ICzech Republic

Izibopho zobuzalwane bomhlaba wonke zaqina nakakhulu koFakazi BakaJehova eCzech Republic ngo-1998. Imihlangano yezizwe enesihloko esithi “Indlela KaNkulunkulu Yokuphila” yayiqhutshwa embulungeni yonke.

Babengu-345 ababevela eCzech Republic ezihambelini ezingu-42 763 ezazibuthene emhlanganweni ePontiac, eMichigan, e-U.S.A. Babebuthene bevela emazweni okungenani angu-44—emazwekazini aseMelika, eYurophu, e-Afrika nase-Asia. Abanye abangu-700 ababevela eCzech Republic, kanye nabangu-700 baseSlovakia, babesemhlanganweni owawuseNuremberg, eJalimane, okwakungomunye wemihlangano eyisihlanu eyaqhutshwa eJalimane kanye kanye, inengqikithi yezilaleli zamazwe ahlukahlukene ezingu-217 472.

Izihambeli ezivela eCzech zathinteka kakhulu lapho zamukelwa ngemfudumalo ngesikhathi zifika emadolobheni omhlangano, lapho zamukelwa ngothando emakhaya abazalwane abangamaKristu ezazingakaze zibabone, nalapho zizwa inhlokomo yehlombe elalamukela izihambeli zakwamanye amazwe ngosuku lokuqala lomhlangano. ENuremberg, oFakazi baseCzech Republic nabaseSlovakia babebingelelana ngothando olukhulu, bangana futhi bekhala ngenxa yenjabulo yokuthola ithuba lokuphinde babe ndawonye. Lezi kwakuyizenzakalo ezingeke zilibaleke.

Ngawo lowo nyaka, ezinye izinkulungwane zaba semihlanganweni efuze le khona eCzech Republic. Lapho, ngalé kwesimiso esethulwa emihlanganweni emikhulu, izihambeli zathokozela ukuthola inguqulo yesiCzech eyayisanda kuqedwa yemiqulu emibili ye-encyclopedia yeBhayibheli ethi Insight on the Scriptures.

Kwakuyizenzakalo ezijabulisa ngempela lezi emlandweni woFakazi BakaJehova eCzech Republic. Kodwa izigigaba eziholela kuzo ziye zaba ziningi futhi zaba nzima. Zaqala eminyakeni engaphezu kwekhulu edlule, futhi izenzakalo zamuva bezingeke zenzeke ngaphandle kosizo lothando lukaJehova uNkulunkulu.

Ngo-1891, uC. T. Russell, owayengumongameli we-Watch Tower Society ngaleso sikhathi, wavakashela ePrague esohambweni oluya eYurophu, nakuba kwaba isikhashana. Kusukela ngaleso sikhathi, oFakazi BakaJehova baye babona ukwanda okukhulu, kanye nezikhathi zobunzima, ukushushiswa nokuhlungwa. Umsebenzi wabo wavalwa ngokuphelele iminyaka engu-46. Ngisho nalapho bengavinjelwe, oFakazi babengaqashelwa ngaso sonke isikhathi ngokomthetho.

Okwehlela oFakazi BakaJehova emazweni aseCzech kuye kwafana nokomprofethi uJeremiya, uJehova athi kuye: “Bayakulwa nawe, kepha abayikukwahlula, ngokuba nginawe, usho uJehova, ‘ukuba ngikophule.’”—Jer. 1:19.

Laziwa Ngokuthi ICzechia

Ngo-October 1918, ngemva kwezingxoxo zezombangazwe emahhovisi osomaqhinga bomhlaba, kwakhiwa iRepublic of Czechoslovakia eYurophu Ephakathi. Yaqedwa okwesikhashana phakathi neMpi Yezwe II kodwa yabuye yavela ngemva kweminyaka engaphezu kweyisithupha yokucindezelwa amaNazi. Yayiye yabekezelela iminyaka engaphezu kwamashumi amane yokubusa kwamaKhomanisi. Kwathi ngemva kweminyaka engu-74, leli zwe elingokombangazwe langabe lisaba khona. Ngo-1993, ingxenye yezwe eyayisempumalanga yaba iSlovak Republic. Ingxenye esentshonalanga, ehlanganisa iBohemia, Moravia, nengxenye yeSilesia, yaba iCzech Republic—ngamafuphi, iCzechia.

ICzech Republic ingamakhilomitha angu-500 ukusuka empumalanga uya entshonalanga, namakhilomitha acela ku-250 ukusuka enyakatho uya eningizimu. Enyakatho nasentshonalanga kunezintaba ezinhle ezinamahlathi; kunendawo yokulima evunde kakhulu nenemifula. Kodwa njengoba kunjalo ngengxenye enkulu eYurophu Ephakathi, ukungcoliswa kwendawo kuyinkinga engathi sína. Iningi labantu lihlala emadolobheni amakhulu namancane.

Umbiko ofingqiwe wentuthuko yomsebenzi woFakazi BakaJehova kulo lonke izwe elaliyiCzechoslovakia phakathi kuka-1912 no-1970 wakhishwa e-Ncwadini Yonyaka Ka-1972 (yesiNgisi). Lapha kuneminye imininingwane, kodwa lo mbiko ugxila ezweni eseliyiCzech Republic.

Ifa Elingokwenkolo

Ngesinye isikhathi, inhloko-dolobha iPrague, ibizwa ngokuthi idolobha lemibhoshongo eminingi. Kodwa ngisho nemibhoshongo eminingi yamasonto ayikwazanga ukuvimbela iCzech Republic ukuba ibe yilokho eyikho namuhla—izwe labantu abangakholelwa ukuthi uNkulunkulu ukhona. Kodwa kwakungenjena.

Ngenxa yesicelo seNkosana uRastislav, umbusi waseMoravia, uMbusi uMichael III waseByzantium wathuma abathile eMoravia ngo-863 C.E. ukuyokwenza umsebenzi wenkolo. UConstantine (kamuva owaziwa ngelikaCyril) noMethodius, amadoda amabili athunywa, ayengabefundisi abavela eThesalonika, eGrisi. Ngalé kokuqhuba izinkonzo zenkolo ngolimi lwendawo, uConstantine wakha izinhlamvu zamagama ezazifanelana nolimi lwamaSlav, olwalukhulunywa abantu baseMoravia. Esebenzisa lezi zinhlamvu zamagama, wabe esehumusha izingxenye zeBhayibheli. Kodwa ukuliqonda ngokucacile iZwi likaNkulunkulu kwenzeka kamuva kakhulu.

Ukumemezela Isigijimi Esiphuthumayo

Ngo-1907, ngemva kweminyaka engaba ngu-16 uC. T. Russell avakashela kafushane ePrague, umFundi WeBhayibheli (njengoba oFakazi BakaJehova babaziwa kanjalo) osekhulile waqala ukuhambela enyakatho yeBohemia kanye ngenyanga esakaza izincwadi zeBhayibheli. KwakunguMfoweth’ u-Erler, waseDresden, eJalimane. Wayefakaza ngentshiseko eLiberec nakwamanye amadolobha izinsuku ezimbili noma ezintathu ngesikhathi. Wasakaza incwadi kaC. T. Russell ethi The Battle of Armageddon futhi ememezela ngokuqiniseka ukuthi ngo-1914 kwakuzokwenzeka inhlekelele ezweni.

Ngo-1912 abantu abaningana abashisekayo babehlwanyela imbewu yeqiniso leBhayibheli, bakha amaqembu amancane futhi bebhapathiza. Lapho kugqashuka impi yezwe ngo-1914, abazange bethuke abaFundi BeBhayibheli, nakuba ngalowo nyaka kungafezekanga konke ababekulindele.

Eminyakeni yokuqala, izincwadi abaFundi BeBhayibheli ababezisakaza lapha zazingesiJalimane. Abanye abantu abakhuluma isiJalimane babezamukela ngesasasa. UCharlotta Jankovcová, wasePlzeň, ukhumbula ukuthi unina wathola ezinye zezincwadi zikaMfoweth’ uRussell kumFundi WeBhayibheli waseDresden nowafika kubo ngo-1925. Ngokushesha baqala ukuya emihlanganweni. Uthi: “Sasenza izifundo zomuntu siqu futhi silungiselele imihlangano. Masonto onke, lonke usuku lwangeSonto sasiluchitha enkonzweni yasensimini. SasingabaFundi BeBhayibheli, sitadisha INqabayokulinda, sifunda izincwadi, futhi sine-Bulletin [manje ebizwa ngokuthi INkonzo Yethu YoMbuso].”

Kancane, kancane, izincwadi zahunyushelwa olimini lwesiCzech. Ngo-1922 kwatholakala incwajana evusa amadlingozi ethi Millions Now Living Will Never Die, futhi abantu abathathu bahlanganyela enkonzweni yesikhathi esigcwele njengama-colporteur ukuze bayisakaze kubantu baseCzech. Okungenani ngo-1923, kwase kutholakala INqabayokulinda enamakhasi angu-16 ngolimi lwesiCzech inyanga ngayinye.

Ukuze aqhubekisele phambili ukushunyayelwa kwezindaba ezinhle emazweni aseCzech, ngo-1923, u-Antonín Gleissner, kanye nomkakhe, bathunyelwa eBohemia bevela ehhovisi legatsha le-Watch Tower Society eMagdeburg, eJalimane. Ngaphansi kokuqondisa kukaMfoweth’ uGleissner, owayeseke wayiqhuba kakade imihlangano edolobheni laseMost ngo-1916, iNhlangano yavula idepho yezincwadi lapha.

Ngo-1928 ihhovisi legatsha laseMagdeburg laqala ukuqondisa kahle umsebenzi eCzechoslovakia. Umphumela waba ukuthi amaqembu ahleleka kangcono, kwaba nempumelelo eyengeziwe enkonzweni yasensimini nomsebenzi wama-colporteur waqondiswa kangcono. Ngokuqondene nalokhu, iqembu ngalinye, kanye nama-colporteur (abenduleli balabo ababizwa ngamaphayona manje), lalabelwa insimu elalizoshumayela kuyo. Umbiko waseCzechoslovakia wangalowo nyaka ubonisa ukuthi kwakunamaqembu amancane angu-25 anabamemezeli abangu-106 nama-colporteur ayisithupha. Sebebonke, bahambisa izincwadi nezincwajana ezingu-64 484 nomagazini abangaba ngu-25 000, ngaleyo ndlela benza abathakazelayo baqonde ukuthi uMbuso kaNkulunkulu uyikhambi lezinkinga zesintu.

Ngonyaka olandelayo, kwafika u-Otto Estelmann evela eJalimane ephethe i-“Photo-Drama of Creation” emnandi ye-Watch Tower Society. Yabukiswa izilaleli kulo lonke izwe. Umvuthwandaba walo msebenzi waba ngasekupheleni kuka-1933 mhla abazalwane beqasha iKapitol, indawo yokubuka amabhayisikobho enkulu kunazo zonke ePrague, bezobukisa i-“Photo-Drama” izikhathi ezine zilandelana. Kwafika abantu abaningi kangangokuba le ndawo yaphinde yaqashwa ezinye izinsuku ezimbili. Abaningi ababefuna ukumenyelwa izinkulumo ezengeziwe zeBhayibheli babhalisa amagama namakheli abo. Yebo, njengoba ukwanda kwenhlangano kwakuya kubonakala, kwaba khona nokuphikiswa. Yilokho uJesu ayetshele abalandeli bakhe ukuba bakulindele.—Joh. 15:18-20.

Abanye Abamukela Izindaba Ezinhle

Phakathi nale nkathi, izindaba ezinhle zatholwa indoda kamuva eyafeza indima ebalulekile emsebenzini woFakazi BakaJehova kuleli zwe. Igama layo kwakunguBohumil Müller. Ekupheleni kwenkambo yakhe yasemhlabeni ngo-1987, wayengabheka emuva eminyakeni engaphezu kuka-55 yenkonzo yokwethembeka, kuhlanganise necishe ibe ngu-14 ayichitha emakamu okuhlushwa nasemajele ngenxa yokuthi wayengeke alulahle ukholo lwakhe.

Ngo-1931, eneminyaka engu-16 ubudala, uBohumil wafundela ukuhlela izinhlamvu zamagama. Umfowabo uKarel, wayefundela ukuhlanganisa izincwadi. Uyise, uTomáš Müller, wayeyilungu eliqavile le-Unity of Brethren, eyayiziqhayisa kakhulu ngamasiko ayo akudala nomlando wayo. Umqashi kaKarel wamnikeza amathikithi okubuka i-“Photo-Drama of Creation.” Ngemva kombukiso wokuqala, uKarel wabuyela kubo ejabulile. Wachaza yonke into ayeyizwile nayeyibonile, futhi wanikeza uyise izincwadi ezimbili zesiJalimane ayezithengile. Ngakusasa kusihlwa wabuyela ekhaya ejabule nakakhulu futhi wafika nencwadi ethi Creation ngolimi lwesiCzech. Lapho exoxa ngayekubonile, waveza ukuthi wayebhalise ikheli lakhe ekupheleni kwesimiso ukuze amenyelwe izinkulumo ezengeziwe zeBhayibheli.

Cishe ngemva kwenyanga, lapho umkhaya usanda kuqeda ukudla kwasemini ngeSonto, kwangqongqoza othile. Kamuva uBohumil Müller wabhala: “Ubaba waya kovula. Wathi ukuxoxaxoxa nesivakashi kuvulandi kamuva wabuyela ekhishini emangele. Amagama akhe okuqala athi: ‘Angikaze ngikubone okunjena. Cabangani nje, indoda iyazihlupha izosivakashela ngeSonto ukuze isimemele enkulumweni! Inkulumo ezonikezwa abaFundi BeBhayibheli. Thina maBrethren ngeke neze sikwenze lokho. Ave sivilapha!’” Kamuva abakwaMüller baqala ukuhlangana ndawonye neqembu elincane loFakazi BakaJehova.

Ngokuhamba kwesikhathi, uBohumil wazinikezela kuJehova, kodwa akazange abhapathizwe kwaze kwaba ngemva kweminyaka engaba mibili. Ngaleso sikhathi wayesekhonza njengomsizi wombonisi webandla (ngaleso sikhathi owayebizwa ngokuthi umqondisi wenkonzo), eqhuba imihlangano futhi esebenza eKhaya LaseBethel ehhovisi leNhlangano ePrague. Akubona bonke oFakazi ngaleso sikhathi ababekuqonda ngokugcwele ukubaluleka kobhapathizo lobuKristu.

Cishe ngaso lesi sikhathi, uLibuše Štecherová, umzala kaBohumil, wafunda iqiniso. Washeshe wabhapathizwa. UDade Štecherová kamuva wathi: “Umalume, uTomáš Müller, wayeyithanda kakhulu inkolo. Langa limbe ehlobo lika-1932 ntambama, wangitshela igama likaNkulunkulu, elithi Jehova, wangitshela ngekusasa lomhlaba nangemihlangano yeBhayibheli emangalisayo yeqembu elibizwa ngokuthi oFakazi BakaJehova. Ekugcineni, wangishiyela incwadi kaJ. F. Rutherford ethi Deliverance. Ngaqala ukuqaphela ukuthi kunokuthile uMdali wami ayefuna ngikuqonde. Emhlanganweni wenkonzo wokuqala engaya kuwo, ngezwa ngobhapathizo olwaluzokwenziwa okwesibili ePrague. Ngahlala ngalalela kodwa ngangingazi ukuthi yini eyayizokwenzeka maduze. Sesigoduka, umalum’ uMüller wangibuza, ‘Ngeke yini uthande ukubhapathizwa nawe?’ ‘Kodwa angikakazi lutho,’ ngiphendula. ‘Ufana nomproselite,’ kuqhuba umalume. ‘Uyalazi iBhayibheli. Kusele nje ukuba uqaphele izikhathi esiphila kuzo nokuthi intando kaNkulunkulu iyini ngawe.’ Ngakho ngamcela ukuba angibhalise kwabazobhapathizwa, kwathi ngo-April 6, 1933, ngabhapathizwa.” Wathola ukuthi iyini intando kaJehova ngaye, futhi wamkhonza ngokwethembeka kwaze kwaba sekushoneni kwakhe ngo-1995.

