Izizathu Ezinengqondo Zinikeziwe

UMA usho okuthile, izilaleli zakho zinelungelo eligcwele lokubuza: “Kungani kuyiqiniso? Yibuphi ubufakazi bokuthi okushiwo isikhulumi kufanele kwamukelwe?” Njengomfundisi, unesibopho sokuyiphendula imibuzo enjalo noma sokusiza izilaleli zakho zizitholele izimpendulo. Uma okushoyo kubalulekile, qikelela ukuthi unikeza izilaleli zakho izizathu ezinamandla zokukwamukela. Ukwenza kanjalo kuyoba nesandla ekwenzeni okushoyo kubathonye abanye.

Umphostoli uPawulu wasebenzisa ikhono lokuthonya. Ngezizathu ezizwakalayo, ngokuhlakanipha, nangokunxusa abantu ngobuqotho, wayefuna ukushintsha izingqondo zalabo ayekhuluma nabo. Wasibekela isibonelo esihle ngalokho akwenza. (IzE. 18:4; 19:8) Yebo, ezinye izikhulumi ezingamagagu zisebenzisa ikhono lokuthonya ngenjongo yokudukisa abantu. (Math. 27:20; IzE. 14:19; Kol. 2:4) Zingase ziqale ngokusho okuthile okuyiphutha, zisebenzise imithombo engathembekile, amaphuzu angenangqondo, zishalazele amaphuzu angavumelani nemibono yazo, noma zithinte imizwelo kunengqondo. Kufanele siqikelele ukuthi siyazigwema zonke izindlela ezinjalo.

Kufanele Kusekelwe Ngokuqinile EZwini LikaNkulunkulu. Esikufundisayo akumelwe kusuke kithina. Sizama ukutshela abanye izinto esizifunde eBhayibhelini. Izincwadi zesigaba senceku ethembekileyo neqondayo ziye zasisiza kakhulu ekwenzeni lokhu. Lezi zincwadi zisikhuthaza ukuba sihlole imiBhalo ngokucophelela. Sibe sesiqondisa abanye eBhayibhelini, hhayi ngenjongo yokuveza ukuthi siqinisile, kodwa ngesifiso sokuthobeka sokuba bazibonele ngawabo lokho elikushoyo. Sivumelana noJesu Kristu, okwathi ethandaza kuYise wathi: “Izwi lakho liyiqiniso.” (Joh. 17:17) Alikho igunya elikhulu ngaphezu kwelikaJehova uNkulunkulu, uMdali wezulu nomhlaba. Ukunemba kwamaphuzu ethu kuxhomeke ekutheni asekelwe eZwini lakhe yini.

Ngezinye izikhathi ungase uxoxe nabantu abangalijwayele iBhayibheli noma abangalibheki njengeliyiZwi likaNkulunkulu. Kufanele usebenzise ukwahlulela okuhle ukuze unqume ukuthi uwafunda nini futhi kanjani amavesi eBhayibheli. Kodwa kufanele uzame ukubaqondisa kulowo mthombo onegunya ngokushesha ngangokunokwenzeka.

Ingabe kufanele uphethe ngokuthi uma nje ucaphuna umbhalo ofanelekayo usuke usunikeze isizathu esingenakuphikiswa salokho okushoyo? Akunjalo ngempela. Kungase kudingeke ubhekisele emongweni ukuze ubonise ukuthi lowo mbhalo ngempela uyakusekela okushoyo. Uma ucaphuna isimiso esithile embhalweni kodwa umongo ube ungakhulumi ngaleyo ndaba, kungase kudingeke ubufakazi obengeziwe. Kungadingeka usebenzise eminye imibhalo ehlobana naleyo ndaba ukuze ugculise izilaleli zakho ngokuthi imiBhalo iyakusekela ngempela okushoyo.

Gwema ukweqisa kulokho umbhalo okushoyo. Wufunde kahle. Kungenzeka ukuthi umbhalo ukhuluma ngendaba oxoxa ngayo. Noma kunjalo, ukuze iphuzu lakho limthinte umuntu okhuluma naye, kumelwe akwazi ukuzizwela ngokwakhe ukuthi lowo mbhalo uyakufakazela ngempela lokho wena okushoyo.

Kusekelwé Ubufakazi Obuseceleni. Kwezinye izimo kungase kusize ukusebenzisa ubufakazi obukomunye umthombo othembekile ongelona iBhayibheli ukuze usize abantu baqonde ukuthi imiBhalo inengqondo.

