Ukulunga Kwaphezulu—Isizathu Sokujabula!
“MASICULE . . . ‘uJehova uyabusa. Mdumiseni nina mhlaba.’” Lawomazwi ayeyingxenye yengoma eyayihlatshelwa izihambeli eziyizi-9 000 ezingama-Arab, amaGriki, amaNtaliyane, amaPutukezi nezaseSpain eMhlanganweni Wesigodi “Wokulunga Kwaphezulu” eMontreal, eCanada. Emizuzwini yokugcina yalomhlangano wezinsuku ezine, ababesemhlanganweni bathutheleka enkundleni yase0lympic Stadium ukuze bahlanganyele engomeni nezihambeli eziyizi-36 900 ezase zisenkundleni kakade.
Abanye bezinye izilimi babekhona ukuze bazokuzwa isimiso somhlangano esifanayo ezinkundleni zemidlalo nasemahholo omphakathi aseduze. Manje bahlanganyela nababesemhlanganweni abakhuluma isiFulentshi nabakhuluma isiNgisi ngendlela ewukubonakaliswa okushukumisayo kobuzalwane nokwethembeka—okuthile okubonakala kuphela phakathi kwezinceku zikaNkulunkulu wokulunga kweqiniso, uJehova. Ngenxa yokungalungi okusakazeke kabanzi ezweni lanamuhla, isihloko somhlangano esithi—“Ukulunga Kwaphezulu”—sasingesifike ngesikhathi ngempela. Sifakwe kuso sonke isimiso, lesihloko sathuthukisa ukwazisa kwethu ngalemfanelo ebalulekile kaJehova uNkulunkulu.
“Babusisiwe Abaqaphela Ukwahlulela”
Lesi kwakuyisihloko sosuku lokuqala lomhlangano. (IHubo 106:3) Inkulumo kasihlalo yokwamukela abasemhlanganweni yakwenza kwakhanya ukuthi ukulunga kwaphezulu akukhona nje ukwenziwa komthetho okungenazwela kwesigungu sesishaya-mthetho. Kunalokho, kuwukulondoloza lokho okulungile ngendlela engabandlululi nefanelekile ngokwezindinganiso zikaNkulunkulu. UJehova ubeka izindinganiso eziphakeme kunazo zonke futhi uphelele ekulungeni ngoba unamathela kuzo. Ngakho-ke, kungashiwo ukuthi “zonke izindlela zakhe zingukulunga.”—Duteronomi 32:4.
Lokhu kwaqokonyiswa ngokuqhubekayo enkulumweni eyisihluthulelo, enesihloko esithi “Ukulunga Kuwuphawu Lwazo Zonke Izindlela ZikaNkulunkulu.” UJehova akakaze achezuke ezindinganisweni zakhe zokulunga kodwa uye wasebenzisa izindlela zokulunga ezifanayo ekusebenzelaneni naso sonke isintu esingaphelele. (Malaki 3:6) Nakuba abanye bengase bambeke icala ngokungeyikho uNkulunkulu lokuthi akalungile ngoba bebona izinga elikhulu lokuntuleka kokulunga emphakathini wesintu, akuyena obangela ukungalawuleki kwesintu esonakele.
Njengoba uJehova engumthandi wokulunga, ulindele ukuba sibonakalise lemfanelo ngokwenza okulungile nokufanelekile. Kumelwe senze lokhu kubantu esikanye nabo nasemikhayeni yethu, ebandleni, nakuzo zonke izici zokukhulekela kwethu. Lokhu kuletha izibusiso ezicebile, njengoba kungabonwa kulokho okwanikezwa esimisweni phakathi nezinsuku ezintathu zokugcina zoMhlangano Wesigodi “Wokulunga Kwaphezulu.”
