“Ukuze Ningangeni Esilingweni”
“Hlalani nilindile futhi nithandaze njalo, ukuze ningangeni esilingweni.”—MATHEWU 26:41.
WAYECINDEZELEKE kakhulu—wayengakaze acindezeleke kanje ngaphambili. UJesu Kristu, iNdodana kaNkulunkulu, wayesesondela ekupheleni kokuphila kwakhe kwasemhlabeni. UJesu wayebona ukuthi ngokushesha nje uzoboshwa, agwetshelwe ukufa futhi abethelwe esigxotsheni sokuhlushwa. Wayazi ukuthi zonke izinqumo nezenzo zakhe zazizothinta igama likaYise. Wayazi nokuthi kwakuzocaca ngaleso sikhathi ukuthi amathemba esintu okuphila kwesikhathi esizayo akhona yini noma cha. Ebhekene nazo zonke lezi zinto ezazimcindezela, wenzenjani?
2 UJesu wahamba nabafundi bakhe waya ensimini yaseGetsemane. Kwakuyiyona ndawo ayeyithanda kakhulu. Ngesikhathi belapho wabashiya ibangana abafundi bakhe. Lapho eseyedwa, wathulula inhliziyo yakhe ngomthandazo oqotho kuYise wacela amandla—hhayi nje kanye kuphela kodwa kathathu. Yize ayephelele, uJesu akazange acabange ukuthi angabhekana nezinto ezimcindezelayo eyedwa.—Mathewu 26:36-44.
3 Nathi namuhla sinezinto ezisicindezelayo. Ngasekuqaleni kwale ncwadi sifunde ngobufakazi bokuthi siphila ezinsukwini zokugcina zalesi simiso esibi. Ziya ziqina izilingo nezingcindezi ezibangelwa izwe likaSathane. Izinqumo nezenzo zanoma ubani kithi othi ukhonza uNkulunkulu weqiniso zithinta igama laKhe futhi ziwathinta kakhulu amathemba ethu ngabanye okuphila ezweni lakhe elisha. Siyamthanda uJehova. Sifuna ‘ukukhuthazela kuze kube sekupheleni’—ekupheleni kokuphila kwethu noma ekupheleni kwalesi simiso, noma yikuphi okuyofika kuqala. (Mathewu 24:13) Kodwa singawulondoloza kanjani umuzwa wethu wokuphuthuma futhi sihlale silindile?
4 Njengoba ayazi ukuthi abafundi bakhe—bangaleso sikhathi nabanamuhla—nabo babeyocindezeleka, uJesu wabanxusa: “Hlalani nilindile futhi nithandaze njalo, ukuze ningangeni esilingweni.” (Mathewu 26:41) Lawo mazwi asho ukuthini kithi namuhla? Yisiphi isilingo wena obhekene naso? Futhi ‘ungahlala kanjani ulindile’?
Isilingo Sokwenzani?
5 Nsuku zonke sonke sibhekana nesilingo sokuvumela ‘ugibe lukaDeveli.’ (2 Thimothewu 2:26) IBhayibheli lisixwayisa ngokuthi uSathane unabakhulekeli bakaJehova shaqa. (1 Petru 5:8; IsAmbulo 12:12, 17) Usophe ukusenzani? Akasophile ngempela ukusibulala. USathane usuke enganqobile uma sifa sithembekile kuNkulunkulu. USathane uyazi ukuthi uJehova, ngesikhathi saKhe esifanele, uyokuqeda ukufa ngovuko.—Luka 20:37, 38.
6 USathane ufuna ukusephuca into ebaluleke kakhulu ukwedlula ngisho ukuphila kwethu kwamanje—ubuqotho bethu kuNkulunkulu. USathane ubabele ukufakazela ukuthi angasenza simfulathele uJehova. Ngakho, uma singase siyengelwe ukuba singathembeki—siyeke ukushumayela izindaba ezinhle noma silahle izindinganiso zobuKristu—uSathane uyobe unqobile! (Efesu 6:11-13) Ngakho-ke, lo “Mlingi” ubeka izilingo phambi kwethu.—Mathewu 4:3.
7 “Amacebo akhohlisayo” kaSathane ayizinhlobo ezihlukahlukene. (Efesu 6:11, Jewish New Testament) Angase asilinge ngokuthanda izinto ezibonakalayo, ukwesaba, ukungabaza noma ukuphishekela ukuzithokozisa. Kodwa enye yezindlela zakhe eziphumelela kakhulu ukusidikibalisa. Njengoba eyiqili elisizakala ngabantu, uyazi ukuthi ukudangala kungasiqeda amandla bese kuba lula ukunqotshwa izilingo. (IzAga 24:10) Ngakho lapho ‘sichotshozwa’ ngokomzwelo, usilingela ukuba siyeke.—IHubo 38:8.