Ngokwesibonelo, ungase ukhombe izulu nomhlaba njengobufakazi bokuthi uMdali ukhona. Ungase ubhekisele emithethweni yemvelo, njengowamandla adonsela phansi, uchaze ukuthi ukuba khona kwemithetho enjalo kusikisela ukuthi ukhona uMniki-mthetho. Indlela ochaza ngayo iyoba ngenembile uma ivumelana nalokho okuseZwini likaNkulunkulu. (Jobe 38:31-33; IHu. 19:1; 104:24; Roma 1:20) Ubufakazi obunjalo buyasiza ngoba bubonisa ukuthi okushiwo yiBhayibheli kuyavumelana namaqiniso abonakalayo.

Ingabe uzama ukusiza othile ukuba abone ukuthi iBhayibheli ngempela liyiZwi likaNkulunkulu? Ungase ucaphune izazi ezithi liyilo, kodwa ingabe lokho kuwubufakazi bokuthi liyilo? Izingcaphuno ezinjalo zimane nje zisiza abantu abahlonipha lezo zazi. Ungayisebenzisa yini isayensi ukuze ufakazele ukuthi iBhayibheli liyiqiniso? Ukube ubungasebenzisa imibono yososayensi abangaphelele njengobufakazi bakho, ubuyobe wakhela phezu kwesisekelo esintengayo. Ngakolunye uhlangothi, uma uqala ngeZwi likaNkulunkulu bese ukhomba okutholwe yisayensi okugcizelela ukunemba kweBhayibheli, amaphuzu akho ayobe akhelwe phezu kwesisekelo esiqinile.

Nikeza ubufakazi obanele banoma yini ozama ukuyifakazela. Kuyoxhomeka ezilalelini zakho ukuthi udinga ubufakazi obungakanani. Ngokwesibonelo, uma uxoxa ngezinsuku zokugcina njengoba zichazwe kweyesi-2 Thimothewu 3:1-5, ungase wazise izilaleli zakho ngombiko wezindaba obonisa ukuthi abantu ‘abanalo uthando lwemvelo.’ Leso sibonelo esisodwa singase sanele ekufakazeleni iphuzu ozama ukulikhanyisa, lokuthi siphila ezinsukwini zokugcina.

Isifaniso—ukufanisa izinto ezimbili ezinezici ezimbili ezibalulekile—ngokuvamile siyasiza. Isifaniso ngokwaso asifakazeli lutho; ukuba yiqiniso kwaso kumelwe kubonakale ngokuba sifaniswe nalokho iBhayibheli ngokwalo elikushoyo. Kodwa isifaniso singase sisize umuntu abone ukuthi umbono othile unengqondo. Ngokwesibonelo, isifaniso singase sisetshenziswe lapho uchaza ukuthi uMbuso kaNkulunkulu unguhulumeni. Ungase uveze ukuthi njengohulumeni babantu, uMbuso kaNkulunkulu unababusi, abantu abangaphansi kwawo, imithetho, izimiso zokwahlulela, nesimiso semfundo.

Okuhlangenwe nakho okungokoqobo ngokuvamile kungasetshenziselwa ukubonisa ukuhlakanipha kokusebenzisa iseluleko seBhayibheli. Okwenzeka kumuntu siqu nako kungasetshenziselwa ukusekela lokho umuntu asuke ekusho. Ngokwesibonelo, uma utshela umuntu ngokubaluleka kokufunda nokutadisha iBhayibheli, ungase uchaze indlela okukuthuthukise ngayo ukuphila kwakho. Ukuze akhuthaze abafowabo, umphostoli uPetru wakhuluma ngokuguquka kukaJesu esinye isimo, okuyinto azibonela yona ngawakhe. (2 Pet. 1:16-18) UPawulu naye wacaphuna izigigaba ezamehlela. (2 Kor. 1:8-10; 12:7-9) Kufanele ungakusebenzisi njalo okuhlangenwe nakho kwakho ukuze ungaziqhakambisi wena ngokungadingekile.

Njengoba abantu benezizinda ezingefani futhi becabanga ngokungefani, ubufakazi obugculisa omunye umuntu bungase bungamanelisi omunye. Ngakho-ke, cabangela imibono yezilaleli zakho lapho unquma ukuthi yibuphi ubufakazi ozobusebenzisa nokuthi uzobethula kanjani. IzAga 16:23 zithi: “Inhliziyo yohlakaniphileyo iyafundisa umlomo wakhe, yenezele imfundiso ezindebeni zakhe.”