesintu. Ukungenela kwaphezulu kuyadingeka nakanjani ukuze kuqinisekise ikusasa elilondekile ngesintu esilalelayo. (IsAmbulo 11:18) Lokhu kungenela yilokho uIsaya abhekisela kukho ngokuthi usuku lwempindiselo.
Yini Eyofezwa Usuku LukaNkulunkulu Lwempindiselo?
NgokweVine’s Expository Dictionary of Old and New Testament Words, emiBhalweni yesiGreki, igama elihunyushwe ngokuthi impindiselo, lapho lisetshenziswa ngokuphathelene noNkulunkulu, ngokwezwi nezwi lisho “‘lokho okuvela ngenxa yobulungisa,’ hhayi, njengoba kungokuvamile ngempindiselo yabantu, ngenxa yomuzwa wokulimala noma nje ngenxa yomuzwa wokucasuka.” Kanjalo, impindiselo kaNkulunkulu ezitheni zakhe ngeke ibe isikhathi sokuchitheka kwegazi okungalawulwa, njengempi yokuziphindiselela komuntu siqu. IBhayibheli liyasitshela, “INkosi [uJehova] iyakwazi ukuhlangulisa ekulingweni abamesabayo uNkulunkulu, kepha abangalungile iyabagcinela usuku lokwahlulelwa, bajeziswe.”—2 Petru 2:9.
Izinceku zikaNkulunkulu zibheke phambili osukwini lukaNkulunkulu lwempindiselo njengesikhathi lapho ukuziphatha okufanele kuyolwelwa khona futhi abalungile bakhululwe ekucindezelweni ababi. Lokhu akusho ukuthi banenzondo noma banomoya wokuphindisela. “Othokoza ngengozi akayikuyekwa,” kuxwayisa iBhayibheli. (IzAga 17:5) Ngokuphambene, zihlakulela isihe nozwela, zishiyela noma yiziphi izinqumo ngempindiselo kuNkulunkulu.
Yiqiniso, akulula ngabantu abathukuthele ukuba benze ngalendlela. Kodwa kungenzeka, futhi abaningi baye benza kanjalo. Ngokwesibonelo, uPedro akakhulanga ngenjabulo futhi wayeshaywa njalo umfowabo omdala. Ngakho wakhula enobudlova, ehlala efunwa amaphoyisa futhi eyikhiphela kumkakhe nasebantwaneni intukuthelo ayenayo ngomfowabo. Ekugcineni, walalela omunye woFakazi BakaJehova futhi kamuva waqala ukutadisha iBhayibheli. “Ngosizo lukaJehova,” uyalandisa, “ngashintsha, futhi manje, esikhundleni sokulwa nabantu, ngiyabasiza njengomdala ongumKristu.” Ngosizo lweBhayibheli nomoya ongcwele, abanye abangenakubalwa ngokufanayo baye bashintsha ekubeni nenzondo noma nomoya wokuphindisela babonisa uthando nokubekezelela abanye.
Yini Oyoyenza?
Ukukhumbula ukuza kosuku lukaNkulunkulu lwempindiselo kuyosisiza ukuba sibambe ithuba lokubekezela kukaJehova. Kodwa ithuba lokwenza kanjalo alilona elingalinganiselwe. Ngokushesha lolosuku luzofika. Umphostoli uPetru wabonisa ukuthi kungani lungakafiki: “INkosi [uJehova] ayilibali ngesithembiso sayo, njengalokhu abanye bathi kungukulibala, kepha iyanibekezelela, ingathandi ukuba kubhubhe namunye, kodwa ukuba bonke beze ekuphendukeni.”—2 Petru 3:9.
Khona-ke, kuyaphuthuma ukululungiselela manje usuku lukaNkulunkulu lokulandisa ngokutadisha imiBhalo nokusebenzisa iseluleko sayo. Lokhu kuyosisiza ukuba silandele amazwi omhubi: “Pheza ukuthukuthela; yeka ulaka, ungakhathazeki; kubanga ukona nje. Ngokuba ababi bazakuchithwa, kepha abalindela uJehova bazakudla ifa lomhlaba.”—IHubo 37:8, 9.
[Isithombe ekhasini 7]
Ngemva kosuku lukaNkulunkulu lwempindiselo, “abalindela uJehova bazakudla ifa lomhlaba”