Umbono Wesazi Semfundiso Yenkolo NgoFakazi BakaJehova ERussia
EROMA, abaholi bomphakathi wamaJuda bekhulu lokuqala baphawula lokhu ngokuphathelene nobuKristu: “Ngokuqondene nalelihlelo siyazi ukuthi kukhulunywa ngokumelene nalo kuyo yonke indawo.” Yini labo baholi abayenza? Ngokutusekayo, baya kumphostoli uPawulu, ngaleso sikhathi owayegadiwe endlini yakhe, base bethi: “Sikucabangela njengokufanelekile ukuzwa kuwe ukuthi iyini imicabango yakho.” (IzEnzo 28:22) Balalela umKristu onolwazi kunokuba balalele labo ababekhuluma ngokumelene nobuKristu.
USergei Ivanenko, isazi semfundiso yenkolo saseRussia esaziwayo, wenza okufanayo. Nakuba ayeyikholelwa imibiko eminingi engemihle ngoFakazi BakaJehova eyayigcwele eRussia, wanquma ukushayela ucingo ehhovisi legatsha loFakazi, elingaphandle nje kwaseSt. Petersburg, ukuze athole ukwaziswa. Wasamukela isimemo sokuba avakashele khona, abuze imibuzo futhi azibonele mathupha okwenziwa oFakazi.
Lapho uMnu. Ivanenko efika ngo-October 1996, kwase kuzoqedwa izakhiwo zokuhlala amalungu angaba ngu-200 ayizisebenzi egatsheni loFakazi BakaJehova eRussia. Wanikezwa ithuba lezinsuku ezintathu zilandelana ukuba abone indawo okwakhiwa kuyo, adlele endlini yokudlela futhi axoxe nanoma ubani ayefuna ukuxoxa naye.
Isihloko esabhalwa uMnu. Ivanenko ngoFakazi sanyatheliswa ephephandabeni lamasonto onke elithandwayo eRussia i-Moscow News ka-February 16-23, 1997. Lesi sihloko, esasithi “Ingabe Kufanele Sibesabe OFakazi BakaJehova?,” sanyatheliswa nasohlelweni lwesiNgisi lwe-Moscow News ka-February 20-26. Njengoba abafundi abaningi be-Phaphama! benesithakazelo esijulile emsebenzini woFakazi BakaJehova eRussia, siye sathola imvume yokuba sishicilele ingxenye enkulu yalesi sihloko. UMnu. Ivanenko waqala ngokuhlangenwe nakho okulandelayo, okwakulotshwe ngamagama agqamile:
“‘Balandeli behlelo, phumani niphele eRussia!’ kusho ibhodi elaliphethwe amalungu eqembu i-LDPR likaZhirinovsky ayebhikishela umhlangano woFakazi BakaJehova. Ngabuza omunye wababhikishi: ‘Yini ongayithandi ngalenhlangano?’ Wanginikeza ikhophi ye-Megapolis-Express eyayinesihloko esikhulu esithi ‘Ukugqashuka Kukagcunsula Ongokwenkolo EKamchatka.’ Leli phephandaba lathi ukuze babe nemali emabhokisini alenhlangano, oFakazi BakaJehova babekhankasa futhi benezigungu zobufebe, besakaza izifo ezithathelwana ngobulili kumatilosi. Ngabuza ngesineke: ‘Ingabe nawe ungesinye sezisulu zabo? Ingabe uyakukholelwa lokhu kwaziswa?’ Impendulo yathi: ‘Akunandaba. Into eyinhloko ukuthi leli hlelo laseMelika libhubhisa ingokomoya nempucuko yaseRussia, futhi kumelwe silinqande.’”
Isihloko esabhalwa uMnu. Ivanenko sasingaphansi kwamazwi athi: “NguSergei Ivanenko, isazi semfundiso yenkolo, isazi sefilosofi.”
“Ukwethembeka okunje kuyivelakancane ngempela, nakuba kuyiqiniso ukuthi abantu abaningi baseRussia ababathandi oFakazi BakaJehova. Ukukhuluma nje ngalenhlangano kubangela ukugxekwa okukhulu kokushiseka kwayo ngokweqile, umsuka wayo waseMelika, ukholo oluphuphuthekisiwe lwamalungu avamile kubaholi balenhlangano nenkolelo yokuthi ukuphela kwezwe kuseduze. Kwabaningi, oFakazi BakaJehova babangela ukwesaba okuhambisana nelukuluku lokufuna ukwazi.