Ngalezo zinsuku abantu abathakazelayo babengaqhutshelwa izifundo zeBhayibheli. Ngokuvamile ukuqeqeshelwa inkonzo yasensimini kwakuhilela nje ukuhamba noFakazi niye emzini owodwa ukuze ubone ukuthi wenza kanjani bese uhanjiswa wedwa.

Abesifazane abaningi balithola phakathi naleyo minyaka iqiniso. Inkonzo yaba into ebaluleke kunazo zonke ekuphileni kwabaningi babo, futhi bafeza okuningi. Babevame ukuhamba nezingane zabo, futhi ngenxa yalokho, izingane zazibonela ngawazo isibusiso sikaJehova. UBlanka Pýchová waqala ukuya enkonzweni yasensimini nonina lapho eneminyaka eyishumi. Ukhumbula isigameko esithile: “Mina nomama sabelwa ukuba sisebenze kwelinye idolobha elincane. Umama wathi angisebenze maphakathi nedolobha yena uzosebenza imizi ezungezile. Lapho ngifika phakathi edolobheni, ngethuka kabi lapho ngibona ukuthi kwakugcwele amahansi. Azikho izilwane engangizesaba, ngaphandle kwamahansi. Angijaha, futhi lapho ezama ukungingqofa, ngazivikela ngesikhwama sami sezincwadi. Kodwa kwakungelula, ngakho ngenxa yokungazi ukuthi ngenzeni, ngathandaza: ‘Nkosi, Jehova, ngicela ungisize!’ Amahansi avele abaleka, eduze kwami kwakumi inja enkulu yohlobo lwe-Saint Bernard. Ngayimbambatha le nja, yangilandela njengoba ngingena endlini ngendlu. Amahansi awaphindanga asondela.” Kamuva unina waqikelela ukuthi uBlanka uyakubona ukunakekela kukaJehova kulokhu okwamehlela.

Ukufinyelela Abantu Ngezindlela Eziningi

Ngo-1932 kwatholakala elinye ithuluzi lokusetshenziswa ensimini kule ngxenye yeYurophu. Umagazini i-Golden Age (manje eyaziwa ngelithi Phaphama!) yatholakala ngesiCzech. Ngalowo nyaka kwahanjiswa amakhophi angu-71 200. Ngemva kokufunda i-Golden Age, abantu abaningi babezimisele ukuthatha ezinye izincwadi ezazikhuluma kabanzi ngeBhayibheli.

Ukuze kunikezwe wonk’ umuntu ithuba lokuzuza ezindabeni ezinhle zoMbuso kaNkulunkulu, kwathunyelwa amaphayona evela eJalimane. Ayephila ukuphila okuphansi ukuze akwazi ukuzinikela kulo msebenzi. Emaphayoneni angu-84 abika ngo-1932, angu-34 kwakungawaseJalimane. Kwakudingeka ukuba amaningi kuwo afunde ulimi olusha. Engakalufundi, yini ayengayifeza? U-Oskar Hoffmann, umzalwane ongumJalimane owayekhonza ePrague wathi: “Nakuba ngangingalwazi ulimi lwezwe, ngangibahambela njalo abantu emizini yabo. Ukuze ngibasize baqonde engangihamba ngakho, ngangibacela ukuba bafunde ikhadi lobufakazi, elalinesigijimi esifushane esibhalwe ngolimi lwabo. Ngale ndlela, izinkulungwane zezincwadi zeBhayibheli zahanjiselwa abantu baseCzech.”

Imithetho ethile kahulumeni eyayilwa nokwanda kwezifiki yenza kwadingeka ukuba iningi lamaphayona aphesheya ahambe ngo-1934. Kodwa kwase kufezwe okuningi okuhle. Phakathi nalowo nyaka amaphayona ayefakaze ezindaweni eziningi ezazingabelwe qembu.

Ngonyaka amaphayona akwelinye izwe ayezohamba ngawo, iNhlangano yalungiselela oFakazi bendawo izinkulumo zeBhayibheli eziqoshwe emapuletini egilamafoni. Abazalwane bendawo bathatha izinyathelo ezincomekayo ezibonisa ukuzimisela. IBandla LasePrague lathenga isithuthuthu sohlobo lwe-Indian 750, esinenqodlana eceleni ababebeka phezu kwayo umshini wokukhulisa umsindo. Babethi bangafika maphakathi nedolobha noma endaweni eyisiganga, babeke lo mshini wokukhulisa umsindo phezu kwento ende enemilenze emithathu bese bedlala umculo oqoshiwe ngesikhathi behambela indlu ngendlu. Lapho sebebaningana abantu abadonswe umculo, abazalwane babedlala irekhodi elinentshumayelo yeBhayibheli emfushane. Ngale ndlela babekwazi ukufakaza kubantu abaningi emadolobheni amancane amaningana ngeSonto nje ekuseni.

Ukubhalisa Ngokomthetho

Ngo-1930 kwakuthathwe izinyathelo zokuba kube nesisekelo esingokomthetho somsebenzi woFakazi BakaJehova eCzechoslovakia. Lokhu kwakuhilela ukwakha izinhlangano okwakungabhaliswa ngazo izindawo, zithole izincwadi futhi zenze neminye imisebenzi eyayidingeka.

Kwaqhutshwa umhlangano okhethekile ePrague lapho bonke ababehilelekile balwamukela khona uhlelo lokwakha izinhlangano ezimbili futhi bayamukela nemigomo yazo. Inhlangano yokuqala yabizwa ngokuthi yi-Watch Tower Bible and Tract Society (Czechoslovak Branch). Umsebenzi wayo kwakuwukuthola izincwadi, ukuqhuba imihlangano nokusakaza izincwadi. Eyesibili yayibizwa ngokuthi yi-Mezinárodní sdružení badatelů Bible, československá větev (International Bible Students Association, Czechoslovak Branch), ikomkhulu layo lisePrague. Yaba inhlangano engokomthetho yokuqondisa umsebenzi woFakazi BakaJehova eCzechoslovakia. Kwamiswa amahhovisi amathathu e-Czechoslovak Branch of the International Bible Students Association, ngalinye lizosingatha izindaba engxenyeni ethile yezwe. Umsebenzi wamazwe aseCzech wawuqondiswa ihhovisi elalisedolobheni laseBrno, u-Antonín Gleissner engusihlalo walo. Lezi zinhlangano zasiza ekwenzeni lula umsebenzi wokufakaza eCzechoslovakia.

Ngemva kweminyaka emithathu, ngo-1933, i-Watch Tower Society yavula ihhovisi legatsha ePrague lapho yayenza khona imisebenzi yokunyathelisa. Kwakufanele kwenziwe lokhu ngenxa yesimo esinzima eJalimane ngemva kokuthatha kukaHitler izintambo. Umsebenzi wawusuvinjelwe lapha, futhi igatsha leNhlangano eMagdeburg lase lithathiwe. U-Edgar Merk, waseMagdeburg, wamiswa njengenceku yegatsha ePrague. UKarel Kopetzky, wasePrague, wabelwa ukuba aqondise iKhaya LaseBethel nehhovisi.

Kodwa akuhambanga kahle konke ePrague. Ngenxa yokuqhosha nezinye izici, laba bazalwane ababili baxabana. Ngo-1936 igatsha lasePrague labe seliqondiswa yi-Central European Office yeNhlangano, eyayiseSwitzerland. Ngokushesha ngemva kwalokhu, uKarel Kopetzky noJosef Güttler, bobabili ababephathiswe izikhundla ezinhlanganweni zeNhlangano ezingokomthetho eCzechoslovakia, basula. Izindawo zabo zathathwa uJosef Bahner noBohumil Müller. Inceku entsha yegatsha kwakunguHeinrich Dwenger, inceku kaJehova emnene nethembekile eyayinakekele izabelo ezingokwasezulwini ezihlukahlukene. Ngesiqondiso sothando, amabandla aqhubeka ehlanganyela ngenjabulo ekumemezeleni izindaba ezinhle zoMbuso kaNkulunkulu—izindaba ababezidinga kakhulu abantu ezweni elaliya liba nezinxushunxushu.

Baqiniswa Imihlangano Yezizwe

OFakazi BakaJehova eCzechoslovakia babazi kahle ukuthi oFakazi bakwamanye amazwe babeba nemihlangano emikhulu, futhi babenesifiso esinamandla sokuba nomhlangano eCzechoslovakia.

Kwahlelwa umhlangano omkhulu wezizwe owawuzoba sePrague ngo-May 14 kuya ku-16, 1932, eVarieté-Theater. Lona kwakuwumhlangano wezizwe wokuqala kuleli zwe. Inkulumo yeningi yayifike ngesikhathi, inesihloko esithi “IYurophu Ngaphambi Kwembubhiso.” Isimiso sahunyushelwa olimini lwesiCzech, isiHungary, isiJalimane, isiRashiya neSlovak. Kwakunabantu abangu-1 500. Kwanikezwa ubufakazi obunamandla. Phakathi nezinsuku zomhlangano, kwahanjiselwa abantu izincwadi zeBhayibheli ezingaphezu kuka-21 000 njengoba ababeze emhlanganweni babehlanganyela enkonzweni yendlu ngendlu.

Ngo-1937 kwaba nomunye umhlangano wezizwe ePrague. Kwafika amakhulu ezivakashi evela ezindaweni ezinjenge-Austria, Hungary, Poland, neJalimane. “Kwakuwumhlangano omuhle ngokumangalisayo!” Kukhumbula uMfoweth’ uMüller kamuva.

Ukushumayela izindaba ezinhle kwaqhubeka kuthuthuka kulo lonke elaseCzechoslovakia. Ngo-1937 oFakazi babeyisebenzisa ngokunenzuzo imishini engu-7 yokukhulisa umsindo namagilamafoni angu-50 ukuze badlale izinkulumo zeBhayibheli eziqoshiwe. Ngalowo nyaka la mathuluzi bawasebenzisa izikhathi ezingu-2 946 bedlalela izilaleli ezingu-31 279 izintshumayelo. Umbiko womsebenzi waseCzechoslovakia ngalowo nyaka wathi: “Kulo lonke izwe umsebenzi wokushumayela izindaba ezinhle uqhubekela phambili. Abantu basemadolobheni amancane namakhulu bazithola, kuze kufinyelele nasezigodlweni nasemapulazini asezintabeni.”

Ukufufusa Kosongo LwamaNazi

IMpi Yezwe II yayisondela. Umoya wawuya ushuba eYurophu. OFakazi BakaJehova babezobhekana kanjani nesimo? Ukwenqaba inkonzo yezempi ngenxa kanembeza kwakungakandi eCzechoslovakia. Ezinkolweni zendawo ezinkulu, ayikho eyayisekela izindinganiso zeBhayibheli kuze kufike eqophelweni lokulondoloza ukungathathi hlangothi kobuKristu. Umuntu wokuqala owaboshelwa ukungathathi hlangothi kobuKristu kuleli zwe kwakunguBohumil Müller. Wabhala: “Kwakumelwe ngingenele inkonzo yezempi ngo-October 1, 1937. Kodwa unembeza wami wangitshela ukuthi uNkulunkulu akafuni izinceku zakhe ‘zifunde impi.’ (Isaya 2:4) Ngathembela kuJehova ukuba anginike amandla nokukhuthazela okwanele ukuze ngikwazi ukubhekana novivinyo olwalungaphambili. Ngenxa yokuma engakuthatha, ekupheleni kuka-March 1939, ngase ngibizelwe phambi kwenkantolo yezempi kane futhi isikhathi ngasinye ngigwetshwe izinyanga eziningi ejele. Uma ngicabanga lezo zinsuku, ngingathi manje ngiyabonga ngalolo vivinyo ngoba lwangicijela izikhathi ezimbi nakakhulu ezazizolandela esikhathini esizayo.”

Njengoba usongo lwamaNazi lwaluqina, ukucindezeleka kwezinceku zikaJehova kwanda. Ezindaweni ezingasemngceleni weJalimane, ukuphikisa kwadlanga. Ngo-August 1938 yavalwa imihlangano yoFakazi BakaJehova, ngakho baqala ukuhlangana ngamaqembu amancane. ULibuše Štecherová wabhala: “Ngo-1938 isimo sezombangazwe sashuba, futhi kwadingeka siziqeqeshele ukufakaza ngaphansi kwezimo ezintsha. Kamuva, ngesikhathi sempi, sasizijwayelanisa nomuntu ngaphambi kokuxoxa naye ngokholo lwethu.”

Ngo-1938, iJalimane yathatha iSudetenland, ngaleso sikhathi eyayingeyeCzechoslovakia. Ngenjongo yokuvimba impi, iBrithani neFrance bavumelana nezimfuno zikaHitler zokuba iSudetenland ibe ingxenye yeJalimane, futhi abantu ababehlala lapho bazithola sebebuswa amaNazi.

IJalimane Iqala Ukuthatha Izintambo

Ngo-March 15, 1939, amabutho aseJalimane alithatha lonke elaseBohemia nelaseMoravia. UHitler wakha umbuso omusha wezombangazwe obizwa ngokuthi yi-Protectorate of Bohemia and Moravia, owawunomongameli wawo nohulumeni owupopayi.

Ngokushesha amaGestapo abathathela isinyathelo oFakazi BakaJehova. Ngo-March 30 afika ehhovisi le-Watch Tower Society ePrague. Ngo-April 1, uBohumil Müller wakhululwa ngemva kokudonsa isigwebo ngenxa yokungathathi hlangothi kobuKristu. Esendleleni esuka ejele eya esiteshini sesitimela, washayela ihhovisi legatsha ucingo. Kamuva wathi: “Ngabatshela ukuthi ngangizofika ngakusasa ukuze ngenze noma yini engangingayenza. Sasibathathu eBethel ngalelo langa. Wawumningi umsebenzi okwakumelwe wenziwe. Eminye imishini yokunyathelisa yayisisesikhumulweni semikhumbi kakade, isilungele ukuthunyelwa eNetherlands. Okunye kwakudingeka kupakishwe masinyane. Lo msebenzi wenziwa yimina noMfoweth’ uMatejka, kwathi uMfoweth’ uKapinus waqoqa izinto emahhovisi nasemagcekeni aseBethel. Phakathi naleso sikhathi sasihumusha nomagazini—INqabayokulinda ne-Consolation (manje ebizwa ngokuthi i-Phaphama!). Sakwazi nokukhipha inqwaba yezincwadi nezincwajana zesiCzech amaGestapo ayengabanga nandaba nazo mhla epequlula izinto ngo-March. Naphezu kwalokho, amaGestapo afika izikhathi eziningi ngesikhathi silungiselela ukuvala ihhovisi.”

Ngemva kokuthathwa kwendawo, kwahlaluka ukuthi izimo okwakuzoshunyayelwa ngaphansi kwazo zazizoba nzima kakhulu. Abazalwane abaningi balishiya elaseCzechoslovakia. UMfoweth’ uDwenger waya eSwitzerland kusele usuku nje kufike amaGestapo ezombopha. NoMfoweth’ uMüller wayelungiselela ukuhamba. Wayethole imvume kuziphathimandla zoMbuso lapho kufika incwadi ivela egatsheni laseBern ithi kungaba kuhle aqhubeke esabelweni sakhe, anikeze isiqondiso nesikhuthazo ababesidinga abazalwane baseCzechoslovakia. UMfoweth’ uMüller wavumela phezulu, futhi ukuze angayishintshi ingqondo, wayidabula i-passport yakhe.

