Okuphawulwa Abafundi Balomagazini
Ukususa Ekuhlanganyeleni Ngasazisa isihloko esithi “Umbono WeBhayibheli: Okwenza Ukususa Ekuhlanganyeleni Kube Ilungiselelo Lothando.” (September 8, 1996) Ngasuswa ekuhlanganyeleni ngo-1987 futhi ngabuyiselwa ngo-1988, ngemva kokuba sengifunde isifundo. Leli lungiselelo lothando langisiza ukuba ngenze ushintsho ekuphileni nakubangane bami. Yeka indlela esibusiswe ngayo ngokuba nenhlangano eqaphela izindinganiso zeBhayibheli!
R. R., United States
Nami ngasuswa ebandleni. Ngaleso sikhathi ngaba nomuzwa wokuthi kwakuyisihluku futhi kuyinto eyehlisa isithunzi kunazo zonke ezingenziwa kumuntu. Nganginephutha! Ngaphambi kokuba ngisuswe ekuhlanganyeleni, abadala bebandla bazikhandla bengisiza ukuba ngiphenduke. Ngamane ngangalwazisa usizo ngaleso sikhathi. Ukususwa ekuhlanganyeleni kwangithobisa kakhulu. Kwangenza ngabona ukuthi bubaluleke kangakanani ubuhlobo bethu noJehova.
B. T., United States
AmaMelika Omdabu Ngiyabonga ngochungechunge oluthi “AmaNdiya AseMelika—Liyini Ikusasa Lawo?” (September 8, 1996) Bengilokhu nginesithakazelo emlandweni wamaMelika Omdabu. Ngaphinde ngahlatshwa umxhwele ukungagwegwesi, ukuba nenjongo nokunemba ngokomlando komagazini benu.
A. M., Italy
Angikaze ngibone uthisha noma ummeli ongumMelika Womdabu esembozweni sikamagazini. Njalo kuvezwa imifanekiso yasendulo, efana nesesembozweni sikamagazini wenu. Ukuvezwa njalo kwalemifanekiso kuthiya imizamo yethu yokusiza abantu abanomqondo ovalekile.
K. M. T., United States
Ngokuqinisekile kwakungeyona injongo yethu ukuthuthukisa noma yimuphi umqondo olimazayo. Umfanekiso osesembozweni wawuklanyelwe ukuveza amaMelika Omdabu ngendlela enhle nenesithunzi. Imvunulo yesintu yasetshenziswa ngoba yayifaneleka endabeni futhi babengayiqonda kalula abafundi balomagazini embulungeni yonke. Ngokuthakazelisayo, abafundi abaningi abangamaMelika Omdabu bazwakalisa ukwazisa ngalezi zihloko nangemifanekiso. Amanye afisa ukulondoloza izindlela zokuphila zasendulo futhi asagqoka ngendlela yomdabu ngezinye izikhathi.—ED.
Njengoba ngisebenza emnyuziyamu njengesazi sokuhlukaniswa kwabantu ngokobuhlanga esigxile eNyakatho Melika, nginesithakazelo esikhulu kulendaba. Ningakwazi yini ukungithumelela amakhophi ayishumi alomagazini, engingawanikeza abanye abanesithakazelo emaNdiyeni AseMelika?
P. B., Germany
Sasamukela ngenjabulo lesi sicelo.—ED.
Okuncane engikwaziyo ngamaNdiya ngakuthola emabhayisikobho. Kulezi zihloko ngibonile ukuthi iHollywood ayizange iveze iqiniso elimsulwa. Indlela engibheka ngayo amaNdiya isishintshile.
T. M., United States
Omunye wokhokho bami wayengumMelika Womdabu, ngakho ngakujabulela ukufunda lomagazini. Nokho, ngokuphambene nombono ovamile, uSitting Bull wayengeyena umholi empini yaseLittle Bighorn.
P. H., United States
Kubonakala sengathi ukuthi uSitting Bull waba nengxenye kulempi noma cha kuyindaba izazi-mlando ezisaphikisana ngayo. Umbono okubonakala wamukelwa izazi eziningi utholakala kumagazini ohloniphekile i-“Natural History,” othi: “Ngokokulandisa kwamaNdiya, uSitting Bull, ngezinye izikhathi okucatshangwa ukuthi wayeyisitha sikaCuster empini, akazange alwe kulempi kodwa wayematasa enza intelezi yokuqinisa amabutho amaNdiya.” Ukuthi kuyovela yini okunye ukwaziswa okucacisayo noma cha kuzobonakala ngokuhamba kwesikhathi.—ED.