Ukushumayela Nokufundisa Emhlabeni Wonke

EMaine, e-U.S.A.: Abafowethu balandela isibonelo sikaJesu sokuba “abadobi babantu”

EMHLABENI WONKE

• AMAZWE 239

• ABAMEMEZELI 7 782 346

• INGQIKITHI YAMAHORA ACHITHWE ENSIMINI 1 748 697 447

• IZIFUNDO ZEBHAYIBHELI 8 759 988

E-AFRIKA

• AMAZWE 58

• INANI LABANTU 968 989 710

• ABAMEMEZELI 1 312 429

• IZIFUNDO ZEBHAYIBHELI 2 999 639

Akazange Asikhiphe Isisu

E-Addis Ababa, inhloko-dolobha yaseTopiya, kuhlala uSaba onesitolo. Langa limbe odade ababili baxoxa naye nge-Phaphama! enesihloko esikhuluma ngokukhipha isisu. USaba wabangenisa futhi wakhala izinyembezi ebatshela ukuthi ubecabanga ukukhipha isisu. Njengoba bexoxa ngale ndaba, bobathathu bahluleka ukuzibamba baqala ukukhala. Ngalolo suku, uSaba wanquma ukuyigcina ingane, watshela nomyeni wakhe isizathu esizwakalayo salokho. Ngokuhamba kwesikhathi, wabeletha intombazane enhle. Wafundelwa wabhapathizwa. Manje useyiphayona elijabule. Umyeni wakhe naye wafundelwa futhi waba uFakazi, ngo-April 2012 izingane zabo ezimbili zabhapathizwa.

‘Singakwazi Yini Ukukhuluma Naye’?

Umbonisi wesifunda eTopiya wayeshumayela endlini ngendlu ehamba nomunye umzalwane. Emzini othile, bathola owesifazane osebenza khona bambuza ukuthi bangakwazi yini ukhuluma nomnumzane womuzi. Lapho ephendula ngokuthi cha, bambuza ukuthi bangamshiyela yini incwadi. Wahamba wayobuza umnumzane womuzi, wabuya wathi uthi ufuna ukuyibona kuqala.

Abafowethu bamnika umagazini ukuze ayomtshengisa. Ngemva kwemizuzwana, wabuya wathi uvumile ukuwufunda. Omunye wabafowethu wathi: “Uma engeke akwazi ukuphuma, singakwazi yini ukungena sikhulume naye?” Lona wesifazane wabuyela emuva wayombuza. Kulokhu wahlala isikhathi eside kunangaphambili, abafowethu bazibuza ukuthi kazi usazobuya yini. Ekugcineni wabuya wabacela ukuba bangene. Abafowethu base bethola ukuthi umninikhaya, uYirgu, wayeyikhehla okwase kuyiminyaka eyishumi lilele embhedeni ligula, lingakwazi ukuvuka ngisho nokuhlala. Isizathu esenza lona wesifazane wephuza ukubuya ukuthi wayemsiza emgqokisa futhi eqoqa nasendlini.

Abafowethu bamxoxela izindaba ezinhle. Kwamjabulisa lokho ayekuzwa uYirgu futhi wavuma ukufundelwa iBhayibheli. Njengoba isifundo siqhubeka, impilo yakhe yaba ngcono. Ngemva kwesikhathi, wayesekwazi ukuvuka embhedeni nokuhambahamba ngesihlalo sabakhubazekile. Ngokushesha nje waqala ukuya emihlanganweni futhi wabhapathizwa emhlanganweni wesigodi wamuva.

Isonto Lezincwadi Zikayise

UCalvin, ohlala eZimbabwe, wayeneminyaka emine ubudala lapho uyise eshona, emshiyela isikhwama esasine-Nguqulo Yezwe Elisha nencwadi ethi Isiprofetho Sika-Isaya—Ukukhanya Kuso Sonke Isintu, uMqulu 1. Wathi kuCalvin: “Hlala esontweni lalezi zincwadi. Lifundisa iqiniso.”

Lapho unina eshona, uCalvin wahlala nogogo wakhe. Kwaphela iminyaka engu-9 uCalvin enqaba ukuya esontweni likagogo, emi kwelokuthi ngelinye ilanga uyolithola “isonto” lezincwadi uyise ayemnike zona.

Langa limbe, ugogo womfana wahlangana nomunye wodadewethu. Engazi ukuthi unguFakazi, ugogo waxoxela lo dade ukuthi unomzukulu onenkani ongafuni ukuya esontweni. Kunalokho, uchitha izinsuku zangeSonto efunda incwadi ayishiyelwa uyise. Udade wabuza igama lencwadi. Ugogo wathi ucabanga ukuthi “enye yalezi zincwadi eziwumsangano zama-Watchtower.”

Udade wathi angathanda ukubonana nomfana. Lapho bebonana, uCalvin wajabula kakhulu. Udade waqala isifundo seBhayibheli ngokushesha ngencwadi ethi Lifundisani Ngempela IBhayibheli? futhi akabange esapholisa maseko waqala ukuya emihlanganweni naphezu kokuphikiswa kanzima ugogo wakhe. Uzimisele ukuhlala eseqinisweni futhi usibheke ngabomvu isikhathi sovuko ngoba unethemba lokuhlanganiswa noyise nonina. UCalvin wabhapathizwa ngo-August 2012.

“UNkulunkulu Omkhonzayo Unamandla”

UCaro uhlala e-Uganda. Ngemva nje kwenyanga eqale ukufunda iBhayibheli, umyeni wakhe, uMartin, owayengumthakathi, waqala ukumphikisa kakhulu. Wathi: “Ngenxa yalezi zincwadi zakho, amadlozi awasakwazi ukungena kule ndlu.” Wamphatha kabi futhi wamesabisa ngokuthi uzombulala uma engayeki ukufunda iBhayibheli. Wayeka nokondla umndeni wakhe. UCaro waqhubeka ezithoba, wondla umndeni wakhe ngokudla ayekutshale ezivandeni, waqhubeka nokungenisa ulwazi olunembile. Ngokuhamba kwesikhathi, lapho sekumcacela ukuthi ukuphila kwakhe kusengozini, uCaro wabaleka ekhaya. Kwaba nzima ukuba aziphilise. Nokho, lapho ezwa ukuthi izingane ziyagula, wathatha imadlana ayeyitholile wazithengela umuthi.

Ngemva kwesikhathi esithile, uCaro wathola ucingo oluvela kumyeni wakhe. Wathi: “Ngifuna ubuye ekhaya. Sengibonile ukuthi uNkulunkulu omkhonzayo unamandla futhi ubelokhu enawe. Ngifuna utshele labo bantu abakufundisayo ukuba beze bazongifundisa nami. Ngifuna ukukushintsha ngempela ukuphila kwami.” UMartin wayeqinisile. Lo mndeni usunobunye manje futhi uyajabula. Bobabili uMartin noCaro babhapathizwa emhlanganweni ngo-August 2012.

