“Izinto Ezikhulisa Amathemba Ethu”

KWAKUYISEKUSENI ngeSonto kufudumele, ngoSeptember 10, lapho kubuthana abayizi-4 155 eHholo Lomhlangano LoFakazi BakaJehova laseJersey City, eNew Jersey, beze esimisweni sokuthweswa iziqu kwekilasi lama-87 leWatchtower Bible School of Gilead. Kwakukhona abafundi abangama-24 nezimenywa zabo kanye namalungu omkhaya waseBethel avela eBrooklyn nasemapulazini eNhlangano.

Izethameli zacelwa ukuba zilungele ukuqala kwesimiso ngo–10:00 a.m. nguAlbert Schroeder, owasebenza njengosihlalo wosuku. Ngemva kwengoma yokuvula, uJohn Barr wenza umthandazo. Bobabili labazalwane bangamalungu eNdikimba Ebusayo. UMzalwan’ uSchroeder walichaza kafushane ikilasi waphawula ukuthi abazothola iziqu ‘babekulungele ukuhlanganyela emsebenzini owenziwa emhlabeni wonke woFakazi BakaJehova, manje owenziwa emazweni angama-210.’ Wabe eseqhubeka ethula ezinye izikhulumi eziyisikhombisa.

URobert Wallen, osebenza emaHhovisi Abaqondisi endlunkulu eBrooklyn, wasekela isihloko sakhe esithi, “Thandanani Ngokujulileyo,” kweyoku-1 Petru 4:8. Wathi izithunywa zevangeli zidinga ukusizana, futhi njengoba bonke abafundi balelikilasi babeshadile, wabhekisa amazwi akhe ikakhulukazi emibhangqwaneni eshadile. Weluleka: “Umfazi kumelwe amthande umyeni wakhe ngisho noma engase alufunde ngokushesha ulimi lwakulelozwe kunomyeni wakhe. Kufanele abe ngoqondayo nonozwela. Futhi, kumelwe azame ukumqonda lapho kuwusuku lwakhe lokupheka lwamasonto onke!” (Ngokuvamile, isithunywa sevangeli ngasinye sabelwa usuku esiyolungiselela ngalo njalo ukudla kwabo bonke abahlala ekhaya lezithunywa zevangeli.) Isikhulumi sabe sesichaza ukukhungatheka nokuhlangenwe nakho okuhlekisayo amanye amadoda ashadile aba nakho lapho efunda ukupheka, njengendaba yendoda eyasebenzisa ibaking soda esikhundleni sebaking powder. UMzalwan’ uWallen waphawula futhi nokuthi indoda eshadile kufanele “iziqonde izidingo zomkayo,” njengoba isikhathi esiningi kakhulu sendoda sizosetshenziswa ekunakekeleni imithwalo yemfanelo yebandla. Kumadoda nakubafazi, wathi: “Yibani ngabakhayo njalo; ningazisho izinkulmo ezimbi, ningazisho ngisho nakubangane benu bomshado. Gwemani ukuba ngonkom’ idla yodwa. Futhi lapho nenza amaphutha wavumeni.”

Isikhulumi esilandelayo, uDaniel Sydlik, ilungu leNdikimba Ebusayo, wakhetha isihloko esithi: “Wugcineni Uvutha Umlilo Womoya KaNkulunkulu,” esisekelwe kweyoku-1 Thesalonika 5:19. Wathi: “Umlilo ungafudumeza futhi ubhubhise. Ngezinye izikhathi izithunywa zevangeli ziyakhuthaza ngezinye izikhathi ziyesabisa. Elinye ixhegu elingumAfrika lake lathi: ‘Vuthela kancane,’ njengalapho uvuthela inhlansi ozama ukuyivuselela! Lapho nikhuluma ngezinto eningase nizithole esabelweni senu—indle ehlezi obala, izimpukane, izimoto ezinomsindo, izwe elisha, inkolo engajwayelekile—bonisani inhlonipho. Ubamba izimpukane eziningi ngoju kunangovinika. Funda ‘ukuvuthela kancane’ uwugcine uvutha umlilo womoya kaJehova.”