“Iyini Lenkolo, Futhi Ingabe Kufanele Siyesabe?
“Ukuze ngizitholele mathupha, ngavakashela edolobhaneni laseSolnechnoye esifundeni saseKururtnoye, eSt. Petersburg, lapho kukhona khona isikhungo esiqondisa oFakazi BakaJehova eRussia.
***
“[Lendawo] isendaweni okwakuyikamu lamaholide. Ngo-1992 isakhiwo [sokuqala] sase siwohloke saphela, futhi esikhundleni sezingane kwakukhona osikhotheni namagundane. Ngokunokwenzeka kwakuyisimo esiwohlokile salendawo esasiza oFakazi BakaJehova ukuba bathole lesi siza esingamahektare angu-7 ababengasisebenzisa isikhathi esingalinganiselwe. Bavuselela izakhiwo ezindala base beqala nokwakha ezintsha, kuhlanganise nesakhiwo sokuqondisa esinezitezi ezine, [iHholo LoMbuso] elinezihlalo ezingu-500 kanye nendawo yokudlela. OFakazi BakaJehova batshala notshani obusha (obabu-odwe ngokukhethekile eFinland) nezinhlobo ezihlukahlukene zezihlahla eziyivelakancane. Lomsebenzi kulindeleke ukuba uqedwe ngehlobo elizayo. Umsebenzi oyinhloko walesi sikhungo sokuqondisa uwukuhlela umsebenzi wokushumayela nokudiliva izincwadi emabandleni endawo oFakazi BakaJehova. ISolnechnoye ayinaso isikhungo sayo sokunyathelisa, ngakho izincwadi zesiRussia zinyatheliswa eJalimane, bese zidilivwa eSt. Petersburg, lapho zisakazwa khona ezindaweni ezihlukahlukene. Cishe abantu abangu-190 basebenza kulesi sikhungo. Basebenza ngokuzithandela futhi nakuba bengaholi, banakekelwa ngazo zonke izidingo eziyisisekelo, njengendawo yokuhlala, ukudla nokokwembatha.
“Umsebenzi walesi sikhungo uqondiswa ikomiti yabadala abangu-18. UVasily Kalin ubelokhu engumxhumanisi walesi sikhungo sokuqondisa kusukela ngo-1992. Wazalelwa e-Ivano-Frankovsk. Ngo-1951, lapho eneminyaka emine ubudala, yena nabazali bakhe badingiselwa eSiberia (ngo-1949 nango-1951 imikhaya engaba ngu-5000 yashushiswa iziphathimandla ngenxa yokuba oFakazi BakaJehova). Wabhapathizwa ngo-1965 futhi wahlala esifundeni sase-Irkutsk. Waba yinduna esikhungweni sokugawula imithi.
“Ngaphandle kwezisebenzi zokuzithandela ezikulesi sikhungo kukhona nezisebenzi zokwakha zokuzithandela ezingu-200 ezivela eRussia, eFinland, eSweden naseNorway ezihlala eSolnechnoye: Iningi lazo liye lahlaba ikhefu emsebenzini walo ovamile. Kukhona noFakazi BakaJehova abaningi abavela e-Ukraine, eMoldova, eJalimane, e-United States, eFinland, ePoland nakwamanye amazwe. (OFakazi BakaJehova abanalo ubandlululo lobuhlanga. Naphezu kweqiniso lokuthi abaseGeorgia, ama-Abkhazia, ama-Azerbaijan nabase-Armenia bahlala ndawonye kulesi sikhungo, akukaze kube nempi ngisho nakanye eminyakeni emine.)
“Izinto nemishini eminingi yokwakha kwathunyelwa amazwe aseScandinavia, futhi okuningi kwatholakala mahhala kuvela kwabakholwa nabo. Ngaboniswa ugandaganda owalethwa uFakazi KaJehova waseSweden eSolnechnoye ngo-1993. Wayewulungisa njalo ngesikhathi elapha, futhi ngaphambi kokuba aphindele ekhaya wawupha abafowabo akholwa nabo. Izisebenzi zokwakha zihlala ezindlini ezinethezekile. Usuku lwabo oluvamile lunjena: ngo-7:00 ekuseni—ukudla kwasekuseni nomthandazo; basebenza kusukela ngo-8:00 ekuseni kuze kube ngo-5:00 ntambama, bathole ihora elilodwa lesikhathi sokudla kwasemini. NgoMgqibelo basebenza kuze kube semini, kanti iSonto usuku lokuphumula.
