UJehova—UMklami Omkhulu!

“ABAKLAMI badweba izithombe ezingenakubalwa zokuphuma kwelanga nokushona kwalo, futhi imisebenzi yabo ibalethela amakhulu, ngisho nezinkulungwane zamaRandi. Kodwa uJehova uNkulunkulu, uMklami Omkhulu noMsunguli wokushona nokuphuma kwelanga, usinikeza usuku ngalunye—mahhala. Okudaliweyo kuwadlula kude amakhophi adwetshiwe. Ingabe lokho akumelwe yini kusinikeze isizathu sokumazisa njengoMdali?” Kwasho kanjalo umjikelezi onguFakazi KaJehova eHawaii phakathi nenye yezinkulumo zakhe ebandleni.

Owesifazane ongakholelwa ebukhoneni bukaNkulunkulu, evakashele eHholo LoMbuso okokuqala, wayephakathi kwezilaleli. Waphawula amazwi esikhonzi, kodwa ukungabaza okunamandla ngobukhona bukaNkulunkulu kwakulokhu kubelesele. Nokho, njengoba elibangise ekhaya ngemoto ebuya emsebenzini cishe eminyakeni emibili kamuva, wabanjezelwa izimoto eziningi emgwaqweni. Lokhu kwamenza waqaphela ukushona kwelanga okukhethekile okwakumangalisa. Imicabango yakhe yabuyela kuleyankulumo yomjikelezi.

Uyalandisa: “Kunokuba ngicasulwe ukubanjezelwa izimoto, ngaqaphela ukushona kwelanga okuhle, futhi kwangikhumbuza ngokwashiwo isikhulumi ngokwazisa uJehova uNkulunkulu njengoMklami noMdali. Kwangenza ngacabanga, ‘Mhlawumbe lokho akusho kuyiqiniso; mhlawumbe ukhona ngempela uMdali.’ Ngacabanga ngakho njengoba ngangiqhubeka ngilibangise ekhaya, futhi ngalobo busuku ngashayela umngane wami ucingo lowo owayengimemele eHholo LoMbuso kuqala. Ngaqala ukufunda iBhayibheli, futhi manje ngikhulekela uJehova njengoNkulunkulu wami noMdali.”

Njengomhubi, lonkosikazi akazange amazise kuphela uJehova njengoMklami Omkhulu wendalo kodwa futhi wahuba izindumiso zakhe. Kwaloba umhubi: “Dumisani uJehova ezulwini, . . . Mdumiseni nina-langa nenyanga, nimdumise nina-zinkanyezi zonke ezikhanyayo. . . . Makuthathe kudumise igama likaJehova, ngokuba wayaleza, kwadaleka.”—IHubo 148:1-5.