Amaphayona Ekhulu Lama-20

IGAMA elithi “iphayona” laziwa izwe lonke. Ngokuvamile libhekisela kumuntu ongowokuqala ukuhlala endaweni, abalungiselela indlela labo abazakuza kamuva. Imizamo yamaphayona angaphambili ekuvuleni amasimu amasha iye yaba ngeyenkonzo enkulu ezizukulwaneni ezilandelayo.

Ingabe kusekhona amasimu amasha okusamelwe avulwe. Yebo. Hhayi emkhathini ongaphandle, kepha khona lapha emhlabeni. Sidinga amaphayona angavula indlela yokuphuma obishini lwamanje lokuziphatha, lwezomnotho nolwezombangazwe lolo umuntu aye wazifaka kulo. Iqembu elincane labantu abazinikezele belibonisa indlela yokuphuma ngaphezu kweminyaka eyikhulu. Laba amaphayona angempela ekhulu lama-20 eminyaka.

OFakazi BakaJehova basebenzisa iBhayibheli njengesibani sendlela yabo. (IHubo 119:105) IZwi likaNkulunkulu elilotshiwe libaholela eMbusweni wakhe njengoyiyona kuphela indlela yokuxazulula izinkinga ezinzima ezihlula ababusi babantu. Akukhona nje ukuthi ukuhlupheka kwanamuhla kuyakususwa kodwa izithembiso ezinhle zikaJehova zithembisa okungaphezulu kwalokho. Esikhathini esizayo umhlaba uyoba yiPharadesi. (IsAmbulo 21:1-4) Lokhu kuyogcwaliswa ngokaNkulunkulu uhulumeni wasezulwini ngoKristu Jesu njengeNkosi. UIsaya 9:7 uthi: “Umbuso uyakuba-mkhulu, ukuthula kungabi-nakuphela esihlalweni sobukhosi sikaDavide nasembusweni wakhe, ukuze uqiniswe, usekelwe ngokwahlulela nangokulunga, kusukela manje kuze kube-phakade. Ukushisekela kukaJehova-Sebawoti kuyakwenza lokhu.”

Njengamaphayona akuqala, lawo phakathi kwawo amadoda, abesifazane nentsha bonke abahlanganyela ekuhleleni izwe elisha, oFakazi BakaJehova bobudala obuhlukene futhi babo bobubili ubulili bonke bahlanganyela ekusakazeni izindaba ezinhle zeBhayibheli. Phakathi kwalaba, nokho, kukhona abaholayo ngokuzithandela, bechitha kusukela emahoreni angama-60 kuya e-140 ngenyanga emsebenzini wobuvangeli. Ngokufanelekile, labashumayeli besikhathi esigcwele babizwa ngokuthi amaphayona.a

Ingabe loluhlobo lobuphayona lungaba ngolungcono kakhulu kuwe? Noma ubungakhetha olunye uhlobo lobuphayona bekhulu lama-20 leminyaka?

Akubona Bonke UbuPhayona Obuholela Ekwanelisekeni

Abantu abavula indlela yezindlela ezintsha zolwazi lwemisebenzi noma izindlela ezintsha zokwenza okuthile bangamaphayona nabo. Ukuphayona kwasezweni, nokho, ngokuvamile kungaholela ekukhungathekeni nasekukhathazekeni. Nazi ezinye zezibonelo zabantu abaziwa kakhulu.

Iphayona lemboni yensimbi, uAndrew Carnegie, uye wanconywa ngabaningi isikhathi eside. Wayengomunye wabantu ababecebe kakhulu besikhathi sakhe. Njengomthandi-bantu waphana ngezigidi. Wayethokoza? Lapho intatheli itshela uMnu. Carnegie ukuthi wayewuhawukela kangakanani umnotho wakhe, intatheli yamangazwa yilempendulo: “Angimelwe ukufelwa umhawu. Ungangisiza kanjani umcebo wami? Ngineminyaka engama-60 ubudala, nesisu asisakwazi ukugaya ukudla kwami. Benginganikela ngazo zonke izigidi zemali uma bengingathola ubusha nempilo.” Khona-ke, ngephimbo elibanga umunyu waqhubeka, “Ngokujabula bengingathengisa noma yini ukuze ngibuyele ebusheni.”

Omunye usozimali uJ. Paul Getty, isazi sowoyela, savumelana nalamazwi lapho sithi: “Imali ayinakho ngempela noma ikuphi ukuxhumana nentokozo. Mhlawumbe nokungathokozi.”