8 Njengoba singena shí ezinsukwini zokugcina, zibonakala zanda izinto ezidikibalisa abantu, futhi nathi ziyasidikibalisa. (Bheka ibhokisi elithi “Ezinye Zezinto Ezidikibalisayo.”) Kungakhathaliseki ukuthi yini esidikibalisayo, ukudikibala kungasiqeda amandla. ‘Ukuthengisisa ithuba’ lokufeza imithwalo yemfanelo engokomoya—kuhlanganise nokutadisha iBhayibheli, ukuya emihlanganweni yobuKristu nasensimini—kungaba inselele uma ukhathele emzimbeni, engqondweni nangokomzwelo. (Efesu 5:15, 16) Khumbula ukuthi uMlingi ufuna ukuba uyeke. Kodwa lesi akusona isikhathi sokuhudula izinyawo noma ukuphelelwa umuzwa wokuphuthuma ngezikhathi esiphila kuzo! (Luka 21:34-36) Ungamelana kanjani nesilingo futhi uhlale ulindile? Cabangela ukusikisela okune okungakusiza.
‘Thandaza Njalo’
9 Ncika kuJehova ngomthandazo. Khumbula isibonelo sikaJesu ensimini yaseGetsemane. Ngesikhathi ecindezeleke kakhulu ngokomzwelo, wenzenjani? Wacela usizo kuJehova, wathandaza ngobuqotho kangangokuthi “izithukuthuku zakhe zaba njengamathonsi egazi awela emhlabathini.” (Luka 22:44) Cabanga ngalokhu. UJesu wayemazi kahle uSathane. Ngesikhathi uJesu esezulwini wayebuka zonke izilingo uSathane azisebenzisayo lapho ezama ukuyenga izinceku zikaNkulunkulu. Nokho, uJesu akazange acabange ukuthi angayinqoba kalula noma yini uMlingi ayengamlinga ngayo. Uma iNdodana kaNkulunkulu ephelele yayisibona isidingo sokuthandazela usizo namandla kaNkulunkulu, kangakanani-ke thina!—1 Petru 2:21.
10 Khumbula futhi ukuthi ngemva kokunxusa abafundi bakhe ukuba ‘bathandaze njalo,’ uJesu wathi: “Yebo, umoya uyalangazela, kodwa inyama ibuthakathaka.” (Mathewu 26:41) UJesu wayekhuluma ngenyama kabani? Wayengakhulumi neze ngeyakhe; akukho lutho olwalubuthakathaka emzimbeni wakhe ophelele. (1 Petru 2:22) Kodwa kwakuhlukile ngabafundi bakhe. Ngenxa yokungapheleli abakuzuze njengefa nokuthambekela esonweni, babezoludinga ngokukhethekile usizo ekulweni nesilingo. (Roma 7:21-24) Yingakho abanxusa—nawo wonke amaKristu eqiniso ayezolandela—ukuba bathandazele usizo ekulweni nesilingo. (Mathewu 6:13) UJehova uyayiphendula imithandazo enjalo. (IHubo 65:2) Kanjani? Ngezindlela ezimbili phakathi kwezinye.
11 Eyokuqala, uNkulunkulu usisiza ukuba sizibone izilingo. Izilingo zikaSathane zinjengezicupho ezisakazeke endleleni emnyama. Uma ungaziboni, ungase ubambeke. NgeBhayibheli nangezincwadi ezisekelwe eBhayibhelini, uJehova uzenza zibonakale kahle izicupho zikaSathane, ngaleyo ndlela sikwazi ukugwema ukunqotshwa isilingo. Phakathi neminyaka edlule, izincwadi ezinyathelisiwe nezimiso zemihlangano emikhulu nemincane ziye zasixwayisa ngokuphindaphindiwe ngezingozi ezinjengokwesaba abantu, ukuziphatha okubi ngokobulili, ukuthanda izinto ezibonakalayo nezinye izilingo zikaSathane. (IzAga 29:25; 1 Korinte 10:8-11; 1 Thimothewu 6:9, 10) Awumbongi yini uJehova ngokuthi uye wasiqaphelisa ngamacebo kaSathane? (2 Korinte 2:11) Zonke izixwayiso ezinjalo ziyimpendulo yemithandazo yakho yokucela usizo lokumelana nesilingo.