Ngemva kweminyaka engu-48, wathi: “Uma othile engangibuza manje ukuthi ngake ngazisola yini ngokungahambi ePrague entwasahlobo ka-1939, ngingaphendula ngokuthi ‘Cha!’ Angizange ngizisole ngokuhlala. Ngokuhamba kwesikhathi ngaqaphela ukuthi kwakumelwe ngibe lapha. Yilapha lapho uJehova nenhlangano yakhe bengibeke khona. Ingani konke ukuhlupheka nokushaywa ngonya engangivame ukukubekezelela kwakwedlulwa yinjabulo enganginayo lapho ngibona ukwanda komsebenzi unyaka nonyaka nokwanda kwesixuku sabakhulekeli boPhezukonke abajabulayo ababengizungezile!”

Kusukela ngo-1939 kuqhubeke, amaGestapo ayebopha abantu. U-Otto Buchta, insika engokomoya eBandleni LaseBrno, wayephakathi kwalabo ababoshwa, kamuva washonela ekamu lokuhlushwa laseMauthausen. Ekwindla ka-1940, uMfoweth’ uKapinus, ngaphambili owayekhonze ehhovisi legatsha ePrague, kanye nabanye abazalwane nodade eMoravia, waboshwa. Noma kunjalo, ofakazi bakaJehova abathembekile baqhubeka beshumayela iZwi nomaphi lapho babengase bakwazi khona.

Abanye ababeye bakhonza uJehova ngezikhathi ezikahle bakuyeka ukumkhulekela futhi balekelelana nezitha zabantu bakhe. UKarel Kopetzky wayekade engumzalwane onekhono noshiseka kakhulu. Kodwa lapho uMfoweth’ uMüller, owayeye wasebenza naye, embona ngo-1940, uKopetzky wayeseshintshile. Kwenzeka kanje: Abazalwane babenze incwadi yeBhayibheli nge-mimeograph bayifaka ezimvilophini ukuze iposwe. UMfoweth’ uMüller wazifaka esikhwameni, washova ibhayisikili lakhe eya emaposini ahlukahlukene ePrague. Ebhokisini leposi ngalinye wayefaka izimvilophi ezimbalwa. Wathi: “Lapho ngingena kwelinye iposi, ngabona indoda imi ekhawunteni, igqoke izingubo zamalungu e-SS. Ngama, kodwa ngingakanqumi ukuthi ngizokwenzani, le ndoda yaphenduka sabhekana ubuso nobuso. Sake sathi ukubukana isikhashana. Ngabamba ongezansi lapho ngibona ukuthi ngibukana nomuntu owayengumfowethu, uKarel Kopetzky! Kwasheshe kwaphela ukwethuka, ngaya kwenye ikhawunta ngathatha ifomu, ngaphuma eposini, ngathi galo yephuka ngebhayisikili lami.”

Ngonyaka olandelayo uMfoweth’ uMüller, ngaleso sikhathi owayeqondisa umsebenzi kulelo zwe, waboshwa futhi wayiswa ekamu lokuhlushwa laseMauthausen.

Ukushumayela ‘Esithandweni Somlilo’

Eminyakeni edlule kuye kwalotshwa okuningi ngamakamu okuhlushwa nokuhlupheka kwabafowethu kuwo. Phakathi kwalabo ababesemakamu kwakunoFakazi BakaJehova baseCzechia. Ngeke sigxile ekuhluphekeni kwabo, kunalokho sizogxila endleleni abakhiwa ngayo ngokomoya nokuthi babakha kanjani abanye ngisho nakuleso ‘sithando somlilo.’—Qhathanisa noDaniyeli 3:20, 21.

Ngalezo zinsuku abantu emhlabeni wonke babelazi igama ledolobhana elincane laseCzech iLidice. Ngo-June 9/10, 1942, lonke leli dolobhana laqothulwa, okwakungumyalo ovela ngqó kuHitler, kuphindiselelwa ukufa kwephoyisa laseJalimane. Igama lalo kwadingeka lisuswe ebalazweni laseYurophu. UBožena Vodrážková, owasinda kuleyo nhlekelele, kamuva wakhumbula: “AmaGestapo ahaqa lonke idolobhana lakithi. Bonke abesilisa badutshulwa, izingane zayiswa lapho kungaziwa khona, isimame sathuthelwa ekamu lokuhlushwa laseRavensbrück. Ngatholana lapho noFakazi beNkosi yethu uJehova . . . Ngesinye isikhathi umngane wami wathi, ‘Božena, ngixoxe nabaFundi BeBhayibheli. Bakhuluma izinto ezimangalisayo. Ungathi inganekwane, kodwa bathi lokho iBhayibheli elikushoyo kuyiqiniso, ukuthi uMbuso kaNkulunkulu uzofika uqede bonke ububi.’ Kamuva ngaxoxa nabo mathupha. Bangitshela ngoMbuso kaNkulunkulu, futhi sangikhanga kakhulu isigijimi sabo.” Yebo, waba omunye woFakazi BakaJehova.

Ukuziphatha koFakazi BakaJehova emakamu kwazihlaba umxhwele ngokujulile iziboshwa eziningi. U-Alois Miczek uyakhumbula: “Ngesikhathi sempi ngaboshelwa imisebenzi yami yobuKhomanisi futhi ngafakwa ekamu lokuhlushwa laseMauthausen. Ngandlela-thile oFakazi lapha babekwazi ukuthola INqabayokulinda nezinye izincwadi, abazisebenzisela ukufundisa ezinye iziboshwa, futhi ama-SS ehluleka ukukuvimbela lokhu. Ngakho njengesixwayiso, ama-SS anquma ukudubula oFakazi abayingxenye eyodwa kweziyishumi emakamu. Baklelisa bonke oFakazi, uFakazi ongoweshumi uma bebalwa wayekhishelwa eceleni agadwe unogada ohlomile. Kodwa ngokushesha, njengokungathi kwakuhlelwe ngaphambili, abazalwane abangamaphesenti angu-90 baphenduka baqala ukuya kuleli qembu elikhishelwe eceleni elizobulawa. ‘Uma nifuna ukudubula laba, sidubuleni sonke!’ Lonke ikamu lakhexa lapho likubona lokhu, ama-SS ahlabeka umxhwele kangangokuba lo myalo washintshwa. Ngazibonela ngawami lesi sigameko.” (Joh. 15:13) Sakuthinta kanjani ukuphila kwakhe?

Indodakazi yakhe, uMarie Gogolková, iyachaza: “Ukubona oFakazi BakaJehova eMauthausen kwaholela ekubeni ubaba amukele iqiniso. Wabhapathizwa ngokushesha nje ngemva kwempi, futhi washumayela ngentshiseko ngoMbuso kaNkulunkulu wasiza nabaningi ukuba bafunde iqiniso.”

U-Oldřich Nesrovnal, waseBrno, naye wayesekamu lokuhlushwa. Ngani? Wayeyenyanya impi, ngakho wazama ukubaleka eqe umngcele aye eSwitzerland. Wabanjwa, wabekwa icala lobunhloli, futhi wadingiselwa eDachau. Uyakhumbula: “Esitimeleni seziboshwa esasihamba ngaso siya ekamu, ngabona umfana onesizotha oneminyaka engu-13 ehlezi eduze kwefasitela efunda okuthile. Kwakubonakala sengathi uzama ukukufihla lokhu ayekufunda. Ngambuza ukuthi wayefundani, waphendula wathi: ‘IBhayibheli.’ Wangitshela ukuthi wayengeke alulahle ukholo lwakhe kuNkulunkulu. Angizange ngimqonde, kodwa nganamathela kuye. Igama lakhe kwakunguGregor Wicinsky; wayengowasePoland. Ngakusasa ngathola ukuthi wayengomunye woFakazi BakaJehova. Wayenqabile ukusayina uhlu lwezinto okwakufanele aziyise emaphoyiseni. Lolu hlu lwalubhalwe ngesiJalimane, futhi wayesaba ukuthi uzosuke asayine iphepha elithi uyalulahla ukholo lwakhe. Washaywa, kodwa nalokho akuzange kumdikibalise . . .

“Ngabhalela umama ngicela iBhayibheli, futhi kuyamangaza ukuthi lafika. Ngaqala ukulifunda njalo. Umlisa othile wase-Ostrava [eMoravia] wangibona. Wangibuza ukuthi ngangikuqonda yini lokho engangikufunda, ngamtshela ukuthi ngangiqonda cishe ingxenye yako. ‘Ungathanda ukuqonda okwengeziwe?’ Ngaphendula: ‘Yebo.’ ‘Masihlangane kusasa ngemva kuka-6:00 ntambama endaweni ewukuthi.’ Ngangiqala ukuba semhlanganweni woFakazi BakaJehova. Imihlangano yayiqhutshwa nsuku zonke ngemva kuka-6:00 ntambama, kathathu ngeSonto. Umqhubi nesihloko kwakwabiwa kusengaphambili. ‘Uthisha’ wami kwakuyinceku yezincwadi. Wayengumkhandi wezicathulo wekamu, futhi zonke izincwadi ezikopishwe ngesandla zazifihlwa ngaphansi kwesihlalo ayesebenzela kuso. Kodwa angiphindanga ngezwa ngoGregor, kwaze kwaphela unyaka nesigamu. Kwathi ekupheleni kuka-1944, ngizibukela isixuku seziboshwa sivela emakamu ahlukahlukene, ngambona uGregor. Wayebukeka emude ngesigamu semitha kunangaphambili kodwa ezace ewuthi lokuvungula. Ngemva kokuvalelwa yedwa ngoba egula, waba nathi emhlanganweni. Sabingelelana ngemfudumalo, wabe esethi, ‘ngathandaza eNkosini uJehova ukuba ingakushiyi lapha wedwa.’ UJehova wayewuphendulile umthandazo wakhe.”

ISikhumbuzo Ekamu Lokuhlushwa

Kwakungenzeka yini kugujwe iSikhumbuso sokufa kukaKristu ngaphansi kwezimo ezinjalo? Yebo, kwakungenzeka! Kodwa ngezinye izikhathi, abantu babezibuza ukuthi kwakuzokwenziwa kanjani. UBožena Nováková wachaza: “ISikhumbuzo sasisondela. Ngangingajabulile neze ngoba ngangicabanga ukuthi ngangingeke ngikwazi ukudla izifanekiselo. Kodwa uJehova wangenela. Wayesazi isifiso sami, ngakho ngosuku lweSikhumbuzo, ngabizelwa kwelinye ikamu. Kwase kukhona odade abaningana bezizwe ezihlukahlukene. ISikhumbuzo, kanye nokudliwa kwezifanekiselo, kwenziwa ngaphandle kwesiphazamiso. Ukubonga, inkazimulo nodumo makube kuNkulunkulu wethu, uJehova, naseWundlwini lakhe!”

Kodwa sasitholakale kanjani isinkwa esingenamvubelo newayini? Wanezela: “Edolobheni laseFürstenberg elaliseduze, kwakukhona oFakazi BakaJehova ababesebenza epulazini likaHulumeni abasinikeza izifanekiselo.”

Ngemva kwalesi sibusiso uDade Nováková wehlelwa esinye isigigaba—esinzima kodwa esiqinisa ukholo. Uyakhumbula: “Langa limbe ngabizelwa ezindlini zokugezela. Kwakuyindawo enamashawa, kodwa lapho kuvulelwa amanzi, kwakuphuma igesi esikhundleni samanzi. Abesifazane ababethelwa lo shevu, babephonswa kohhavini, ngezinye izikhathi besaphila. Ngangingakwazi lokho kwaze kwaba yilapho unogada wesifazane ethi kimi: ‘Wena Bibelforscher [njengoba oFakazi BakaJehova babebizwa kanjalo], uzongena kule gesi! Sizobona-ke ukuthi uJehova wakho uzokusindisa yini!’” Njengoba uDade Nováková ayephenduka, amehlo akhe agcwala izinyembezi, wathandaza: “Baba Jehova, uma ngizofa, ngicela kwenzeke intando yakho. Kodwa ngithandazela izingane zami. Sengizishiya ezandleni zakho ngokuphelele.” Exoxa ngokwenzeka ngaleso sikhathi, wathi: “Ngisathandaza, kwavuleka umnyango kwangena udokotela omkhulu, wabona unxantathu wami onsomi, wathi: ‘Bibelforscher, wenzani lapha? Ubani okuthumele la?’ Ngaphendula ngathi ngangithunyelwe unogada. Wathi: ‘Phuma lapha! Indawo yakho ilaphaya!’ ekhomba umnyango. Njengoba ngiphuma, ngezwa unogada ethi: ‘Manje sengiyakholwa ukuthi uJehova wabo uyabavikela.’”

Ukufakaza Ngesikhathi Kuphethe AmaNazi

Nakuba kungekho mibiko yenkonzo yasensimini eyaqoqwa phakathi nalesi sikhathi, ukushunyayelwa kwezindaba ezinhle kwaqhubeka eCzechoslovakia. URŭžena Lívancová, wasedolobheni laseKladno, wabhala: “Umama wasifundisa ukuba sibe nokholo kuNkulunkulu, hhayi ngendlela abapristi ababefundisa ngayo, kodwa wasifundisa ukuhlonipha abantu. Ngo-1940 udade wasePrague wafakaza kithina. Ngakho ngaqala ukufunda ngoNkulunkulu wethu omuhle noBaba onothando uJehova. Ngo-1943 mina nomama nodadewethu sabhapathizwa.”

Ngisho nangaleso sikhathi, nangaphansi kwezimo zempi, uJehova wayedonsa “ababethambekele ngokufanele ekuphileni okumi phakade.” (IzE. 13:48) UFrantišek Šnajdr, wasePrague, wathi: “Ekhaya sasingamaKatolika kodwa sasingakaze siye esontweni. Ngangisebenza ngemishini, ngiziphilela ukuphila okuvamile. Ngangiya njalo ezinkantini, lapho ngangidlala khona amakhadi. Kwakuye kufike mlisa mumbe, aphuze ingilazi kabhiya abese efakaza kwabakhona. Babeye bahlekise ngaye. Kodwa njengoba ngidlala amakhadi, ngangiye ngibeke indlebe kulokho ayekusho. Wakhuluma ngesahluko 24 sikaMathewu. Ngakujabulela lokho ayekwenza futhi ngamtshela. Ngakho wangimemela emzini wakhe. Ngesikhathi ngifika, umhlangano wawusuqhubeka. Kwase kunabangu-7 emzini wakhe. Ngabuza, ‘Ake usho, uzofika nini umpristi?’” Kwakungeke kufike mpristi. UJosef Valenta, owayehlezi eceleni kukaFrantišek, wayeqhuba umhlangano.

UFrantišek waqhubeka etadisha iBhayibheli, kwathi ngo-August 1942 wabhapathizwa. Ngonyaka olandelayo waboshwa amaGestapo. Kodwa uJehova waqhubeka emnika usizo ayeludinga ukuze akhule ngokomoya. UFrantišek wachaza: “EMauthausen ngatholana noMfoweth’ uMartin Poetzinger. Wayengumzalwane onesibindi nonokuqonda. Wangenzela amahliphasi, futhi wayenginika izincwadi njalo. Sasiba nemihlangano njalo ngeSonto—ngasese kodwa—khona kanye e-‘Platz’”—ngokusobala okuyindawo okwakuhlolelwa kuyo ukuthi iziboshwa zisaphelele yini ngokuba kubizwe amagama.

UJan Matuszný naye waqaphela ukuthi wayedinga usizo olungokomoya. Kamuva wabhala: “Ngesikhathi sempi ngangisebenza emayini. Mina nabafowethu ababili sasiseqenjini lomculo lasemayini. Ngangibhema ngiphuza. Ngangisesimweni esibi kangangokuthi izandla zami zaziqhaqhazela kuhle kwezekhehla. Ngelinye ilanga lapho ngidakiwe futhi ngizizwa ngilusizi, ngaqala ukuthandaza ngokuzwakalayo kuNkulunkulu, ngimcela ukuba angisize ngandlela-thile ngithole indlela yokuphuma ezinkingeni zami.”