Umshumayeli Ongayedwa Edolobheni Elikude

Ngesikhathi ehlala edolobheni elikude kakhulu nakubo eKenya, uDavid waqala ukufunda iBhayibheli noFakazi BakaJehova. Nokho, kungakabiphi, kwadingeka abuyele endaweni yakubo eLokichar, endaweni ekude esenyakatho-ntshonalanga yeKenya. Ibandla elaliseduze lalisedolobheni laseLodwar eliqhele ngamakhilomitha angu-165. Kwaphela iminyaka emine uDavid engaxhumani njalo noFakazi, kodwa ebashumayeza omakhelwane nezihlobo zakhe, axoxe nabo ngezinto azifunda phakathi nesikhathi esifushane afunda ngaso iBhayibheli. Abanye basabela kahle futhi ngokushesha nje wayeseqhuba izifundo zeBhayibheli eziningi. Ngo-2007 waxhumana nabazalwane baseLodwar waqhubeka nokufundelwa, ethatha uhambo kabili ngenyanga ngesithuthuthu noma ngetekisi.

Njengoba ulwazi lukaDavid lwalukhula, washiseka kakhulu nasenkonzweni. Engakabhapathizwa, wakha iHholo LoMbuso lesikhashana ngodaka eceleni kwakwakhe, walifulela ngotshani, waqhubela kulo imihlangano nabathakazelayo. Kodwa akubona bonke ababewujabulela umsebenzi wakhe wokushumayela, futhi kwaphela iminyaka emibili bemchapha ngenhlamba futhi bemshaya. Ngelinye ilanga abantu bendawo bamshaya waze waquleka, bemsola ngokuletha “ukukhulekela uDeveli” endaweni. Kodwa ngemva kokuba uDavid ecele usizo esikhulwini sikahulumeni, udlame lwanqamuka, uDavid waqhubeka nokushumayela. Uthi: “Iqiniso liwukuphila kwami. Akukho ukuphikiswa okungangivimba.”

Ngo-2009, uDavid wabhapathizwa, manje useyinceku ekhonzayo nephayona elivamile. Yena nendodana yakhe eneminyaka engu-15 ubudala yibona bodwa abangabamemezeli kule ndawo, kodwa ngo-April 2012, bangu-60 abantu basendaweni ababekhona eSikhumbuzweni sokufa kukaKristu, esasisehholo lesikhashana eliseduze komuzi kaDavid.

“Kufakazele NgemiBhalo Ukuthi Unamanga”

UJanet, udade oyiphayona elivamile eGhana, wayefunda incwadi ethi Okufundiswa IBhayibheli phakathi nohambo lwakhe olude ngebhasi. Kwangena umshumayeli ebhasini, washumayela, wabe esecela abagibeli ukuba bakhiphe umnikelo wenkonzo yakhe. UJanet wathi kuye: “Uthi uJesu noNkulunkulu umuntu oyedwa? Pho ubani lo owayekhuluma noJesu ngesikhathi ebhapathizwa?”

Umshumayeli wathi: “Lokho kuyimfihlakalo.”

UJanet wavula isahluko 4 sencwadi ethi Okufundiswa IBhayibheli, wakhetha imiBhalo ethile, wacela abagibeli abambalwa ukuba bayifunde. Wabe esechaza umehluko phakathi kukaJesu noNkulunkulu uMninimandla onke, uJehova.

Umshumayeli wathi: “Ungumthakathi.”

Ngaso leso sikhathi abagibeli bamkhulumela uJanet bathi: “Kufanele ukufakazele ngemiBhalo ukuthi unamanga kunokuthi uvele umbize ngomthakathi.” Ngenxa yokucasuka, umshumayeli wehla esitobhini esilandelayo. Intokazi eyayihlezi eceleni kukaJanet yathi kuye: “Bengizitshela ukuthi igama elithi Jehova yigama lesakhiwo sesonto loFakazi. Bengingazi ukuthi igama likaNkulunkulu kwaze kwaba yilapho uxoxa nalowaya mshumayeli.”

Ingxoxo yalandela, uJanet wathatha izinombolo zale ntombazane, wayithembisa ukuthi uzoyishayela ucingo. Lapho ifika kubo, yalandisa ugogo wayo okwakwenzekile. Ugogo naye wamangala lapho ezwa ukuthi igama likaNkulunkulu uJehova. Ngokuhamba kwesikhathi uJanet wahlela ukuba oFakazi abathile baqhubeke nokuxoxa nale ntombazane nogogo wayo. Bobabili manje sebeya emihlanganweni.

AMAZWEKAZI ASEMELIKA

• AMAZWE 57

• INANI LABANTU 946 087 916

• INANI LABAMEMEZELI 3 861 145

• IZIFUNDO ZEBHAYIBHELI 4 196 922

Wathola Iqiniso Endaweni Ayengayilindele

Onogada basejele eBolivia babelwa no-Andrea oneminyaka engu-20 baze bafika egcekeni lejele. Wayelokhu ebathuka futhi ebasongela. Ngenxa yokuthi uyisidlova esiyisigwebedla, uyesabeka. ULeidy, onguFakazi KaJehova owayemangalelwe ngamanga wayesegqunywa ejele, wayengamesabi u-Andrea kodwa wayemzwela. Zonke izinsuku ekuseni uLeidy wayejwayele ukufunda ngokuzwakalayo enye yezingoma zethu. Lapho u-Andrea emuzwa, wambuza: “UnguFakazi KaJehova?”

ULeidy wavuma, u-Andrea wayesethi: “Umama naye unguFakazi KaJehova, nami ngangiya naye emihlanganweni. Uyena owayengifundela.” Wabe esekhihla isililo. Ezinsukwini ezimbalwa ezalandela, uLeidy waxoxa izinto ezingokomoya no-Andrea, futhi lapho kufika isikhathi sokuthethwa kwecala lika-Andrea, bathandaza ndawonye becela usizo nesiqondiso sikaJehova. U-Andrea wadedelwa futhi waqhubeka efunda ngoJehova. Ngokushesha wafanelekela ukuba ummemezeli ongabhapathiziwe, manje ulungiselela ukubhapathizwa.

ULeidy walisebenzisa kahle ithuba ayeboshelwe ngalo into engekho, waqala izifundo zeBhayibheli ezingu-21 ngaphambi kokuba adedelwe. Usephindela kathathu ngesonto ejele eyohlakulela isithakazelo.

Kwakuyingosi Ye-Internet Ethi www.jw.org

Ngelinye iSonto entwasahlobo ka-2011 kwangena umbhangqwana ogqoke kahle nezingane zawo ezimbili eHholo LoMbuso eCanada, bonke bacabanga ukuthi bangoFakazi BakaJehova bakwenye indawo bavakashile. UDominic, oyinceku ekhonzayo ebandleni, nalo baba ovakashile babonana bakhumbulana. UDominic wayefundele le ndoda eminyakeni engu-17 ngaphambili. Eminyakeni emibili ngaphambili uMarc-André noJosée, umkakhe, babethatha omagazini INqabayokulinda ne-Phaphama! engosini ethi www.jw.org babafunde, ngemva kwesikhathi baqaphela ukuthi wonke umkhaya kufanele uye eHholo LoMbuso. Isifundo saqalwa ngaso leso sikhathi futhi lo mkhaya waqala ukuba khona kuyo yonke imihlangano. Ngemva kwezinyanga ezimbili kuphela befundelwa, baqala ukuba nobusuku bokuKhulekela Komkhaya. Bayaqhubeka bethuthuka futhi uJosée wabeka inkulumo yakhe yokuqala eSikoleni Senkonzo Esingokwasezulwini ngo-May 2012.