“Badla ukudla okunomsoco futhi ukudla kwabo njalo kunezithelo. Lenkolo ayikuzili ukudla noma igcine noma yimiphi imibandela yokudla. Ngemva komsebenzi, abaningi baya kuyi-sauna bese bephuza ubhiya baphumule belalele umculo. Azikho izidakwa phakathi koFakazi BakaJehova, kodwa notshwala abenqatshelwe. Amakholwa avunyelwe ukuphuza iwayini, i-cognac, i-vodka nokunye ngokulinganisela. Nokho, oFakazi BakaJehova ababhemi.
***
“Kathathu ngesonto kunamakilasi esifundo seBhayibheli, ngokuvamile okuba khona intsha kuwo. Nokho, kuvamile ukuba uthole labo asebeneminyaka engu-30 kuya kwengu-40 bengoFakazi BakaJehova. Cishe bonke asebekhulile baye bachitha isikhathi esithile begqunywe emajele, besemakamu okusebenza futhi bedingisiwe. Ngemva kokuphela kwenkathi yokuvinjelwa, odokotela abaningi, abameli, onjiniyela, othisha, osomabhizinisi nabafundi bazihlanganisa noFakazi BakaJehova.
“Amabandla azama ukulondoloza isimo sokulingana phakathi kwamalungu awo. Ngokwesibonelo, ngisho nomxhumanisi walesi sikhungo sokuqondisa ugeza izitsha kusihlwa uma kuyithuba lakhe. OFakazi BakaJehova babizana ngendlela ekhululekile futhi banezela elithi ‘mfowethu’ noma ‘dadewethu’ uma bebiza othile ngegama.
“Uma uFakazi KaJehova eqa izimfundiso zeBhayibheli futhi engafuni ukuphenduka, ujeziswa ngendlela engathi sína—uyaxoshwa. Lomuntu usengaya emihlanganweni, kodwa akholwa kanye nabo ababe besambingelela. Isijeziso esingaphansana kwaleso kungaba ukusolwa.
***
“Ngachitha isikhathi eside ngibheke oFakazi BakaJehova ngizama ukuthola ukuthi yini eyaletha abantu abaningi abahlukene kangaka kulenhlangano engokwenkolo. Nakuba ubuntu babo bungafani, futhi benemfundo engafani nezinto abazithandayo nabangazithandi, [oFakazi BakaJehova abahlanganyeli ekukhulekeleni] nezinkolo ezivunana nezwe elinesono. Abakhululeki ezindaweni lapho [abantu] kumelwe bakholelwe khona egunyeni ngokunganaki, lapho kunokukholelwa ezimfihlweni, lapho abantu behlukaniswa khona kube nesigungu sabefundisi kanye nezixuku ezibalalelayo.
“OFakazi BakaJehova bahlukaniswa ngokukholelwa kwabo okuqinile ekuphileni ngokuvumelana neBhayibheli. Bazama ukusekela konke abakwenzayo ngesimiso esithile seBhayibheli, noma ngokucaphuna indima eTestamenteni Elidala noma Elisha. OFakazi BakaJehova bakholelwa ukuthi yiBhayibheli kuphela elinezimpendulo zayo yonke imibuzo. OFakazi BakaJehova babheka iBhayibheli njengomthetho-sisekelo, isimiso sezokuhlalisana neqiniso eliphakeme kakhulu.
“Ngenxa yalesi sizathu oFakazi BakaJehova baziwa emhlabeni wonke njengabantu abagcina umthetho ngokuphelele futhi ikakhulukazi ngesimo sabo sengqondo sokwethembeka ngokuqondene nokukhokha izintela. Ihhovisi lezentela njalo liyabahlola futhi isikhathi ngasinye limangale lapho lingatholi nokukodwa ukwaphulwa komthetho. Yiqiniso, oFakazi BakaJehova, njengabanye abaningi, bangazama ukuthola izaba zokungazikhokhi izintela, kodwa iBhayibheli lithi umuntu kumelwe athembeke ekukhokheni izintela, futhi koFakazi BakaJehova lelo yizwi lokugcina.
“Nokho, ukungayekethisi kwabo eBhayibhelini ngokuvamile kuwumthombo wokungqubuzana okukhulu phakathi koFakazi BakaJehova nohulumeni. Impikiswano enkulu ukungahlanganyeli kwabo nakancane kwezombangazwe, futhi lokhu kubonakala ngokwenqaba kwabo ukukhonza empini.
