Ubani ULizwi KaNkulunkulu Noma Liyini Izwi LikaNkulunkulu?
Impendulo yeBhayibheli
Inkulumo ethi “izwi likaNkulunkulu” ngokuvamile ibhekisela emyalezweni kaNkulunkulu noma eqoqweni laleyo miyalezo. (Luka 11:28) Ezindaweni eziningana, inkulumo ethi “uLizwi KaNkulunkulu” noma “uLizwi” isetshenziswa njengesiqu somuntu.—IsAmbulo 19:13; Johane 1:14.
Umyalezo kaNkulunkulu. Abaprofethi babevame ukusho ukuthi umyalezo ababewuletha wawuyizwi likaNkulunkulu. Ngokwesibonelo, uJeremiya wayethula imiyalezo yakhe eyisiprofetho ngamazwi athi, “izwi likaJehova lafika kimi.” (Jeremiya 1:4, 11, 13; 2:1) Ngaphambi kokutshela uSawule ukuthi uNkulunkulu wayekhethe yena njengenkosi, umprofethi uSamuweli wathi: “Yima manje ukuze ngikuzwise izwi likaNkulunkulu.”—1 Samuweli 9:27.
Isiqu somuntu. Elithi “uLizwi” libuye livele eBhayibhelini njengesiqu sikaJesu Kristu, kokubili njengomoya ezulwini nanjengomuntu emhlabeni. Cabanga ngezinye zezizathu ezenza siphethe kanjalo:
ULizwi wayekhona ngaphambi kwayo yonke indalo. “Ekuqaleni wayekhona uLizwi . . . Ekuqaleni lona wayenoNkulunkulu.” (Johane 1:1, 2) UJesu ‘uyizibulo layo yonke indalo. Ungaphambi kwazo zonke ezinye izinto.’—Kolose 1:13-15, 17.
ULizwi weza emhlabeni njengomuntu. “ULizwi waba yinyama wahlala phakathi kwethu.” (Johane 1:14) UKristu Jesu “wazidela, wathatha isimo senceku wafana nabantu.”—Filipi 2:5-7.
ULizwi yiNdodana kaNkulunkulu. Ngemva kokusho amazwi athi, “uLizwi waba yinyama,” njengoba kucashunwe ngenhla, umphostoli uJohane waqhubeka wathi: “Sayibona inkazimulo yakhe, inkazimulo enjengeyendodana ezelwe yodwa kuyise.” (Johane 1:14) UJohane waphinde wabhala: “UJesu Kristu uyiNdodana kaNkulunkulu.”—1 Johane 4:15.
ULizwi unezimfanelo zobunkulunkulu. “ULizwi wayewunkulunkulu,” noma “wayengowaphezulu.” (Johane 1:1; An American Translation) UJesu ‘uwukubonakaliswa kwenkazimulo kaNkulunkulu nomfanekiso okuyiwonawona wobuqu bakhe uqobo.’—Hebheru 1:2, 3.
ULizwi ubusa njengenkosi. IBhayibheli lithi ekhanda likaLizwi kaNkulunkulu kukhona “imiqhele eminingi.” (IsAmbulo 19:12, 13) ULizwi ubizwa nangokuthi “iNkosi yamakhosi noMbusi wababusi.” (IsAmbulo 19:16) UJesu ubizwa ‘ngeNkosi yalabo ababusa njengamakhosi noMbusi walabo ababusa njengababusi.’—1 Thimothewu 6:14, 15.
ULizwi ungumkhulumeli kaNkulunkulu. Isiqu esithi “uLizwi” kubonakala siveza umniniso njengalowo osetshenziswa uNkulunkulu ukuze adlulisele ukwaziswa neziqondiso. UJesu wathi wayefeza le ndima: “UBaba ngokwakhe owangithuma unginike umyalo ngokuqondene nokuthi yini okumelwe ngiyisho nokuthi yini okumelwe ngiyikhulume. . . . Ngakho-ke izinto engizikhulumayo ngizikhuluma njengoba nje uBaba engitshele zona.”—Johane 12:49, 50.