‘Wanginika Ukudla Kwakhe Nesigqoko Sakhe’

Ngesikhathi ethamele umhlangano wesigodi ka-2010 eChile, uMarcelo oneminyaka eyishumi waqaphela ukuthi indoda esikhulile ehleli eceleni kwakhe ayinazo izincwadi.

“Lo baba akanalo iBhayibheli,” uMarcelo ehlebela unina.

“Mfundise kwelakho,” kuhleba unina. Ngakho uMarcelo wasondela kulo baba ogama lakhe uVictor, bafunda ndawonye yonke imiBhalo eshiwoyo. Lapho kuqala ikhefu, uMarcelo wabuka unina wathi: “Akanako ukudla.” Unina wasikisela ukuba adle naye. Ngakho uMarcelo wapha lo baba isemishi netiye elishisayo. Njengoba lo baba edla, uMarcelo wayemvulela yonke imiBhalo ayengayikhumbula.

Ntambama ilanga lase lishisa kakhulu. UMarcelo waphinda wabuka unina wathi: “Akanaso isigqoko.”

Unina wathi: “Mnike esakho.” Wamnika nangempela. Ngemva kwesimiso, uMarcelo noVictor bavalelisana.

Emhlanganweni wesigodi wangonyaka olandelayo, uMarcelo wayehamba ebheka ukuthi ukhona yini uVictor. Wajabula kakhulu lapho embona, futhi manje wayesefake nothayi! Lapho uVictor ebona uMarcelo, wamemeza: “Ngilapha namhlanje ngenxa yalo mfana. Ngonyaka odlule ngathola isimemo somhlangano, ngafika. Lo mfana wangifundisa eBhayibhelini lakhe, wangipha ukudla kwakhe wangiboleka nesigqoko sakhe. Manje sengiyafundelwa!” UVictor usengummemezeli ongabhapathiziwe.

Intatheli Iyancoma

Engosini yayo yephephandaba, intatheli eyaziwayo yaseVenezuela yachaza okwenzeka kuyo lapho ishayele ucingo inkampane yezingcingo idinga usizo. Owaphendula ucingo wamphendula kabi futhi wangamsiza. Lapho eseshaya okwesibili, ucingo lwaphendulwa insizwa okuthiwa “uMisael” futhi yamphendula kahle ngenhlonipho yamsiza. Iyabhala: “Ngangiqala ukuzwa umusa, inhlonipho, ukuzimisela ukusiza nomoya omuhle owaboniswa yile nsizwa njengoba sikhuluma ocingweni. Ngosizo lwayo, ngakwazi ukuxazulula inkinga, ngathola nokuthi ngingenzenjani esikhathini esizayo uma kwenzeka okufanayo.”

Lapho le ntatheli incoma le nsizwa, le nsizwa yathi njengoba inguFakazi KaJehova, izama ukuphatha abantu ngendlela eyafundiswa uJesu. Intatheli yacela ukukhuluma nomphathi kaMisael. Yamncoma kuye ngomsebenzi wakhe omuhle ngendlela emangalisayo. Esihlokweni sayo le ntatheli yathi uMisael ungumVenezuela oyisibonelo futhi unguFakazi KaJehova. Yaphetha ingosi yayo ngokuthi: “Sidinga abantu abanjengaye kuzo zonke izindawo ezisiza umphakathi.”

“Ningabi Nenkani!”

UGabriela oneminyaka engu-15 futhi oyisithulu, wajabula kakhulu lapho ebhapathizwa ngo-October 2011 emhlanganweni wesigodi wolimi lwezandla e-Ecuador. Wayethokoze kakhulu kangangokuba lapho ephindela esikoleni ngoMsombuluko, wacela kuthisha ukwenza isaziso esifushane ekilasini. Uthisha wavuma, uGabriela wama phambi kwekilasi wayesesayina ngomdlandla: “Ngithanda ukunazisa ukuthi ngoLwesihlanu, ngoMgqibelo nangeSonto bengisemhlanganweni ngafike ngabhapathizwa njengomunye woFakazi BakaJehova. Ngithanda nokunazisa ukuthi siphila eduze kokuphela kwalesi simiso sezinto. Sekusele isikhathi esincane! Kuyaphuthuma ukuba nenze izinguquko ezidingekayo. Ngakho ningabi nenkani. Yesabani uNkulunkulu!” Izingane zahlabeka umxhwele.

Ngalolo suku, ngesikhathi sekhefu, uKatty onguFakazi oyisithulu owayesepholile, waya kuGabriela eyobuza ngomhlangano. UGabriela waphendula ngaphandle kokunanaza: “Bekumnandi! Kodwa njengoba senginguFakazi obhapathiziwe, ngifuna ukuthembeka kuJehova. Ngakho ngeke ngisaba umngane wakho ngoba wena wenza izinto ezingcolile. Ukuba umngane wakho kungalimaza ubungane bami noNkulunkulu. Kudingeka ushintshe. Kubalulekile ukuthandaza kuJehova ukhulume nabadala. Ngiyazi ukuthi ungashintsha ube umuntu ongcono.” Ngenxa yeseluleko sikaGabriela esingagudl’ iguma kodwa esinothando, uKatty wakhuluma nabadala, wathola usizo olungokomoya, waphinde wakhuthala enkonzweni.

Wasebenzisa I-laptop Kathisha

Intombazane eneminyaka engu-16 yase-United States yabuzwa izingane efunda nazo ngenkolo yayo, kodwa yayingaphethe zincwadi, ingaliphethe ngisho neBhayibheli. Njengoba yayifuna ukuphendula isebenzisa iBhayibheli, yaboleka i-laptop kathisha yangena engosini ethi www.jw.org. Le ntombazane ayigcinanga nje ngokuphendula yonke leyo mibuzo kodwa yabatshengisa nendlela yokusebenzisa le ngosi. Yachaza ukuthi noma nini lapho benemibuzo ngeBhayibheli futhi bengekho oFakazi endaweni abakuyo, bangavele bangene kule ngosi ukuze bathole izimpendulo. Phakathi nalelo sonto, yaphawula ukuthi izingane azisabuzi imibuzo eminingi njengasekuqaleni. Lapho ibuza ukuthi kungani, ezinye zathi bezilokhu zingena kule ngosi ngomakhalekhukhwini bazo. Ngisho nothisha wayengena kuyo!