Ngokushesha ngemva kwalokhu, uFakazi mumbe owayehambela udadewabo walo mlisa, waxoxa nalo mlisa kabanzi futhi wamnika iBhayibheli kanye nezincwajana ezintathu. Njengoba ayezifunda, waqiniseka ukuthi lokhu ayekufunda kwakuyiqiniso. Wayeka ukubhema, ukusebenzisa kabi utshwala, ukudlala eqenjini lomculo futhi waqala ukuya emihlanganweni. Wabhapathizwa ngo-1943 echibini lezinhlanzi. Wenezela: “Ngesikhathi sempi sasiyiqhuba njalo imihlangano. Safundiswa incazelo yegama elithi ‘ukuhlehla’ nokuthi kungcono ukufa kunokukhaphela umzalwane. Lokhu kwakha isisekelo esihle soshushiso olwalusengaphambili”—yebo, ushushiso olwaba khona ngisho impi isiphelile.

Ukuyisebenzisa Kahle Inkathi Yokuthula

Ngemva kokuphela kwempi, kwaba nenkathi yenkululeko nokuthula okusesilinganisweni esithile kubantu bakaJehova kusukela ngo-1945 kuya ku-1949. Kwakuyisikhathi sokuvuselelana nesikhathi abafowethu ababehlanganyela ngaso ngentshiseko evuselelwe emsebenzini wabo wokushumayela ababewunikwe uNkulunkulu.—Math. 24:14.

Into yokuqala okwakudingeka yenziwe kwakuwukuthola wonke amabandla nabamemezeli. Abanye base beshonile, abanye bethuthile, kanti izinkulungwane ezingamaJalimane nezazihlala eduze kwemingcele zazidingiswa. UMfoweth’ uMüller, mhlawumbe owaba omunye wabazalwane bokuqala abafika ekhaya, wasebenza kanzima enza ukuba amabandla aphinde akwazi ukuxhumana. Wazama nokuthintana namahhovisi egatsha eNhlangano akwamanye amazwe, kodwa kwaqale kwaba nhlanga zimuka nomoya. Kwathi ekuqaleni kuka-June incwadi yocingo yakwazi ukufinyelela eBern, eSwitzerland. Izincwadi ezivela eBern zaqala ukutheleka, ngayinye inamakhasi amaningi e-Nqabayokulinda yesiJalimane. Ukuhumusha kwasheshe kwaqalwa. Ngo-August 1945 abazalwane ePrague bakhulula INqabayokulinda yokuqala yesiCzech ngemva kwempi, inyatheliswe nge-mimeograph.

Abantu abaningi babesakukhumbula lokho oFakazi ababeshumayele ngakho ngaphambi kwempi, futhi abanye babo base bethanda ukulalela manje. Kwaqala ukunikezwa izinkulumo zeBhayibheli zeningi bukhoma—hhayi eziqoshiwe, kodwa zazinikezwa izikhulumi ezifanelekayo. Kwakuba khona amakhulu abantu. Inkulumo yokuqala, enesihloko esithi “Inkululeko Ezweni Elisha,” yanikezwa ngo-November 11, 1945, ehholo le-Agricultural Stock Market yasePrague. Izilaleli ezingaba ngu-600 zabonisa intshiseko enkulu. Phakathi neminyaka emithathu, kwanikezwa lezo zinkulumo zeningi ezingu-1 885 eCzechoslovakia. Abaningi abangoFakazi BakaJehova manje bathi bangena eqinisweni ngenxa yalezo zinkulumo.

Omunye walabo uTibor Tomašovský, manje ohlala eBohemia. UFakazi othile owayezenzela umsebenzi wakhe wokuziphilisa watholana noTibor, futhi phakathi nengxoxo, wakhuluma ngeBhayibheli. Isizotha sakhe samhlaba umxhwele uTibor futhi wamemela lo Fakazi emzini wakhe. Lokhu kwaholela ekutheni amenyelwe emhlanganweni. Kamuva uTibor wathi: “Sasingakwazi ukukuchaza lokho mina nomkami esakubona kulowo mhlangano. Ngangingakaze ngiyizwe inkulumo evuth’ uphondo kanjeya. Izikhulumi ezintathu zayinikeza ngokushintshana. ‘Kumelwe ukuba laba bantu bafunde bagogoda,’ ngitshela umuntu owayehlezi eceleni kwami. ‘Cha, bangabalimi nje.’ Esakuzwa kwakumnandi kangangokuba sasingasafuni ukugoduka. Ngesonto elilandelayo ehhovisi, ngangingakwazi ukugxila emsebenzini wami futhi ngangijahe ukuba kufike iSonto. Asikaze siphuthe emhlanganweni.”

Phakathi kwezindawo oFakazi ababenza kuzo inkonzo yabo kwakusemakamu okusetshenzwa kanzima kuwo, lapho iziboshwa zempi namaJalimane ayelindele ukudingiswa ayegcinwe khona ngemva kwempi. Umbiko ophathelene nomsebenzi ngaleso sikhathi uthi: “Abazalwane babehambela amaJalimane, ikakhulu amaNazi emakamu okusetshenzwa kanzima kuwo, futhi baba nempumelelo enkulu.” Ingabe izimo zawo ezishintshile zaziyowenza alamukele kangcono iqiniso leBhayibheli? OFakazi BakaJehova babefuna ukuwanikeza lelo thuba.

Ngo-November 1945 kwafika incwadi emisa uMfoweth’ uMüller njengomqondisi wegatsha ongokomthetho. Ngehlobo elilandelayo abazalwane bakwazi ukuthenga isakhiwo esithi asibe sisha esinezitezi ezine eSuchdol, eduze kwasePrague. Lokho kwenza kwaba nendawo ethulile yokusebenzela, nezindawo ezikahle zokuhlala umkhaya waseBethel. Izwe lahlukaniswa laba izifunda, ngasinye sakhiwa amabandla angaba ngu-20, futhi imihlangano yesifunda yaqala ukuqhutshwa njalo. Kwaba isibusiso esicebile lokhu. Ngaso sonke isikhathi imihlangano enjalo yayihlanganisa nenkonzo yendlu ngendlu, futhi ubufakazi obuhle babunikezwa ngenkulumo yeningi ngeSonto ntambama. Lapho iSikole Senkonzo Esingokwasezulwini siqala ukuba khona emabandleni, abazalwane abengeziwe, ngosizo lomoya kaJehova, bafanelekela ukunikeza izinkulumo zeningi kwathi abamemezeli baba abafundisi abangcono.

Kwahlelwa nemihlangano yesigodi. Inkulumo ethi “Jabulani” nethi “INkosi Yokuthula” zethulwa emhlanganweni owawunabangu-1 700 eBesední du̇m, indawo yeqembu elithile eBrno, ngo-1946. UFranz Zürcher waseBern, eSwitzerland, wayekhona kulo mhlangano. Ngonyaka olandelayo, ngesikhathi kunomunye umhlangano eBrno, amalungu amathathu ezisebenzi zasendlunkulu yomhlaba wonke—uN. H. Knorr, uM. G. Henschel noH. C. Covington—aba nezingxenye esimisweni. Inkulumo yeningi ethi “Intokozo Yabantu Bonke,” yakhangiswa kulo lonke idolobha ngamaphepha ezikhangiso amakhulu namancane, futhi kwafika abangu-2 300 bezoyilalela. Abaningi bashiya amakheli abo futhi bathi banesifiso sokuba bamenyelwe eminye imihlangano.

Ekuqaleni kuka-1948 kwaba nezinguquko kuhulumeni. AmaKhomanisi athatha izintambo. OFakazi BakaJehova baqhubeka ngentshiseko beshumayela izindaba ezinhle. Ngalowo nyaka abamemezeli boMbuso banda ngamaphesenti angu-25. Ngo-September kwaba nomunye umhlangano wesigodi—lona wawusePrague. Inkulumo yeningi yayinesihloko esasifike ngesikhathi esithi “UMbuso KaNkulunkulu—Ithemba Laso Sonke Isintu.” Futhi ngenxa yalokho okwakuseza, inkulumo ethi “Ukugcina Ubuqotho Ngaphansi Kovivinyo” nayo yaba efaneleka kakhulu. Ngisho nalapho umhlangano uqhubeka, izitha zabantu bakaJehova zazilungiselela ukuhlasela.

Amafu Amnyama Ayaqoqana Futhi

Kungakapheli neminyaka emine abazalwane bededelwe ejele, isimo sashintsha isigubhukane. Emhlanganweni wesifunda owawuseKarlovy Vary, entshonalanga yeBohemia, ngo-November 1948, kwavela amafu esivunguvungu. Umhlangano wona awuzange uphazanyiswe. Kodwa njengoba uMfoweth’ uMüller ayenikeza inkulumo yeningi ngeSonto ntambama, ngo-November 28, kwezinye izihlalo ezingemuva zehholo kwakuhlezi amaPhoyisa KaHulumeni ayengagqokile izingubo zomsebenzi. Ngalo lelo langa lapho uMfoweth’ uMüller edla ukudla kwakusihlwa, kwafika u-Oldřich Skupina, umbonisi weBandla LaseKarlovy Vary, wamtshela ethukile ukuthi amaPhoyisa KaHulumeni ayepequlule izindlu zabazalwane abaningi futhi abaphuca izincwadi.

UMfoweth’ uMüller wazama ukushayela ucingo eBethel YasePrague, kodwa akuphendulanga muntu. Ngokusobala kwakonakele nalapho. Wabuyela ngokushesha ePrague. Kodwa njengoba ayesondela esakhiweni seBethel, wabona amadoda amabili ayezishaya izisebenzi kodwa ebe egade iKhaya LaseBethel. EBethel wathola umzalwane owamtshela ukuthi amaPhoyisa amaningana kaHulumeni ayepequlule yonke indawo futhi alivala ihhovisi. Phakathi nemizuzu engu-45 efikile, kwatheleka izikhulu ezimbili eKhaya LaseBethel zivela eMnyango Wezangaphakathi futhi zamemezela ukuthi lesi sakhiwo sase sithathiwe. UMfoweth’ uMüller washaya phansi ngonyawo, eveza ukuthi ukuthathwa kwento kumelwe kwandulelwe incwadi evela enkantolo. Sezihambile, wakwazi ukuthutha amanye amafayela ayengawabonanga amaPhoyisa KaHulumeni wawayisa emzini wabazali bakhe. Kodwa lapho ebuyela eBethel, wayelindwe iPhoyisa likaHulumeni liphethe izincwadi ezithi yena nodade ababili ayenabo bayaboshwa. Amanye amalungu omkhaya waseBethel ayeseboshiwe kakade.

Ingabe incwadi yenkantolo yayikhishwe masinya kangako? Cha. Ngemva kwezinyanga, ngesikhathi abafowethu besaboshiwe, uMfoweth’ uKapinus, owayephakathi kwababoshiwe, wathola incwadi. Yayinesinqumo soMnyango Wezangaphakathi, ibhalwe umhla ka-April 4, 1949—ngemva kwezinyanga ezingaphezu kwezine bezithathile izakhiwo—sokuba uyekwe umsebenzi weNhlangano nokuthi uyayithatha indawo yayo.

Naphezu kwalokhu, ngo-July iNkantolo KaHulumeni yawesula amacala abazalwane ngoba babungekho ubufakazi. Badedelwa lapho babevalelwe khona besalinde ukuthethwa kwecala. Kodwa abazishiyanga lezo zakhiwo zeNkantolo KaHulumeni bengabantu abakhululekile. Izikhulu ezimbili zoMnyango Wezangaphakathi zabamisa futhi zabatshela ukuthi iKhomishane Yezombangazwe YamaKhomanisi inqume ukuba bathunyelwe ekamu okusetshenzwa kanzima kulo iminyaka emibili. Okwakungenakwenziwa ngenqubo engokomthetho kwamane kwenziwa nje ngaphandle komthetho. UMfoweth’ uMüller wayiswa eKladno, lapho asebenza khona emayini yamalahle.

Igagasi lokuboshwa elahlasela kulo lonke izwe lalethela oFakazi BakaJehova ubunzima obukhulu. Kodwa lokho izikhulu zamaKhomanisi ezazikulindele akwenzekanga. Ngesikhathi uMfoweth’ uMüller esejele, zazithé kuye: “Nquma inhloko, umzimba uyobe usuzifela.” Zazicabanga ukuthi yena nabanye abazalwane abaholayo ‘babeyinhloko,’ kodwa zazingaqondi ukuthi iNhloko yangempela yebandla lobuKristu yiNkosi uJesu Kristu ezulwini.—Efe. 4:15, 16.

Ukukhulekela Kweqiniso Kuyaqhubeka

Naphezu kwezingcindezi zangalezo zinsuku zosizi, ukukhulekela kweqiniso akuphelanga. Ngokushesha abazalwane baqala ukwenza amalungiselelo okuqhubekisela phambili umsebenzi wokufakaza ngokuthi uJesu uyiNkosi enguMesiya. UJosef Skohoutil, wasePrague, uyachaza: “Ngemva kwezinsukwana kuqale ushushiso, ngavakashelwa uMfoweth’ uGros, umbonisi wasendaweni. Wanginika amagama abamemezeli abayishumi wathi angibanakekele.” Baqhubeka bezama ukufakaza endlini ngendlu okwesikhashana, kodwa kancane kancane bafunda ezinye izindlela zokwenza lo msebenzi.

Nakuba abazalwane abaningi babesejele, ababengaphandle baqhubeka behlangana ndawonye. Amahholo omphakathi ayengenakusetshenziswa, kodwa imihlangano yesifunda enesimiso esifushanisiwe yayiqhutshelwa ezindlini ezinkulu. Ngezinye izikhathi, imihlangano emikhudlwana yayiqhutshelwa ehlathini. Owokuqala wayo wawuse-Oldřichov, eduze kwedolobha laseNejdek, ngo-1949. Amadwala ayesemthambekeni aba yindawo yokuhlala abangu-200 ababa khona. Eduzane kwakunendlu engasasetshenziswa, ingobo nechibi. Ingobo yahlukaniswa yenziwa izindawo zokushintshela abesilisa nabesifazane ababezobhapathizwa. Bahlanza ichibi futhi babeka izitebhisi zamapulangwe zokungena emanzini. Kwabhapathizwa abangu-37 lapho.

Kuthiwani ngokuthola izincwadi zeBhayibheli zokufunda? Ukulandisa okwathunyelwa uMfoweth’ uVykouřil, waseTeplice, kuyasembulela. Kuthi: “Ngo-1950 sasibathathu kuphela esasisele eTeplice. Sasiye sithole INqabayokulinda yesiFulentshi ngeposi ivela kudade mumbe eSwitzerland. Sake salahlekelana okwesikhashana, kodwa ngemva kwesikhathi satholana. Ngaqala ukuthola izincwadi zibhalwe ngendlela engavamile. Kulezo zincwadi kwacelwa ukuba ngithole othile owayazi othile, nalowo azi othile futhi, ngaleyo ndlela sasizophinde sikwazi ukuxhumana. Abazalwane abaholayo babesejele, ngakho kwadingeka sihlele kabusha imizila yokuxhumana. Sasisebenza ngaphandle kwezabelo eziqondile—sonke sasenza okwakudingekile. Kodwa asizange siyeke ukuthola INqabayokulinda.”

Lesi kwakuyisiqalo sezikhathi ezinzima kakhulu emlandweni woFakazi BakaJehova kuleli zwe. Nokuthi umsebenzi awumanga, kungenxa yesandla sikaJehova. Kunalokho, naphezu kwezilingo eziningi, waqhubeka wanda.

