Izifundo Ezivela EmiBhalweni: Zefaniya 1:1–3:20

Funa UJehova Futhi Umkhonze Ngenhliziyo Yonke

EMINYAKENI engama-50 ngaphambi kokuba abaseBabiloni babhubhise uJuda ohlubukayo, uJehova wamemezela ngomprofethi wakhe uZefaniya: “Ngiyakuqothula nokuqothula konke, kusuke ebusweni bomhlaba.” (1:1, 2) Kodwa uNkulunkulu wababonisa abantu bakhe indlela yokuphepha. (2:3; 3:9) Ngokuqondene nalokhu, incwadi kaZefaniya iqukethe izifundo ezibalulekile kubo bonke manje ababhekene ‘nokulwa kosuku olukhulu lukaNkulunkulu uMninimandla onke.’—IsAmbulo 16:14.

Usuku LukaJehova Luseduze

Njengoba usuku lukaJehova luseduze kangaka, noma ibaphi abahlubuke kuNkulunkulu kufanele babuyele kuye ngokushesha. Phakathi kwalabo ‘abayoqothuIwa’ uNkulunkulu kukhona “nababuyile ekumlandeleni uJehova.” Bachezukile futhi abasazikhathazi ngentando kaNkulunkulu. Yeka isimo esiyingozi! Kumelwe silungiswe ngokushesha.—Zefaniya 1:3-11.

Ingcebo yezinto ezibonakalayo ayinakukunikeza ukulondeka ngosuku IukaJehova. Abanye abathi bakhonza uJehova baba matasa ekuphishekeleni izinto ezibonakalayo, bethokomala ezikhundleni zokunethezeka. Kodwa yeka ukuzikhohlisa! Izinto zabo ezibonakalayo ngeke zinikeze kulondeka “ngalolosuku.”—Zefaniya 1:12-18.

Ukusinda Kungenzeka

Ukuze umuntu asithezwe ngosuku lukaJehova, kudingeka okungaphezu kolwazi IwemiBhalo olungajulile. ‘Abathobekileyo”abasebenzile ukwahlulela kwakhe’ bayaIwa ukuba ‘bafune uJehova, bafune ukulunga, bafune ukuthobeka.’ Yilabo abaye ‘bakhuthazela kwaze kwaba sekupheleni’ kuphela abayosindiswa.—Zefaniya 2:1-3; Mathewu 24:13.

Izizwe ezicindezela abantu bakaJehova namuhla ziyobhujiswa. Ziyoba nokuhlangenwe nakho okufanayo njengoMowabi, uAmoni, iAsiriya, nezinye izizwe ezazizungeze uJuda. Futhi imbubhiso ilindele iBabiloni Elikhulu. (IsAmbulo 18:4-8) Yeka ukuthi lokhu kusikhuthaza kanjani ukuba siphikelele ekumemezeleni izahlulelo zikaNkulunkulu!—Zefaniya 2:4-15.

Abantu Abalondoloziwe

UJehova manje ulungiselela abantu bakhe ukusinda. Ingabe uyishiyile imiqondo yobuBabiloni futhi waqala ukukhuluma “ulimi oluhlanzekileyo” (NW) Iweqiniso leBhayibheli eliyigugu? Ingabe uye ‘walibiza igama likaJehova’ ngokuzinikezela kuye? Ingabe ‘uyawuletha umnikelo,’ okungukuthi, “isithelo sezindebe ezivuma igama lakhe”? Ukuze usinde, kumelwe ukhonze uJehova “nganhliziyonye” nabantu bakhe abazinikezele.—Zefaniya 3:1-10; Roma 10:13-15; Heberu 13:15.

Ukuze sisinde, kumelwe sifune uJehova futhi siphakamise igama lakhe elingcwele. Ukuqhosha, ukungalungi, namanga akunandawo phakathi kwabantu bakhe. (Efesu 4:25-32) “Abahluphekayo nabampofu” kuphela abayosindiswa lapho engcwelisa igama lakhe.—Zefaniya 3:11-20.

Izifundo Ezivela EmiBhalweni: Hagayi 1:1–2:23

INCWADI kaHagayi isiyisa ku-520 B.C.E., iminyaka eyi-17 ngemva kokubuyela kwensali engamaJuda eJerusalema ukuyokwakha kabusha ithempeli likaJehova. (Hagayi 1:1) Leso kwakuyisikhathi sokuba wonke umuntu abeke inhliziyo yakhe emsebenzini kaNkulunkulu. Nokho, uJehova wakuthola kudingekile ukuba athumele umprofethi uHagayi ukuba akhumbuze abantu baKhe ngesibopho sabo. Ingabe kukhona esingakufunda kulokhu?