E-ASIA NASEMPUMALANGA EPHAKATHI

• AMAZWE 48

• INANI LABANTU 4 222 869 785

• ABAMEMEZELI 674 608

• IZIFUNDO ZEBHAYIBHELI 662 736

Udweshu Lwasendaweni Lwagwenywa

Lisendleleni lilibangise emngcwabeni, iqembu loFakazi ladabula edolobhaneni elise-Indonesia. Iphayona labona intsha ethile imi eceleni kwendlela. Lakhuluma nayo labe seliyinikeza incwajana ethi Lalela UNkulunkulu Uphile Phakade. Ngemva kwesikhathi esithile, udade owayegoduka wadlula kuyo leyo ndlela. Indoda eyayiphethe incwajana ethi Lalela Uphile yabuye yambonga ngokunika izingane zayo le ncwajana. Yathi: “Le ncwajana isindise ukuphila kwezingane zami!” Engazi ukuthi le ntsha ibishunyayezwe iphayona, udade wabuza ukuthi kwakwenzekeni. Ubaba wachaza ukuthi le ntsha yayihlele ukuyohlasela enye indawo. Ivunyelwa umkhuba wendawo, yayihlose ukuziphindiselela ngokushaywa komunye wabangane bayo. Kodwa lapho abafana sebefunde le ncwajana, bathola ukuthi abantu abalwa nabanye ngeke balizuze njengefa iPharadesi elizayo. Ngakho-ke babhodla, baliyeka icebo labo, babuyela emakhaya. Udweshu oluyingozi olwaluzophakama lwagwenywa ngenxa yesigijimi seBhayibheli esisencwajaneni.

Owayegqoka Njengabesifazane Wenza Izinguquko

URek wakhulela emndenini ovamile eCambodia, kodwa kusukela esemncane kakhulu, yena nomfowabo ayiwele naye baba nomuzwa wokuthi bangabantu besifazane. Babedlala ngonodoli futhi bethanda ukugqoka izingubo zamantombazane. Unina wayedidekile, enamahloni futhi engazi ukuthi angabavimba kanjani. Babesuka ekhaya begqoke izingubo zabafana kodwa lapho nje befika esikoleni, babeshintsha bagqoke izingubo zamantombazane. Lapho sebeneminyaka engu-16, bangenela umqhudelwano wonobuhle abagqokisa okwabesifazane futhi abantu abasebenzela ezikaqedisizungu bababona. Lokhu kwabaholela ekutheni bafakwe ezinhlelweni zethelevishini nasemidlalweni ehlekisayo. Akuphelanga sikhathi, uRek wayesephila impilo yobungqingili futhi esehamba nabanye abagqokisa okwabesifazane.

Unina kaRek waqala ukuya esontweni, wenza noRek ukuba ahambe naye. Nakuba avuma ukugqoka izingubo zabesilisa, wenqaba ukugunda izinwele zakhe ezinde. Umfundisi wayehlale esho izinkulumo ezilulazayo kuRek futhi ajivaze indlela yakhe yokuphila. Noma kunjalo, uRek wazitshela ukuthi uzozama ukufunda iBhayibheli esontweni. Ngesonto lokuqala, wavuka ekuseni kakhulu wahamba amakhilomitha amaningi ngebhayisikili eya esontweni, kodwa umfundisi wayenqena ukufundisa futhi wabeka izaba. URek wanengeka lapho umfundisi engafiki futhi nangesonto lesibili.

Nokho, lapho uRek efika kubo, iwele lakhe lamtshela ukuthi bekufike owesifazane futhi wacela ukubaqhubela isifundo seBhayibheli sasekhaya samahhala. Wabashiyela incwadi ethi Lifundisani Ngempela IBhayibheli? Amawele aqala ukufunda nodade nomyeni wakhe. Ngemva kwezinyanga eziyisithupha, umfowabo kaRek wabona ukuthi wayengakakulungeli ukushintsha indlela yakhe yokuphila, futhi wayeka ukufunda. Ngakolunye uhlangothi, uRek yena wamthinta ngokujulile umBhalo weyoku-1 Korinte 6:9, 10, futhi kwamkhanyela ukuthi yini okufanele ayenze. Ukufunda ngenkuthalo, ukufunda iBhayibheli, ukuthandaza nokuya emhlanganweni kwamsiza wakwazi ukuhlanza ukuphila kwakhe. Unina kaRek naye uyafundelwa futhi wenza intuthuko enhle. Lapho uRek ebhapathizwa, unina, egcwele izinyembezi emehlweni wathi: “Ave kungijabulisa ukubona indodana yami ibhapathizwa njengendoda.” Manje uRek ukhonza njengephayona elivamile.

Osebenzelana Nemimoya Ushintsha Izindlela Zakhe

U-Or-Ya wayesebenzelana nemimoya, engumelaphi, umeluleki futhi engumbikezeli wezinhlanhla. Umbhangqwana ongamaphayona akhethekile okhonza eHaifa, kwa-Israel, wahlangana naye enkonzweni yendlu ngendlu. Wawubingelela ngala mazwi: “Uma nizokhuluma ngoNkulunkulu, ngenani!” Umuzi wakhe wawugcwele izinto zemimoya nezimfihlakalo. Wathi yena uthola imiyalezo evela kuNkulunkulu, eminye ifika ngomoya karabi ongasekho.

Isicelo sesifundo seBhayibheli sasekhaya ngencwadi ethi Okufundiswa IBhayibheli samthakazelisa. Ezinsukwini ezimbili ngaphambi nje kokuba lo mbhangqwana ufike kwakhe, wayethandazile wacela uNkulunkulu ukuba athumele umuntu ozomfundisa iBhayibheli ngaphandle kwezincazelo zorabi. Ingakapheli inyanga, wabuza: “Bakhona abanye abantu abanezinkolelo ezifana nezenu?” Waya emhlanganweni wobuKristu futhi yamhlaba umxhwele imfudumalo nothando aboniswa lona. Kusukela ngaleso sikhathi ulokhu eya njalo emihlanganweni.

Ngemva kwezinyanga ezimbili efunda, u-Or-Ya wabuza ngomhlangano owawusondela: “Akukhona yini emhlanganweni lapho umuntu engabhapathizwa khona? Uma kunjalo, unezinyanga ezimbili kuphela zokungilungiselela ukuba ngibhapathizwe!” Isinyathelo sokuqala asithatha kwaba ukulahla zonke izimpahla zakhe zikanokusho zokusebenzelana nemimoya. Wayeka ukwenza imisebenzi yemimoya waqala ukufakaza kwabanye, ehambisa incwadi ethi Okufundiswa IBhayibheli nomagazini kubo bonke ababeyiziguli zakhe nayebenzela izinto ezithile. Lapho egula, wenqaba ukuzelapha ngezindlela zakhe ezindala. Ukuyeka lo msebenzi wakhe wokwelapha kwamshiya engenamali izinyanga ezine. Noma kunjalo, wabeka imibandela ayezosebenza ngaphansi kwayo—uzosebenza izinsuku ezine ngesonto amahora ayisithupha ngosuku—ukuze abe nesikhathi semisebenzi engokwasezulwini, ekugcineni wawuthola umsebenzi okahle. Wabe esethengisa indlu yakhe enkulu waqasha encane.

Ngesikhathi esifanele, u-Or-Ya wafanelekela ukubhapathizwa, kodwa ngaphambi kwesonto lomhlangano, waphuka umlenze. Noma kunjalo, waba nesibindi wabhapathizwa efakwe ukhonkolo emlenzeni. Namuhla u-Or-Ya ungummemezeli okhuthele, ufakaza kulabo ayebelapha futhi uqhuba izifundo zeBhayibheli.

