Ukuqondisisa Izindaba

“Indlebe” Yebululu

Umshwana weBhayibheli okhuluma ngokusankondlo nge“ndlebe” yebululu uye wabekelwa inselele izikhathi eziningi. (IHubo 58:4, 5) Kodwa umagazini waseJalimane ophathelene nempilo yezilwane iGrzimeks Tier, Sielmanns Tierwelt (Izilwane ZaseGrzimek, Izwe Lezilwane LaseSielmann) uye wakhipha isihloko ovumayo ukuthi “siphikisana ngokuqondile” nombono wokuthi “amabululu ayizithulu,” futhi uyaqhubeka ubuze: “Ubani oqinisile—umbono wesayensi noma umlobi wethu?”

Umlobi ulandisa ngebululu elalihlala endaweni yakhe eSri Lanka esidulini somuhlwa. Wacela umthonyi wezinyoka ukuba abambe lenyoka yasendle futhi ayidansise. Umlobi uyabika: “Ngemva kokuba sengisiqinisekisile isivakashi sami ukuthi ngempela kwakunebululu elalihlala lapho, sahlala phambi kwesiduli somuhlwa futhi saqala ukudlala umtshingo waso. Ngemva kwesikhathi eside—ngangingasakholelwa ukuthi kwakusekhona okwakungenzeka—ibululu lakhipha ikhanda lalo ngaphandle komgodi amasentimitha ambalwa. Ngaphambi kokuba inyoka ivule umlomo wayo umthonyi wagijima wayibamba ikhanda ngeminwe yakhe emibili nesithupha.” Kanjalo iNdiya layidansisa ngempela inyoka. Kulendaba nokho, ibululu ngempela ‘lalilalela izwi lomthonyi.’