12 Eyesibili, uJehova uphendula imithandazo yethu ngokusinika amandla okukhuthazelela izilingo. IZwi lakhe lithi: “UNkulunkulu . . . ngeke akuvumele ukuba nilingwe ngokungaphezu kwalokho eningakuthwala.” (1 Korinte 10:13) UNkulunkulu akasoze avumela isilingo ukuba sibe sikhulu kakhulu kangangokuthi siswele amandla angokomoya okumelana naso—uma siqhubeka sincika kuye. ‘Usenzela kanjani indlela yokuphuma’? ‘Ubanika umoya ongcwele labo abawucelayo.’ (Luka 11:13) Lowo moya ungase usisize ukuba sikhumbule izimiso zeBhayibheli ezingaqinisa ukuzimisela kwethu ukwenza okulungile futhi zisisize senze izinqumo ezihlakaniphile. (Johane 14:26; Jakobe 1:5, 6) Ungasisiza ukuba sibonise zona kanye izimfanelo esizidingayo ukuze sikwazi ukunqoba ukuthambekela okubi. (Galathiya 5:22, 23) Umoya kaNkulunkulu ungashukumisela ngisho nesikholwa nabo ukuba “babe usizo oluqinisayo” kithi. (Kolose 4:11) Awumbongi yini uJehova ngokuthi ukuphendula ngezindlela ezinothando kangaka lapho uthandazela usizo?
Bhekana Namaqiniso
13 Ukuze sihlale silindile, kudingeka sibhekane namaqiniso. Ngenxa yokucindezeleka esibhekana nakho ekuphileni, sonke siyakhathala ngezinye izikhathi. Kodwa kufanele sikhumbule ukuthi uNkulunkulu akazange asithembise ukuthi ngeke sibe nazinkinga ekuphileni kulesi simiso esidala. Ngisho nasezikhathini zeBhayibheli, izinceku zikaNkulunkulu zazibhekana nobunzima, obuhlanganisa ukushushiswa, ubumpofu, ukucindezeleka nokugula.—IzEnzo 8:1; 2 Korinte 8:1, 2; 1 Thesalonika 5:14; 1 Thimothewu 5:23.
14 Namuhla nathi siyaba nezinkinga. Singase sishushiswe, sikhathazwe izinkinga zezimali, silwe nokucindezeleka, sigule noma sihlupheke ngezinye izindlela. Uma uJehova ubengasivikela ngokuyisimangaliso kuko konke ukuhlupheka, ubengeke yini uSathane athole ibhaxa lokuklolodela uJehova? (IzAga 27:11) UJehova uyazivumela izinceku zakhe ukuba zilingwe futhi zivivinywe, ngezinye izikhathi zize zisheshe zife zibulawa abaphikisi.—Johane 16:2.
15 Kanti yini uJehova ayithembisile? Njengoba sishilo ngaphambili, uthembise ukuthi uyosenza sikwazi ukunqoba noma isiphi isilingo esingase sivele, uma nje simethemba ngokugcwele. (IzAga 3:5, 6) NgeZwi lakhe, ngomoya wakhe nangenhlangano yakhe, uyasivikela ngokomoya, asisize sihlale sinobuhlobo obuhle naye. Uma nje lobo buhlobo bungakonakali, noma singafa siyobe sinqobile. Akukho lutho—ngisho nokufa—olungavimbela uNkulunkulu ukuba anike izinceku zakhe ezithembekile umvuzo. (Hebheru 11:6) Futhi ezweni elisha manje eliseduze, uJehova ngeke ahluleke ukufeza zonke izithembiso zakhe ezinhle zokubusisa labo abamthandayo.—IHubo 145:16.
Khumbula Izinselele
16 Ukuze sikhuthazele kuze kube sekugcineni, kufanele sikhumbule izinselele ezibalulekile ezimayelana nokuvumela kukaNkulunkulu ububi. Uma ngezinye izikhathi izinkinga zethu zibonakala zingaphezu kwamandla futhi sizwa kuthi asivele siyeke phansi, siyobe senza kahle uma sizikhumbuza ukuthi uSathane uye wakubekela inselele ukufaneleka kobukhosi bukaJehova. UMkhohlisi uye wakungabaza nokuzinikela nobuqotho babakhulekeli bakaNkulunkulu. (Jobe 1:8-11; 2:3, 4) Lezo zinselele nendlela uJehova akhethe ukuzixazulula ngayo zibaluleke kakhulu ukwedlula noma ubani kithi. Kanjani?
17 Ukuvumela kukaNkulunkulu ubunzima isikhashana kuye kwanikeza abanye ithuba lokwamukela iqiniso. Cabanga ngalokhu: UJesu wahlupheka ukuze thina sithole ukuphila. (Johane 3:16) Asibongi yini ngalokho? Kodwa ingabe thina sizimisele ukubekezelela ubunzima isikhashana ukuze nabanye bathole ukuphila? Ukuze sikhuthazele kuze kube sekugcineni, kufanele siqaphele ukuthi ukuhlakanipha kukaJehova kukhulu kakhulu kunokwethu. (Isaya 55:9) Uyoqeda ububi ngesikhathi esingcono kakhulu ukuze izimpikiswano zixazululwe unomphela nangokwenzuzo yethu yaphakade. Kambe ikhona yini enye indlela engcono kunale? Akukho ukungalungi kuNkulunkulu!—Roma 9:14-24.