Isihloko esithi “Hlala Esabelweni Sakho Ngentshiseko Nangokuqapha” sakhulunyelwa uKenneth Flodin, umbonisi waseKhaya laseBethel eWatchtower Farms. Njengoba iSikole saseGileyadi manje sesiseWatchtower Farms, bonke ababezothola iziqu babejwayelene kahle noMzalwan’ uFlodin. Enkulumweni yakhe waxoxa ngezici ezimbili okumelwe ziqashelwe: (1) ukuthanda izinto ezibonakalayo (2) ukukhuluma nokucabanga okuphambene. Iseluleko sasithi: “Gwema ubugovu uzidele.” Wathi: “Bheka phambili ekunethezekeni nasezintweni ezinhle ezweni elisha; musa ukuzifuna manje.” Ukuze sisize abafundi bagweme ukuba nombono ophambene, isikhulumi sacaphuna uNumeri 13:28, 32. Sathi: “Ngezinye izikhathi abantu bangabona into efanayo, kodwa abanye bayoba nombono ophambene, abanye babe nombono oqondile. NjengoKalebi wasendulo, thembela kuJehova. Tshela abanye ngemicabango yakho eqondile. Futhi uma uhlangabezana nenkulumo ephambene, yishintshe indaba ukuze ugweme imicabango ephambene.”

ULloyd Barry, ilungu leNdikimba Ebusayo naye ngokwakhe owayeyisithunywa sevangeli, wanikeza iseluleko esiwusizo. Wathi: “Uthando, injabulo, nokuthula yizimfanelo ezibalulekile ezithunyweni zevangeli ezisezintsha. Uzobuqaphela ubuthakathaka babanye ekhaya lezithunywa zevangeli oyohlala kulo, kodwa gxila ebuthakathakeni bakho.” Wakhumbula izinsuku zakhe eseseJapane lapho izithunywa zevangeli zazidla inhlanzi zonke izinsuku, kodwa kwafika izithunywa zevangeli ezazingazwani nenhlanzi. Ngakho isimiso sokudla sashintshwa ngenxa yothando ngalaba abasha. Futhi weluleka: “Zigcine ukwazi ukuhleka; ungalivumeli ilanga lishone usekunoma iziphi izinkinga onazo. Gcina ukuthula ekhaya, khona-ke uyojabula ekuphileni kwakho kokuba isithunywa sevangeli.”—Efesu 4:26.

UJack Redford, omunye wabaqeqeshi baseGileyadi, wabe esekhuluma ngesihloko esithi: “UJehova Uyophelelisa Ukuqeqeshwa Kwenu,” esekela amazwi akhe kweyoku-1 Petru 5:10, NW. Wathi: “UJehova anganiqeqesha ngokuvumela ukuba kuphakame izimo okunzima ukuzisingatha. Njengoba aqeqesha abaphostoli ukuba basingathe ukungezwani ngenxa yokungafani kobuntu, nani uyoniqeqesha. Ningaphelelwa ithemba lapho kunokuphambana kwemibono. Kulungeleni ukulungisa ubuntu benu. Ukuqhosha kukwenza kube nzima, kodwa ukuthobeka kukwenza kwenzeke. Fundani ukuvumelana nezimo. UJehova futhi uyoniqeqesha ukuze nikwazi ukuzwana nabanye. ‘Ningabeki inhliziyo yenu kuwo wonke amazwi akhulunywayo’ ngani.” (UmShumayeli 7:21, 22) Ushushiso futhi lusebenza njengengqeqesho. Izithunywa zevangeli eziye zabekezelela ushushiso ziyajabula futhi azizisoli, ziyajabula ngokuthi ziqeqeshwé ushushiso.

U-Ulysses Glass, omunye umqeqeshi, wabe esekhuluma amazwi akhe okugcina kwabazothola iziqu. Wagxila kwabase-Efesu 4:1-3, etusa ikilasi ngokubonisa izimfanelo ezibangela ubunye ezichazwe lapho futhi elikhuthaza ukuba liqhubeke lenza kanjalo, ethi: “Ukuthula kuyisici esihlanganisayo, futhi kudingekile ukuze kube nobunye.” Wabe eseqhubeka neyabase-Efesu 4:4-6 wabukeza ubukhulu bomoya kaNkulunkulu, ebakhumbuza bonke ukuthi “UJehova unguMthombo wawowonke amandla amakhulu. Kufanele sihlale simesaba; kuyinto eyesabekayo ukuwela ezandleni zakhe.”—Heberu 10:31.

