Luka 1:37—“Ngokuba Akukho Lutho Olungenzeke KuNkulunkulu”

“Ngoba akunasimemezelo esingeke sifezeke kuNkulunkulu.”—Luka 1:37, IBhayibheli—ImiBhalo Engcwele.

“Ngokuba akukho lutho olungenzeke kuNkulunkulu”.—Luka 1:37, IBhayibheli Elingcwele.

Incazelo kaLuka 1:37

UNkulunkulu uMninimandla Onke angenza izinto ezibukeka zingenakwenzeka emehlweni abantu. Akukho lutho olungamvimba ukuba afeze izithembiso zakhe noma enze lokho akushoyo.

Inkulumo ethi “isimemezelo” ingabhekisela “kwizwi” noma “isisho”—kuleli vesi, kubhekiselwa ezwini likaNkulunkulu noma amazwi ashiwo uNkulunkulu. Lingabuye libhekisele emiphumeleni yalokho uJehovaa uNkulunkulu akumemezele. Ngenxa yokuthi izwi likaNkulunkulu lihlale ligcwaliseka, uLuka 1:37 angaphinde ahunyushwe ngokuthi: “Ngoba izithembiso zikaNkulunkulu azisoze zangagcwaliseka” noma “Ngoba ngoNkulunkulu, akukho okungeke kwenzeke.” La magama ahunyushwe esuselwa embhalweni yesiGreki adlulisela iqiniso elilodwa elilula: Asikho isimemezelo noma isithembiso sikaNkulunkulu esingeke sigcwaliseke, ngoba akukho okungeke kwenzeke ngaye.—Isaya 55:10, 11.

Izinkulumo ezifana nalena eziphathelene nezithembiso zikaNkulunkulu zivela kulo lonke iBhayibheli. Ngokwesibonelo, esebenzisa ingelosi yakhe, uJehova, wabikezela ukuthi inkosikazi ka-Abrahama engenamntwana, uSara, wayezokhulelwa ebumpungeni bakhe. UNkulunkulu wanezela: “Ingabe kukhona okungaphezu kwamandla kaJehova?” (Genesise 18:13, 14) Ngemva kokucabanga ngendalo kaNkulunkulu, inhloko yomndeni uJobe yavuma: “Akukho lutho olucabangayo ongeke ukwazi ukulwenza.” (Jobe 42:2) Nalapho abafundi bakaJesu beveza ukukhathazeka nokungabaza kwabo mayelana nokufanelekela ukusindiswa uNkulunkulu, uJesu wabakhumbuza ukuthi “kuNkulunkulu zonke izinto zingenzeka.”—Mathewu 19:25, 26.b

Umongo kaLuka 1:37

Ingelosi ebizwa ngokuthi uGabriyeli yasho amazwi akuLuka 1:37 kwintombi engumJuda uMariya. UGabriyeli wamtshela ukuthi uzozala “iNdodana YoPhezukonke” futhi kwakumele ‘ayiqambe ngokuthi uJesu.’ Le Ndodana yayizoba iNkosi yoMbuso kaNkulunkulu, ozobusa phakade naphakade.—Luka 1:26-33; IsAmbulo 11:15.

UMariya wabuza ukuthi kwakungenzeka kanjani lokho ngoba wayengashadile futhi ‘engayi ocansini nendoda.’ (Luka 1:34, 35) UGabriyeli waphendula ngokuthi uNkulunkulu wayezosebenzisa umoya waKhe ongcwele, noma amandla asebenzayo. Ngaleso sikhathi, uJesu wayeyindodana kaNkulunkulu engumoya ezulwini. Ngakho uJehova wasebenzisa umoya wakhe ongcwele ukuze adlulisele ukuphila kweNdodana yakhe kusuka ezulwini kuya esibelethweni sikaMariya. (Johane 1:14; Filipi 2:5-7) Ngaleyo ndlela, uMariya wakhulelwa ngokuyisimangaliso. Ukuze iqinise ukholo lwakhe emandleni kaNkulunkulu, ingelosi yamtshela ukuthi isihlobo sakhe u-Elizabethe wayekhulelwe indodana “ekugugeni kwakhe.” U-Elizabethe nomyeni wakhe, uZakariya, babengenabantwana ngoba u-Elizabethe wayeyinyumba. (Luka 1:36) Indodana yabo yaba uJohane uMbhapathizi, lowo uNkulunkulu ayebikezele kusengaphambili ngenkonzo yakhe.—Luka 1:10-16; 3:1-6.

Ingelosi uGabriyeli yabe isisho amazwi alotshwe kuLuka 1:37, mhlawumbe ecabanga ngoMariya no-Elizabethe. Lawo mazwi afanayo aqinisekisa izikhonzi zikaJehova namuhla ngokuthi uzoqhubeka egcina izithembiso zakhe. Lokho kuhlanganisa nesithembiso sakhe sokususa ohulumeni babantu bese esikhundleni sabo, amise ukubusa okulungile kweNdodana yakhe, uJesu Kristu, iNkosi yoMbuso kaNkulunkulu wasezulwini.—Daniyeli 2:44; 7:13, 14.

Bukela le vidiyo emfushane ukuze ubone amazwibela encwadi kaLuka.