Intsha Iyabuza . . .

Ingabe Ngikulungele Ukuba Ngibhapathizwe?

Watchtower Society Ethandekayo:

Igama lami uSharon futhi ngineminyaka engu-13 ubudala. Bengilokhu ngizibuza ukuthi kazi ngikulungele yini ukubhapathizwa. Ngicabanga ukuthi ngikulungele, kodwa angikaqiniseki. Ngiyaqiniseka ngokuthi lokhu kusezingqondweni zamanye amaKristu asemasha. Ningasiza nibhale isihloko ukuze ningisize ngiqonde?

USHARON uqinisile. Ngempela ubhapathizo lusezingqondweni zentsha eningi eyesaba uNkulunkulu. Phakathi koFakazi BakaJehova, intsha iyaqaphela ukuthi kumelwe izenzele lesosinqumo sayo sokukhonza uNkulunkulu, ukuthi abazali bayo abanakuyenzela isinqumo. Futhi iyaqaphela ukuthi uJesu Kristu wayala abalandeli bakhe ukuba babonakalise ukuzinikezela kwabo kuNkulunkulu ngobhapathizo lwamanzi.—Mathewu 28:19, 20.

Ukwenza isimemezelo sasobala njengenceku kaNkulunkulu ezinikezele kuwumthwalo wemfanelo omkhulu. Ngokuqinisekile ngeke uthande ukugijimela kuwo ukuze nje ujabulise abangane bakho noma abazali. Ngaphezu kwalokho, akekho okumelwe akuphoqelele ukuba ubhapathizwe. (IHubo 110:3) Nokho, uJesu waseluleka sonke ukuba ‘sibale izindleko’ zokuba umlandeli wakhe. (Luka 14:28) Lokhu akusho ukuthi kumelwe ucabangele ukuthi uyafuna yini ukuba umfundi kaKristu noma cha. Ngokusobala, lokhu kuyinto elungile ukuyenza. Nokho, kumelwe, ukuqaphele ngokugcwele lokho okuhilelwa ukuba uFakazi kaJehova.a Okwesibili, kumelwe uzihlole ukuthi ukulungele yini ngempela ukuthwala lomthwalo wemfanelo.—Qhathanisa nezAga 20:25.

‘Ingabe Ngikhule Ngokwanele?’

Njengoba abasebasha bekhula, ngokuvamile baba nomuzwa wokuthi banelungelo lokujabulela amalungelo athile nemithwalo yemfanelo. Bayashesha ukucela ngokuphikelela ukushayela imoto yomkhaya, ukucela imvume yokuba namatoho angemva kwesikole, ukufuna neyabo imali yokuzithengela. Kodwa lapho kuziwa ekubhapathizweni, intsha eningi ibeka isaba sokuthi isencane kakhulu noma ayikawulungeli lomthwalo wemfanelo. Osemusha ogama lakhe linguAndre uyaphawula: “Intsha eningi ilinda ize ibe neminyaka engu-17 noma engu-18 ukuze ibhapathizwe, kuyiminyaka lapho isithe ukukhulakhula ngayo.” Kungani? “Ngenxa yokuthi esikhathini eside ngaphambi kwalokho, basuke sebekhule ngokwanele ukuba bazenzele ezinye izinqumo.”

Yebo, iqiniso nje lokuthi usemusha alisona isaba ‘sokuntengantenga phakathi kwezinhlangothi ezimbili,’ futhi alisona isizathu esizwakalayo sokuzindela ukuthatha ukuma kokuba umKristu. (1 AmaKhosi 18:21) IBhayibheli liyanxusa: “Khumbula uMdali wakho emihleni yobusha bakho.” (UmShumayeli 12:1) Umprofethi uSamuweli wayengomunye owaqala ukukhonza uJehova esemncane kakhulu. (1 Samuweli 3:1-18; 12:2) Umhubi uDavide ngokufanayo wayengathi: “Wena uyithemba lami, Nkosi Jehova, ithemba lami kwasebusheni bami.”—IHubo 71:5.

