IBhayibheli Nokuziphatha Kwentsha

“Kubonakala sengathi intsha yamukele ifa lezwe elibi kunawo wonke angatholakala uma kuziwa ekuchayekeni kwayo ezinkulumweni zobulili: Amabhayisikobho, umculo, umsakazo neTV kuyitshela ukuthi ubulili buyamangalisa, buyajabulisa, buyaqabula . . . Nokho, ngesikhathi esifanayo, intsha ithola inkulumo yokuthi amantombazane amahle kumelwe enqabe.”—The Alan Guttmacher Institute.

INTSHA yanamuhla iye yakhula enkathini yokuziphatha okukabili. Nokho, iBhayibheli linikeza isiqondiso esikhanyayo, esingagwegwesi ngokuziphatha okungokobulili. Lapho izinhlelo zemfundo yobulili zithambekele ekugxileni ekuvimbeleni ukukhulelwa, iBhayibheli libonisa ukuthi bona ngokwabo ubuhlobo bobulili bangaphambi komshado buyinto okumelwe igwenywe. “Ningaqiniseka ngempela ukuthi akekho ozitika ebufebeni [obuhlanganisa ubuhlobo bobulili bangaphambi komshado] noma ekungcoleni noma ekuziphatheni okuxekethile . . . ongazuza utho lombuso kaNkulunkulu,” kusho iBhayibheli. (Efesu 5:5, The Jerusalem Bible) Ngokusobala, ubuhlobo bobulili bumelwe bulinganiselwe emshadweni.

Ngakho impendulo enkingeni yokukhulelwa kwabeve eshumini elinambili ayikhona ukufundisa intsha ukuvimbela inzalo, kodwa ukuyinikeza ukuqondisa okungokomoya nokokuziphatha. IBhayibheli likwenza kucace ukuthi umthwalo wemfanelo kabani ukunikeza lokhu kuqondisa: “Nani-boyise, ningabathukuthelisi abantwana benu, kodwa nibondle ngokuyala nangokuqondisa kweNkosi.”—Efesu 6:4.

Nokho, kokunye ukuhlola, intsha yacelwa ukuba “isho izinga lokunganeliseki nokwaneliseka kwayo ngalokho abazali bayo abayazisa khona ngobulili. Ukulinganisa okwenziwa yintsha kwabonisa ukuthi omama ngokuvamile basezingeni eliphansi lokwanelisa. Ukulinganiswa kobaba kwakunganelisi ngempela.” Khona-ke ingabe kufanelekile ukulindela abazali ukuba banikeze abantwana babo isiqondiso ezindabeni zobulili?

Ukunikeza Intsha Isiqondiso Sokuziphatha

KuzAga 4:1-4, iNkosi uSolomoni inxusa intsha: “Zwanini, madodana ami, ukulaya kukayise, . . . Ngokuba ngangiyindodana kubaba, ethambileyo neyodwa emehlweni kamame. Wangifundisa, wathi kimi: Inhliziyo yakho mayibambe amazwi ami.” Kusobala ukuthi uSolomoni wayekwazi ukuxoxa ngisho nezinto ezijule kakhulu noyise; uSolomoni ngokwakhe uyaqhubeka axoxe ngokuziphatha okubi kobulili ngendlela engagunciyo.—IzAga 5:1-19.

Phakathi koFakazi BakaJehova, imikhaya eminingi ilondoloza ingxoxo enjalo ekhululekile nabantwana bayo—futhi iyaphumelela kakhulu! Benza okungaphezu nje kokutshela abantwana babo ukuthi bathi “Cha!” ngokuqondene nobuhlobo bobulili. IBhayibheli libasiza ukuba banikeze abantwana babo izizathu ezizwakalayo zokugwema ukuziphatha okuxekethile. Phinda ucabangele amazwi kaSolomoni. KuzAga 5:3, 4, ukhuthaza izinsizwa ukuba zigweme ubuhlobo bobulili nesifebe. “Ngokuba izindebe zowesifazane ondindayo [isifebe] ziconsa izinyosi; umlomo wakhe ubushelezi kunamafutha.” Yebo, ukulangazela kokuziphatha okubi kungase kubonakale kukhanga kakhulu. Nokho, uSolomoni uyaxwayisa: “Kepha ekugcineni umunyu njengomhlonyane, ubukhali njengenkemba enezinhlangothi ezimbili.”