Ilungu Lehlelo Lithola Amaqiniso

Isifundo seBhayibheli saqalwa namawele ayizithulu endaweni esezintabeni ezikude ePhilippines. La mawele ayeyingxenye yehlelo elikholelwa ukuthi izikhali ngeke ziwalimaze amalungu azo uma nje ezofaka iziphandla ezithile nezikhafu ukuze avikeleke. Babeqeqeshelwe ukusebenzisa imimese, imimese emide esankemba nezibhamu futhi sebeke balwa ezimpini eziningi belwa namaqembu avukelayo ezintabeni. Ihlelo labavumela ukuba bafunde iBhayibheli ngoba lalazi ukuthi oFakazi ngeke babaphoqe ukuba bashiye ihlelo.

Ngempela, abafowethu bakhuthaza amawele ukuba azenzele esawo isinqumo ngokwalokho ayekufunda eBhayibhelini. Elilodwa iwele laba nomuzwa wokuthi ngeke likwazi ukwenza izinguquko ezidingekayo ekuphileni kwalo ukuze likhonze uNkulunkulu ngokwamukelekayo. Kodwa elinye laqhubeka nokufunda. Ukuze alikhuthaze, umfowethu owayelifundela wavula iBhayibheli wayesechaza ngolimi lwezandla: “Igama lakho elithi Samuel, likhona eBhayibhelini. Lo Samuel oseBhayibhelini wakhonza uNkulunkulu weqiniso, uJehova, waze waguga. Nawe ungamlalela ngokwethembeka uJehova.” Lokhu kwamthinta inhliziyo uSamuel. Wacabanga, “Uma igama lami liseBhayibhelini, nami kufanele ngibe sohlangothini lukaJehova.” Watshela ihlelo ukuthi uyahamba ezintabeni, washisa zonke iziphandla zakhe nezinto zemimoya futhi wathuthuka ngokushesha. Manje uyisikhonzi sikaJehova esibhapathiziwe, usiza izithulu ngentshiseko ukuba zifunde iqiniso leBhayibheli.

Ingane Iyashushiswa

URajiv uhlala edolobheni elikude enyakatho yeNdiya. Lapho eseneminyaka engu-9 ubudala futhi efunda ibanga lesine, uthisha wakhe ongomunye woFakazi BakaJehova, wafundisa izingane izindinganiso zokuziphatha esebenzisa incwadi ethi Funda KuMfundisi Omkhulu. URajiv wayamukela le mfundiso futhi waqala ukuyisebenzisa. Watshela uthisha wakhe ukuthi useyekile ukuqamba amanga nokulwa nezinye izingane futhi ngesikhathi sokudla udla ukudla kwakhe nalabo abangenakho.

Njengoba ayesefunde okuningi ngesithembiso sePharadesi lasemhlabeni, waqala ukutshela abanye ngalezi zindaba ezinhle endaweni yangakubo nalapho ehamba ngesitimela. Kwabacasula futhi kwababangela amahloni abazali bakhe. Bamtshela ukuba ayeke ukukhuluma ngoJehova noJesu. Lapho eqhubeka, baqala ukumshaya, unina wayethatha izingubo zakhe lapho esebuyile esikoleni ukuze angayi ukuyokhuluma ngethemba lakhe elisha. Abazali bakhe bamnqabela ukuba alale embhedeni wakhe, bamncisha nokunye ukudla. Lapho lezi zinyathelo zingasebenzi, babiza umfundisi ukuba azoshintsha ukucabanga komfana.

Umfundisi wahlala izinsuku ezimbalwa kubo kaRajiv ezama ukumphoqa ukuba akhothamele isithombe. Lapho uRajiv ethi isithombe simane nje siyitshe asiyena unkulunkulu ophilayo, umfundisi wathi kumfana kufanele ‘abheke ngale kwalokho akubonayo.’ Kulapho kuphela lapho eyobona khona ukuthi leso sithombe siwunkulunkulu. URajiv wathatha isiqeshana sephepha wasibhala “ama-rupee ayikhulu.” Wasinika umfundisi wamcela ukuba amthengele ushokoledi bese ebuyisa ushintshi. Umfundisi wathi akasona isiphukuphuku; lokho kwakumane nje kuyisiqephu sephepha esingenamsebenzi. URajiv waphendula: “Uma ubheka ngale kwalokho okubonayo, uzobona imali yangempela kuleli phepha.” Ecasukile, umfundisi wamgobisa umfana wamphoqa ukuba akhothamise ikhanda phambi kwesithombe. URajiv wathi: “Uphoqe ikhanda lami ukuba likhothame phambi kwalesi sithombe kodwa awusoze wayikhothamisa inhliziyo yami.” Ekugcineni umfundisi wahamba, wathi umfana akashintsheki futhi naye uma engaqhubeka ahlale uzophelelwa ukholo. Abazali bakaRajiv bamthuthela kwesinye isikole. Kodwa akayekile ukhuluma nalabo abalalela lokho akushoyo ngoJehova nangesithembiso sePharadesi. Manje useneminyaka eyishumi ubudala, futhi uyaqhubeka encika kuJehova ukuze amsize agcine ukholo lwakhe luqinile.

Walithola IBhayibheli Ayelifuna

Ngesikhathi uLarisa efakaza esisebenzini esitolo sezincwadi e-Armenia, kwangena owesifazane wabuza isisebenzi ukuthi likhona yini iBhayibheli okuthiwa “iZwe Elisha.” Isisebenzi sathi asinalo lelo Bhayibheli kodwa singamnika inguqulo evamile yesi-Armenia. Umthengi wabuza: “Kulula ukuyiqonda?” Isisebenzi safunda amavesi ambalwa sase sithi: “Izwakala sengathi iyaqondakala.” Engagculisekile, umthengi wagcizelela ukuthi kudingeka athole iBhayibheli “leZwe Elisha.” Ngaso leso sikhathi uLarisa wakhumbula ukuthi unalo elakhe iBhayibheli lesi-Armenia esikhwameni. Walibonisa lona wesifazane wamcela ukuba afunde isihloko salo. Lona wesifazane wafunda, “INguqulo Yezwe Elisha.” Kwakuyilo kanye iBhayibheli ayelifuna!

Umthengi wachaza ukuthi indodakazi yakhe nomkhwenyana wayo abahlala eGreece basanda kuqala ukufunda iBhayibheli noFakazi BakaJehova. Njengoba bengakasazi isiGreki, bacela unina ukuba abaphathele INguqulo Yezwe Elisha yesi-Armenia uma ezovakasha. Udadewethu walinika lona wesifazane iBhayibheli wayesethi: “Ngicela ubanike lona ubatshele ukuthi liyisipho esivela kuJehova.” Lona wesifazane wajabula kakhulu lapho uLarisa ecela ukumsiza ukuba afunde iBhayibheli. Banikana izinombolo zocingo ukuze baqale isifundo seBhayibheli ngokushesha nje lapho lona wesifazane ebuya eGreece.