‘Sondela KuNkulunkulu’
18 Ukuze sihlale sinomuzwa wokuphuthuma, kudingeka sihlale siseduze noJehova. Singalokothi sikhohlwe ukuthi uSathane wenza konke okusemandleni akhe ukuze abhidlize ubuhlobo bethu obuhle noJehova. USathane ufuna sikholelwe ukuthi ukuphela akusoze kwafika nokuthi akusizi ngalutho ukushumayela izindaba ezinhle noma ukuphila ngezimiso zeBhayibheli. Kodwa “ungumqambimanga noyise wamanga.” (Johane 8:44) Kufanele sizimisele ‘ukumelana noDeveli.’ Ubuhlobo bethu noJehova abuyona neze into okufanele siyithathe kancane. IBhayibheli lisinxusa ngothando: “Sondelani kuNkulunkulu, naye uyosondela kini.” (Jakobe 4:7, 8) Ungasondela kanjani wena kuJehova?
19 Ukuthandaza nokuzindla kubalulekile. Lapho izinkathazo zokuphila zibonakala zingaphezu kwamandla, thululela inhliziyo yakho kuJehova. Uma umtshela izinkathazo zakho ngokuqondile, kuyoba lula nakakhulu ukubona lapho eseziphendula izicelo zakho. Kungase kungenzeki ngaso sonke isikhathi ukuba impendulo ibe yikho kanye lokho obukucabanga, kodwa uma ufisa ukumdumisa nokugcina ubuqotho, uyokusiza ukhuthazele ngokuphumelelayo. (1 Johane 5:14) Uma ubona isiqondiso sakhe ekuphileni kwakho, uyosondela nakakhulu kuye. Ukufunda ngezimfanelo nezindlela zikaJehova nokucabangisisa ngazo, njengoba zembulwe eBhayibhelini, kubalulekile nakho. Ukuzindla okunjalo kukusiza ukuba umazi kangcono; kushukumisa inhliziyo yakho futhi kujulise uthando lwakho ngaye. (IHubo 19:14) Futhi lolo thando yilo oluyokusiza ngaphezu kwanoma yini enye ukuba umelane nesilingo futhi uhlale ulindile.—1 Johane 5:3.
20 Ukuze sihlale siseduze noJehova, kubalulekile nokuba sihlale siseduze nesikholwa nabo. Lokhu kuzoxoxwa ngakho engxenyeni yokugcina yale ncwajana.
IMIBUZO YESIFUNDO
• Yini uJesu ayenza ngesikhathi ecindezeleke kakhulu lapho sekusondele ukuba afe, futhi wanxusa abafundi bakhe ukuba benzeni? (Izig. 1-4)
• Kungani uSathane enabakhulekeli bakaJehova shaqa, futhi usilinga ngaziphi izindlela? (Izig. 5-8)
• Ukuze simelane nesilingo, kungani kufanele sithandaze njalo (Izig. 9-12), sibhekane namaqiniso (Izig. 13-15), sikhumbule izinselele (Izig. 16-17), futhi ‘sisondele kuNkulunkulu’ (Izig. 18-20)?
[Ibhokisi ekhasini 25]
Ezinye Zezinto Ezidikibalisayo
Impilo/ukukhula. Uma sihlushwa isifo esingamahlalakhona noma singasakwazi ukwenza ezinye izinto ngenxa yokuguga, singase sicindezeleke ngoba singasakwazi ukwenza okwengeziwe ekukhonzeni uNkulunkulu.—Hebheru 6:10.
Ukudumazeka. Singase siphele amandla uma sibona abantu bengasabeli kahle emizamweni yethu yokushumayela iZwi likaNkulunkulu.—IzAga 13:12.
Ukuzizwa ungelutho. Ngenxa yokuphathwa kabi iminyaka eminingi, umuntu angase aqiniseke ukuthi abantu abamthandi, ngisho noJehova.—1 Johane 3:19, 20.
Ukuphatheka kabi. Uma umuntu eye wakhutshwa othile akholwa naye, angase akhathazeke kakhulu kangangokuba ayeke nokuya emihlanganweni yobuKristu noma enkonzweni yasensimini.—Luka 17:1.
Ukushushiswa. Abanye abangakholwa nawe bangase bakuphikise, bakushushise noma bahlekise ngawe.—2 Thimothewu 3:12; 2 Petru 3:3, 4.
[Isithombe ekhasini 26]
UJesu wasinxusa ukuba ‘siluthandazele njalo’ usizo lokulwa nezilingo