“OFakazi BakaJehova bawathatha ngokoqobo amazwi kaJesu athi abafundi bakhe nombuso wakhe akukhona okwalelizwe, futhi ngenxa yalesi sizathu bayenqaba ukuhlanganyela kwezombangazwe nasempini, kungakhathaliseki ukuthi ilwelwa kuphi futhi ngasiphi isizathu. Ngenxa yokuthi oFakazi BakaJehova benqaba ukuthi ‘Heil Hitler’ nokukhonza ebuthweni lakhe, izinkulungwane eziningi zamakholwa zathunyelwa emakamu okuhlushwa amaNazi, futhi kwafa izinkulungwane. UFakazi KaJehova ngamunye waseJalimane owalahlekelwa ukuphila kwakhe ngenxa yokwenqaba ukuhlanganyela ekuhlaselweni kweSoviet Union ubhekwa abaseRussia njengomuntu owenza isenzo sokuziphatha esihle kakhulu. Nokho, ngesikhathi esifanayo, abantu abaningi baseRussia abanalo uzwela ngoFakazi BakaJehova [baseRussia] ababulawa ngenxa yokwenqaba ukuthatha izikhali bahlanganyele eMpini Yezwe II, noma abagwetshwa ngenxa yokwenqaba ukukhonza ebuthweni lempi phakathi nezikhathi zokuthula. Kodwa kuzo zombili lezi zimo oFakazi BakaJehova babenza ngokuvumelana nezinkolelo zabo ezingokwenkolo hhayi imibono yezombangazwe.
“Muva nje kwaphakama inkinga efanayo eJapane, lapho abafundi abathile abangoFakazi BakaJehova benqaba khona ukufundela ubuciko bokulwa futhi bazifaka engozini yokuxoshwa eyunivesithi. Ngo-1996 iNkantolo Ephakame yaseJapane yakhipha isinqumo esisekela amalungelo alaba bafundi futhi yabavumela ukuba bathathe ezinye izifundo.
***
“Yini emangaza izingqapheli zanamuhla ngoFakazi BakaJehova? Okuvelele kunakho konke ukushumayela kwabo ngokungaphezi ukuthi ukuphela kwezwe kuseduze (benza umsebenzi wokushumayela emigwaqweni nasendlini ngendlu). Muva nje abadala baye baluleka abashumayeli ukuba bangagcizeleli kakhulu ‘ukuphela kwezwe’ nesiphelo esidabukisayo esiyofikela izoni, kodwa kunalokho ukuba bachazele izilaleli ukuthi uJehova ubanikeza ithuba lokuba bathole ‘ukuphila okuphakade epharadesi emhlabeni.’
“Okunye okubanga inkinga ukungavumelani koFakazi BakaJehova nokusebenzelana kwezinkolo ezihlukahlukene, nokungavumelani kwabo nobumbano lwamasonto emhlabeni wonke. Bakholelwa ukuthi amasonto obuKristu aye alahla uNkulunkulu neBhayibheli, nokuthi zonke ezinye izinkolo zisephutheni. OFakazi BakaJehova bafanisa lezi zinkolo ‘nesifebe saseBabiloni,’ futhi bathi zizokwehlelwa isiphelo esifanayo. Umagazini wamuva nje i-‘Phaphama!’ uthi ukuphela kwezinkolo ezihlukahlukene kuseduze, nokuthi okuwukuphela kwenkolo eyosala yileyo oFakazi BakaJehova abashumayela ngayo.
“Kodwa-ke, oFakazi BakaJehova bayaliqaphela ilungelo lomuntu ngamunye lenkululeko kanembeza.
***
“Amazwe amaningana kakade asezwakalise ukukhathazeka ngokuqondene nokuthi izimfundiso zoFakazi BakaJehova ziwusongo yini emphakathini. INkantolo Ephakeme yesifundazwe saseConnecticut, e-United States (1979) neyaseNew South Wales, e-Australia (1972), iNkantolo Yesifundazwe saseBritish Columbia, eCanada (1986) nezinye izinkantolo ziye zamemezela ukuthi abukho ubufakazi bokuthi oFakazi BakaJehova bawusongo emphakathini, noma ukuthi bawusongo empilweni yabantu noma esimweni sabo esingokomzwelo. I-Human Rights Court yaseYurophu (1993) yalivikela ilungelo loFakazi BakaJehova lenkululeko yenkolo, elalibekelwe imingcele eGreece nase-Austria. Namuhla oFakazi BakaJehova bayashushiswa emazweni angu-25 . . .
