Ukujabulela Umculo—Siyini Isihluthulelo?
KWAKWENZIWA ukuziphatha okubi nokukhulekela izithombe okukhulu ezweni lasendulo. Ngenxa yalokho, umphostoli uPawulu wakuthola kudingekile ukuba anikeze iseluleko esinamandla kakhulu ngokuziphatha kobuKristu. Ebhalela ibandla lase-Efesu wathi: “Ngakho ngisho, ngifakaza eNkosini, ngithi ningabe nisahamba njengalokhu kuhamba abezizwe ebuzeni bengqondo yabo, behlelwe emqondweni, behlukanisiwe nokuphila kukaNkulunkulu ngokungazi okukubo ngenxa yobulukhuni benhliziyo yabo.”—Efesu 4:17, 18.
Ingabe leyo akuyona yini incazelo enhle yendlela izinto ezingayo namuhla? Lokhu kuhlanganisa nomkhakha wezomculo? Umculo omningi wesimanje ubonisa isimo ‘esihlukaniswe nokuphila kokwesaba uNkulunkulu.’ Ngokuvamile amazwi amaculo abonisa ‘inhliziyo elukhuni,’ engenawo umusa noma uzwela.
Kodwa uPawulu waqhuba iseluleko sakhe ngokuthi: “Umqondo wabo wokuhle nokubi wake wafiphala, bazilahlele ebulilini futhi bawuphishekela ngentshiseko umsebenzi wokungcola kwalo lonke uhlobo.”—Efesu 4:19, The Jerusalem Bible.
Lokhu ‘kuphishekela ngentshiseko umsebenzi wokungcola’ kuboniswa emculweni omningi wanamuhla. Amazwi aculwayo nenjongo yomculo kwanelisa isizukulwane esigxile ebulilini, ebudloveni, emilalisweni, nasenjabulweni. AmaKristu kufanele abubheke kanjani ububi obunjalo? Phawula amazwi kaPawulu: “Manje lokho akuyona neze indlela eniyifunde kuKristu, ngaphandle kokuba nihlulekile ukumuzwa kahle lapho nifundiswa iqiniso elikuJesu.”—Efesu 4:20, 21, JB.
Kudingeka “Inguquko Engokomoya”
Singakusebenzisa kanjani lokhu kuyala endabeni yomculo obonisa umoya wezwe? Ekutheni, uma ‘sinomqondo kaKristu,’ okuwukuthi, uma sinesimo sakhe sengqondo, ngeke sifune ukulalela umculo ‘obonisa isimo sezwe, [wobulwane, NW], wobudemoni.’—1 Korinte 2:16; Jakobe 3:15.
Kodwa ungase ubuze, ‘Ngingalushintsha kanjani uhlobo lomculo engiwuthandayo?’ Nalapha uPawulu uyasiza, ngoba uthi: “Kumelwe nidele indlela yenu yokuphila endala; kumelwe nibekele eceleni ubunina obudala, ukungcola ngokulandela izifiso ezidukisayo. Ingqondo yenu kumelwe yenziwe ibentsha ngenguquko engokomoya.”—Efesu 4:22, 23, JB.
Ikhona impendulo, ukwenziwa kwengqondo ibentsha ngenguquko engokomoya. Lokhu kuhilela okungaphezulu kakhulu kothando lwethu lomculo. Kudinga ukufunda kabusha, ukuphakanyiswa kwezindinganiso nezinto ozazisayo. Kusho ushintsho endleleni yethu yokucabanga, uhlobo oluhlukile lwezindinganiso. Futhi kuhilela ukubona izinto ngombono kaNkulunkulu noKristu. Njengoba uPawulu akusho ngokucacile: “Noma nidla, noma niphuza, noma nenzani, konke kwenzeleni udumo lukaNkulunkulu.”—1 Korinte 10:31.
Umculo omningi wanamuhla awululethi udumo kuNkulunkulu. Ngokuphambene, uchilizela eceleni lezozinto ezimelelwa amaKristu nalezo abaningi abaye bazimisela ukuzifela emajele nasemakamu okuhlushwa. Ngakho-ke, kungani kufanele sikubheke njengokuzidela uma kudingeka senze ushintsho ohlotsheni lomculo esiluthandayo ukuze singabi ‘abathanda izwe nezinto ezisezweni’?—1 Johane 2:15-17.
Umculo Omuhle—Siyini Isihluthulelo?