IYUROPHU

• AMAZWE 47

• INANI LABANTU 738 679 198

• INANI LABAMEMEZELI 1 595 888

• IZIFUNDO ZEBHAYIBHELI 841 260

Wabuyisela Isikhwama Semali

UNina, udade oyiphayona elivamile eBosnia, wafundela umkhaya wamaRoma. Ngolunye usuku lapho indodakazi yalo mkhaya eneminyaka eyishumi izihambela emgwaqweni yazitholela isikhwama semali sinemali, amakhadi okuthenga ngesikweletu namanye amaphepha. Ngaphambi kokuba ifunde iqiniso yayiyothi inhlanhla yayo, kepha ngemva kokuba isixoxisene nonina, yanquma ukusiyisa emaphoyiseni. Lesi sinqumo sasincomeka ngoba lo mkhaya wawuzihluphekela ungenayo nemali yokuthenga isinkwa lesi! Ngemva kwamahora amabili behambise isikhwama, kwangena ucingo lubacela ukuba babuyele esiteshini samaphoyisa. Umnikazi wesikhwama wayebalinde khona efuna ukubabonga futhi abaphe okuthile. Wabapha imali ethi ayibe ngu-R240, elingana nomholo wezinsuku ezimbili.

Samhlaba Umxhwele Isihloko

UNihad ohlala eBosnia wayeseqedile ensimini. Njengoba esondela emotweni yakhe, wabona indoda imi eduze kwayo. Lapho eyibingelela, yathi: “Uxolo, ngibone umagazini emotweni yakho onesihloko esithi, ‘Indlela Yokuba Ubaba Omuhle.’ Ngingathanda ukuwuthola. Sekuphele cishe ihora ngilindile. Ngicela ungiphe wona.” UNihad wamnika ngenkulu injabulo wayesemshumayeza.

Amatilosi Athola Induduzo

Lapho umbhangqwana owawushumayela ethekwini laseRotterdam eNetherlands uya emkhunjini, wathola amatilosi ahluneme. Ehlengezela izinyembezi, unjiniyela omkhulu wawutshela ukuthi umkhumbi wawehlelwe izinhlekelele eziningi zilandelana, ezinjengokucishe ushayise nokulimala. Ngakho wabuza: “Ngeke nasithandazela?” Lo mbhangqwana wathembisa ukunikeza la matilosi inkulumo yeBhayibheli eyisikhuthazo. Ngakusasa ngo-7 kusihlwa, laba bamemezeli kanye neminye imibhangqwana emibili bamukelwa endaweni engaphambili yomkhumbi lapho uqondiswa khona. Kwakuhlangene amatilosi angu-15 kwangu-16. Ngemva komthandazo wokuvula, umfowethu wanikeza inkulumo enesihloko esithi “Izinhlekelele—Ingabe Zibangelwa UNkulunkulu?” Amatilosi akwazi ukufunda amavesi eBhayibhelini ngoba abamemezeli babephethe amaBhayibheli engeziwe futhi bawasiza ukuba abheke imiBhalo. Ngemva komthandazo wokuphetha, wonke amatilosi aqhubeka ehlezi exoxa nabafowethu. Azizwa eduduzekile futhi abonga. Elinye lathi: “Lena impendulo yomthandazo wethu.” Athatha izincwadi ezingu-20 kanye namaBhayibheli nezinye izincwadi, ngemva kwalokho ukaputeni wanika abamemezeli imvilophu eno-R1 600, umnikelo wezincwadi.

Wathandazela Ukuba Asize

U-Irene ohlala eSweden wabhala: “Ngineminyaka engu-80 futhi ngenxa yezinhlungu angisakwazi ukuya ensimini. Ngathandaza kuJehova ngicela ukuba ngisize othile engake ngamvakashela kudala osengathanda manje ukuba nezingxoxo noma ukuvakashelwa.

“Ngolunye usuku kwakhala ucingo, umyeni wami waluphendula. Kwakungowesifazane owathi kuye: ‘Uxolo, yinina kuphela enginikhumbulile, yingakho ngishayele nina ucingo. Umkakho angathanda yini ukungivakashela sizoxoxa ngeZwi likaNkulunkulu? Ngangifundelwa eminyakeni engu-15 noma engu-20 edlule, kodwa umyeni wami osewashona wayephikisa, ngakho ngayeka ukufunda.’

“Ngabe sengikhumbula ukuthi ngake ngamvakashela lona wesifazane ngihamba nomunye udade owayemfundela. Okwangimangaza ukuthi lo mama wakhumbula mina. Ngajabula kakhulu, ngabe sengihlela ukuba sibonane. Kusukela ngaleso sikhathi besilokhu sifunda masonto onke. Waba khona eSikhumbuzweni nasenkulumweni ekhethekile. Uyeza nasezifundweni. Ngimbonga nsuku zonke uJehova ngokuphendula umthandazo wami.”

Ushokoledi Awungeni Ebhokisini Lomnikelo

USergio oneminyaka engu-8 ohlala eNtaliyane wayefuna ukuqinisekisa abadala ukuthi wayesekulungele ukuba ummemezeli ongabhapathiziwe. Ngolunye usuku wahamba noyise owayeyolungisa isicabha sombhangqwana othile oneminyaka eyevile ku-70. USergio waphatha omagazini. Uyachaza: “Ngesikhathi ubaba esebenza, mina ngahambisela ubaba wakulo muzi omagazini, wamangala kakhulu waze wabiza umkakhe wamtshengisa bona. Ngabe sengibhala isibongo sabo, ikheli nenombolo yocingo ukuze ngenze impindelo. Umkakhe wanginika konke lokhu kwaziswa, wayesengipha ushokoledi omkhulu.” Ngemva kwezinsukwana, uSergio nomunye wabadala baphindela kulo muzi. USergio wangqongqoza, kwavula inkosikazi, wayeseyichazela ukuthi ubalethele incwadi ethi Lifundisani Ngempela IBhayibheli? Lo mama wayamukela ngenjabulo. Wayesepha uSergio omunye ushokoledi. “Bengingeke ngikwazi ukuwufaka ebhokisini lomnikelo lowo shokoledi, ngakho ngiwudlile,” kusho uSergio, wabe esenezela: “Ekugcineni abadala baqonda ukuthi ngangifuna kangakanani ukuba ummemezeli ongabhapathiziwe.”

Umfundisi Wayefuna Ukwazi Okwengeziwe

USimeon wayengumfundisi wesonto eGurkovo, eBulgaria, edolobheni elingenabo oFakazi. Ukutadisha kwakhe iBhayibheli kwakumenze waqaphela umehluko phakathi kokufundiswa iBhayibheli nokufundiswa isonto. Ngolunye usuku esesitimeleni wathola omagazini bethu. Kwamjabulisa uSimeon ukufunda ukuthi uJehova unguNkulunkulu weqiniso nokuthi akekho uZiqu-zintathu. Enesifiso sokwazi okwengeziwe, wabhalela ihhovisi legatsha nawo wonke amasonto ayewazi. Linye kuphela isonto elaphendula, lathi akangazikhathazi ngalowo “mbhedo.” Ihhovisi legatsha lenza okuhlukile, lahlela ukuba abazalwane ababili baye kuye, okuwuhambo lwamakhilomitha angu-35 besuka eKazanlŭk. Baqala isifundo seBhayibheli noSimeon kanye nomkhaya wakhe. USimeon wakuthanda ayekufunda, wamema nomakhelwane nabangane ukuba babe khona. Ngokushesha kwase kuba khona abantu abangu-25 esifundweni seBhayibheli samasonto onke. Ngemva kokuba khona kwenye yezingxoxo zeBhayibheli okokuqala, umakhelwane oneminyaka engu-75 wahlengezela izinyembezi wathi: “Ngiqonde okuningi ngehora elilodwa kunalokho engikuthole eminyakeni engu-30 ngisonta.” Abantu abangaba ngu-60 eGurkovo baba khona njalo ngenyanga emihlanganweni eqhutshwa abafowethu abavela eKazanlŭk, futhi kwaba khona abangu-79 eSikhumbuzweni.