“Yamukelani Ukuyalwa Okunikeza Ukuqonda”
Usuku lwesibili lomhlangano lwalunesihloko esishiwo ngenhla, esisekelwe kuzAga 1:3. Sakhuthazwa ukuba ‘Samukele Isiyalo Sihlakaniphe,’ leso kuyisihloko sengxenye yokuqala esimisweni. Isiyalo esivela kuJehova siphawula indlela yokuphila ehlanganisa ukwenza amandla ethu engqondo nokuziphatha kuhlanzeke. Futhi siwukubonakaliswa kothando lukaNkulunkulu ngathi. (Heberu 12:4-11) Isiyalo esinjalo sisigcina siqaphela izindinganiso eziphakeme kunazo zonke zokulunga—ukulunga kwaphezulu.
Lamazwi aqondile alandelwa inkulumo ethi “Yibani Ngabahlanzekile Engqondweni Nasemzimbeni.” Yeka ukuthi yayishukumisa ingqondo kanjani! Yagcizelela kithi isidingo sokuba siziveze kuNkulunkulu singabantu abamsulwa, abahlanzekile, nabangcwele. Ngani? Ngoba uJehova uhlanzekile futhi ungcwele ngokuphelele—isimo esimenza ahluke kubo bonke onkulunkulu abangcolile bezizwe. Ekhumbula lenkulumo,omunye umzalwane osemusha waphawula:
“Kwahlolwa konke okuqondene nokuhlanzeka kwethu okungokwengqondo, kokuziphatha, okungokomzimba, nokungokomoya. Ukugqoka kwethu, ukuzilungisa, indlu, imoto, nobuntu konke kwanikezwa ukunakekela.” Omunye umdala waphawula: “Ukusebenzisa iseluleko esinjalo kuyokwenza abazalwane bethu bavelele kunanini ngaphambili kubantu ababazungezile futhi kuyonikeza isilinganiso esithile sempilo esingaziwa yizwe lilonke.”
Idrama yosuku lwanamuhla ethi “Ukuphawulelwa Ukusinda” yanezela umqondo wokuphuthuma esimisweni, ngoba ukulunga kwaphezulu kumelwe kwaneliswe ngokushesha. Ledrama ethintayo yakubonisa ngokucacile ukuthi kuyaphuthuma ngabo bonke ukuba bavule amehlo abo babone ukubaluleka kwezikhathi zethu. Ngempela, ngaphambi kokuba inkolo yamanga ibhujiswe, kumelwe sibalekele endaweni yokuphephela futhi ngokuqinisekile siphawulelwe ukusinda. Ntambama, uchungechunge lwezikhulumi lwaqinisekisa isidingo ‘Sokuyala Ngokulunga Phakathi Komkhaya.’ Amadoda nobaba bakhuthazwa ukuba babe nesimiso esingokomoya ekhaya, bahole emthandazweni, esifundweni, nasenkonzweni engcwele. Izimfanelo zobudoda zikababa nendlela asingatha ngayo ubunhloko bakhe kubonakaliswa umbono womntwana ngegunya, kokubili elaphezulu nelabantu. Ngakho-ke, obaba abangamaKristu kumelwe babonise ukulunga nokungaguquguquki esiyalweni sabo. Kudingeka babonise uzwela nemfudumalo, ngaleyondlela begcina umzila wokukhulumisana nabantwana babo uvulekile.
Abazali bakhuthazwa ukuba bavumelanise isiqondiso sabo nabantwana. Kubalulekile ukunikeza abantwana ukuqonda ngokucabangela lokho okumelwe kufundiswe nendlela okumelwe kufundiswe ngayo ukuze bafinyelele izinhliziyo zabo. Inhloso iwukwenza iqiniso lithonye wonke umkhaya ngendlela enhle.
Isikhulumi sokugcina saloluchungechunge senza isicelo esifudumele kubantwana sokwenza lokho uJehova akulindele kubo elungiselelweni lomkhaya. Intsha yanxuswa ukuba igweme umoya wokuhlubuka womphakathi wanamuhla oyekelelayo nokuba ijabulele isiyalo esinikeza ukuqonda.