Ukukhokha Umoya Kancane

Kungazelelwe, ekuqaleni kuka-1950 bonke oFakazi BakaJehova, abazalwane nodade, badedelwa emakamu okusetshenzwa kanzima kuwo. Yini eyayibalindele? UMfoweth’ uMüller uyakhumbula: “Kwangimangaza futhi kwangijabulisa ukuhleleka okuhle okwakwenziwe singekho.” Umoya kaJehova wawuye washukumisa abazalwane abasebasha, kuhlanganise noJan Sebín noJaroslav Hála, ukuba bahole ngentshiseko. Uyise kaJaroslav wayeboshwe ngo-1948 (kamuva washonela ejele), kodwa uJaroslav waba isibonelo nomthombo omkhulu wesikhuthazo kubazalwane nodade abaningi. Bathola ukuthi oFakazi ababikayo ezweni lonke (elaliyiCzechoslovakia) base bande ngamaphesenti angu-52 eminyakeni emibili, besuka ku-1 581 baya ku-2 403. Ngonyaka olandelayo kwaba nokunye ukwanda ngamaphesenti angu-38.

Lapho kukhishwa izingxenye eziyisithupha zencwadi ethi “UNkulunkulu Makabe Oneqiniso” ngo-1951 ngesiCzech, kwakheka isisekelo sokwanda okwengeziwe. Le ncwadi yayizosetshenziselwa izifundo zeBhayibheli zasekhaya. Yayiqukethe lokho abafundelwayo ababekudinga ukuze bathole isiqalo esihle ekuphileni kokukhonza uJehova.

Nokho, izikhulu zamaKhomanisi zazingawuthandisisi umsebenzi woFakazi BakaJehova. Unyaka ka-1952 waqala enye inkathi ende yokushushiswa kanzima kwabantu bakaJehova.

Baphindela ‘Esithandweni Somlilo’

Ekuseni ngovivi ngo-February 4, 1952, uMfoweth’ uMüller waphinde waboshwa amaPhoyisa KaHulumeni. Manje wambozwa amehlo njengoba ayeyiswa ejele. Kamuva wabhala: “Ezinyangeni ezingu-14 ezalandela, ngangingavunyelwe ukuphuma ngingamboziwe amehlo esitokisini sami engangivalelwe ngedwa kuso. Njalo ngemva kosuku olulodwa, iphoyisa elalingiphenya ngemibuzo lalingiyisa ehhovisi lalo. Lapha ngangiphenywa isikhathi eside, bezama ukungenza ngivume ukuthi ngangiyinhloli nokuthi ngangiye ngavukela umbuso. Kwakubhalwa imibiko eminingi yamaphoyisa ibuye idatshulwe, kuphinde kubhalwe eminye. Abaphenyi babelokhu bezama izindlela ezintsha ukuze babhale umbiko wokuthi nginecala. Ngenqaba ngiphindelela ukusayina leyo mibiko. Lapho sengikhululiwe, ngemva kweminyaka engaba ngu-16, isikhulu soMnyango Wezangaphakathi sangitshela ukuthi ngangisohlwini lwabantu ababezobulawa. Ngo-March 27, 1953, ngayiswa enkantolo ePankrác ngimbozwe amehlo. Mina nengangisebenza nabo ababili sacindezelwa ngokwengqondo ngendlela esabekayo. Ukuthethwa kwecala kwathatha izinsuku ezimbili. Lalithethelwa ngasese. Ezihlalweni zomphakathi kwakuhlezi abaphenyi boMnyango Wezangaphakathi kuphela.”

U-February 4, 1952 wawuwusuku okwaboshwa ngalo abaningi kulo lonke elaseCzechoslovakia. Ngalolo suku amaPhoyisa KaHulumeni ayebophe oFakazi BakaJehova abangu-109 (abazalwane abangu-104 nodade abahlanu).

Phakathi kwalabo ababoshwa ngalelo langa kwakuno-Emílie Macíčková. Uyalandisa: “Ngo-February 4, 1952, lapho umyeni wami esesibhedlela, emzini wami kwafika amadoda amathathu nowesifazane oyedwa ababengamaPhoyisa KaHulumeni ngo-3:30 ekuseni. Ngaboshwa ngaso leso sikhathi. Bapequlula endlini bathatha ababekuthola. Bangiyisa eMnyango Wamaphoyisa Esifunda e-Ostrava. Base bebaningi kakade oFakazi lapho. Sasiboshwa ngobuningi. Basifaka ezitokisini ezibandayo ezazisanda kucakwa kodwa zinuka kabi, basinika amanzi okugeza abandayo base bezihluthulela izicabha zensimbi. Uma besiyisa noma kuphi, babesigqokisa izibuko ezimnyama. Babethumela imisheshelengwana ezitokisini zethu, kodwa sasixoxa nayo ngoMbuso kaNkulunkulu kuphela. Lezo zimpimpi zazize zicule izingoma zethu zoMbuso zenze sengathi ziyathandaza—izitha zethu zazize zifike lapho, zizama ukusidikibalisa, kodwa uJehova wasiqinisa!”

Icala Elinesihluku Esikhulu EPrague

Lesi kwakuyisikhathi ayemaningi ngaso amacala ezombangazwe eCzechoslovakia. Izigwebo ezazikhishwa kula macala zazinzima ngokweqile—iminyaka eminingi ugqunywe ejele noma ukufa. Icala loFakazi BakaJehova ngo-March 27 no-28, 1953 lathethwa ngale nkathi. Ngasese, kwaqulwa amacala-mbumbulu ayebekwe ababonisi ababili abayinhloko boFakazi BakaJehova. Elesibili elalandela laba ngemva kwenyanga kudlule elokuqala. Izigwebo zazimi kanje: “UMüller noFogel: banikwa isigwebo seminyaka engu-18 begqunywe ejele. Ummangalelwa uSebín, uGros noHála: iminyaka engu-15; uNahálka: iminyaka engu-12; uNovák: iminyaka engu-8; uPorubský: iminyaka engu-5. Bonke abamangalelwa babengase baphucwe impahla namalungelo okuba izakhamuzi.”

Amaphephandaba kuphela ayenikeza umphakathi ukwaziswa okuphathelene nala macala. Ayethini? Isibonelo siyilo mbiko ohlanekezelwe owavela ngo-March 30 kuyi-Rudé právo (UMthetho Obomvu) yamaKhomanisi eyayiphuma nsuku zonke: “Amanxusa emibuso ebumbene yaseMelika, njengoba ezonda iCzechoslovakia ebusa ngentando yeningi, asebenzisa zonke izindlela ukuze achezukise inqwaba yabantu bethu endleleni eya eSimisweni Sokusebenzela Uhulumeni . . . Inkantolo yasePrague isingathe olunye uhlobo lomsebenzi obulalayo wala manxusa ombuso obumbene waseMelika . . . Kuthethwa icala lamalungu aholayo ehlelo elibalandeli balo bazibiza ngoFakazi BakaJehova. Le nhlangano, ephethwe eBrooklyn, e-U.S.A., nebilokhu ivaliwe ezweni lakithi kusukela ngo-1949 ngenxa yemikhuba yayo ebulalayo, iye yangenisa eCzechoslovakia imibono exubile embozwa ngelithi ubuKristu obumsulwa eklanyelwe ukwehlisa izimiso ezinhle zoquqaba olusebenzayo, ukukhuthaza ukuzondwa kukaHulumeni nemithetho yawo, neyaqala ukubacijela impi abalandeli bayo, bona bezoba iqembu lezinhloli lomshoshaphansi.”

Lokhu kuhlanekezela amaqiniso ukuze kuvunwe izenzo zenkantolo kwaba isibonelo esalingiswa kulo lonke izwe.

Ukuthola Abanjengezimvu Emajele

Nokho, nasemajele ayevela amathuba okufakaza. Kwakudingeka amasu, kodwa abafowethu bayithola indlela. Babekhona abantu ababelamukela iqiniso leBhayibheli ejele. Omunye wabo kwakunguFrantišek Janeček, waseČáslav. Uyakhumbula: “Ngesikhathi sempi ngangena enhlanganweni elwela iziNguquko. Ngo-1948, ngaphikisana nohlobo olusha lobudlova, futhi njengoba ngangilwa obala nokungabi nabulungisa, ngagwetshwa iminyaka engu-11 ejele. Ngangivunyelwe ukuba ngibe neBhayibheli ejele, futhi ngangize ngifundise nabanye ngalo ngezikhathi zokuphumula. Ngakho abazalwane bacabanga ukuthi ngingumpristi. Sasihlala emakamu ahlukene, kodwa ngezinye izikhathi sasigada amakamu ebusuku, okwakubizwa ngokuthi ama-fire watch. Langa limbe ngesikhathi ngigadile ebusuku, kwakubanda kakhulu futhi isibhakabhaka sigcwele izinkanyezi. Kwaqhamuka esinye isiboshwa ekamu eliseduzane naso sizoqala umsebenzi waso wokugada. Ngathi kuso, ‘Nawe ulapha uzokhonza uFaro?’ ‘Uyazi ukuthi kwakungubani uFaro?’ singibuza. ‘Yebo, kwakungumbusi waseGibithe.’ ‘Ingabe uyazi ukuthi wayefanekisela bani?’ ‘Cha!’ ‘Woza lapha-ke ngizokutshela.’ Sahamba amahora amabili, futhi sanginikeza incazelo enhle. Ngathuthuka ngokushesha. UNkulunkulu wayengithanda futhi wakubona ukulangazelela kwami iqiniso.” UFrantišek wahlanganyela noFakazi BakaJehova ekufundeni iBhayibheli, futhi ngokushesha wayesebika amahora aphakathi kuka-70 no-80 enkonzweni kaJehova inyanga ngayinye.

Abaningi abathola iqiniso ejele babhapathizelwa khona. Kwakwenziwa kanjani lokho? ULadislav Šmejkal, owathola iqiniso ngesikhathi eyisiboshwa sezombangazwe, uyachaza: “Emayini esasisebenza kuyo, sasikwazi ukusebenzisa izindawo zokupholisa umoya zomshini omkhulu wasemayini wokungenisa umoya. Ngo-June 1956, mina kanye nabanye abaningana, sabhapathizelwa kwelinye lamathange akulezi zindawo. Kwakungelula ngoba kwakudingeka sikwenze ngesikhathi sekhefu elifushane ngaphambi komsebenzi wantambama. Sathatha izingubo zethu zangaphansi, saya kule ndawo, sabhapathizwa, sashintsha masinyane, sabe sesiyoqala emsebenzini.” Babejabula ngokuthi uJehova wayezisizile izinceku zakhe zathola indlela yokubonisa ukuzinikezela kwazo, zilalela umyalo kaJesu Kristu.—Math. 28:19, 20.

“Osanta” Ezimayini Zamalahle

Ukuvinjelwa koFakazi BakaJehova kwakwenziwa ngezindlela ezihlukahlukene nangamazinga angafani. Kwakungenziwa ngendlela efanayo kuzo zonke izindawo noma ngezikhathi zonke. Ngaphansi kwazo zonke izimo, abazalwane bazama ukugcina ubuqotho bobuKristu beqondiswa unembeza. Umphumela waba ukuboshwa kwabaningi.

Kwathi ngo-1958, ngenxa yesinqumo sikahulumeni, izisebenzi zasemayini yamalahle ezingaphansi kweminyaka engu-30 zakhululwa enkonzweni yezempi. Esikhundleni sokulinda baze baboshwe futhi bagwetshelwe ukuya ejele—mhlawumbe ukusebenza ezimayini—abanye abazalwane bazenza ukuba bahlale bekhululeke kakhudlwana ngokuba babe izisebenzi zasezimayini. (IzAga 22:3) Kwenzeka kanjalo ukuba “osanta” noma “abapristi,” njengoba abantu babebabiza kanjalo oFakazi, baqashwe ezimayini eziningi. Futhi njengoba ezimayini ezithile babeba baningi oFakazi BakaJehova, baqala ukwakha amabandla aqinile abazalwane abakhulela kuwo bafinyelela ekuvuthweni okungokomoya, baba izikhonzi ezifanelekayo.

U-Eduard Sobička wasebenza iminyaka eyishumi emayini esedolobheni elincane laseKamenné Žehrovice, eduze nedolobha laseKladno. Uthi: “Ngokwalokho engikukhumbulayo, inani elikhulu kunawo wonke labazalwane abasebenza ngasikhathi sinye emayini engangiqashwe kuyo lalingu-30. Sasisebenza ngezikhathi ezingafani, futhi sazibekela umthetho wokugwema ukusondelana kakhulu size sizehlukanise nezinye izisebenzi. Kodwa babenakwa kakhulu ‘osanta,’ njengoba sasivame ukubizwa kanjalo. Sasihlekwa usulu futhi sithukwa kodwa ngesikhathi esifanayo sihlonishwa ngasese.” Ezimayini, babebamba amathuba okufakaza, futhi lapho kuboniswa isithakazelo, babetshelekisa ngezincwadi zeBhayibheli eziyigugu.

Eholideni Nabanye OFakazi

Nakuba lezi kwakuyizikhathi ezinzima, abantu bakaJehova babesithola isikhathi seholide. Uma ehlelwe kahle, amaholide ayengabi nje isikhathi sokuphumuza umzimba kuphela kodwa nesokwakhana ngokomoya. Njengoba emihlanganweni kwakuba khona abantu abangengaphezu kweshumi, cabanga ukuthi kwakuba njani uma oFakazi BakaJehova mhlawumbe abangu-30 bendawonye isonto elilodwa noma amabili!

Kwakubalulekile ukunquma ngokuhlakanipha ukuthi obani abazomenywa. Labo ababehlela babezama ukungakhethi abasha bashiye abadala noma ukungakhethi abazalwane bashiye odade. Kwakuzanywa ukuba kuhlanganiswe nabazalwane abaningana abangamaKristu avuthiwe ngokomoya, ababezonikeza ukuqondisa okudingekayo.

Okwakukhathalelwa ngokuyinhloko kwakuwukuba isimiso esingokomoya sihlanganise izici ezihlukahlukene. Isimiso sansuku zonke sasinjena: Umthandazo wasekuseni, itekisi losuku nokufundwa kweBhayibheli. Ngezinye izikhathi ntambama kwakuba nemihlangano ethatha ihora. Ngokuvamile kusihlwa kwakuba nombuthano ongokomoya onesimiso esasisuke sihlelwe kusengaphambili. Esinye isikhathi sasikhululekile. Abazalwane nodade babengatadisha, baqwale intaba, babhukude noma okunye okunjalo. Ngokuvamile inkonzo yayihlanganiswa nohambo lokuyoqwala izintaba, kodwa nalapho, kwakunemithetho engabhaliwe okwakudingeka ilandelwe. Zama ukubona ngeso lengqondo iqembu labantu abangu-20 beyoqwala intaba. Babethola abantu bendawo emadolobheni amancane, ehlathini nasemasimini. Lapho behlangana nomuntu, umzalwane noma udade wayephuma eqenjini azame ukuqala ingxoxo naye. Bonke abanye baqhubeke nohambo.

La maholide ayejatshulelwa iqembu ayefeza okuningi okuhle. Ayeqinisa ukholo, futhi aba nesandla ekusakazweni kwezindaba ezinhle. La maholide ayejatshulelwa amaqembu ayeyingxenye ebalulekile yomlando wosuku lwanamuhla woFakazi BakaJehova kuleli zwe. Nokho, asikho isikhathi izinceku zikaJehova ezazinganciphisa ngaso ukuqapha kwazo ngokomoya.

Ukuhlasela Kobuqili

USathane uDeveli, “uyise wamanga,” ufuna ukuqeda ukuqiniseka ngokusonta amaqiniso nokukhuluma okungeyikho ngezinceku zikaNkulunkulu ezithembekile. (Joh. 8:44) Wasebenzisa lelo qhinga ukuze enze buthakathaka u-Israyeli wasendulo, ukuze amaJuda ekhulu lokuqala amelane noKristu, futhi ukuze azame ukuhlakaza ibandla lamaKristu okuqala. (Num. 13:26–14:4; Joh. 5:10-18; 3 Joh. 9, 10) Abanye abantu abafeza izinjongo zakhe basuke befuna ukuvelela. Abanye bangase babe nomuzwa wokuthi lokho abakushoyo kulungile, kodwa baveze imibono eqinile bebe bengawazi wonke amaqiniso. USathane angakusebenzisa kokubili, futhi wenza kanjalo kuleli zwe.

