Injabulo Ngobuhlobo Obuyigugu
“INJA ephilayo ingcono kunengonyama efileyo.” (UmShumayeli 9:4) Ngalawomazwi ambalwa, iNkosi uSolomoni wakudala washo iqiniso eliyisisekelo lokuthi ukuphila kubaluleke kunanoma yini yezinto ezibonakalayo noma imigomo efiselekayo esingase sithembe ukuyifinyelela. Ngaphandle kokuphila, asinakuzuza ngisho nakweyodwa yalezizinto. Yebo, ukuphila kuyinhloko ekuphishekeleni kwethu injabulo.
Okuthile “Okungcono Kunokuphila”
Nokho, njengoba ukuphila kuyigugu, kunokuthile okungcono kunakho. ‘Ingabe kukhona?’ ungase ubuze. ‘Kungaba yini eyigugu kunokuphila ngokwakho?’
INkosi uDavide kaIsrayeli wasendulo yasinikeza impendulo. Ekhuluma noMdali, uJehova uNkulunkulu, wathi ngokwazisa okujulile: “Ngokuba umusa wakho wothando ungcono kunokuphila, izindebe zami ziyakukudumisa.” (IHubo 63:3, NW) Amazwi aqotho kaDavide abonisa ukuthi ukwamukela umusa wothando kaNkulunkulu, osekelwe ekubeni nobuhlobo obuhle naye, kuyigugu kakhulu kunokuphila ngokwakho. Kungani kunjalo?
Lokho Okwenza Ukuphila Kube Nokwenzeka
Ake sithi wawunikezwe isipho, okuthile owakuthanda ngempela. Ngempela ubungakujabulela ukwamukela isipho futhi mhlawumbe uthole injabulo enkulu ekusisebenziseni. Kodwa ubuyobe ungabongi ngempela, uma imicabango yakho igcina esiphweni hhayi kokuphile. Ingabe kwakungebona ubuhlobo bomuntu siqu phakathi kwakho nomniki wesipho okwashukumisela isipho? Uma lobobuhlobo babungekho, nesipho besingenakuba khona nokusijabulela bekungenakuba khona.
Kuyiqiniso nangokuphila. Njengoba kuyigugu, kumelwe sikhumbule ukuthi ukuphila kwethu kuvelaphi nokuthi kuye kwasekelwa kanjani. Ngokuqinisekile asizidalelanga khona, futhi asinakukusekela ngaphandle kwawo wonke amalungiselelo amangalisayo uJehova aye wawenza emhlabeni. (IHubo 100:3; IzEnzo 14:17) Lona kanye iqiniso lokuthi siyaphila, nokuthi ngokungangabazeki siyakujabulela ngezinga elithile, liwukubonakaliswa komusa wothando ngoMdali Omuhle, uJehova uNkulunkulu. Ingabe asiboni ukuthi kungani iNkosi uDavide ngenhliziyo yonke yaba nomuzwa wokuthi ‘umusa wothando kaNkulunkulu ungcono kunokuphila’?
Kunesinye isizathu sokuba ubuhlobo obuvunyelwe noMdali bube obubaluleke kakhulu kunokuba nokuphila ngokwakho—ikusasa lethu lixhomeke kubo. Ake sibone lokhu ukuthi kukanjani.
Ingabe awuvumi ukuthi ukuphila kuyaguquguquka futhi kugcwele ukungaqiniseki? Umuntu angase asebenze kanzima iminyaka eminingi ukuze afinyelele umgomo othile wezinto ezibonakalayo awucabangela njengobalulekile. Kodwa, ukufa ngokushesha kumphuce yonke into aye wayizuza. Kunjengoba iNkosi ehlakaniphile uSolomoni yasho: “Ngokuba umuntu unanzuzoni yawo wonke umshikashika wakhe nokukhandleka kwenhliziyo yakhe akushikashikile phansi kwelanga na? Ngokuba zonke izinsuku zakhe zinobuhlungu, nomsebenzi wakhe ulusizi; yebo, nasebusuku inhliziyo yakhe ayiphumuli; nalokho kuyize.”—UmShumayeli 2:22, 23; qhathanisa no-UmSh 2:3-11.
Naphezu kwalokhu, kuyinjongo yoMdali wethu onothando ukuthi bonke labo abamthandayo nabamlalelayo bayokhululwa ekukhungathekeni nobuze bethu banamuhla. UJehova uyasiqinisekisa ngesithembiso sakhe esimangalisayo: “Abayikwakha, kuhlale omunye; abayikutshala, kudle omunye, ngokuba izinsuku zabantu bami ziyakuba-njengezinsuku zomuthi, nomsebenzi wezandla zabakhethiweyo bami uyakugugela kubo.”—Isaya 65:22.
Ingabe lokho kubonakaliswa komusa wothando kaNkulunkulu akungcono kunokuphila kwethu kwamanje okulinganiselwe nokungenasiqinisekiso? Ukwamukela umusa wakhe wothando, yebo, ukuphila kuloloHlelo Olusha nokujabulela ukuphila okunenjongo nengqondo ngempela kuyoba umgomo obaluleke kakhulu. Ukuze azuze kulelothemba elijabulisayo, umuntu kumelwe athole ukuvunyelwa uJehova manje futhi alondoloze ubuhlobo obuseduze naye nabantu bakhe.