NjengoSolomoni, abazali bangabonisana nabantwana babo ngemiphumela yakamuva yobuhlobo bobulili. Unembeza okhathazekile, ukukhulelwa okungafunwa, izifo ezithathelwana ngokuhlangana kobulili njengengculaza—lena imivuzo ebuhlungu yenjabulo yesikhashana ekhohlisayo. USolomoni ngokuqhubekayo unxusa intsha ukuba ‘inganiki abanye udumo [lwayo].’ (IzAga 5:9) Ingabe akubonisi ukuntula ukuzihlonipha ngomusha ukuzinikela kothile ongenasithakazelo somshado? Ingabe akwehlisi isithunzi ukukhonza nje njengendlela yokwanelisa izifiso zobulili zobugovu zomuntu siqu noma zomunye umuntu? Abazali bangasiza abantwana babo ukuba baqaphele lamaqiniso.

USolomoni wanikeza esinye iseluleko ngokusebenzelana nomuntu oziphethe kabi: “Dedisela kude naye indlela yakho, ungasondeli emnyango wendlu yakhe.” (IzAga 5:8) Ngokufanayo, abazali banganikeza intsha iseluleko esiwusizo ekuvimbeleni izimo ezilimazayo. Bangayikhuthaza ukuba ingapholi nabantu abangenazimiso. Futhi lapho ifinyelela izinga lokufanelekela ukuqomisa, ingakhuthazwa ukuba ithathe izinyathelo eziwusizo ukuze igweme ukuziphatha okubi. Ngokwesibonelo, umbhangqwana othandanayo ungase uhlele ukuba othile ahambe nawo njalo uma uphola. Ingabe kuyisidala? Mhlawumbe kunjalo. Kodwa kungcono ukuthatha izixwayiso ezinengqondo kunokuba “ububule ekugcineni, lapho umzimba wakho nenyama yakho kuqediwe, ngokuthi: Yeka ukuzonda kwami ukulaywa . . . Angilalelanga izwi labafundisi bami.”—IzAga 5:11-13.

Ukusiza Intsha Yesabe UJehova

Ngokokunye ukubala, kunentsha engaphezu kwezigidi eziyi-12 eshiswa yinkanuko yobulili eUnited States kuphela. Ngisho nengculaza ewumqedazwe iye yenza okuncane ukuqeda leligagasi lokuziphatha okubi. Nokho, oFakazi BakaJehova bazama ukufaka kubantwana babo okuthile okunethonya ngokwengeziwe kunokwesaba ingculaza noma ukukhulelwa: ukwesaba uJehova uNkulunkulu okunempilo. USolomoni ukhumbuza intsha kuzAga 5:21: “Ngokuba izindlela zomuntu ziphambi kwamehlo kaNkulunkulu; uyenza yonke imikhondo yakhe ukuba ilingane.” UJohn, ongomunye woFakazi BakaJehova futhi ongubaba wabantwana abane, unikeza leseluleko: ‘Okusizayo, ukuba abantwana babe nokwesaba uJehova kothando. Ungesabi ukutshela umntanakho ukuthi uJehova angadunyazwa yizenzo zethu zobugovu.’—Qhathanisa nezAga 27:11.

Yiqiniso, ukuze ukwesaba uNkulunkulu kube yisithiyo esisebenzayo ekuziphatheni okubi, uNkulunkulu kumelwe abe ngokoqobo ngempela komusha. (Qhathanisa namaHeberu 11:27.) Abazali bangasiza abantwana babo ukuba bahlakulele ubuhlobo obungokoqobo noNkulunkulu ngokutadisha njalo iBhayibheli, ukuthandaza nsuku zonke, nokuhlangenwe nakho kwangempela ekuphileni. Lapho omusha efinyelela ekuqapheleni ukuthi uNkulunkulu uyamkhathalela, uyoshukumiseleka ukuba agweme ukuziphatha okungase kungamthokozisi.—1 Petru 5:7.

Ngokuthakazelisayo, ubuhlobo bomusha noNkulunkulu bungase futhi busize ukugcwalisa izidingo ezithile lezo ngokuvamile ezihlala zingagcwalisiwe kwenye intsha eningi. Ngokwesibonelo ochwepheshe bathi, ukuziphatha okuxekethile ngokuvamile kuyindlela yomusha yokulwisana nemizwa yokungabi namandla noma ukuntula ukuzethemba. Nokho, imizwa enjalo, akudingeki ihluphe umuntu onobungane noJehova! Omusha onjalo angase athi: “UNkulunkulu ungumsizi wami; iNkosi ikubo abaphasa umphefumulo wami.”—IHubo 54:4.

Umbono Olinganiselwe Wobulili Nomshado

Yiqiniso, abazali abafuni ukuba abantwana babo babe nenhlonipho eyeqile noma umbono ophambene ngobuhlobo bobulili. Nakuba iBhayibheli libulahla ubufebe, liyabonisa futhi ukuthi ukuhlangana ngokobulili kungase kube kuhle ngempela—okungukuthi, ngaphakathi kwesibopho somshado. Esebenzisa ulimi olusankondlo uSolomoni uyanezela: “Mawubusiswe umthombo wakho, uthokoze ngomfazi wobusha bakho . . . Amabele akhe mawakudelise ngesikhathi sonke, weqiwe njalo luthando lwakhe.”—IzAga 5:18, 19.