Uma, ngenxa yokwazisa kwethu izimiso ezingokomBhalo, siwenqaba umculo ohlazisayo, singadlala muphi esikhundleni sawo? Nokho, kungani singahloli ezinye izinhlobo zomculo? Zingase zibe-mnandi futhi zakhe kakhulu kunalezo ebesizithanda esikhathini esidlule. Ngokwesibonelo, owayekade engumculi werock washo lokhu ngoshintsho alwenza:
“Kwadingeka ukuba ngenze umzamo ukuze ngiyeke isigqi esipholile serock ngiye ohlotsheni lomculo owamukelekayo nothandwayo iclassic eshona phansi. Kodwa lapho ngiqaphela ukuthi wawunengqondo ngokwengeziwe nokuthi ngangingasawujwayele umoya womculo omningi wanamuhla, waba lula futhi wanelisa ngokwengeziwe. Ngokushesha waba-mnandi. Ngaqaphela ukuthi kungakanani okwakuye kwangiphuthela ngenxa yokungafuni ukulalela ezinye izinhlobo zomculo.”
Kunezinhlobo eziningi zomculo weclassic, kanye nomculo womdabu nomunye wesimanje, onezinsimbi ezishaya kahle, amazwi ahlanzekile, futhi ongakhulumi ngefilosofi ephambene nezimiso zeBhayibheli. Isihluthulelo siwukuthola nokujabulela umculo ongeke ukuthonye kabi ukucabanga kwethu, umculo ‘olungileyo, omhlophe, otusekayo, omuhle, nobongekayo.’—Filipi 4:8.
Indima Yomculo Ekuphileni KomKristu
Kwabanye, enye indlela yokujabulela umculo omnandi ingokucula noma ngokufunda ukudlala insimbi yomculo. Kungatholakala injabulo enkulu ngokucula ngawedwa nangokucula ngamaqembu nemikhaya nabangane. Nokho, njengakuzo zonke izinto, ukulinganisela kudingekile. Ukuzijabulisa noma ukuzilibazisa akumelwe neze kuminyanise ukuphila komKristu. Uma lokho kungenzeka, ngisho nomculo omnandi, ngenxa yokweqisa, ungaba nemiphumela emibi. Khona-ke umKristu uyoba sengozini yokuba ‘othanda injabulo kunokuthanda uNkulunkulu.’—2 Thimothewu 3:4.
Umculo futhi uyingxenye ebalulekile yokukhulekela kwethu uJehova. KwaIsrayeli wasendulo, uAsafa nabafowabo bahlabelela: “Bongani uJehova, nibize igama lakhe, nizazise phakathi kwabantu izenzo zakhe. Hlabelelani kuye, nimhubele, nikhulume ngezimangaliso zakhe zonke.” Yebo, umculo ungadumisa uNkulunkulu futhi umthokozise.—1 IziKronike 16:8, 9.
Izingoma zoMbuso ezisetshenziswa oFakazi BakaJehova emaHholo abo oMbuso zisekelwe emibhalweni yeBhayibheli, amahubo, imithandazo, nezimfundiso. Asinakuwujabulela yini ngokujulile nawo lomculo ongcwele? Akufanele yini sibonise injabulo yethu ngokucula lamaculo ngomuzwa nangentshiseko? Ngisho nasemicimbini engahlangane nemihlangano yobuKristu, asinakukwenza yini ukuphila kwethu kube lula ngamalungiselelo amahle alamaculo abizwa ngokuthi amaKingdom Melodies?
Kulemiculo yeorchestra, bonke abadlali bangoFakazi BakaJehova. Abanye bayizingcweti ezidlala kumaorchestra amakhulu. Abanye, kuhlanganise nowayekade engumculi werock ocashunwe ngenhla, bayintsha eneziphiwo ejabulela izinhlobo eziningi zomculo onesizotha. Abazizwa belahlekelwa ngenxa yokulahla umculo obonisa isimo sengqondo sezwe, sobudemoni. Isibonelo sabo esihle sibonisa ukuthi nathi futhi, uma sivumela izimiso zeBhayibheli zilawule ukukhetha kwethu, singathola injabulo enkulu emculweni, kokubili wezwe nongcwele.—Efesu 5:18-20.
[Ibhokisi ekhasini 28]
“Umculo werock ukhanga entweni eyodwa kuphela, ukukhanga kokungazithibi, enkanukweni yobulili—hhayi uthando, hhayi umzwelo, kodwa inkanuko yobulili engekho obala nengalawulwa. . . . Intsha iyazi ukuthi irock inesigqi sobuhlobo bobulili.”—The Closing of the American Mind, ka-Allan Bloom.