Ngokukhulumela okusekelwe kuzAga 2:1-9, ababesemhlanganweni bakhuthazwa ukuba ‘Baqhubeke Bekuphenya Njengokungathi Amagugu Afihliweyo.’ Kwafanekiselwa ukuthi amagugu angokomoya angatholwa ngesifundo senkuthalo nokucwaninga. Sikhulumela isihloko esithi “Bhekani KuJehova Ukuze Nithole Ukuqonda,” isikhulumi esilandelayo sachaza ukuthi ukuqonda kungamandla okubukisisa isimo, ukubheka ngale kokuvamile nokuthola umqondo wokuthile. (Mathewu 13:13-15; Roma 3:11; Efesu 5:17) Khona-ke lolusuku oluvusa amadlingozi lwafika emvuthwandaba lapho i0lympic Stadium ixhunywa ngocingo namanye amadolobha amaningi aseCanada naseUnited States. Uchungechunge lwezingxenye ezimbili lwaqokonyiswa ukukhululwa kwencwadi enemiqulu emibili ethi Insight on the Scriptures, enamakhasi angaphezu kwezi-2 500 ezihloko ezifundisayo nemifanekiso eyojulisa ukwazisa kwethu ngezinto ezingokomoya.
“Ziqinisile, Zilungile Izahlulelo Zakhe”
Ngosuku lwesithathu, olwalunalesihloko esisekelwe kusAmbulo 19:2, kwakunokuningi kokusenza sijabule. Inkulumo ethi “Ukuhlanzeka Kokuziphatha Kuwubuhle Bobusha” yahlaba intsha umxhwele. Yakhuthazwa ukuba yazise ubuhle obuhambisana nokulondoloza izindinganiso zikaNkulunkulu zokuhlanzeka okungokomzimba, kokuziphatha, nokungokomoya. Amaculo akhuluma imbaba ngobulili, izinhlelo zethelevishini ezinokuziphatha okubi, amabhayisikobho nezincwadi okungcolile, nokucindezela kontanga kuyihlasela njalo intsha engamaKristu. Ngokomunye umthombo, yilowo nalowo nje umuntu omusha oze abe neminyaka eyi-19 engakaze abe nobuhlobo bobulili bangaphambi komshado. Kodwa izilaleli zalishaya ngemfudumalo ihlombe lapho isikhulumi sincoma izinkulungwane zentsha yoFakazi ezibonakalisa ihlukile ngokulondoloza indinganiso ephakeme yokulunga. Ukushada kwabantu abancane kugcwele izinkinga, futhi kwaboniswa ukuthi amazwi kaPawulu ngokushada ngenxa ‘yokushiswa inkanuko’ awabhekiselwe entsheni kodwa kulabo ‘asebedlule ekuqhumeni kwenkanuko yobusha.’—1 Korinte 7:9, 36, NW.
Esithi “Ningazibopheli Ejokeni Linye Nabangakholwayo” kwakuyisihloko esalandela. Ukulalela umyalo kaNkulunkulu wokushada ‘kuphela eNkosini’ kusilondoloza emiphumeleni ebuhlungu. (1 Korinte 7:39) Ngaphezu kwalokho, akukho okuqinisa umshado ukwedlula ababili abazinikele kuJehova futhi abanamathele ezindinganisweni zakhe zokulunga. Ngokulandelayo sasizwa ukuba sibone ukuthi kumelwe ‘Senze Kanjani Ngenhlonipho Nangokwesaba UNkulunkulu.”
Kwabe sekulandela isici esivelele esivusa amadlingozi—inkulumo ethi “Ukubhapathizwa Okuholela Ekwahlulelweni Okuhle,” ilandelwa ukucwiliswa kwabantu abasanda kuzinikezela. Kwagcizelelwa ukuthi kwakulindelwe kubo okwengeziwe kunokumane basuse ukungcola kwenyama. Ukuphenduka, ukuguquka, nenkonzo engcwele yasikhathi sonke kumelwe kuhambisane nokuzinikezela kwabo nobhapathizo uma bezojabulela ukwahlulelwa okuhle okuvela kuJehova.