“OFakazi BakaJehova bangabhekwa njengesibonelo ezakhamuzini abaphila nazo ngokuzinikela kwabo eqinisweni leBhayibheli nangokuzimisela kwabo ukumelela izinkolelo zabo ngokuzidela. Kodwa kuphakama umbuzo: Ingabe umphakathi wethu ukulungele ukuzinikeza iziqinisekiso zomthetho-sisekelo zenkululeko kanembeza izinhlangano ezilondoloza inkambiso yazo engokweBhayibheli kuzo zonke izici zokuphila ngendlela ephawulekayo nengayekethisi ngalendlela?”
Kulomusho wokugcina, uMnu. Ivanenko waphakamisa umbuzo obalulekile. Ekhulwini lokuqala, umphostoli uPawulu, owakhethwa ngokuqondile uKristu ukuba akhonze njengommeleli wakhe, wangena ‘ezibophweni zasetilongweni’ ngokungafanele. Ngakho, uPawulu wabhalela amakholwa akanye naye ngomzamo wakhe ‘ekuvikeleni nasekumiseni ngokomthetho izindaba ezinhle.’—Filipi 1:7; IzEnzo 9:3-16.
OFakazi BakaJehova namuhla bamema bonke ukuba bahlole imisebenzi yabo ngokucophelela, njengoba kwenza uMnu. Ivanenko. Siyaqiniseka ukuthi uma abantu benza kanjalo, bayothola ukuthi imibiko engemihle ngoFakazi ayilona iqiniso, njengoba nemibiko efanayo ngamaKristu okuqala yayingelona iqiniso. Ngokuphawulekayo, oFakazi balalela “umyalo omusha” uJesu awunika abafundi bakhe: “Nithandane; njengoba nje nami nginithandile.”—Johane 13:34, 35.
[Ibhokisi ekhasini 23]
Ifayili Ye-MN
(Ukwaziswa okulandelayo okuvela emafayilini e-Moscow News kwanyatheliswa nguSergei Ivanenko kanye nalesi sihloko.)
“OFakazi BakaJehova baseRussia bayingxenye yenhlangano yobuKristu yomhlaba wonke esebenza emazweni angu-233 futhi enamalungu ayizigidi ezingu-5,4. OFakazi BakaJehova balandela isiqondiso esingokomoya seNdikimba Ebusayo eseBrooklyn, eNew York. Inhlangano yanamuhla yoFakazi BakaJehova yasungulwa ekilasini lesifundo seBhayibheli elabunjwa ngo-1870 nguCharles Taze Russell ePittsburgh, ePennsylvania. Lenhlangano yafika kwelaseRussia ngo-1887. Omunye woFakazi BakaJehova bokuqala eRussia, uSemyon Kozlitsky, wadingiselwa eSiberia esuka eMoscow ngo-1891. Naphezu koshushiso lenhlangano eyabhekana nalo, ngo-1956 kwakunoFakazi BakaJehova abangu-17000 eSoviet Union. OFakazi BakaJehova abazange baqashelwe ngokomthetho eRussia kwaze kwaba ngo-March 1991, ngemva kokushaywa komthetho ‘Wenkululeko Yenkolo.’ Namuhla kunamaqembu angaphezu kuka-500 anamalungu ashisekayo angaba ngu-70 000 eRussia. Lenhlangano isakaza amakhophi e-‘Nqabayokulinda’ (enyatheliswa ngezilimi ezingu-125, kusakazwa amakhophi ayizigidi ezingu-20) kanye ne-‘Phaphama!’ (ngezilimi ezingu-81, kusakazwa amakhophi ayizigidi ezingu-18).”
[Isithombe ekhasini 23]
Ingxenye yesakhiwo sehhovisi legatsha laseRussia
[Isithombe ekhasini 24]
IHholo LoMbuso lapho umkhaya wegatsha laseRussia uhlangana khona ukuze ube nesifundo seBhayibheli
[Izithombe ekhasini 25]
Imikhaya yoFakazi iyatadisha futhi izilibazise ndawonye
[Izithombe ekhasini 26]
Bahlanganyela ulwazi lweBhayibheli nabanye