Ake Sithi Qaphu Qaphu NgeSierra Leone NeGuinea

Izwe Womabili la mazwe anamaxhaphozi agudle ugu, izinkangala, amathafa alinyiwe nezintaba ezinde ezimaphakathi nezwe. EGuinea kunesizalo semifula emikhulu emithathu yaseNtshonalanga Afrika​—iGambia, iNiger neSenegal.

Abantu AmaMende namaTemne ayizizwe zendabuko ezinkulu kunazo zonke kwezingu-18 eSierra Leone. AmaKrio​—isizukulwane sezigqila zase-Afrika ezakhululwa​—ahlala ikakhulu eFreetown. EGuinea kunezizwe zendabuko ezingaphezu kuka-30, ezinkulu kunazo zonke amaFulani, amaMandingo namaSusu.a

Inkolo Cishe amaphesenti angu-60 abantu baseSierra Leone bangamaSulumane; abanye bathi bangamaKristu. Amaphesenti acishe abe ngu-90 abantu baseGuinea angamaSulumane. Iningi labantu kuwo womabili la mazwe lisezinkolweni zendabuko zase-Afrika.

Ulimi Isizwe ngasinye sinolimi lwaso. Ulimi oluyinhloko eSierra Leone isiKrio​—inhlanganisela yesiNgisi nezilimi zaseYurophu nezase-Afrika. Ulimi olusemthethweni eGuinea isiFulentshi. Cishe abantu abangamaphesenti angu-60 ezweni ngalinye abafundile.

Indlela yokuziphilisa Iningi labantu liyalima ukuze lithole ukudla. Cishe isigamu semali engena eSierra Leone bayithola ngokuthumela amadayimane kwamanye amazwe. EGuinea kumbiwa into ebizwa ngokuthi i-bauxite okutholakala kuyo i-aluminum.

Ukudla Abantu bavame ukuthi “Uma ngingakalidli ilayisi, ngisuke ngingakadli!” I-fufu, umdumbula obilisiwe owenziwe inhlama, ivame ukudliwa nenyama, nomfino okuthiwa i-okra nesosi emuncu.

Isimo sezulu Kuyashisa futhi kunomoya onomswakama ngasogwini. Kupholile ezinkangala. Ngenkathi elingani ngayo, i-harmattan, umoya oshisayo nowomile waseSahara, ivunguza ivunguzile, yenze kubande futhi yemboze le ndawo ngezintuli.