Ngokufanayo, izinkulungwane zentsha engamaKristu namuhla—kuhlanganise nabanye abangaphansi kweminyaka eyishumi nantathu—iye yazibonakalisa ikwazi ukuthwala umthwalo wemfanelo ngokwanele ukuba izinikezele ukuze ikhonze uNkulunkulu. Kuyavunywa, enye intsha intula ukuzimisela futhi ayinaki kakhulu futhi ayikakavuthwa ngokomzwelo ukuba yenze isinqumo esifinyelela kude njengokubhapathizwa. (IzAga 22:15) Kodwa lokhu ingabe kunjalo ngempela ngawe? (Ngokungangabazeki abazali bakho basho okuningi ngokuphathelene nalendaba.) UNkulunkulu akakulindele neze ukuba osemusha abe nokuvuthwa komuntu oneminyaka engu-40 ubudala. Uyazi kahle ukuthi uyisisulu ‘sezinkanuko zobusha.’ (2 Thimothewu 2:22) Kodwa uma usukhule ngokwanele ukuba ngokwesilinganiso esithile ube nokuzimisela futhi ukwazi ukuthwala umthwalo wemfanelo, khona-ke ngokunokwenzeka kakhulu usukhule ngokwanele ukuba ucabangele ukuzinikezela. Nokho, kuneminye imibuzo okumelwe uzibuze yona.

‘Ingabe Ngiye Ngangenisa Ulwazi Olwanele?’

Incwadi ethi The Adolescent, kaF. Philip Rice, iphawula ukuthi “umqondo ongajulile, ontulayo ngenkolo ngokuvamile ngeke ume ngaphansi kokuhlaselwa nokuvivinywa.” Nokho, uMnu. Rice uyaphawula: “Kunezimpawu ezithile ezibonisa ukuthi intsha yanamuhla ayinalwazi ngokudabukisayo. Ukuhlolwa ngolwazi lweBhayibheli kwabafundi abenza unyaka wesibili eyunivesithi yamaProthestani neyamaJuda kwembula ukungaziwa kwangempela kweTestamente Elidala neLisha.”

Lokhu akumelwe kube njalo ngomuntu obhapathizwayo. Umuntu kumelwe kuqala “angenise ulwazi” ukuze abe umfundi, noma umuntu ofundisiwe. (Johane 17:3, NW; Mathewu 28:19) Ngakho ngeke yini kube okunengqondo ukulindela ukuthi ngaphambi kokuba ubhapathizwe, wazi okungenani “izinto eziyisisekelo zezimemezelo ezingcwele zikaNkulunkulu?” (Heberu 5:12) Lokho kuyohlanganisa nokwazi ukuthi iBhayibheli lifundisani ezindabeni ezinjengomphefumulo, isimo sabafile, ukungcweliswa kwegama likaNkulunkulu, uMbuso, nesihlengo.

Yiqiniso, kumelwe ukuba wazi okuthile ngeBhayibheli ngenxa nje yokuthi ubulokhu uya nabazali bakho emihlanganweni yobuKristu. Kodwa ulwazi olutholwe ngaleyondlela lungase lube olukha phezulu futhi ngokunokwenzeka ngeke “lume ngaphansi kokuhlaselwa nokuvivinywa.” Kumelwe ukwazi ukunikeza abanye ‘isizathu sethemba elikuwe.’—1 Petru 3:15.

UTerry uthi wayewakholelwa amaqiniso eBhayibheli. Noma kunjalo uyavuma: “Ngangingakaze ngizanelise ngokubuza imibuzo yami siqu bese ngiyiphendula. Muva nje, ngaqala ukwenza lokhu.” Waba yini umphumela wesimiso esinjalo sokutadisha iBhayibheli? “Ukholo lwami luyakhula, futhi manje ngithola ukuthi ngiyakwazi ukukhuluma nabantu ngokuqiniseka kwangempela. Ngitshela yonke intsha engoFakazi ukuba ingesabi ukuzibuza ukuthi ingabe leli yiqiniso yini. Zihlole! Cwaninga, tadisha. ‘Vivinyani konke.’ Khona-ke niyokwazi ukuzinikezela ngenhliziyo yonke kuJehova.—1 Thesalonika 5:21.

‘Abenzi Bezwi’

Nokho, kumelwe sibe ‘abenzi bezwi, singabi abalizwayo kuphela.’ (Jakobe 1:22) Awunakuzinikela ukuba ubhapathizwe futhi ube ‘ofihla lokho ayikho ngempela’ ngokufihla ububi obungathi sína. (IHubo 26:4) Ububi obunjalo buyohlanganisa ukuziphatha okubi kobulili, ukudakwa, ukusebenzisa kabi izidakamizwa, noma yinoma yiziphi ezinye izono okukhulunywa ngazo kweyoku-1 Korinte 6:9, 10. Uma uye waba nezinkinga ngokuphathelene nalokhu, kungani ungahleli nabazali bakho ukuba nikhulume nabanye babadala abangamaKristu? Qiniseka ukuthi bayokunikeza usizo lomusa.—Jakobe 5:14, 15.