“Ngicela Ungayishintshi Le Ndlela Yokuphila”

UValya, udade wase-Ukraine oneminyaka engu-15 waphawula ukuthi uthisha wakhe wafika egqoke izingubo ezimnyama nokuthi ubekhala. Lapho ezwa ukuthi wayeshonelwe unina, uValya wanquma ukuyomduduza ngemiBhalo ekhuluma ngovuko. Waphatha iBhayibheli nezincwajana ezimbili, ethi Kwenzekani Kithina Lapho Sifa? nethi Lapho Ufelwa Othandekayo, wayesenquma ukuthi ngemva kwesikole, uzoya kuthisha. Wathi: “Ngesikhathi ngisalinde emnyango wehhovisi, ngashaywa uvalo ngabe sengithandaza ngicela uJehova angisize.”

Lapho engena ehhovisi likathisha, uthisha wambuza: “Ufunani?”

“Ngicela ukukududuza ngoba ngiyayiqonda indlela ozizwa ngayo. Eminyakeni ethile edlule nami ngashonelwa umkhulu.”

Kwamthinta lo thisha ukukhathalela kukaValya. Wakhala, wayesethi asikho nesisodwa isihlobo sakhe noma asebenza nabo ababembonise uzwela oluqotho kanje. UValya wabe esefunda futhi echaza isAmbulo 21:3, 4, ngemva kwalokho uthisha wathatha izincwajana, wathi: “Uhluke kakhulu kwabanye abafundi.”

UValya wachaza: “Ngizama ukufunda iBhayibheli nokuphila ngalo futhi ngiyabalalela abazali bami.”

Njengoba uthisha ayecelile, uValya wamphathela iBhayibheli nencwadi ethi Okufundiswa IBhayibheli. Uthisha waphinde wabonga kuValya, wayesethi: “Inkolo yakho iyinkolo yeqiniso, futhi unabazali abakahle kakhulu abakufundisa okulungile. Ngicela ungayishintshi le ndlela yokuphila.”

Washaya Inombolo Okungeyona

Ngosuku lokuqala lomhlangano wesigodi ka-2011 owawuseMalakasa, eGreece, uNatalie washayela uyise ucingo ngomakhalekhukhwini emtshela ngebhasi elaliya emabaleni omhlangano. Kepha washaya inombolo okungeyona, kwangaphendula muntu. Kamuva, umuntu ayemshayele ngephutha wabona le nombolo wayeseyishayela ukuze athole ukuthi ekabani. Kodwa isimiso sase siqalile, futhi nakuba uNatalie ayethi ulucishile ucingo lwakhe, ngandlela-thile lwaphenduleka ucingo lwalo muntu. Nakuba uNatalie ayengaboni ukuthi ucingo lwakhe luphendulekile, le ndoda yakwazi ukulalela ingxenye yenkulumo kasihlalo, eyavusa isithakazelo kuyo.

Ngemva kwesikhathi yathumela umyalezo: “Ungubani? Ungumfundisi?” Ekupheleni kwesimiso sasekuseni, uNatalie wawubona lo myalezo wayesewuphendula: “Angiyena umfundisi. NginguFakazi KaJehova, ngethamele umhlangano.”

Lo mlisa waphinde washaya ucingo ngoMgqibelo ebuza ukuthi usaqhubeka yini umhlangano. Uyise kaNatalie wamshumayeza, ngemva kwalokho lo mlisa wathi: “Ngesikhashana nje inkulumo engiyizwe ocingweni iphendule imibuzo eminingi ebilokhu ingihlupha.” Kwabe sekuvela ukuthi umkhaya wale ndoda wawuhlushwa amademoni futhi ingazi ukuthi iyini le mimoya nokuthi yayibahluphelani. Yathi: “Angikaze ngithande ukuxoxa noFakazi BakaJehova kuze kube manje, futhi uma kungenzeka, ngicela ukukhuluma nalo muntu obenikeza inkulumo.”

Yafika emhlanganweni ngeSonto, yamangala lapho ibona imikhaya egqoke kahle nabantu abajabulayo. Kwakungekho zibi phansi, bengekho abathukayo, bengekho nababhemayo. Ithi: “Bengingazi ukuthi kukhona abantu abanjengani kulo mhlaba! Ungathi ngikwelinye izwe.” Uyise kaNatalie wayiyisa ehhovisi likasihlalo, yafike yaxoxa nosihlalo. Umhlangano nezimpendulo eyazinikwa kwayihlaba umxhwele kakhulu le ndoda. Yathatha incwadi ethi Okufundiswa IBhayibheli, iBhayibheli nomagazini abambalwa futhi kwahlelwa ukuba kuphindelwe kuyo.

E-OCEANIA

• AMAZWE 29

• INANI LABANTU 38 495 300

• ABAMEMEZELI 94 924

• IZIFUNDO ZEBHAYIBHELI 59 431

“Ingoma Emnandi Kunazo Zonke Engake Ngazizwa”

ESavaii, eSamoa, izingane zesikole ziqala usuku ngokuhlangana zicule ingoma yesonto. Kodwa uCelina oneminyaka emihlanu noLevaai oneyisithupha, ngenhlonipho batshela uthishanhloko ukuthi bona ngeke bacule ngoba bangoFakazi BakaJehova. Leso senzo sasingenza bajeziswe kanzima. Kodwa cishe uthishanhloko wacabanga ukuthi uzobukisa ngabo baze bacule, ngakho wathi: “Uma ningeke nicule ingoma yethu, culani eyenu.” UCelina noLevaai bacula ingoma 111 ethi “Uyobiza,” ababesanda kuyiprakthiza ekuKhulekeleni Komkhaya. Lapho beqeda, uthishanhloko wayehlengezela izinyembezi. Wathi: “Le ngoma imnandi kunazo zonke engake ngazizwa. Ngicela niyiphinde.” Bayiphinda. Wayesethi kubo: “Kusukela manje, sengizocela nisiculele izingoma zenu, hhayi ezethu.”

Wayethandaza KuJesu Konke Ukuphila Kwakhe

Umlisa waseFiji owayengumfundisi wahlala walalela lapho othile eqhutshelwa isifundo seBhayibheli. Phakathi nesifundo, wezwa kuthiwa uJesu akayena uNkulunkulu. Kwamkhathaza kakhulu lokhu, waqwasha nasebusuku. Lapho umkakhe ebona ukuthi kukhona okumdlayo, wathi kuye: “Ungaphinde ubalalele laba bantu!” Noma kunjalo, akakwazanga ukuyidlulisa engqondweni le ndaba. Ngesonto elilandelayo waphinde waya kolalela lapho kuqhutshwa isifundo. Ngemva kwezinsukwana engakaqhutshelwa yena isifundo, waya esontweni wesula ekubeni umfundisi. Izihlobo zakhe namalungu esonto ashaqeka futhi athukuthela. Wayengashiyi nje isonto kuphela kodwa wayeshiya nomsebenzi owawumholela kahle. Kwaba lula kakhulu ngaye ukubona iqiniso ngoJesu eBhayibhelini, kodwa kwakunzima ukuthandaza kuJehova ngoba wayethandaza kuJesu konke ukuphila kwakhe. Ngemva kwezinyanga eziningi, wakwazi ukuthandaza kuJehova. Manje useshumayeza abanye izindaba ezinhle, abasize bafunde ngoJehova futhi bamthande.