Isimo sasinzima kubafowethu eCzechoslovakia ngasekupheleni kwawo-1950. Abaningi babesejele. Ukuxhumana nendlunkulu yomhlaba wonke yoFakazi BakaJehova kwakuphazanyisiwe. Abanye ababehola banikeza iziqondiso ezazibonisa umbono wabo siqu esikhundleni sokugxila ngokuqinile emiBhalweni. (Thithu 1:9; Jak. 3:1) Benziwa ukucindezela kwezikhathi, abanye babethatha uhlangothi ngokuqinile ezindabeni ezithile bebe bengawazi wonke amaqiniso. (Qhathanisa nezAga 18:13, 17.) Abambalwa baqala ‘ukuhunga abafundi ukubalandela.’—IzE. 20:30.

Ngokuqondene nezigigaba zangaleyo nkathi, uMfoweth’ uMüller kamuva wabhala: “Ngolunye usuku ngo-January 1956 ejele laseValdice, ngayiswa ehhovisi elalinamadoda amabili ayengilindile. Athi avela eMnyango Wezangaphakathi. Azama ukungenza ngikholelwe ukuthi kufanele ‘sixegise’ kwezinye izimfundiso zethu ezingokwenkolo. Asizange sikuvume lokho, futhi ngenxa yalokho ingxoxo yaba mfushane. Ngo-1957 ngavakashelwa ezinye izikhulu ezimbili zoMnyango Wezangaphakathi. Kuleyo ngxoxo eyathatha amahora amathathu isimo sasihluke ngokuphelele. Ngakwazi ukuchaza ngokukhululeka imibono nesimo sengqondo soFakazi ngezinto ezihlukahlukene. Zazifisa ukwazi umbono wethu ngenkonzo yezempi, ukumpontshelwa igazi, izinyunyani kanye nezinye izinto eziningana. Ekugcineni esinye sazo sangibuza: ‘Mnu. Müller ucabanga ukuthi singaba abangane?’ Ngaphendula: ‘Abantu abangabangane basondelene kakhulu futhi banezinto eziningi ezifanayo abazithandayo. Thina boFakazi BakaJehova sikholelwa kuNkulunkulu. Kodwa nina maKhomanisi anikholelwa ukuthi uNkulunkulu ukhona. Asikwazi ukuba nento esivumelana ngayo. Kodwa ngicabanga ukuthi singakwazi ukuphila nokuhlala ndawonye.’ Lesi sikhulu sathi: ‘Iyangijabulisa impendulo yakho ngoba besingeke sinethembe.’ Ngacabanga ukuthi lo mbuzo wokugcina wabuzelwa ukuthola ukuthi kwakungenzeka yini esikhathini esizayo kube nezingxoxo ezinenjongo phakathi kwethu. Futhi uma kunjalo, zaziyosisondeza ekutholeni ikhambi lesimo sethu.”

Umphumela waleyo ngxoxo waba ukuxhumana kalula kwabazalwane neziphathimandla zikahulumeni. Kodwa ngenxa yomoya owawukhona ngaleso sikhathi, abanye oFakazi abezwa ngalezo zingxoxo baba nomuzwa wokuthi laba bazalwane abaholayo babehlehlile okholweni. Akungabazeki ukuthi abanye abasabela ngale ndlela babenesifiso esinamandla sokugwema noma ikuphi ukuhlehla ezimisweni zobuKristu. Kodwa, abambalwa ababezikhukhumeza abanqenanga ukuveza imizwa yabo yokungabethembi abazalwane ababexoxe nezikhulu zikahulumeni. Kodwa ingabe ukungabethembi kwabo kwakunezisekelo ezinhle?

Kwakuhileleke nezinye izici. UJuraj Kaminský, oseneminyaka engaphezu kuka-50 ekhonza uJehova ngokwethembeka, uyachaza: “Ngemva kokuba abazalwane abaholayo nabadala abaningi beboshiwe, abanye balabo ababehola emabandleni nasezifundeni baqala ukushayela abamemezeli imithetho yokuziphatha, bebatshela okumelwe bakwenze nokungamelwe bakwenze.” Yeka ukuthi kwakuyoba ngcono kanjani ‘ukukhuthaza ukulalela ngokholo,’ njengoba kwenza umphostoli uPawulu! (Roma 16:26) Ngenxa yokuthi umthetho wawuthi abantu mabavote, abanye oFakazi babeya ezikhungweni zokuvota, kodwa ngenxa kanembeza, babengavoteli muntu wezombangazwe. Abanye baba nomuzwa wokuthi laba babehlehlile okholweni. Mhlawumbe ngezizathu ezizwakalayo, abanye abazalwane babengazithandi iziphathimandla ngenxa yokuphathwa kabi kwabafowabo abangamaKristu. UMfoweth’ uMüller uthi: “Lesi simo sangikhathaza kakhulu, ngakho ekwindla ka-1957, ngabhala incwadi [ngisejele], ngenjongo yokusiza abazalwane babheke izinto ngendlela efanele.” Esinye sezigaba zayo sasifundeka kanje:

“Kunokunye okungikhathazayo enhliziyweni. . . . Ngikhumbuza abafowethu ukuthi imihlangano yethu eyokufunda imiBhalo nokuqeqesha oFakazi BakaJehova ukuba babe izikhonzi ezingcono nezifaneleka ngokwengeziwe. Akwamukeleki nhlobo ukuxoxa ngezombangazwe noma ukugxeka uHulumeni emihlanganweni, kungakhathaliseki ukuthi iqhutshelwaphi nokuthi babili yini abakhona noma baningi. Bafowethu, kukhumbuleni lokhu, futhi ningazivumeli izingxoxo ezinjalo. Ingabe bakhona phakathi kwenu ababambele umbuso amagqubu ngoba mina nabanye abazalwane sisejele? Ngiyaninxusa-ke egameni lami, nasegameni labanye abazalwane, ukuba niyiqede imizwa enjalo. Ningayivumeli intukuthelo nenzondo, ngoba indaba yethu siyishiyele kuNkulunkulu futhi nani yenzani kanjalo.”—Roma 12:17–13:1.

Le ncwadi yabakhuthaza kakhulu abazalwane nodade abathembekile. UJan Tesarz wathi: “Sayithola incwadi yakhe, ayeyibhale esejele ngo-1957. Yayingabonisi kuhlehla, kodwa yayibonisa ukuba nengqondo kobuKristu!” Kodwa akubona bonke abayibheka kanjalo. Incwadi kaMfoweth’ uMüller yaba indab’ egudwini kwaba kuningi nokungaqiniseki eyakubanga.

Bazihlukanisa Nebandla

Ngemva kokumenyezelwa kokuthi iziboshwa zezombangazwe zizoxolelwa ngobuningi bazo ngo-May 1960, oFakazi BakaJehova abaningi ababesejele badedelwa. Yeka injabulo ababa nayo! Naphezu kwezinsongo, baqala ukushumayela izindaba ezinhle ngaphandle kokulibala. Abaningi babo babekhumbula isibonelo esabekwa abaphostoli bakaJesu Kristu, okwathi lapho bededelwa ejele bathandazela isibindi sokuqhubeka beshumayela izwi. (IzE. 4:23-31) Kodwa babelindwe izilingo ezintsha.

Abazalwane base bengenwe ukungabaza nokungathembi. Ngesikhathi kuthunyelwa incwadi kaMfoweth’ uMüller kubazalwane ukuze kucaciswe izinto, abanye ababenemibono eqinile negxekayo abavumanga ukuba le ncwadi ifundwe emabandleni. Ngo-1959 inani loFakazi ababikayo eCzechoslovakia lalingu-2 105, kodwa abangaphezu kwenkulungwane, nakuba babethi basakhonza uJehova, babengasamkhonzi ngobunye namaKristu ababekanye nawo. Labo ababehola kulaba abazihlukanisile babeze bathi bavunyelwe indlunkulu eBrooklyn, eNew York, noN. H. Knorr, ngaleso sikhathi owayengumongameli we-Watch Tower Society.

Ezinye izenzakalo zanezela ezinsolweni ababenazo labo abase bezahlukanisile namaKristu ababekanye nawo. Ngalesi sikhathi, izikhulu zikahulumeni waseCzechoslovakia zase zibonile ukuthi oFakazi BakaJehova abazona izinhloli zombuso waseMelika, njengoba babemangalelwe ngalokho. Zazazi nokuthi zazehlulekile ukumisa umsebenzi woFakazi BakaJehova noma ukubenza bahlehle okholweni lwabo. Ngakho, uhulumeni, umbuso womashiqela abangamaKhomanisi, wathatha isinyathelo sokuba nezingxoxo noFakazi. Babephoqiwe ukuba bahlanganyele kulezi zingxoxo. Inhloso yamaPhoyisa KaHulumeni kwakuwukuqikelela ukuthi ukuthanda inkolo akusetshenziselwa ukulwa nombuso, kodwa uma kungenzeka, kusetshenziselwa ukuwusekela. Ngezinye izikhathi ukuze kuxhunyanwe kwakubizwa uMfoweth’ uMüller noma omunye wababonisi abajikelezayo aye esiteshini samaphoyisa eyophenywa ngemibuzo. Ngezinye izikhathi, kwakubonakala sengathi yingxoxo yobungane esitolo sokudlela.

Abanye ababebona lokho, ngenxa yokungawazi wonke amaqiniso, bacabanga ukuthi abazalwane ababehileleke kulezi zingxoxo babesekela amaPhoyisa KaHulumeni. Amagama abanye balaba bazalwane aze afakwa nasohlwini lwabasolwa ngokusebenzelana nohulumeni, futhi bagxekwa ngokuthi bashintsha izihloko ezazisuke zizonyatheliswa ukuze zivumelane nezifiso zamaPhoyisa KaHulumeni.

Isikhuthazo Sothando ‘Sokufuna UJehova’

UMfoweth’ uKnorr wayekhathazeke kakhulu ngomsebenzi weNkosi nangalabo ababezama ukukhonza ngokwethembeka nenhlangano kaJehova. Ngo-December 7, 1961, wabhalela abazalwane baseCzechoslovakia incwadi wabenza baqaphela imibhalo enjengoMika 2:12 neHubo 133:1. Wachaza ukuthi iNhlangano imiphi ezindabeni ezihlukahlukene futhi wathi uyabasekela abazalwane abathile ababephathiswe imithwalo yemfanelo. Empeleni, lokhu kwakuyisikhuthazo sothando sokuba abazalwane ‘bafune uJehova’—baqonde indlela umoya kaJehova owawusebenza ngayo ukuze ugcwalise izwi lakhe bese bebambisana namathuluzi uJehova ayewasebenzisa. (Zak. 8:21) Nasi isigaba esisodwa esivela kuleyo ncwadi:

“Bafowethu Abathandekayo: . . . Imibiko engiyitholayo ibonisa ukuthi abazalwane abaningi eCzechoslovakia balondoloza ubunye babo bobuKristu obungokwasezulwini, kodwa ngenxa yokuntuleka kwezinto zokuxhumana abambalwa baye bavumela ukuba amahebezi nenhlebo kudale imibuzo ezingqondweni zabo okuphumele ekuhlulekeni kwabanye ukubambisana nabanye noma ukufaka imibiko yabo yenkonzo. Lokhu kungenza labo abambalwa bangajabuli futhi bangene ezinkathazweni, njengoba sekwenzekile kakade. Ngakho injongo yokunibhalela iwukunazisa ukuthi iNhlangano iqaphela uMfoweth’ u-Adam Januška noMfoweth’ uBohumil Müller nabazalwane abasebenza nabo njengababonisi abangamaKristu abaholayo eCzechoslovakia futhi ngiyanincenga ukuba nikhumbule amazwi kaPawulu kweyamaHeberu 13:1, 7, 17. Laba bazalwane banesithakazelo kinina futhi bazama ukunisiza nonke ukuba nithembeke kuJehova uNkulunkulu. Ngakho sebenzisanani nabo ngokuthobeka nabo bazosebenza nani, kube udumo kuJehova.” Kuyadabukisa ukuthi akuphelanga sikhathi ifikile le ncwadi, kwabe sekudingeka ukuba u-Adam Januška asuswe ekuhlanganyeleni ngenxa yokuziphatha okungamfanele umKristu.

Abanye bayijabulela incwadi kaMfoweth’ uKnorr, kodwa akubona bonke abasivumela iseluleko sayo ukuba sibalungise. Eqinisweni, ngo-1962 izinkinga zanda. Kuyi-Nqabayokulinda kwakhishwa uchungechunge lwezihloko ezazichaza imithwalo yemfanelo yomKristu kuNkulunkulu kuqala bese kuba seziphathimandleni ezibusayo, “amagunya aphakeme” okukhulunywa ngawo kweyabaseRoma 13:1. Lokho okwakhishwa kwakulungisa ukuqonda kwethu. Labo ababezibonise bengabasolayo nabagxekayo basakaza amahemuhemu okuthi lezi zihloko eqinisweni zazakhiwe uMfoweth’ uMüller eqondiswa uMnyango Wezangaphakathi. Kwakufanele kwenziweni? Esikhundleni sokuchitha sonke isikhathi sabo bezama ukugculisa labo ababengafuni kugculiswa ngaleso sikhathi, abazalwane bagxila ekushumayeleni izindaba ezinhle kulabo ababelambele futhi bomele ukulunga.

Eminyakeni yakamuva abanye ababeyishiyile inhlangano babona ubufakazi bokuthi isibusiso sikaJehova sikuyo futhi bacela ukubuya. Nokho, kunabanye abahlala bezahlukanisile kwaze kwaba ngu-1989 lapho iNdikimba Ebusayo ithumela incwadi yomusa eyayibhalelwe “Labo Abafisa Ukukhulekela UJehova Nokumkhonza Ngobunye.” Leyo ncwadi yagxila eziprofethweni ezinjengesikaZakariya 8:20, 21 no-Isaya 60:22, ezigcwalisekayo manje. Yayigcizelela iseluleko esingokomBhalo nezindinganiso ezitholakala kuMathewu 24:45-47, 1 Korinte 10:21, 22 neyabase-Efesu 4:16. Le ncwadi ngokwengxenye yayifundeka kanje:

“Siyadabuka ukuzwa ukuthi kuze kube manje anihlanganyeli ngenkuthalo nelungiselelo elingokwasezulwini nezinqubo ezilandelwa abantu bakaNkulunkulu kuzo zonke izingxenye zomhlaba. Sinibhalela ngenjongo yokunikhuthaza ukuba ninikeze ubufakazi besifiso senu sokusebenza ngokubambisana nenhlangano kaJehova ebonakalayo njengoba imiswe emhlabeni wonke futhi njengoba ikhona nasezweni lakini. Lesi sifiso eninaso esihle ningasibonisa ngokwamukela abazalwane esibakhethile. Bakulungele ukuhlela ukuba nifundelwe le ncwadi noma banifundele yona. Ningathemba ngokugcwele ukuthi bagunyazwe yithi abazalwane abafika kini baveze le ncwadi. Kuyilungelo labo ukuba baninxuse ukuba nibuyele emhlanjini owodwa ningabe nisazihlukanisa.—Johane 10:16.”

Lesi senzo seNdikimba Ebusayo senza lukhulu ekulungiseni umonakalo owenziwa ukuhlasela kukaSathane kobuqili emabandleni ngesikhathi engakwazi ukuxhumana ngokukhululeka nayo yonke inhlangano kaJehova ebonakalayo.

Ukuhlela Nokuqeqeshela Inkonzo Eyengeziwe

Ngemva kokudedelwa koFakazi ejele ngo-1960, kwakusekuningi okwakusadinga ukwenziwa ngokuqondene nokushumayela izindaba ezinhle emazweni aseCzech. Ukuze kwenziwe, kwakubalulekile ukuhlela okufanele nokuqeqeshwa okuhle. Ukuyifinyelela le migomo ngaphansi kwezimo ezinzima ezazikhona ngaleso sikhathi kwanikeza ubufakazi obanelisayo besivikelo sikaJehova sothando nesibusiso sakhe.