Amathemba Amakhulu

Khona-ke bonke bamlalela ngesithakazelo esikhulu uTheodore Jaracz, ilungu leNdikimba Ebusayo YoFakazi BakaJehova, owakhuluma ngesihloko esiyisihluthulelo: “Izinto Ezikhulisa Amathemba Ethu.” Ekhuluma ngeyoku-1 Korinte 2:9, wathi: “Lelivesi alikhulumi ngezinto ezibonakalayo, ngoba ivesi elilandelayo, eyoku-1 Korinte 2:10, likhuluma ‘ngokujulileyo kukaNkulunkulu.’ Lokhu kwakuhlanganisa ‘ukuhlakanipha kukaNkulunkulu’ ngokuqondene ‘nemfihlakalo engcwele, NW’ ‘ukuhlakanipha’ kwakhe ‘okufihlakeleyo’ okuvele ngalé kwalesimiso sonozungezilanga, yebo, okuvela kuNkulunkulu ngokwakhe.” (1 Korinte 2:7) Izilaleli zabe sezikhonjwa kuIsaya 64:4, okwakuyisikhumbuzo sokuba ‘ziqhubeke zilindela’ uNkulunkulu nezinto azilungiselele.

Yeka amathemba abantu bakaNkulunkulu abanawo ngempela! UMzalwan’ uJaracz waveza lokhu okulandelayo: “Ngo-1919 iBabiloni Elikhulu lawa; ngo-1922 kwaba nesimemezelo esivusa amadlingozi sokuba ‘kumenyezelwe iNkosi noMbuso,’ sokuba kushunyayelwe emhlabeni wonke ngoMbuso omisiwe; ngo-1935 abantu bakaNkulunkulu bazi incazelo ‘yesixuku esikhulu’ kusAmbulo 7:9; ngo-1943 babona iSikole saseGileyadi siqala ukuthumela izithunywa zevangeli emaphethelweni omhlaba; namuhla, ngo-1989, nina enithola iziqu ninelungelo lokubatshela izindaba ezinhle abantu abasensimini yenu abamagange ngokuzwa.”

Ngemva kokuba sekunikezwe amadiploma, omunye wabafundi wafunda incwadi yokwazisa ethinta inhliziyo evela emalungwini ekilasi.

Ntambama, uLon Schilling, umxhumanisi weKomiti YeWatchtower Farms, waqhuba isiFundo seNqabayokulinda esifushanisiwe. Ngemva kwalokho abafundi bethula isimiso esijabulisayo somculo futhi badlala okunye kokuhlangenwe nakho kwabo kwasenkonzweni yasensimini. Ngemva kwalokhu, abamemezeli basemabandleni aseduze badlala idrama efike ngesikhathi enesihloko esithi: “Ukubhekana Nezenzo ZikaSathane Zobuqili.” Ekugcineni, ngemva kokulalela ezingxoxo nabayisithupha abasanda kuthweswa iziqu, isixuku esijabulayo sahlabelela ingoma yokuphetha futhi sajabula ukuhlanganyela emthandazweni nomongameli weSikole saseGileyadi oneminyaka engama-96 ubudala, uFrederick Franz.

[Ibhokisi ekhasini 23]

IMINININGWANE YEKILASI

Inani lamazwe abavela kuwo: 5

Inani lamazwe ababelwe kuwo: 10

Inani lemibhangqwana eshadile: 12

Ingqikithi yabafundi: 24

Isilinganiso seminyaka yobudala: 30,9

Isilinganiso seminyaka yokuba seqinisweni: 13,4

Isilinganiso seminyaka yokuba senkonzweni yesikhathi esigcwele: 9,2

[Isithombe ekhasini 23]

IKilasi Lama-87 Elithola Iziqu LeWatchtower Bible School of Gilead

Ohlwini olungezansi, izinombolo zezinhlu zisuka phambili ziye emuva, kuthi amagama ahlelwe kusukela ngakwesobunxele kuya ngakwesokudla ohlwini ngalunye.

(1) Heindel, E.; Andrews, D.; Casavant, D.; Montanez, E.; Nale, P.; Koukaras, S. (2) Miell, T.; Heithaus, M.; Melton, T.; Hagberg, N.; Kettinen, M. (3) Kettinen, L.; Andrews, W.; Koukaras, E.; McCollough, S.; Melton, G.; McCollough, J. (4) Heindel, W.; Casavant, G.; Miell, G.; Montanez, J.; Nale, M.; Hagberg, I.; Heithaus, K.