Umphakathi Omncane Wamukela Iqiniso

Bangu-62 kuphela abantu abahlala esiqhingini esiseNingizimu Pacific okuthiwa iMakatea. Ibandla loFakazi BakaJehova eTahiti lifundisa laba bantu ngoJehova. Abantu bakhona abangu-9 baqhutshelwa izifundo zeBhayibheli ngocingo. Abangu-15 bahlangana emzini womunye wabafundelwayo bese bethamela imihlangano eqhutshwa ngesiTahiti. Phakathi kwalabo manje abafundelwayo kunowesifazane owayeseyinsika esontweni, sekulindeleke ukuba amiswe njengedikoni. Esikhathini esingeside ngaphambili, waphindela esontweni eyochaza ukuthi kungani engasezi. Wabachazela ngeBhayibheli ukuthi kungani abesifazane kungamelwe bafundise ebandleni. Wachaza indima kaJesu Kristu nenjongo yeSidlo SeNkosi, okufanele sikhunjulwe kanye ngonyaka, hhayi njalo ngeSonto. Ngaphezu kwalokho, wakwazi nokubachazela ukuthi bangu-144 000 kuphela abayophila noKristu ezulwini nokuthi yibona kuphela okufanele badle izifanekiselo zeSikhumbuzo. Ekhuthazwe isibonelo sakhe, owesifazane othile washiya esontweni, manje useyafundelwa.

Umkhaya Wasamukela Isimemo

Emzamweni wabo wokumema asebepholile eSikhumbuzweni sokufa kukaKristu, abadala ababili baseSolomon Islands bavakashela uJoshua, owayegcine ukuya esifundweni ngo-1998. Yena nabakubo abangu-20 bahamba amahora amabili beya eSikhumbuzweni. Imfudumalo abamukelwa ngayo ebandleni yenza uJoshua wakhala izinyembezi. Abaningi beza nasenkulumweni ekhethekile, batshela abadala ukuthi bafuna ukufundelwa. Kwenziwa amalungiselelo okuba abangu-15 bafundelwe.

Wayeyazi Impendulo

Phakathi kweziqhingi ezingaphezu kwenkulungwane zensimu yegatsha laseGuam, kuneziyikhulu ezihlala abantu. Nokho, zingu-13 kuphela eziseduze kwebandla. Ngenxa yokuthi ziningi kangaka iziqhingi ezingakaze zivakashelwe oFakazi BakaJehova, abafowethu bayaqhubeka befuna izindlela zokuzifinyelela. Ngo-April 2012, abamemezeli bahamba ngesikebhe baya ePolowat, esinye seziqhingi ezikude. Abantu basePolowat abakwazi ukuxhumana nabantu bakwamanye amazwe. Abesilisa bayabhinca, bakha izikebhe ngezingodo futhi baziphilisa ngokulima.

Omunye wabamemezeli owayevakashile wabuza enye insizwa: “Kwenzekani kithi lapho sifa?”

“Ngiyayazi impendulo yalowo mbuzo!” kusho le nsizwa. Yagxuma yayolanda incwadi yesiChuuk ethi Ungaphila Phakade EPharadesi Emhlabeni eshalofini layo, yavula uhlu lokuphakathi. Yakhomba isahluko 8, esithi “Yini Eyenzekayo Ekufeni?” yasho lokho eyayikufunde kule ncwadi.

Yayiyithole kanjani leyo ncwadi? Ngo-2009 abamemezeli basesiqhingini esikhulu saseChuuk babeshumayela emathekwini ukuze baxoxe nabantu ababeya eziqhingini ezikude futhi babahambisele nencwadi ethi Ungaphila Phakade. Othile owayeya ePolowat wavuma ukuthatha ibhokisi lalezi zincwadi ukuze anikeze nomakhelwane, omunye wabo kuyile nsizwa.

Ngaphambi kokuba basuke ePolowat, abafowethu bayivakashela kaningana le nsizwa ukuze bayikhuthaze futhi bayibonise izinzuzo zokutadisha. Bayifundisa nendlela yokuvula imiBhalo nokubhala amaphuzu ayinhloko emaceleni encwadini yayo.

Kuyajabulisa ngempela ukwazi ukuthi ngisho naseziqhingini ezikude lapho kungekho thelevishini, umsakazo, amaphephandaba noma i-Internet khona, izincwadi zethu zisiza abantu ukuba bafunde iqiniso ngolimi abaluncela!

Izinhlamvu Zesibhamu Ezintathu, Izizathu Ezintathu

U-Anna wayengummemezeli ongabhapathiziwe futhi esanda kweva eminyakeni engu-20 lapho ibambana phezulu eyombango eBougainville ePapua New Guinea. Ngo-1991 wayephakathi koFakazi abayisithupha nezingane ezingu-7 zaseBandleni Lase-Arawa abaphoqeleka ukuba babalekele emahlathini bengenazinto ezanele zokuziphilisa. Kwaphela iminyaka emibili behlala ezindlini ezishiywe abanikazi bephanza nokudla. Babeba nemihlangano ngezincwadi ezimbili kuphela ababenazo, iBhayibheli lika-Anna nencwadi ethi Ubunye Ekukhulekeleni Okuwukuphela KukaNkulunkulu Weqiniso. Babethandaza ndawonye, bacule izingoma zoMbuso bashumayeze nabantu abahlangana nabo.

Izishoshovu zabathola zathi abazalwane ababili ababehamba nabo abajoyine ibutho lazo, kodwa zazikuhlonipha ukungathathi hlangothi koFakazi. Elinye isosha lalike labonisa u-Anna izinhlamvu zesibhamu ezintathu lathi kuye: “Uma ungafuni ukushada nami, ngizokubulala.” U-Anna wamtshela izizathu ezintathu—ngasinye simelela ngayinye inhlamvu yesibhamu—ezimvimbela ukuba angashadi naye, esiyinhloko siwukuthi iBhayibheli lithi asishade “kuphela eNkosini.” (1 Kor. 7:39) Lo mlisa wajika wahamba.

Ngo-2012, ngemva kokuzwa ngesidingo sabamemezeli boMbuso e-Arawa, u-Anna, manje oseyiphayona elivamile, waphindela khona nelinye iphayona ukuze bayosiza ekumiseni iqembu. Wabuzwa ukuthi akanankinga yini ngokuphindela endaweni ayeke wabona kubulawa abantu abaningi kangaka kuyo, futhi wathwala kanzima phakathi naleyo mpi. Waphendula: “Ngiyajabula ngokuphinde ngibe lapha. Akukho okungavimba umsebenzi kaJehova, ngisho nempi ngeke.”