Ukuqhathanisa Isithakazelo Sesikhashana Nenzuzo Yesikhathi Eside
Ngokwamaphuzu angenhla, ngokuqinisekile kuyoba ukungacabangeli isikhathi esizayo futhi okungahlakaniphile ngathi ukuzigcina simatasa kuphela ngeminako yezithakazelo zethu, kungaba udumo, umcebo, umsebenzi, umgomo wemfundo ephakeme, imigomo yomuntu siqu, noma yini enye ecatshangelwa njengebalulekile kulesimiso sezinto. Nakuba lemigomo ingase ingabi mibi ngokwayo, ukuphishekela omunye wayo njengento ebaluleke kakhulu kungasenza singanaki imithwalo yethu yemfanelo phambi koMdali wethu. Ekugcineni, singase silahlekelwe umusa wakhe futhi sihluleke ukuzuza “ukuphila okuyikho.”—1 Thimothewu 6:19; Luka 9:24.
Ukuthatha inkambo enjalo kungafaniswa nomusha oyeka esikoleni futhi ayosebenza njengesisebenzi esingafundiswanga ukuze nje athole imali azoyichitha. Angase abe nomuzwa wokuthi ekugcineni ukhululekile emithethweni yasesikoleni futhi unesikhathi sokuzithokozisa. Kodwa ingabe akadeli inhlala-kahle yakhe yesikhathi eside ngenxa yezithakazelo ezithile ezingenasiqinisekiso zesikhathi esifushane? Khona-ke, ngokufanayo, ingabe umuntu akacabangi ngekusasa uma enganaki ubuhlobo bakhe noMdali ngoba ematasa ngokuphishekela umgomo othile wakhe siqu?
Njengoba sonke simatasatasa, ngokuvamile siyakwazi ukuthola isikhathi namandla okwenza izinto esizicabangela njengezibaluleke ngempela, akunjalo? Kanjalo, ngokusiqonda okungenaphutha isimo somuntu, uJesu ubonisa ngokukhanyayo: “Ngokuba lapho kukhona ingcebo yakho, nenhliziyo yakho iyakuba-khona lapho.”—Mathewu 6:21.
Ngakho-ke kukuyiphi “ingcebo” oye wabeka kuyo inhliziyo yakho? Ubucwebecwebe nobukhazikhazi balelizwe bungase bubonakale bukhanga. Kodwa zibuze: Zihlala isikhathi eside kangakanani lezinzuzo ezicatshangelwayo ezitholakala ezintweni ezinjalo? Ingabe ziletha injabulo yeqiniso noma nje ukuzijabulisa kwesikhashana, njengomlaliso, oshiya umphumela ongathandeki noma ngisho obuhlungu?
Yenza Ukukhetha Okuhlakaniphile
Kunesifundo esibalulekile esingafundwa kubantu bosuku lukaLoti. UJesu wathi: “Babedla, bephuza, bethenga, bethengisa, betshala, bakha.” Ngamanye amazwi, babematasa bephishekela lokho ababekucabangela njengokubalulekile, ngaphandle kokunaka intando kaNkulunkulu. Waba yini umphumela? “Kepha ngosuku uLoti aphuma ngalo eSodoma lana umlilo nesibabule kuvela ezulwini, kwababhubhisa bonke.” Khona-ke, ngokwenzuzo yethu uJesu wenezela: “Kuyakuba-njalo ngosuku eyakwambulwa ngalo iNdodana yomuntu.”—Luka 17:28-30.
Zonke izimpawu zibonisa ukuthi “lolosuku” selufikile. Ngenxa yokukhathalela inhlala-kahle yethu yaphakade, uJehova uNkulunkulu ulokhu ekhipha izimemezelo eziphindaphindayo ngeZwi lakhe nangabantu bakhe abahlelekile kuzo zonke izizwe. Isimemo siwukushiya iminako yenyama nokubuyisana naye. Ngempela kuyoba ubuwula ngathi ukuvumela izithakazelo zethu siqu zithathe sonke isikhathi sethu namandla, bese sihluleka ukusabela kulolubizo lothando. Kunalokho, njengoba umphostoli uPawulu asho, kumelwe siqaphele ukuphuthuma kwezikhathi: “Bheka, manje kuyisikhathi esihle kakhulu; bheka, manje kulusuku lwensindiso.”—2 Korinte 5:20; 6:2.
Ingabe uyoba phakathi kwalabo ababusiswe ngethemba elijabulisayo lokusinda ekupheleni kwalesimiso sezinto esibi bangene oHlelweni Olusha lokulunga lwesithembiso sikaNkulunkulu? Lokho kuxhomeke kulokho okucabangela njengokubaluleke kakhulu ekuphileni kwakho manje nakulokho okwenzayo ngokuthola ubuhlobo obuvunyelwe noNkulunkulu. Ukukhetha kungokwakho!
[Izithombe ekhasini 5]
Uma umbonga okuphayo . . .
. . . kuthiwani ngomuphi omkhulu, uJehova uNkulunkulu?