Imihlangano Yesigodi “Yokulunga Kwaphezulu”
YEKA ukuhlupheka okukhona emhlabeni ngenxa yokuntuleka kokulunga! Ukusetshenziswa kabi kwamandla okusakazekile kwabanye abaholi bezombangazwe kuye kwaphumela ekuhluphekeni okungafanele. Izithakazelo zezentengiselwano zobugovu zicindezela abantu, kuphumele ebunzimeni obukhulu. Khona-ke kukhona ukucindezela kwabaholi benkolo namuhla abafana nalabo bosuku lukaJesu, nalabo athi ngabo: “Babopha imithwalo enzima, bayibeke emahlombe abantu; kepha bona abavumi ukuyifukula ngomunwe wabo.” (Mathewu 23:4) Kukhona futhi ukusetshenziswa kabi kwamandla okuningi nokungalungi okuwumphumela phakathi kwemikhaya.
Umlando ubonisa ukuthi kungaba yize ukubheka kubantu abangaphelele, nakuba bengase babe nezinhloso ezinhle, ukuba baxazulule izindaba ezinjalo. Kodwa emazulwini kunoMuntu oPhakeme noMahluleli, uJehova. UnguNkulunkulu wokulunga. Ngokufanelekile, uMose wahlabelela: “Uyidwala, umsebenzi wakhe uphelele, ngokuba zonke izindlela zakhe zingukulunga; unguNkulunkulu wokuthembeka ongenakonakala; ulungile, uqotho yena.”—Duteronomi 32:4.
Sekuyisikhathi eside uJehova ebekezelele konke ukungalungi kwalelizwe, kodwa ngeke enze kanjalo sonke isikhathi. Kukhona isikhathi esimisiwe sokuba athathe isinyathelo bese kugcwaliseka isiprofetho esitholakala kuIsaya 14:4-7 esithembisa ukuthi lonke uhlobo lokubusa ngonya luzophela nokuthi ‘wonke umhlaba uzophumula.’
Ngenxa yokholo lwabo oluqinile kulezithembiso ezingokwesiprofetho, oFakazi BakaJehova bajabulela ukumemezela kuyo yonke indawo ukuthi ngokushesha uJehova uzoqeda konke ukucindezela, ububi, nokungalungi ngokuletha ukubusa okuphelele koMbuso. Khona-ke akekho oyolimaza noma onakalise, ngoba ‘umhlaba uyogcwala ukumazi uJehova njengamanzi asibekela ulwandle.’—Isaya 11:9.
Ukuze siqinise ukholo lwethu ezahlulelweni zikaJehova zokulunga, imihlangano yesigodi ka-1988 izoba nesihloko esithi “Ukulunga Kwaphezulu.” Ukugcizelela lesihloko ngeke kusishukumisele nje kuphela ekwenzeni ithemba lethu lokulunga kwaphezulu laziwe kodwa futhi kuyosikhuthaza ukuba senze ngokuvumelana nokulunga kwaphezulu kukho konke ukuziphatha.
Njengezinceku zikaJehova, sonke siyazi ukuthi ngenxa yesiphambeko sabazali bethu bokuqala, ukuthambekela kwethu kusebugovwini, nokungalungi. Ngakho-ke siyakujabulela ukwaziswa okuhle esiyokuthola ngezinkulumo zeBhayibheli, imiboniso, izingxoxo, namadrama okuyogcizelela isidingo sokusekela ukulunga kwaphezulu. Lokhu kusekuvumelaneni nesiyalo esikuMika 6:8, ‘sokwenza ukulunga kuphela nokuthanda umusa, nokuhamba noNkulunkulu wethu ngokuthobeka.’ Lokhu kwenza kube nokuthula, ukwaneliseka, nenjabulo; futhi kusiza ekuqhubekiseleni phambili ukushunyayelwa kwezindaba ezinhle emhlabeni wonke.
Isici esivelele salemihlangano siyoba ukuthi amadolobha amaningana ayoxhunywa ngezingcingo ngenxa yezinkulumo ezikhethekile eziyonikelwa ngamalungu eNdikimba Ebusayo yoFakazi BakaJehova. Futhi, ngenxa yalemihlangano izithunywa zevangeli emhlabeni wonke ziyolungiselelwa izinto zokuhamba; lokhu kuyozenza futhi ukuba zikwazi ukuvakashela imindeni yazo.
Ngentando kaJehova, iMihlangano Yesigodi “Yokulunga Kwaphezulu” iyoqala ngoLwesine cishe ngo-1:30 p.m. futhi iyophela ngo-4:00 p.m. ngeSonto ntambama. Masihlele izimo zethu ukuba sibe khona lapho isimiso siqala nokuba sihlale kuze kube sengomeni nasemthandazweni wokuphetha nsuku zonke. Fika unesifiso esihle sokudla okungokomoya futhi uhlomele ukuthatha amaphuzu. Qiniseka ukuthi uJehova usigcinele “idili” lezinto ezinhle eliyosiqinisa futhi lisishukumisele umsebenzi ongaphambi kwethu.—Isaya 25:6; IsiHlabelelo SeziHlabelelo 2:4.
Yebo, ngamunye makeze ezimisele ukuthola isibusiso esingokomoya esikhulu ngangokunokwenzeka eMhlanganweni Wesigodi “Wokulunga Kwaphezulu.”