Ukufinyelela Abangafinyeleleki

NAKUBA inkonzo yendlu ngendlu ilokhu iyindlela eyinhloko oFakazi BakaJehova abasakaza ngayo iqiniso leBhayibheli, ukusetshenziswa kwamatafula nezinqola ezinhle zokukhangisa ngezincwadi kubonakala kuyindlela ephumelela kakhulu yokushumayela izindaba ezinhle zoMbuso kaNkulunkulu. (Math. 24:14) Abashumayeli boMbuso baye basebenzisa izinqola namatafula ukuze bafinyelele abantu ezindaweni zomphakathi. Ngaphezu kwalokho, amabandla emhlabeni wonke asenikezwe izinqola zezincwadi ezingaba ngu-250 000. Basabele kanjani abantu?

EDar es Salaam, eTanzania, abantu ababalelwa ku-700 baye bacela ukufundelwa kusukela kwaqala uhlelo lokufakaza okukhethekile emadolobheni amakhulu kuleli zwe ngo-2014. Abantu abaningi abathakazelayo bebelokhu beza emihlanganweni futhi basondela kuNkulunkulu. Ngonyaka owodwa, abantu abavela emazweni ase-Afrika naphesheya bathathe izincwadi ezingaphezu kuka-250 000 ezinqoleni zokukhangisa.

ESolomon Islands, lapho abamemezeli abangaphansi kuka-2 000 beshumayela khona ensimini enkulu eneziqhingi ezingaphezu kuka-300, ukufakaza okukhethekile emadolobheni amakhulu sekuyindlela ebalulekile yokusakaza iqiniso. Enhloko-dolobha, iHoniara, abazalwane bahambisa omagazini abangaphezu kuka-104 000 nezincwajana ezingaphezu kuka-23 600, eziningi zithathwa abantu abahlala eziqhingini nasemadolobheni aqhelile angenabo oFakazi. Ngelinye ilanga ntambama, bahambisa izincwadi ezingu-400 ezithi Lifundisani Ngempela IBhayibheli? futhi abantu abangu-60 bacela ukufundelwa.

Ngelinye ilanga ekuseni, amaphayona avamile uMichael noLinda babebeka itafula lezincwadi ngasogwini lolwandle eMargarita Island, eVenezuela. Indoda okuthiwa u-Aníbal yeza etafuleni, yathatha incwadi ethi Okufundiswa IBhayibheli. Yawatshela ukuthi uyise washonela kulo kanye leli bhishi eminyakeni engu-7 ngaphambili, nokuthi kusukela lapho unina waba nesifo sokucindezeleka. Ngesonto elilandelayo, u-Aníbal wabuya, waxoxela uMichael noLinda ukuthi ngalolo suku kwakuwusuku okwakushone ngalo uyise. Wakhipha umakhalekhukhwini, washayela unina, wacela uMichael ukuba aduduze unina, uMichael wamduduza nangempela. Kusukela lapho, unina ubefonela uMichael noLinda izikhathi eziningi futhi baye bamduduza ngemiBhalo. Komunye umyalezo, umama ka-Aníbal wabhala, “Namuhla ngizizwa ngingcono kakhulu ngoba niye nangiduduza futhi nangisiza ngaqinisa ukholo lwami.”