Kungase futhi kwenzeke ukuthi kudingeka ezinye izinguquko endleleni ophatha ngayo abazali bakho noma obheka ngayo iseluleko esivela kubadala abangamaKristu, ngisho nasendleleni okhetha ngayo abangane. (IzAga 6:20; 13:20; 1 Korinte 15:33; Heberu 13:17) Kungase kungabi lula ukwenza izinguquko ezinjalo, kodwa izAga 11:19 ziyasikhumbuza: “Oqinile ekulungeni uyakuphila, kepha olandela okubi, kuyakuba-ngukufa kwakhe.”

Ingabe uJehova ufuna ukuba ube ophelele? Lutho neze. IzAga 20:9 ziyabuza, “ngubani ongasho ukuthi ngihlanzile inhliziyo, sengihlambulukile ezonweni zami, na?” Njengoba singaphelele, sisawenza amaphutha. Kodwa ngenxa yesihlengo sikaKristu, singahlala sisekumeni okuhle noNkulunkulu. (1 Johane 2:1, 2) Ngokwesibonelo, osemusha olwa kanzima nomkhuba omubi, onjengesenzo esingahlanzekile sokushaya indlwabu, akudingeki abe nomuzwa wokuthi akalufanelekele ubhapathizo.b Ngempela, ngokulwa kanzima nokungalungi, umuntu angayithokozisa inhliziyo kaJehova!—IzAga 27:11.

‘Ingabe Sengimenzile UNkulunkulu Umngane Wami?’

Nokho, mhlawumbe umbuzo obaluleke kakhulu, uhilela ubuhlobo bakho noNkulunkulu. Khumbula: awuzinikezeli emsebenzini, noma enkambweni, noma ngisho nasenhlanganweni, kodwa uzinikezele kuNkulunkulu ngokwakhe. Ingabe uNkulunkulu ubonakala engaphili, ekude? Noma ingabe usuye wamazi futhi wamthanda njengomuntu? (Eksodusi 34:6, 7) Uma kunjalo, uyozithola ukhuluma naye njalo, hhayi ukhuluma nje ngokuzenzakalelayo, kodwa ngokusuka enhliziyweni.—IHubo 62:8.

Futhi uyozithola uphoqelekile ukuba ukhulume nabanye ngoNkulunkulu. (Qhathanisa neyesi-2 Korinte 5:14.) IzAga 15:7 zithi: “Izindebe zabahlakaniphileyo ziyasakaza ukwazi, kepha izinhliziyo zeziwula azinjalo.” Ingabe wenza kanjalo ngokushumayela njalo kwabanye? Noma ingabe uvumela ukuzilibazisa, injabulo, ngisho nobuvila ukuba kukuvimbele ekusizeni abanye ukuba bafinyelele ekwazini uNkulunkulu?—IzAga 19:24.

Yebo, ukuze ubhapathizo lusho okuthile, uNkulunkulu kumelwe abe umngane wakho oseduze kakhulu. (Qhathanisa noJakobe 2:23.) Uma lokhu kungenjalo manje, iphutha akulona elikaNkulunkulu, ngoba umema bonke ngemfudumalo ukuba bamfune. (IzEnzo 17:27) Futhi, ngokuphikelela esifundweni somuntu siqu, emkhulekweni, nasekuhlanganeni nabantu bakhe, ngesikhathi esifanele uyozizwa useduze kakhudlwana noNkulunkulu. (Roma 12:12; 1 Thimothewu 4:15; Heberu 10:24, 25) Ubhapathizo luyoba umphumela ozenzakalelayo ‘wokusondela eduze nonkulunkulu’ okunjalo.’—Jakobe 4:8.

Ngokwesibonelo, cabanga ngentombazane esencane egama layo linguCindy. Iyabhala: “Lapho ngineminyaka engu-14 ngabhapathizwa. Ngiyazi ukuthi kunjani ukuba manqikanqika ngokwenza kanjalo. Kodwa ngifuna ukusho ukuthi lokhu kuyinto enhle kakhulu ongase uyenze. Ake ucabange, ukwazi ukuthi uJehova uye wakuvumela nokuthi ‘akasoze akushiya futhi akasoze akulahla’! (Heberu 13:5) Uma noma ubani engangibuza ukuthi kufanele yini azinikezele kuJehova, ngingathi yebo! Kodwa ungakwenzi lokhu ukuze uthokozise othile. Kwenze ngoba ufuna ukukwenza.”

[Imibhalo yaphansi]

[Isithombe ekhasini 16]

Intsha eningi iyalufanelekela ubhapathizo. Ingabe wena uyalufanelekela?