Igxathu elikhulu lentuthuko enhlanganweni engokwasezulwini laliwukumiswa kweSikole Senkonzo SoMbuso ngo-1961 ukuze kunikezwe ababonisi abajikelezayo nezinceku zamabandla (manje ezibizwa ngokuthi ababonisi abengamele) ukuqeqeshwa okukhethekile okusekelwe eBhayibhelini. UKarel Plzák, wasePrague, owayekhonza njengombonisi wesifunda ngaleso sikhathi, ukhumbula ikilasi lokuqala. Lalizoqhutshelwa ngaseKarlovy Vary. Kwaba sobala ukuthi amaPhoyisa KaHulumeni ayezwile nawo ukuthi sizoqhutshelwaphi. Ngenxa yalokho, kwadingeka abazalwane bahlelelwe ngomzuzu wokugcina indlu ababezohlanganyela kuyo ngasese.

Izinsizwa eziningi ngaleso sikhathi zazikuqonda ukubaluleka kwenkonzo kaJehova. Ezinye zasheshe zavuthwa futhi masinyane zamenyelwa eSikoleni Senkonzo SoMbuso. Enye yazo, uJaromír Leneček, yaba umqhubi wesifundo sencwadi ineminyaka engu-14. Yaba umsizi wombonisi webandla ineminyaka engu-16, kwathi isineminyaka engu-20, yamenyelwa eSikoleni Senkonzo SoMbuso. Manje iyilungu leKomiti Yegatsha.

Esinye isimiso sokuqeqesha esamiswa ngo-1961 saba neqhaza kakhulu ekuthuthukeni kwezinga lenkonzo yasensimini. Ummemezeli onolwazi wayabelwa ukuba aqeqeshe ongenalwazi olutheni. Babelungiselela ndawonye futhi basebenze ndawonye enkonzweni yasensimini. Inhloso kwakuwukuba kusizwe oqeqeshwayo ukuze naye akwazi ukusiza abanye. Ngaleso sikhathi kwakushunyayelwa ngokwethukela kuphela, kodwa lokhu kuqeqeshwa kwasiza abaningi baba abadumisi bakaJehova abaphumelelayo.

Ngaphansi kombuso wobushiqela, uhulumeni ulihlolisisa ngokucophelela iposi. Ngakho eCzechoslovakia ababonisi abajikelezayo baba umzila obalulekile ekuxhumaneni okungokwasezulwini. Ukuhambela ngakunye kombonisi wesifunda kwakuba isikhathi esilindelwe ngamehlo abomvu. U-Eduard Sobička uyakhumbula: “Umbonisi ojikelezayo kwakudingeka abe nomsebenzi wokuziphilisa, ngakho-ke wayeqisa impelasonto eyodwa abese esebenza namabandla kusukela ngoLwesihlanu kuze kube yiSonto kusihlwa—ingqikithi yezinsuku ezingaba yisihlanu phakathi nenyanga. Lesi sikhathi silingana nesonto ababonisi besifunda emazweni angenamingcele engokomthetho abalisebenza nebandla. Ngenxa yalokho isifunda sasivame ukwakhiwa amabandla ayisithupha kuphela.” Ngala bazalwane, kwaqhutshekwa kuxhunyanwa namabandla, futhi ayehlala azi ukuthi kuqhubekani.

Lapho Ukuqapha Kulibaleka

Ngezinye izikhathi uma umsebenzi uhamba kahle, kwakulula ukulibala ukuthi oFakazi BakaJehova babesavinjelwe. Abazalwane ababeqondisa bakhuthaza ukuba konke okwakwenziwa kwenziwe ngokuhluzeka kwengqondo. Kodwa abanye zazingabenelisi izindlela ezazisetshenziswa. Babefuna imiphumela esheshayo.

Ngelinye ilanga ngo-1963 epaki lasePrague, abazalwane ababili baqoqa isixuku sabantu. Omunye walaba bazalwane wagibela phezu kwebhentshi waqala ukushumayela. Lapho indoda ethile esixukwini iphikisana nokwakushiwo, lo mzalwane wayibiza ngokuthi iyinxusa likaDeveli. Kwafika amaphoyisa athi abazalwane abazichaze, kodwa akuphelelanga lapho. Leso sigigaba sasusa omkhulu umkhankaso wamaphoyisa. Ngezinsuku ezimbalwa nje, abazalwane nodade basePrague abangaphezu kwekhulu baboshwa. Lokhu kwaphumela ezintweni ezimbili—amacala asenkantolo, nesifundo kubazalwane. Abayisithupha kulaba ababoshwa baquliswa icala futhi bagwetshwa.

Lesi sigigaba asiyinciphisanga inkonzo, kodwa sakhumbuza abazalwane ngesidingo sokuba nokuhlakanipha. (IzAga 3:21, 22) Kwakubaluleke ngokukhethekile lokho ngasekupheleni kwawo-1960 ngesikhathi emakhulu amathemba okuqedwa kokuvinjelwa.

Ingabe Inkululeko Yokukhulekela Iseduze?

Unyaka ka-1968 waba nezinguquko ezingalindelekile. AmaKhomanisi ayezibiza ngokuthi ashisekela izinguquko athatha izintambo futhi aqala ukusebenzela ukubusa ngentando yeningi. Abantu bazijabulela lezi zinguquko, futhi kwakukhulunywa “ngesimiso somusa nesobungane sokusebenzela uhulumeni.”

OFakazi BakaJehova basabela kanjani kulezi zinguquko? Abazange bathatheke. Nakuba bakujabulela ukuxegiswa kwesimiso, bethemba ukuthi hleze ukuvinjelwa kuqedwe, bagwema ukuba ngokuphamazela bathathe izinyathelo ababengazisola ngazo kamuva. Kwabonakala kuyinkambo ehlakaniphile lena. (IzAga 2:10, 11; 9:10) Ngemva kwezinyanga ezingu-8 zenkululeko esesilinganisweni, amabutho amazwe ayisihlanu ayenze iWarsaw Pact atheleka ezweni laseCzechoslovakia. Amasosha angaba ngu-750 000 nezinqola zempi ezinamathange ezingu-6 000 asiqeda “isimiso somusa nesobungane sokusebenzela uhulumeni.” Abantu babekhungathekile. Kodwa ukuziphatha koFakazi BakaJehova kokungathathi hlangothi phakathi nesikhathi esabizwa ngokuthi “intwasahlobo yasePrague” kwabasiza kakhulu eminyakeni eyalandela ngoba iziphathimandla zikaHulumeni kwadingeka zivume ukuthi oFakazi BakaJehova abalona usongo kuhulumeni.

Kuyamangalisa ukuthi ngemva kwalezo zigigaba izakhamuzi zaseCzechoslovakia zathola ithuba lokuhamba ngokukhululeka ziye eNtshonalanga Yurophu okwesikhashana. OFakazi BakaJehova abaningi balisebenzisa leli thuba, ikakhulukazi ngenxa yeMihlangano Yezizwe ‘Yokuthula Emhlabeni’ eyayihlelelwe lowo nyaka. Abazalwane nodade abangaba ngu-300 bevela kulo lonke elaseCzechoslovakia baya eNuremberg, eNtshonalanga Jalimane, idolobha eliseduze okwakuzoqhutshelwa kulo umhlangano. Wabanikeza amandla engeziwe ngokomoya. Nokho, kungakapholi maseko, imingcele yayisivaliwe.

Ekuqaleni kwawo-1970 kwaqala inkathi eyayibizwa ngokuthi ukuzinza kwezombangazwe. Ababezwelana nenhlangano yezinguquko zika-1968 basuswa ngesu emkhakheni wezombangazwe nasekuphileni okuvamile. Abantu abangaba ngu-30 000 bathinteka. Cishe ingxenye yesine yezikhulu zamaPhoyisa KaHulumeni yayihambisana nezinguquko, futhi yalahlekelwa imisebenzi. Abanye abantu bathi kwakubuye iNkathi Yobumnyama.

Nakuba le nkathi yayihlukile kuleyo yasekuqaleni kwawo-1950, yayiyisikhathi amaPhoyisa KaHulumeni aphinde awufakela izibuko ngaso umsebenzi woFakazi BakaJehova. Kwezinye izindawo zezwe, abazalwane baboshwa. OFakazi abayekanga ukushumayela, kodwa base beqapha ngokwengeziwe.

“Iminyaka Eyizinkulungwane Eziyisithupha Yokuba Khona Kwabantu”

Ngo-1969 INqabayokulinda yesiCzech yaqala ukunyathelisa uchungechunge lwezihloko ezisekelwe encwadini ethi Ukuphila OkuPhakade NgeNkululeko Yamadodana KaNkulunkulu. Isahluko 1, esinesihlokwana esithi “Iminyaka Eyizinkulungwane Eziyisithupha Yokuba Khona Kwabantu Iyaphela,” yayinencazelo yeJubili nokubalwa kwezikhathi zeBhayibheli. Lokhu kwaziswa kwaba nethonya elihle kwabanye; kodwa kwaholela nasemibuzweni eminingi nasekuqageleni okukhulu.

Ihhovisi laseCzechoslovakia lathumela incwadi ngomhla ka-22 ku-February 1972, kuwo wonke amabandla. Yayinencazelo ende yezizathu zokuba singagomeli ngosuku okuzogadla ngalo i-Armagedoni. Yaveza ukuthi ayikho incwadi yeNhlangano eyayithe i-Armagedoni izofika ngonyaka othile. Le ncwadi yaphetha kanje: “OFakazi BakaJehova emhlabeni wonke bayakwazi lokhu, futhi akukho muntu okufanele anezele umbono wakhe siqu ngokuthi kuzokwenzekani ngaphambi kuka-1975 noma ngalowo nyaka. Azikho izizathu ezingokomBhalo zokugomela, futhi kungaba nomphumela olimazayo emsebenzini wokushumayela. Ngakho-ke, lwelani ukuba ‘nonke nikhulume ngokuvumelana, nokuba kungabi nakuhlukana phakathi kwenu, kodwa ukuba nihlangane ngokufanele emqondweni ofanayo nasendleleni efanayo yokucabanga.’ (1 Kor. 1:10) Ngoba ngokuphathelene nalolo suku nalelo hora akekho owaziyo.”—Math. 24:36.

Okwenzeka

Ngo-February 1975 abazalwane abaningana baboshwa emkhankasweni wamaphoyisa. Kwaboshwa abengeziwe phakathi nonyaka ezindaweni ezihlukahlukene zezwe. UStanislav Šimek, waseBrno, owayeseke waboshwa izikhathi eziningana ngaphambili, uthi: “Ngo-September 30, 1975 ngaboshwa futhi kwaseshwa indlu yami nalapho ngangisebenzela khona. Amaphoyisa athatha amasaka amahlanu ezincwadi. Kamuva ngathola ukuthi amaPhoyisa KaHulumeni angaba ngu-200 ayehlanganyele kulo mkhankaso. Asesha imizi engu-40 futhi athatha izimpahla eziyisigamu sethani. Sagwetshwa izinyanga ezingu-13 noma 14 ejele.”

Ukuseshwa kwezindlu kwakungathandeki. Ngokuvamile imizi yababonisi yayinemibiko yebandla, futhi kwakunzima ukuyigcina ifihlekile. Kodwa ezikhathini ezingaphezu kwesisodwa, uJehova wavala amehlo alabo ababefuna ukuzenza isilo sengubo izinceku zakhe. UMfoweth’ uMařák, wasePlzeň, uyakhumbula: “Ngaleso sikhathi ngangikhonza njengombonisi wensimu. Ekhabetheni elinezivalo zengilazi, ngangibeke imvilophi enkulu enombiko wenkonzo, iminikelo nohlu lwamagama abo bonke abadala nezinceku ezikhonzayo. Lapho amadoda ayesesha esondela eduze kwaleli khabethe, umkami wangibuka futhi waqala ukunxusa usizo lukaJehova buthule. La madoda alunguza ezivalweni zengilazi, imvilophi enkulu ensundu iphambi kwamehlo awo, kodwa kwaba sengathi amehlo awo avaliwe futhi angayibona. Sambonga ngokusuka ekujuleni kwezinhliziyo zethu uJehova ngalesi sivikelo.”

Ukusebenzelana kweziphathimandla zikaHulumeni nabazalwane ngezinye izikhathi kwakuhlekisa. UMichal Fazekaš, owabhapathizwa ngo-1936 futhi waboshwa izikhathi eziningana, wehlelwa yilokhu okulandelayo: “Ngo-1975, ngaphinde ngagwetshwa. Kulokhu isigwebo sami salengiswa. Kodwa kuyathakazelisa ukuthi ngawo lowo nyaka, lapho kugujwa iminyaka engu-30 kwaphela iMpi Yezwe II, impesheni yami yanyuswa kuthiwa umvuzo wokuthi ‘ngasebenzela ukukhinyabeza amabutho oMbusi WaseJalimane’ ngoba ngangithunyelwe ekamu lokuhlushwa ngenxa yokungathathi hlangothi kobuKristu.”

Ukudabula Amasimu Amabandla

Ngo-February 1, 1976, kwamiswa ikomiti yezwe enamalungu amahlanu eyayizonakekela umsebenzi woFakazi BakaJehova eCzechoslovakia. Yayakhiwa u-Ondřej Kadlec, uMichal Moskal, uBohumil Müller (umqondisi), u-Anton Murín, u-Eduard Sobička.

Ngasekupheleni kwalowo nyaka, u-Ondřej Kadlec wavakashela ihhovisi legatsha loFakazi BakaJehova eFinland. EMnyango Wenkonzo wabona ibalazwe laseFinland elibonisa amasimu esigodi, esifunda nawamabandla. Emhlanganweni wekomiti yezwe ekhaya, wasikisela ukuba kwenziwe okufanayo eCzechoslovakia. UMfoweth’ uMüller washo ngokuqinile ukuthi ibalazwe elinjalo lingenza izikhulu zikahulumeni zisole futhi ngaleyo ndlela kudaleke umonakalo omkhulu. UMfoweth’ uKadlec uyakhumbula: “Ngangingafuni nhlobo ukuphinde ngikhulume ngale ndaba. Kodwa ngemva kwezinyanga ezimbili nje, uMfoweth’ uMüller wayivusa yena futhi.” Sase sibonakala isidingo sohlelo olunjalo. Ngokushesha wonke amabandla ayesenengxenye kulo.

Kodwa insimu yaseCzechoslovakia yayizohlukaniswa kanjani njengoba yayinamabandla angu-220 ezigodini ezingu-8 nezifunda ezingu-35? Lo msebenzi wabelwa uJaroslav Boudný, wasePrague. Uthi: “Ayemaningi amathuba okuba ngizisebenzele ngendlela engibona ngayo. Futhi kwakumangalisa ukusebenza noMfoweth’ uMüller, owayewenzisisa umsebenzi wakhe. Ngigcwele ugqozi futhi ngithandaza kakhulu, ngashona esabelweni sami. Sasihilela ukubhala phansi izinkulungwane zemingcele yamasimu amabandla futhi ngidwebe izinto eziningi.”

Ukuya Kwamanye Amasimu

Ngemva kokuba amabandla esabelwe insimu okokuqala, lawo ayengase akwazi ukusebenza izindawo ezingabelwe muntu acelwa ukuba enze kanjalo. Kwakuthinta inhliziyo ukuzimisela kwamabandla amaningi ukwamukela lezi zabelo ezengeziwe, ikakhulu amabandla aseduze kwase-Ostrava, eMoravia. Amanye kwakudingeka ahambe amakhilomitha angu-200 ngaphambi kokufika ensimini.