Beka Umsebenzi KaJehova Kuqala

Ungalokothi ubeke izithakazelo zezinto ezibonakalayo ngaphambi kwemisebenzi engokomoya. AmaJuda abuyela ezweni lenkaba yawo ayenesizathu sokukhathazeka ngokungaqiniseki ngezomnotho, omakhelwane abanenzondo, nokunye. Kodwa lokhu kwakungezona izizathu zokunganaki kwawo, uma kubhekwa izimo zawo zokuphila kokutamasa. Kungemva kokuba eseshukunyiswe uHagayi kuphela lapho aqala khona ukusebenza ethempelini. Ngokufanayo namuhla, sidinga ‘ukubeka izinhliziyo zethu ezindleleni zethu’ futhi siqikelele ukuthi siwusekela ngezinga eligcwele ngangokunokwenzeka umsebenzi kaNkulunkulu.—Hagayi 1:2-15.

UJehova uyayibusisa imizamo yalabo abenza umsebenzi wakhe ngenhliziyo yonke. UNkulunkulu wayezowubusisa umsebenzi kaZerubabele namanye amaJuda ekuqedeni ithempeli, futhi inkazimulo yalo yayiyodlula leyo yendlu yokuqala. Njengoba “isixuku esikhulu” sisabela esigijimini soMbuso namuhla, “okunxanelekayo kwabo bonke abezizwe” kuza ethempelini likaJehova elingokomoya, futhi ‘ugcwalisa indlu yakhe ngenkazimulo.’—Hagayi 2:1-9; IsAmbulo 7:9.

Kudingeka Inkonzo Yenhliziyo Yonke

Ukukhulekela kwethu kuba okwamukelekayo kuphela uma sihlanzekile, izisusa zethu zingokoqobo, futhi sikhonza uJehova ngenhliziyo ephelele. Ukudebeselela indlu kaNkulunkulu kwenza amaJuda aba angahlanzekile, kodwa wayezowabusisa ngokushesha lapho kuqala umsebenzi wethempeli. Ngakho, uma sifuna ukujabulela isibusiso sikaJehova, kumelwe silungise noma yini edinga ukulungiswa futhi sibeke izinhliziyo zethu emsebenzini wakhe. (Qhathanisa noNumeri 19:11-13.) Njengoba silindele ukuba uNkulunkulu azamazamise amazulu nomhlaba, egumbuqela imibuso, masilandele uZerubabele ongokomfuziselo, uJesu Kristu, futhi sihlanganyele ngenhliziyo yonke emsebenzini kaJehova.—Hagayi 2:10-23.

[Ibhokisi ekhasini 30]

IZINGCAPHUNO ZEBHAYIBHELI ZIYAHLOLWA

○ Zefaniya 1:5—UMilkomu, ngokunokwenzeka onguMoloki, wayewunkulunkulu wamanga oyinhloko wama-Amoni. (1 AmaKhosi 11:5, 7) Ukukhulekelwa kukaMoloki kwakuhlanganisa ukunikela ngabantwana okwenyanyekayo futhi kwakulahlwa uMthetho.—Levitikusi 20:2-5; IzEnzo 7:42, 43.

○ Zefaniya 2:14—Njengoba kwakubikezeIwe, izinsika nezinhloko-dolobha zazo ezidiliziwe zeNinive elichithiwe zaba yizindawo zezinyoni nezilo. Izinyoni cishe nomoya ‘kwakhala’ emafasiteleni angenamuntu. Iminyango ngisho nengaphakathi lesigodlo kwachithwa.

○ Zefaniya 3:9—Ulimi oluvamile lwabantu alubuqinisekisi ubunye, njengoba kuboniswa izimpi ezilwiwa abantu bolimi olulodwa. “Ulimi oluhlanzekileyo” luyiqiniso elingokomBhalo, “isibonelo samazwi aphilayo:” (2 Thimothewu 1:13) Ludlula ukuqhosha, lukhazimulisa uNkulunkulu, futhi luhlanganisa bonke abalukhulumayo.

○ Hagayi 1:6—Njengoba amaJuda ayedebeselela ithempeli IikaJehova, ayengenaso isibusiso sakhe. Ngakho, atshala kakhulu kodwa avuna isivuno esincane futhi antula ukudla neziphuzo ezanele ukuze anelise izidingo zawo. Izingubo zabo zazingenele futhi zingezohlobo oluphansi ukuthi zingabagcina befudumele, futhi abahola imali kwabonakala sengathi bafaka izimali emgodleni wemali ogcwele izimbobo. Ngokungafani nalawomaJuda, masingalokothi sidebeselele izithakazelo zaphezulu.—IzAga 10:22; Nehemiya 10:39.

○ Hagayi 2:9—Ithempeli ‘lokuqala,’ elakhiwa uSolomoni, lama iminyaka engama-420, kuyilapho ‘elokugcina’ lasetshenziswa iminyaka engama-584 (515 B.C.E.—70 C.E.). Ngakho ithempeli lesibili lama isikhathi eside. Abakhulekeli abengeziwe bathutheleka kulo, njengangePentekoste lika-33 C.E., lapho amaJuda namaProselithe ahlangana khona esuka kude naseJudiya. Ngaphezu kwalokho, uMesiya, uJesu Kristu, wafundisa ‘endlini yokugcina.’ Lezizici zalenzela udumo olungokwenkolo olukhulu.