Ukufakaza okukhethekile emadolobheni amakhulu sekuhlelwe ezindaweni ezingu-127 emadolobheni angu-14 ase-United States. Ezinyangeni zokuqala ezingu-7 zonyaka wenkonzo ka-2015, kwaqalwa izifundo zeBhayibheli ezingu-8 445! Le ndlela yokufakaza ibe wusizo nakwabaningi ababehlanganyela ukuba babuyele ekukhulekeleni kweqiniso. Ngokwesibonelo, indoda okuthiwa uTerry yayibuka elinye lamatafula ethu akhangisa ngezincwadi eLos Angeles, eCalifornia, ngakho umbhangqwana ongoFakazi etafuleni wambuza ukuthi wake wazifunda yini izincwadi zethu. Wachaza ukuthi ungomunye woFakazi BakaJehova kodwa ubesephole iminyaka engaba mine. Lo mbhangqwana wamfundela uHezekeli 34:11 base bexoxa ngawo, kulo mBhalo uJehova uthi: “Mina uqobo, ngiyozifuna izimvu zami ngizinakekele.” Wamtshela ngengosi yethu nangeSiteshi Sokusakaza Se-JW. Ngosuku olulandelayo, uTerry wathumelela umzalwane i-e-mail, echaza ukuthi ngaphambi nje kokuba abone itafula lezincwadi, wayecele uNkulunkulu ukuba amxolele ngokungayi emihlanganweni yebandla. Wayecele nosizo lokusondela kuye. UTerry wathi, “Wabe usungibingelela ngemfudumalo. Wangifundela lowa mBhalo okhuthazayo futhi wanginika ulwazi engiludingayo ukuze ngibuyele enhlanganweni kaJehova. Kwakuphenduleka umthandazo wami.”

Kunezindawo ezine zokufakaza okukhethekile emadolobheni amakhulu e-Addis Ababa, eTopiya. Ezinyangeni ezintathu, abazalwane bahambisa izincwadi ezingu-37 275 futhi abantu abangu-629 bacela ukuba oFakazi bafike emizini yabo. Phakathi kwabaningi abamukela incwadi ethi Okufundiswa IBhayibheli kwakuwumkhulu owayifunda ngaso leso sikhathi. Wayefundele ukuba umfundisi esikoleni sabefundisi futhi wayenemibuzo ngoJesu nangoMbuso kaNkulunkulu. Ngakho ngosuku olulandelayo, wabuyela etafuleni eyofuna izimpendulo zemibuzo yakhe. Ngemva kwalolo suku, wavuma ukufundelwa, ekupheleni kwesonto, weza okokuqala esifundweni. Manje uza njalo emihlanganweni yethu futhi uthuthuka kahle.

Indoda engumJuda yeza etafuleni lezincwadi eMexico, yabuza abazalwane ababili ababelapho ukuthi banayo yini incwadi ekhuluma ngokufa. Bayitshela ukuthi omagazini abakhuluma ngokufa base bephelile kodwa bayinika okhuluma ngekusasa. Le ndoda yabamba ingalo yomzalwane yathi: “Angifune kwazi ngekusasa. Engikufunayo nje ukuzibulala.” Yaqala ukukhala. Abazalwane bayibuza ukuthi kungani yayizizwa kanjalo. Ibibitheka yathi: “Ngisanda kushonelwa umfana wami.” Base beyibonisa isahluko 7 sencwadi ethi Okufundiswa IBhayibheli. Bayifundela izigaba ezimbili zokuqala ngaphansi kwesihlokwana esithi, “Lapho Othandekayo Efa” nasekugcineni kwesahluko, lapho kuchazwa khona ithemba labafileyo. Ithinteke kakhulu, yaphinde yabamba ingalo yomzalwane yabe isibuza, “Kuyiqiniso ngempela lokhu?” Abazalwane bayiqinisekisa ngokuthi uJehova uzosigcwalisa nakanjani leso sithembiso. Yabuza, “Yini engingayenza ukuze ngiphinde ngibone umfana wami?” Bahlela ukuyivakashela kwayo. Bafika ibalindele ngabomvu ukuze baqale ukutadisha iBhayibheli.

Umbonisi ojikelezayo owasiza ekuhleleni ukufakaza okukhethekile emadolobheni amakhulu eNew York wathi, “Yeka indlela uJehova alubusise ngayo lolu hlelo! Akukona nje ukuthi lubonakale luyindlela ephumelela kakhulu yokufinyelela amashumi ezinkulungwane zabantu kodwa luphinde lwasixhumanisa nabaningi abapholile noma abasusiwe—‘izimvu ezilahlekile’—abasizwayo manje ukuba babuyele emhlambini.”—Hezekeli 34:15, 16.