Isimiso santambama ngokuqinisekile sasingesiphawulekayo. Exhunywe ngocingo nakuso, amalungu eNdikimba Ebusayo yoFakazi BakaJehova athakazelisa izilaleli eNyakatho Melika ngokunikezwa okushukumisayo kochungechunge oluthi “Isikhathi Esimisiwe Siseduze.” Emashumini amaningi eminyaka, oFakazi BakaJehova abagcotshiwe baye bamemezela izigijimi zesahlulelo saphezulu eBabiloni Elikhulu, umbuso wezwe wenkolo yamanga. Nokho, kulomhlangano lezigijimi zaba nesigqi esinamandla. IBabiloni Elikhulu belilokhu linecala lokweqa imiyalo kaJehova yokulunga. Lifanelwe ukubhujiswa, ngoba “izono zalo zifinyelele ezulwini, noNkulunkulu wakhumbula ukungalungi kwalo.” Ngakho-ke, njengoba ingelosi kaJehova imemezela, “kuyakufika ngalusuku lunye izinhlupheko zalo, ukufa, nokulila, nendlala, futhi liyakushiswa liqedwe ngomlilo; ngokuba iNkosi uNkulunkulu elahlulelayo inamandla.”—IsAmbulo 18:5, 8.
Sikhulumela isihloko esithi “‘Isifebe’ Esinyanyekayo—Ukuwa Nokubhujiswa Kwaso,” isikhulumi sokugcina saloluchungechunge sadonsela ukunakekela emvuthwandaba omkhulu wesAmbulo. Lomvuthwandaba ufinyelelwa lapho kushada iWundlu, elihlangana nomlobokazi walo, umuzi ongcwele, bebusisa isintu ngokuphila okuphakade. Igama likaJehova liyangcweliswa! Loluchungechunge lwaphetha ngamazwi ashukumisayo okuthi isikhathi esimisiwe siseduze ngaphezu kwalokho esingase sikucabange! Ngempela, umvuthwandaba omkhulu wesAmbulo useduze!
Lapho izilaleli zisashaya ihlombe, kwakhululwa incwadi entsha enamakhasi angama-320 ethi IsAmbulo—Umvuthwandaba Waso Omkhulu Useduze! Yeka isizathu sokujabula! Lencwadi ngokuqinisekile iyoba yindlela ephumelelayo yokumemezela ukuthi iBabiloni Elikhulu lahlulelwe, ukuthi izizwe manje zibhekene neArmagedoni, nokuthi uJehova usezokhipha isahlulelo. Bonke abanokwazisa mabaphendule isimemo ‘sikaMoya nomlobokazi’ sokuba ‘beze’ emanzini okuphila. (IsAmbulo 21:2, 9; 22:17) Lencwadi evusa amadlingozi ekhululiwe yalandelwa esinye isizathu sokujabula. Ziqiniseka ngenjabulo, izilaleli zasho kanye kanye izwi lesinqumo elicace kakhulu nelisobala elisho ukulenyanya kwethu iBabiloni Elikhulu.
“Uyakulandela Ukulunga Okuyikho”
Sisekelwe kuDuteronomi 16:20, lesi kwakuyisihloko sosuku lokugcina. Izikhulumi zasekuseni zagcizelela iphuzu lokuthi ukuze sizuze ekulungeni kwaphezulu, kumelwe sihluke ezweni. Cabangela inkulumo ethi “Ukulondoloza Impilo Engokomoya Ezweni Eligulayo.” Yabonisa indlela esingakugwema ngayo ukungcoliswa yizwe elingenampilo ngokomoya ngokuxwaya ubuthakathaka obungokwenyama, ithonya lezwe, “namaqhinga kaSathane.” (Efesu 6:11, 12; Roma 7:21-25; 1 Johane 2:15-17) Inkulumo ethi “Ingabe Ukholo Lwakho Luyalilahla Izwe?” yabonisa ukuthi uma sinokholo olunjengalolo lukaNowa, siyobonakala singabahlukile ezweni. Osukwini lukaNowa, kwakunomehluko ophawulekayo phakathi kwabasinda kuZamcolo nalabo ababhujiswa. Kunjalo nanamuhla.