Ngokucabangela lombono ophakeme wobuhlobo bomshado, akukho sizathu ngabazali sokuba bazizwe bezinyeza ngokuxoxa izinto ezijulile. UJohn (okubhekiselwe kuye ekuqaleni) uthi: “Ngaso sonke isikhathi sixoxa nabo ngokwethembeka, ngakho indaba yobulili ayisiyo imfihlo. Siqokomisa ukuthi buyisipho esivela kuMdali, uJehova, okumelwe sijatshulelwe yindoda nomfazi ngesikhathi esifanele.” Omunye ubaba wabafana ababili abeve eshumini elinambili uthi: “Kusukela besebancane, siye saxoxa nabo ngobulili ngokukhululekile. Siye sazama ukubafundisa umbono ophakeme wenhlonipho yothando nobulili. Sigcina ingxoxo eqhubekayo.” Ngokuphawulekayo, abantwana babo baye bahlala bemsulwa.

Ukwenza Intsha “Ihlakaniphele Insindiso”

Umphostoli uPawulu wabikezela: “Abantu ababi nabakhohlisi bazakuqhubekela phambili ebubini.” (2 Thimothewu 3:13) Ngakho izindinganiso zokuziphatha ziyoqhubeka ziwohloka. Ukuziphatha okuxekethile kwentsha nokukhulelwa kuyoqhubeka kuhlupha umphakathi.

Abazali abesaba uNkulunkulu bayophendukela eBhayibhelini ukuze benze abantwana babo “bahlakaniphele insindiso.” (2 Thimothewu 3:15) Uma uqaphela ukuthi wena ngokwakho udinga ukufundiswa iBhayibheli, zizwe ukhululekile ukuthintana noFakazi BakaJehova ngokubhalela abanyathelisi balomagazini. Bayokujabulela ukukulungiselela ukuba wamukele leyomfundo mahhala. OFakazi BakaJehova futhi bangakunikeza izincwadi ezinjengencwadi Ubusha Bakho—Ukuthola Okungcono Kakhulu Kubo.a Iqukethe ukwaziswa okungokomBhalo okuye kwasiza izinkulungwane zentsha ukuba ibalekele izingibe zezwe zokuziphatha okubi.

Nokho, kuthiwani ngamantombazane kakade aseye aba nokuhlangenwe nakho kosizi lokukhulelwa ngokungemthetho? Izimo ezinjalo zisengalungiswa. UNkulunkulu ‘uthethelela ngendlela ebanzi’ lowo ozisola ngempela ngenkambo yakhe yokuziphatha. (Isaya 55:7) Nakuba ukuba umzali oyedwa kungelula, umuntu angaphumelela ngokusebenzisa izimiso zeBhayibheli. Owesifazane osemusha owaba nabantwana abathathu engashadile ngaphambi kokuba umKristu uye wenza lokho kanye. Uzama ukusebenzisa iZwi likaNkulunkulu emkhayeni wakhe. Ngokuhlanganyela eduze nebandla loFakazi BakaJehova, uye wazuza induduzo enkulu nokusekelwa. Uthi: “Ngokuqinisekile kuyamangalisa ukukhonza uNkulunkulu othethelela kangaka, nokuba nabazalwane nodade abaqonda ngalendlela. Okokuqala ekuphileni kwami, ngizizwa ngicocekile futhi ngiphile kahle, ngokomoya nangokwenyama.”

Yiqiniso, kungaba ngcono kakhulu ukugwema izinkinga zobulili bangaphambi komshado zisuka nje. Ngokujabulisayo, izinkulungwane zentsha namuhla zenza kanjalo ngoba zilandela iseluleko seBhayibheli esingaphelelwa yisikhathi.

[Umbhalo waphansi]

[Amazwi acashunwe esihlokweni ekhasini 6]

OFakazi BakaJehova bazama ukufaka kubantwana babo okuthile okunethonya ngokwengeziwe kunokwesaba ingculaza noma ukukhulelwa: ukwesaba uJehova uNkulunkulu okunempilo

[Amazwi acashunwe esihlokweni ekhasini 6]

Ngokokunye ukubala, kunentsha engaphezu kwezigidi eziyi-12 eshiswa yinkanuko yobulili eUnited States kuphela

[Isithombe ekhasini 5]

Abazali bangagcina ingxoxo eqhubekayo nabantwana babo uma kuziwa ezindabeni zobulili

[Izithombe ekhasini 7]

Intsha engamaKristu iyogwema ukuziphatha okungase konakalise ubuhlobo bayo noNkulunkulu