Kuthiwani ngomsebenzi wokuphayona kwezesayensi? Lalela lokho omunye wososayensi abahlonishwa kakhulu namaphayona kunyukliya yesayensi yezinto zemvelo, uAlbert Einstein, ake akusho ngesayensi yesimanje: “Empini yenza ukuba sifakane ubuthi futhi sicwiyane. Ekuthuleni iye yenza ukuphila kwethu kwaba okokujaha futhi kungaqinisekisi. . . . Iye yenza amadoda izigqila zomshini lawo ngokwengxenye enkulu awuphetha ngokucasuka umsebenzi wawo wosuku obanzi oyisidina.” Futhi, encwadini eya kumngane othile, uEinstein wabonisa ukudabuka kwakhe ekuboneni ulwazi lwakhe ngeathomu lusetshenziselwa ukukhiqiza ibhomu yeathomu.

Ingabe umsebenzi wezombangazwe ubungazuzisa ngokwengeziwe? Ngisho noma besikwazi ukuzihlehlisela emuva esikhathini somphakathi omncane, ubuphayona kwezombangazwe bebungeke buqinisekise ngokweneliseka. Ngokwesibonelo, uAbraham Lincoln ungomunye wezazi zezombangazwe ezinconywa kakhulu. Wakhonza njengomongameli enhloko-dolobha yesizwe. Nokho emva kokubulawa kwakhe, indodana yakhe, uTad yathi ngaye: “Ubengakaze athokoze emva kokuba eza lapha. Lena kwakungeyona indawo enhle kuye.”

Akuwona umcebo, ulwazi lwasemhlabeni noma udumo okungaqinisekisa ngokweneliseka. Abaningi baphupha ngokuvula indlela entsha ebhizinisini, emidlalweni, ekuzijabuliseni, kwezombangazwe noma kwezesayensi. Bazama ukufinyelela iphupho labo futhi, uma futhi sebelifinyelele, bagcine bethi ngokudumala: ‘Ingabe lokhu ukuphela kwakho?’

Ubuphayona Obanelisayo

Abanye baye banquma ngenye indlela eyehlukile ngomsebenzi wabo—umsebenzi wesikhathi esigcwele wokushumayela. Kungokushukumisa ngokoqobo ukubona lokho lamaphayona aye akufeza nendlela azizwa ngayo ngomsebenzi wawo.

Ngonyaka ka-1923 indoda ethile, umfazi wayo nomtanabo bacelwa ukuba basuke ekhaya labo eTrinidad baye eSierra Leone. Ngasizathu sini? Ukuze baqalise umsebenzi wokushumayela, eNtshonalanga Afrika. UW. R. Brown nomkhaya wakhe bavuma. Ngokushesha ekufikeni kwabo ihholo laqashelwa inkulumo yeBhayibheli. Laligcwele lichichima; amakhulu abuyiselwa emuva. NgeSonto elilandelayo kwanikelwa inkulumo ethi “Ukuya EsiHogweni NokuBuya—Obani Abalapho?” Futhi, obunye ubuningi bezilaleli—abantu babelambele amaqiniso eBhayibheli. Futhi abakwaBrown babelapho ukubondla ngokomoya, bevula indlela yokuhamba abanye abafundisa ngeBhayibheli ababezolandela.

Kwathi ngonyaka ka-1930, abakwaBrown baya eNigeria ukuyohlela umsebenzi wokushumayela kulelozwe. Eminyakeni engama-17 eyalandela babona amabandla amaningana ekhula kusuka ezeni kuya e-165 eNigeria. Kwachithwa isikhathi futhi kuvakashwa futhi kunikezwa izinkulumo zeBhayibheli kwamanye amazwe njengeGhana, iLiberia, neGambia. Kulo lonke laseNtshonalanga Afrika waziwa njengoBhayibheli Brown. Namuhla kulengxenye yeAfrika kukhona oFakazi abangaphezu kwezi-131 000.

Nokho, okubaluleke ngokwengeziwe kunobuningi, umphumela lemfundiso yeBhayibheli, eyavulwa uW. R. Brown nomkakhe eye yaba nawo ekuphileni kwabantu. UDr. Azikiwe, owayengumbusi jikelele waseNigeria ngo-1960, wathi: “Ngiye ngazi uMnu. noNkkz. Brown cishe iminyaka engamashumi amathathu futhi baye benezela kakhulu ekwakhekeni okungokomoya kwabantu bakithi eNigeria. . . . Uma wonke amahlelo ezinkolo abefana noFakazi BakaJehova, besingeke sibe nababulali, abagqekezi, iziboshwa namabhomu eathomu. Iminyango ibingeke ikhiywe ngaso sonke isikhathi.”

