IBhayibheli LesiGeorgia

ULIMI lwesiGeorgia lwalungolunye lwezilimi zokuqala iBhayibheli elahunyushelwa kuzo kuhlanganise nesi-Armenia, isiCoptic, isiLatin, isiSyriac nezinye. Imibhalo yesandla yolimi lwesiGeorgia esidala yamaVangeli, izincwadi zikaPawulu kanye namaHubo kwabhalwa maphakathi nekhulu lesihlanu C.E noma ngisho nangaphambi kwalokho. Emakhulwini eminyaka eyalandela, umsebenzi wokuhumushela nokukopishela iBhayibheli olimini lwesiGeorgia wanda, okwenza kwaba nezinguqulo eziningi zesiGeorgia.a

IBhayibheli laba nethonya elinamandla ezincwadini nasemasikweni abantu baseGeorgia. Ngokwesibonelo, indaba edabukisayo yeNdlovukazi uShushanik, cishe eyabhalwa ngasekupheleni kwekhulu lesihlanu, inezingcaphuno zeBhayibheli futhi ibhekisela ezindinyaneni ezihlukahlukene zalo. Imbongi uShota Rustaveli yabhekisela emithethweni yamaKristu yokuziphatha enkondlweni yayo ende i-Vepkhvistqaosani (The Knight in the Panther’s Skin) eyabhalwa cishe ngonyaka ka-1220. Yabhala ngezihloko ezifana nobungane, ukupha nothando ngezihambi—izici abantu baseGeorgia abasazibheka njengezibaluleke kakhulu.