Ukulunga Kubo Bonke—Ingabe Kuyoke Kufike?

IZIVAKASHI ezihambele eOld Bailey engokomlando yaseLondon, isakhiwo seNkantolo Enkulu Yezigelekeqe, laphaya phezulu zibona isithombe sowesifazane ofanekisela ukulunga. Ngesandla esisodwa, uphethe isilinganiso, okubonisa ukuthi ubufakazi buyolinganiswa ngokucophelela. Esinye isandla sakhe sibambe inkemba, yokuvikela abangenacala futhi ijezise abanecala. Kwezinye izindawo eziningi, ungabona izinhlobo ezingefani zaloluphawu, ngezinye izikhathi isithombe esibizwa ngokuthi “Ukulunga” sivalwe amehlo ukuze kuboniswe ukungakhethi kwakhe.a

Nokho, ungase ubuze: ‘Ingabe lokho akufanekiselayo, ukulunga kubo bonke, kukhona ngempela kunoma yiliphi izwe?’ Yebo, kuwo wonke amazwe kunemithetho, nalabo abaqikelela ukuba igcinwe. Bese kuba nabahluleli nezinkantolo. Ngokuqinisekile, abantu abaningi abanezimiso baye bazama ukusekela amalungelo abantu nokuqiniseka ukuthi kwenziwa ukulunga okufanayo kubo bonke. Noma kunjalo, kusobala ukuthi eminingi yemizamo yabo iye yahluleka. Cishe nsuku zonke, sibona, sizwe, noma sifunde ngokonakala, ububi, nokungalungi.

Cabangela isibonelo sowesifazane othile owamangalelwa enkantolo. Ngaphambi kokuba kuvezwe ubufakazi obumlahlayo noma obumthethayo, umahluleli wamazisa ukuthi ‘uzonakekela’ icala lakhe uma engabonana naye ehhotela, ngokusobala ngenjongo yobuhlobo obungemthetho. Yebo, labo okumelwe baqikelele ukuba kwenziwe ukulunga ngokuvamile baye babonakala bonakele noma bengafaneleki. Umagazini iTime wakhuluma ngelinye izwe eUnited States lapho kwamangalelwa khona abahluleli abathathu kwabayisihlanu basezinkantolo eziphakeme ngenxa yokuziphatha okungafanele ekusizeni umahluleli abakanye naye.

Ngaphezu kwalokho, lapho abantu bezwa ngezigelekeqe ezilokhu zibalekela isijeziso, abaningi baba abangasathembi lutho futhi bakuthole kulula ukwephula umthetho bona ngokwabo. (UmShumayeli 8:11) Nakhu esikufunda ngeNetherlands: “AmaDashi amaningi agxeka ezombangazwe ngokukhuthaza ukuyekelela okubangela ubugebengu. Amanye amangalela izinkantolo, ikakhulukazi abahluleli . . . abaqhubeka bekhipha izigwebo ezincane, ngezinye izikhathi ezithambe ngokweqile.” Kodwa isidingo sethu esikhulu sokulunga sihlanganisa okungaphezu kokulungisa izinhlangano ezimisa imithetho nesimiso sokwahlulela.

Uyazi ukuthi emazweni amaningi iqembu elincane elicebile liqhubeka liceba kakhulu, kuyilapho izindimbane ezimpofu zibhekana nokungalungi okungokwezomnotho. Ukungalungi okunjalo kuyanda uma abantu benamathuba amancane okwenza isimo sabo sibe ngcono, ngisho nokuzigcina bephilile, ngenxa yebala labo lesikhumba, isizinda sobuzwe, ulimi, ubulili, noma inkolo. Umphumela uwukuthi izigidi zibhuqwa ubumpofu, indlala, nezifo. Nakuba abantu abaningi emazweni anothile bezuza ezinqubweni ezithuthukisiwe zezokwelapha, izigidi ezingenakubalwa ziyagula futhi zife ngenxa yokungabi namandla okuthola imithi eyisisekelo ngisho namanzi ahlanzekile. Khuluma nabo ngokulunga! Okwabo ukubona ukungalungi kusukela bezalwa kuze kube sethuneni.—UmShumayeli 8:9.

Futhi kuthiwani ngalokho okubonakala kuwukungalungi okuvelayo okungenakulawulwa umuntu? Cabanga ngabantwana abazalwa bekhubazekile—beyizimpumputhe, bephazamiseke ngokwengqondo, noma ngokomzimba? Ingabe owesifazane ubengaba nomuzwa wokuthi kuwukulunga uma umntwana wakhe ezalwa ekhubazekile noma efile, kuyilapho abanye besifazane abaseduze begone izinsana ezinempilo? Njengoba ingxoxo elandelayo izobonisa, okunjalo okubonakala kuwukungalungi kuyolungiswa.

Nokho, kuleliqophelo lesikhathi, awuvumelani yini nokukhulumela okukumShumayeli 1:15? Lapho iNkosi ehlakaniphile nenokuhlangenwe nakho yavuma, ngokombono womuntu: “Okuyisigwegwe akunakuqondiswa, nokungekho akunakubalwa.”

Indoda edume ngisho nangokwengeziwe kwakunguJesu Kristu. KuLuka 18:1-5 sifunda umfanekiso wakhe womahluleli “owayengamesabi uNkulunkulu, enganaki-muntu.” Nokho, umfelokazi waqhubeka emncenga lowomahluleli ecela ukulunga ayekugunyazwa umthetho. Kodwa uJesu wathi umahluleli omubi wamsiza kuphela ngoba ukuncenga kwakhe kwase kuyisicefe. Ngakho, ungathi, uJesu wayeqaphela ukuthi ukungalungi kuningi. Eqinisweni, yena ngokwakhe kamuva wahlushwa futhi wabulawa ngecala elingamanga, okungokunye ukwehluleka okubi kakhulu ukwenza ukulunga!

Abaningi bakholelwa ukuthi ukhona uNkulunkulu okhathazekayo ngokungalungi. Phakathi neMisa kwelinye izwe eliseMelika ePhakathi, uPapa John Paul II wathi: “Uma unyathela umuntu, uma wona amalungelo akhe, uma wenza ukungalungi okukhulu kuye, uma umzwisa ubuhlungu obukhulu, ugqekeza futhi umthumba noma wone ilungelo lakhe lokuphila, wenza ubugebengu necala elikhulu kuNkulunkulu.” Amazwi amahle. Nokho, ukungalungi kuyaqhubeka. Ukungondleki kahle kulelozwe kuhlasela abantwana abayi-8 kwabayi-10 abangaphansi kweminyaka emihlanu ubudala. Amaphesenti amabili abantu angabanikazi bamaphesenti angama-80 ezwe elilinywayo.

Ngakho ingabe ukhona ngempela uNkulunkulu okhathazekayo ngokungalungi okunjalo okubi, uNkulunkulu oyoba nendaba ngisho nangokungalungi okukuthintayo? Ingabe uyoke aqikelele ukuba ukulunga kufike?

[Umbhalo waphansi]