Leliphuzu elibalulekile laqokonyiswa edrameni yeBhayibheli ethi “Izahlulelo ZikaJehova Kubantu Abadelela Umthetho.” Yaqhathanisa ngokucacile abantu abephula umthetho ezinsukwini zikaNowa noLoti nalabo abaphila esikhathini sethu. UNowa noLoti babonakala behluke ngokuphelele, futhi ukholo lwabo lwabalahla abantu ababephila ngesikhathi sabo. Ingabe thina ngabanye sibonakala sihlukile kubantu namuhla abahlala becabanga ngezinto ezibonakalayo nabangabathandi bokubi?
Inkulumo yeningi ethi, “Ukulunga Kubo Bonke Ngomahluleli KaNkulunkulu Omisiwe,” yayiwukuhlaziywa okuthakazelisayo kwenkulumo yomphostoli uPawulu kumadoda aseAthene eAreyophagu, noma eMars’ Hill. Njengoba sizungezwe ukungalungi okukhulu nenkolo yamanga, amazwi omphostoli asho okukhulu kithi. Sinesizathu sokujabula ikakhulukazi ngoba siphila esikhathini esibucayi sokwahlulela lapho singathatha khona isinyathelo sokuba sibe nokuvunyelwa uNkulunkulu. Yebo, njengoba uPawulu asho, uJehova uhlose ‘ukwahlulela izwe ngokulunga ngomuntu [uJesu Kristu] ammisele lokho, enika bonke ithemba ngokumvusa kwabafileyo.’—IzEnzo 17:31.
Njengoba isimiso sasisondela ekupheleni, sakhuthazwa ukuba ‘Siqhubeke Siphishekela Ukulunga Njengoba Umvuthwandaba Usondela.’ Lomhlangano wezinsuku ezine omuhle kakhulu wasigcwalisa ngokuzimisela ukwenza kanjalo. Isimiso sasihlaba umxhwele futhi ngezinga lobuzalwane bethu bezizwe zonke. Ngokwesibonelo, yeka injabulo okwakuyiyo ukuzwa ezithunyweni zevangeli ebezilokhu zikhonza ngokwethembeka ezabelweni zazo iminyaka eminingi!
Sashiya umhlangano sinokuzimisela okuvuselelwe ukuhlala sihlukile kulelizwe nokuzigcina sihlanzekile ngokomoya, ngokokuziphatha, ngokwengqondo, nangokwenyama. Njengoba sasihlanganyela kanye kanye engomeni yokuphetha, sajabulela ukuhlabelela izindumiso zikaJehova, sibonga ukuthi ukulunga kwaphezulu kusinikeza isizathu esikhulu sokujabula.
Emihlanganweni engaphezu kwe-125 eUnited States naseCanada kuphela, kwakukhona abantu abayisi-1 440 939 futhi kwabhapathizwa abayizi-19 878
[Isithombe ekhasini 26]
1, 2. Izincwadi i-Insight on the Scriptures nethi IsAmbulo—Umvuthwandaba Waso Omkhulu Useduze! zikhululwa eYankee Stadium, eDolobheni laseNew York amalungu eNdikimba Ebusayo uJ. E. Barr noW. L. Barry
3, 4. Izigcawu zedrama yeBhayibheli ethi “Izahlulelo ZikaJehova Kubantu Abadelela Umthetho”
5. Izinkulungwane zabhapathizwa zibonakalisa ukuzinikezela kwazo kuJehova uNkulunkulu
6. Isigcawu sedrama yosuku lwanamuhla ethi “Ukuphawulelwa Ukusinda”
7. Izithunywa zevangeli ezihambele, njengoJohn Cutforth wasePapua New Guinea, zahlanganyela okuhlangenwe nakho kwazo nababesemhlanganweni