ISierra Leone NeGuinea
EMINYAKENI engaba ngu-500 edlule, eduze kwesizalo soMfula iSierra Leone, kwahluma isihlahla esincane esikhiqiza ukotini. Njengoba lesi sihlahla sasikhula kwaze kwaphela iminyaka engu-300, udwendwe lwabantu olubanga usizi lwalulokhu ludlula phambi kwaso. Abathengisi bezigqila abanonya babefaka amadoda, omama nezingane abangaba ngu-150 000 emkhunjini babayise phesheya kwezilwandle ezimakethe zezigqila.
Isihlahla i-cotton tree saseFreetown
Ngo-March 11, 1792, izigqila zaseMelika ezikhululiwe ezingamakhulu ngamakhulu zahlangana ngaphansi kwalesi sihlahla esibizwa ngokuthi iCotton Tree zizogubha ukubuyela kwazo ezweni lase-Afrika. Ngalolo suku zathola indawo eyaba uphawu lwethemba lazo elikhulu—idolobha iFreetown. Izigqila ezazikhululiwe zaqhubeka zibuya kwaze kwaba yilapho le ndawo isinezizwe zabantu base-Afrika ezingaphezu kwekhulu. Lezi zakhamuzi ezintsha zamukela iCotton Tree njengophawu lwenkululeko nethemba.
Sekuphele iminyaka ecishe ibe yikhulu oFakazi BakaJehova eSierra Leone beduduza omakhelwane babo ngethemba lenkululeko emangalisa kakhulu kunabayithola— ‘inkululeko ekhazimulayo yabantwana bakaNkulunkulu.’ (Roma 8:21) Le nkululeko iyosho ukukhululwa ebugqilini besono nokufa lapho uMbuso kaNkulunkulu osezandleni zikaMesiya uletha ukuthula nePharadesi emhlabeni.—Isaya 9:6, 7; 11:6-9.
Eminyakeni engu-50 edlule, ihhovisi legatsha loFakazi BakaJehova eSierra Leone liye laqondisa umsebenzi wokushumayela naseGuinea. Leli zwe elingumakhelwane liye laba nezinxushunxushu zezombusazwe, ezenhlalo nezomnotho, okuye kwenza izakhamuzi eziningi zamukela umyalezo weBhayibheli okhuthazayo.
OFakazi BakaJehova eSierra Leone naseGuinea bamemezele izindaba ezinhle naphezu kwezingqinamba eziningi. Zihlanganisa ukuhlukumezeka emzimbeni, ukudla imbuya ngothi, ukungakwazi ukufunda, amasiko agxilile, ukuhlukana ngokobuzwe nobudlova obunyantisa igazi. Lokhu esizokufunda kuzonikeza ubufakazi bokholo nokuzinikela okungenakunyakaziswa kwalezi zinceku zikaJehova eziqotho. Siyethemba ukuthi indaba yabo iyokuthinta inhliziyo futhi iqinise ukholo lwakho ‘kuNkulunkulu onika ithemba.’—Roma 15:13.