Wazizwa kanjani uW. R. “Bhayibheli” Brown emva kweminyaka engama-53 njengesikhonzi esiyiphayona? Wathi: “Yeka injabulo okuyiyo ukubona amadoda nabesifazane beba ngabalalela izindaba ezinhle zoMbuso kaNkulunkulu! . . . Ngiyakuthanda ukuphayona. Kungelinye lamalungelo aphakeme kakhulu anganikezwa isidalwa esingumuntu, ukuba inxusa likaJehova!” Ingabe nawe, uzizwa unothando ngenkonzo yobuphayona?

UKathe B. Palm waqalisa umsebenzi wakhe wokushumayela isikhathi esigcwele ngo-1931. Amashumi amane nesithupha aleminyaka wawachitha eChile, eNingizimu-Melika efakaza kusuka komunye umkhawulo wezwe kuya komunye. Ebheka emuva emsebenzini wakhe wobuphayona, uthi: “Ngangingeke ngiwuthole omunye umsebenzi owawungangilethela ukwaneliseka okukhulu noma owawungaba ngozuzisa kangaka ngokomoya . . . Ngithola umuzwa ofudumele, owenelisayo njengoba ngibona abaningi kangaka abantu engiye ngaba nezifundo zeBhayibheli nabo bememezela izindaba ezinhle, besiza abanye ukuba beze emanzini okuphila. Ngabamema ukuba baphuze amanzi eqiniso futhi manje bamema abanye.” Lapho eqala ngo-1936, kwakukhona nje kuphela oFakazi abangama-50 abakhuthele kulo lonke elaseChile. Manje kunabangaphezu kwezi-18 000. Ingabe uye wakunambitha ukwaneliswa nomvuzo ongokomoya wokuphayona?

Ngo-1967 uMalinda Z. Keefer wathi: “Intokozo yami iphakama kakhulu ngeqiniso lokuthi ngaphezu kweminyaka engamashumi amahlanu edlule ngazinikela ngokwami njengesikhonzi sokuzithandela enkonzweni yesikhathi esigcwele.” Namuhla usehlanganise iminyaka engaphezu kwama-75 njengephayona! Emuva lé ngoJune ka-1907, lapho engenelisekile ngokufakaza endlini-ngendlu ngeSonto ekuseni nje, watshela uMfowethu uRussell, umongameli weWatch Tower Society isifiso sakhe sokungenela inkonzo yesikhathi esigcwele. Wangabaza, nokho, ukuthi wayenolwazi olwanele. UMfowethu uRussell wamtshela: “Uma ufuna ukulinda uze ukwazi konke ngeke uqale, kepha uyofunda njengoba uqhubeka.” Ngenyanga elandelayo waqala umsebenzi wakhe wobuphayona oye wamhambisa amazwe ayi-15 aseUnited States. Njengoba uMalinda engenela unyaka wakhe we-100 wokuphila, usakhuthele enkonzweni yobuphayona.

Isu lokuqala elihle emsebenzini wokuphayona inkonzo yobuphayona obusizayo. Ukuchitha nje amahora angama-60 ngenyanga ushumayela kungaba okuhlangenwe nakho okujabulisayo kuwe. UJehova uyasimema ukuba si‘zwe futhi sibone’ ukuthi ukukhonzwa kwakhe kuhle. (IHubo 34:8) Loluhlobo lokuphayona luyokunikeza isifanekiso soku‘zwa’ ukuthi kunjani ukushumayela kwesikhathi esigcwele nokufundisa. Uma ungazange unambithe okomsebenzi wobuphayona ngalendlela, usengakatholi ukuthi ziyini izinjabulo nokwaneliseka ubuvangeli besikhathi esigcwele obungakuletha.

Ingabe uye wacabanga ngokungathi sína ngomsebenzi wakho? Ingabe nawe, ungalamukela lelifa elimangalisayo lomsebenzi wobuphayona? Ingabe uyongena emabuthweni andayo abashumayeli besikhathi esigcwele futhi ube iphayona lekhulu lama-20 eminyaka?

[Umbhalo waphansi]