Ukubuka Okwezwe

◼ “Kunemidwebo engaba ngu-160 000 elahlekile eminyuziyamu kulo lonke elaseRussia.—I-RIA NOVOSTI, ERUSSIA.

◼ “I-Phoenix Mars Lander ye-NASA ithungathé ukukhithika kweqhwa emafwini eMars.”—I-“NASA MISSION NEWS,” E-U.S.A.

◼ “Amaphesenti angu-65 abashayeli nabagibeli abashonayo emigwaqweni yaseGreece basuke bengawabophanga amabhande noma bengazifakile izigqoko zokuvikela.”—I-EIKONES, EGREECE.

Imithwalo Elahlekayo

Ukulahlekelwa imithwalo phakathi nohambo lwendiza kuyinsakavukela. I-International Herald Tribune ibika ukuthi ngo-2007, “kwalahleka izikhwama eziyizigidi ezingu-42, ezingamaphesenti angu-25 ngaphezu kwalezo ezalahleka ngo-2006.” Eziningi zalezo zikhwama zadilivwa kubanikazi engakapheli amahora angu-48, kodwa ezingamaphesenti amathathu, “okuyisikhwama esisodwa kubagibeli abangu-2 000, azizange zitholakale.” Imithwalo elahlekile yabiza izinkampani zezindiza imali engamaRandi ayizigidi eziyizinkulungwane ezingu-38 ngo-2007. Phakathi kwezimbangela ezikhona kubalwa “ukuminyana ngenxa yokwanda kwabagibeli, isikhathi esifushane sokulungela kwezindiza uhambo olulandelayo,” ukungaphathwa kahle kwemithwalo namaphutha okuphambanisa amalebula.

AmaKatolika Akipitayo

Umagazini i-Population & Sociétés uthi ucwaningo olwenziwa eFrance lubonisa ukuthi “ukuwohloka kwethonya lenkolo” kuyimbangela yokushintsha kokuphila kwabantu nezindinganiso zokuziphatha, kungakhathaliseki ukuthi iyiphi inkolo. Ngokwesibonelo, intsha engaba amaphesenti angu-88 eneminyaka ephakathi kwengu-18 nengu-24 eFrance ithi ingamaKatolika, kodwa abantu abangamaphesenti angu-80 kulaba abalubhadi nasesontweni ngaphandle kwalapho kunemishado, kubhapathizwa othile, noma kuwumngcwabo. Ukuwohloka kwezindinganiso zokuziphatha kubonakala ekuphileni komkhaya. Eminyakeni engu-40 edlule, kwakuwumbhangqwana owodwa kweyishumi owawukipita ngaphambi kokushada. Namuhla, leso sibalo sesiyimibhangqwana engu-9 kweyishumi. Lolu cwaningo lwembula ukuthi: “Phakathi kwamaKatolika avame ukuya esontweni njalo, angamaphesenti angu-75 ayakipita ngaphambi kokushada.”

Ubhadane Lokuzibulala Kwabalimi BaseNdiya

Iphephandaba i-Hindu libika ukuthi kusukela ngo-2002 eNdiya, kunabalimi abangaphezu kuka-17 000 abaye bazibulala, ngokuvamile ngokudla amakhemikhali abulala izinambuzane. Phakathi kwezinkinga abalimi ababhekana nazo kubalwa isomiso, ukuncipha kwentengo yezilimo, ukwenyuka kwezindleko zezolimo nezinkinga zokuthola imali ebolekiswayo ebhange. Ngenxa yalokho, abaningi baya komashonisa, abafuna inzalo emba eqolo, okushiya ababolekile benezikweleti ezinzima. Ukuze bazikhokhe, abanye abalimi baze baphendukele nasekudayiseni izitho zabo zomzimba. Nokho, uma lokho kungaphumeleli noma kungekho okunye okubonakala kusebenza, izinkulungwane ziphendukela endleleni yokubaleka okuwukuphela kwayo eziyibona iwusizo—ukuzibulala.

Izingwenya ZaseNayile Ziyakhuluma Ngaphambi Kokuchanyuselwa

I-Times yaseLondon ibika ukuthi “amachwane ezingwenya ayakhuluma ngaphambi kokuchanyuselwa,” acuphe isikhathi sokuchanyuselwa kanyekanye. Kwaqoshwa imisindo izingwenya zaseNayile eziyenzayo ngaphambi kokuba zichanyuselwe. Le misindo yabe isidlalwa eduze kweqoqo elithile lamaqanda. Amachwane akulawo maqanda aphendula okwenza ukuba lawo maqanda anyakaze ngokushesha kunamaqanda angayizwanga leyo misindo. Lo mbiko uthi: “Izingwenya ezezwa umsindo wezinye ezingakachanyuselwa zavumelanisa isikhathi sokuchanyuselwa kwazo sashiyana ngemizuzu nje eyishumi.” Amaqanda ayesendaweni ethule noma ayechayeke emisindweni ehlukahlukene awakwazanga ukuvumelanisa isikhathi sokuchanyuselwa kwawo.