Wawuhlelwa kanjani umsebenzi? Abazalwane babehamba impelasonto yonke; basuke ngoMgqibelo ekuseni babuye ngeSonto ntambama. Izimoto zazihlale zigcwele, futhi abazalwane babezikhokhela bona izindleko zabo. Abamemezeli babengase bathathe lolo hambo njalo ngemva kwesonto.

Abamemezeli bakhuthazwa ukuba benze sengathi bayizivakashi ezibuka indawo, bashiye imoto ngaphandle kwedolobha elincane, bahambe edolobheni baye ngandawonye, baqale ingxoxo yobungane, kancane kancane iyele ekufakazeni, kuthi lapho kuba nokuphikiswa, babuyele esihlokweni ababeqale ngaso bese bephetha ngomusa. Esikhathini esiyiminyaka eyishumi, kwakuqabukela kube nezinkinga.

Ukuze afinyelele kwamanye amasimu, amanye amaphayona ayetuswe abadala abelwa ukuba asebenze isikhathi esithile. Njengoba kwakuye kwenzeka eminyakeni engaphambili, ngokuvamile ayehamba isonto noma ngaphezulu. Phakathi kwawokuqala ePrague kwakunodade ababili, uMarie Bambasová noKarla Pavlíčková, abase beneminyaka cishe engu-30 besebenza ndawonye. UKarla uyakhumbula: “UMarie wathatha umhlalaphansi ngo-1975. Ngosuku lwesibili ethathe umhlalaphansi, sase sisendleleni siyophayona eMoravia. Kwakuyinkathi yokushushiswa, ngakho inkonzo enjalo yayingaba yingozi, ikakhulukazi endaweni esasikuyo. Sasikhonza eduze nomngcele wase-Austria. Udade wakule ndawo wasidonsa ngendlebe: ‘Ningahambi nezincwadi. Futhi uma othile enibamba, nimtshele ukuthi niyazihambela nje, bese niyasuka kuleyo ndawo, ningabe nisabuyela kimina. Ngiyozithumela kamuva izinto zenu.’ Kodwa uJehova wasibusisa. Okuhlangenwe nakho kwethu kulolu hlobo lwenkonzo kwakumangalisa. Sasiphayona kanjalo njalo ngonyaka futhi sasithunyelwa ezindaweni ezihlukahlukene njalo nje.”

Ngezinye izikhathi lolo hambo lokuphayona lwalubayisa ezindaweni ezikude. “Mfowethu, kunendingeko eBulgaria! Uyakwazi ukukhuluma isiRashiya ngakho uyakufanela lo msebenzi.” Watshelwa lokho umzalwane wasePrague ekupheleni kwawo-1970. Yena nomkakhe bavuma ukuya eBulgaria ngezikhathi ezithile, ngezinye izikhathi baze baye kabili ngonyaka, futhi baqhubeka benza kanjalo iminyaka engu-13.

Wawungenele yini umsebenzi ekhaya njengoba abamemezeli baseCzech kwadingeka baye eBulgaria, ezimweni ezinzima nakakhulu? Wawumningi umsebenzi eCzechoslovakia, kodwa sasiqinile nesifiso sokusiza nomaphi lapho kwakudingeka khona.

Umzalwane wasePrague owahlanganyela kulowo msebenzi ukhuluma ngensimu yaseBulgaria ngalezo zinsuku: “Abantu baseBulgaria bangabantu abanomusa kakhulu ngokwemvelo. Lokho kwasenza sasondelana nabo. Ngokuhamba kwesikhathi sasiqonda isimo sabo. Iqiniso babelihlanganyela namalungu emikhaya yabo ikakhulu. Babengakaze bacabange ukuthi bangaya kubantu emigwaqweni. Ngesinye isikhathi lapho ngabelwe ukuba ngiqhube iSikhumbuso eSofia, ngakusebenzisa ngokunenzuzo ukuba khona kwabamemezeli abaningana. Sisebenzisa okuhlangenwe nakho nemiboniso, sabonisa abamemezeli indlela ‘ephephe’ ngokwengeziwe yokufakaza. Kwakubalulekile ukungasho ukuthi, ‘Ngitadisha iBhayibheli,’ kodwa kwakumelwe uqale ingxoxo ngezinto ezivamile, kancane kancane uyele ngaseBhayibhelini. Sasingase sithi, ‘Ngizwe endaweni ethile ukuthi iBhayibheli lithi . . . ’ Abamemezeli bayamukela ngezandla ezimhlophe le ndlela entsha yokufakaza, futhi isigijimi ngoNkulunkulu saqala ukukapakela nakwabanye abantu abangabajwayele.”

Umsebenzi Wentshiseko Ucasula Izikhulu

Ababesishushisa babesheshe baphawule noma imiphi imizamo eyandisiwe yokushumayela izindaba ezinhle, nakuba abafowethu babezama ukuqapha. Ibandla laseNejdek, eduze kwaseKarlovy Vary, yilona eladonsa ukunaka kwezikhulu zezombangazwe namaphoyisa. UJuraj Kaminský, owakhonza iminyaka eminingi njengombonisi ojikelezayo, uthi: “Bake bakholelwa nawukuthi umsebenzi wezwe lonke wawuqondiswa eNejdek. Izicukuthwane zamaKhomanisi zazihlale zihlanganisa amakhanda zixoxa ngendlela ezingawuvimba ngayo umsebenzi wethu. Ongqondongqondo bake baba nengqungquthela ehhotela laseKarlovy Vary, bevela kude ePrague. Kwakukhona izikhulu ezimbili zikahulumeni, abameleli bamasonto namaphoyisa. Kwakunabantu abangaba ngu-200.

“Isikhulumi sasiphethe incwadi IQiniso epulatifomu. Sayichaza ngokuningiliziwe inhlangano yoFakazi BakaJehova, saveza ukuthi thina sinekhono elihle kakhulu lokuhlela. Lapho sesisemvuthwandaba wokuncoma oFakazi BakaJehova, sathi: ‘Kumelwe sihleleke ngaphezu kwabo ukuze sibavimbe bangasihluli!’”

Bashushiselwa Ukudumisa UJesu Kristu

Kwakunzima ukufihlela amaphoyisa amaKhomanisi usuku lweSikhumbuzo sokufa kukaKristu. UBožena Pětníková, owayehlala ePrague, usikhumbuza esinye isenzakalo esinjalo: “Ngalezo zinsuku babembalwa abazalwane emabandleni, ngakho-ke odade bababelwa ukuba baqhube imihlangano emizini. Kwakuye kube khona okungenani abayishumi emhlanganweni. Ngo-1975 iqembu lethu lalizoqhubela iSikhumbuzo endaweni okwakungakaze kuqhutshelwe kuyo umhlangano. Ngemva kwemizuzu engaba ngu-40, saphazanyiswa ukungqongqoza nokukhahlelwa kwesicabha ngendlov’ yangena. Baqhubeka lobu buhhomuhhomu, umninikhaya wavula. Kwangena amadoda amathathu, amabili egqoke izingubo zamaphoyisa enye ingazigqokile. ‘Nank’ umhlola! Nkosikazi Pětníková, besingazi ukuthi sizokuthola la! Nenzani la?,’ kubuza engazigqokile izingubo zomsebenzi. ‘Sigubha iSikhumbuzo sokufa kukaJesu Kristu. Ngicela nihlale phansi, nisiyeke siqede lo mkhosi,’ ngiphendula ngomoya ophansi. Enqaba-ke kodwa. Athi masiveze omazisi bethu, futhi ayelokhu ebuza umuntu ngamunye ukuthi uzokwenzani lapha. Kwabe sekubuzwa udade osekhulile. Ngangesaba ukuthi kazi uzothini. Kodwa impendulo yakhe yasikhuthaza sonke. Wathi: ‘NginguFakazi KaJehova, futhi ngidumisa uJehova.’ ‘Uyohamb’ usinda ngoba usukhule kangaka,’ kuphendula iphoyisa, elamangazwa ukubona isibindi sakhe. Abe esesixosha, kwathi esiteshini samaphoyisa sendawo, kwadingeka ngisayine ukuthi bengiqhuba iSikhumbuzo.”

Ngemva kweminyaka engu-12, ngo-1987, kwezinye izindawo zaseBohemia, amaPhoyisa KaHulumeni abopha abazalwane abaningi ababegubha iSikhumbuzo. Ayefuna kakhulu ukwazi ukuthi iSikhumbuzo sasigujelwephi nokuthi ubani owayenikeze inkulumo. Ekupheleni kweSikhumbuzo kwenye indawo, amaphoyisa ababona bonke ababekhona, umzalwane oyedwa waboshwa futhi waphenywa ngemibuzo. Kwenye indawo futhi, odade abathathu bamangalelwa ngokuthi bayizigebengu, isizathu kwathiwa babekade bevakashela owesifazane othile “befunda izincwadi zehlelo lenkolo elivaliwe elibizwa ngokuthi oFakazi BakaJehova.”

Omunye udade, uMiluše Pavlová, wagwetshwa ukuba agqunywe ejele lasePardubice, hhayi ngoba ebanjwe enza okuthile, kodwa ngoba wayesolwa. Isizathu sokugwetshwa kwakhe sasithi: “Umbono wongqondongqondo uthi ummangalelwa ubehambisa futhi ekopisha izincwadi ezivinjelwe. Inkantolo yokudlulisa amacala isamukele isinqumo sokuqala, yanezela, ‘Ugwetshwe ngenjongo yokumyekisa lo msebenzi futhi nabanye bawuyeke.’”

Ukulungiselela Ukudla Okungokomoya

Ukulungiselela izincwadi zokutadisha iBhayibheli kwakwenziwa ngokucophelela okukhulu phakathi nenkathi yobuKhomanisi. UFakazi ovamile wayengazi ukuthi zihunyushwa kanjani, zinyatheliswe kanjani bese zitholakala kanjani ukuze zisetshenziswe. Abahumushi nabahlola umsebenzi, kanye nababenyathelisa futhi behlanganisa izincwadi, babengaziwa yiningi.

Umhumushi wayebhala isihloko se-Nqabayokulinda ngomshini ngolimi lwesiCzech, asidlulisele kozosihlola, angaphinde asibone kuze kube semihlanganweni yebandla. Konke kwakuhunyushwa ngale ndlela, kuhlanganise izincwadi nezincwajana. Noma kunjalo, kwakuhunyushwa kahle. Umagazini i-Phaphama! wawungahunyushwa ngaleso sikhathi.

Ngisho nezindikimba zabadala zazingazi ukuthi obani abahumushayo emabandleni abo. Ngezinye izikhathi uma umsebenzi wokuhumusha umningi, yayincipha inkonzo yasensimini yalaba bazalwane, abadala bese bezama ukubasiza, becabanga ukuthi mhlawumbe sebeyaphola ngokomoya. Kodwa abahumushi nabahlola umsebenzi babengadaluli ukuthi benzani.

Ngaphansi kwalezi zimo ezinzima, kwafezwa umsebenzi omkhulu kakhulu. Yonke i-New World Translation of the Holy Scriptures yahunyushelwa olimini lwesiCzech. Phakathi kuka-1982 no-1986 yanyatheliswa futhi yenziwa imiqulu emihlanu khona kanye eCzechoslovakia, kwathi umkhaya ngamunye woFakazi wanikezwa ikhophi. Ngendlela efanayo, kwenziwa umsebenzi wokunyathelisa i-New World Translation ngolimi lweSlovak, kodwa yaze yaqedwa kamuva.

Indlela Ababenyathelisa Ngayo Izincwadi

Ngeminyaka yawo-1950 abazalwane ababengaboshiwe benza umzamo omkhulu wokuqikelela ukuthi abafowabo nodadewabo abangamaKristu bayondliwa ngokomoya. Isikhathi esithile ngemva kokuvinjelwa komsebenzi nokuboshwa kwabazalwane abaholayo, kwakuvame ukuba kube nekhophi eyodwa ye-Nqabayokulinda eyayisetshenziswa amabandla amaningi. Isimo saya siba ngcono. Ngemva kwesikhathi, ibandla ngalinye laba nekhophi, kamuva umkhaya ngamunye waba nekhophi. Abamemezeli babezenzela amakhophi ngesandla. Babengenayo imishini yokubhala.

UJuraj Kaminský, waseBandleni LaseNejdek, uchaza isimo abazalwane ababhekana naso. Uthi: “Ngesikhathi abazalwane sebesesimweni sokuzithengela umshini wokubhala, kwakuwumshini ogugile. Indoda eyabadayisela wona yawumba emgodini bebuka. Kamuva, bathola izindlela zokuthenga imishini emisha nemishini yokukhulisa izithombe.”

Kwakuhileleke abantu abahlukahlukene ekukhiqizweni kwezincwadi. Odade abaningi, abanye abangaphezu kuka-70 ubudala, bafunda ukubhala ngomshini. Abazalwane baze bakwazi ngisho nokushushumbisa izincwadi emajele. Ngo-1958, baqala ukunyathelisa INqabayokulinda encane enezithombe. Kwakuye kuthukuswe amakhophi anjalo amathathu esigaxeni sensipho noma emuthini wokuxubha abese ethunyelwa kubazalwane ejele. Babebe sebezenzela amakhophi abo ngesandla bese beyayidabula ikhophi yokuqala.

Ngo-1972 uHerbert Adamy wacelwa ukuba asize ekukhiqizeni izincwadi. Wabelwa ukuba aqondise ukukhiqizwa kwezincwadi kulo lonke elaseCzechoslovakia. Uyakhumbula: “Ekuqaleni izincwadi zazenziwa ngesandla ngabamemezeli abaningi emabandleni. Ekugcineni—sesizowa nje isimiso sobuKhomanisi—sasinezindawo zokunyathelisa eziphambili ngaphansi komhlaba, ezinemishini ekahle, ezazikwazi ukunyathelisa izincwadi eziningi kakhulu kunezazidingeka ngaleso sikhathi.”

Ngokuqondene nesikhathi abasebenzisa ngaso i-mimeograph yabo yokuqala, uMfoweth’ u-Adamy uthi: “Cishe kane ngonyaka, umshini wokunyathelisa kwakudingeka uthuthelwe endaweni ecashile eyayisuke ishiwo kusengaphambili. Kulo ‘msebenzi’ leli qembu lake lanyathelisa, lahlanganisa, futhi lathumela izincwadi ezingu-12 000. Lo msebenzi wathatha cishe isonto. Izisebenzi zazivuka ngo-4:00 ekuseni futhi ngokuvamile zilale ngemva kwamabili. Lapho usuphothuliwe umsebenzi, ngangiyisa izincwadi esiteshini sesitimela esiseduze. Lapha zazinikezwa isithunywa, esasihamba nazo amakhilomitha angu-600 ngezinye izikhathi.”

Ngemva kwesikhathi, ezindaweni zokunyathelisa ababezakhele zona, abazalwane baqala ukuzenzela eyabo imishini ye-mimeograph. Sekukonke, benza imishini enjalo engu-160, eminye yanikezwa abazalwane baseRomania.

Ngawo-1980 abazalwane baseCzechoslovakia baqala ukunyathelisa nge-offset, okwalithuthukisa kakhulu izinga lomsebenzi wabo. Ukuze benze lokhu, bazakhela eyabo imishini ye-offset. Esikhathini esingunyaka nengxenye, base bakhe engu-11, enemishini ye-rotary efaka amaphepha esebenza ngogesi. Umshini owodwa wawukwazi ukunyathelisa izincwadi ezingu-11 000 ezisezingeni elihle ngehora.

Izindawo Ezimbili Zokunyathelisa EPrague Ziyaseshwa

Ekupheleni kuka-1986, amaPhoyisa KaHulumeni akwazi ukuthola nokuvala izindawo zethu ezimbili zokunyathelisa. Ngemva kokuseshwa kwenye yazo, kwavela umbiko ebhukwini langaphakathi loMnyango Wezangaphakathi. Iphoyisa elinomusa lanikeza oFakazi ikhophi yalo. Okokuqala, kwakunenkulumo-ze eyayivamile eyayizama ukuhlanganisa oFakazi nezinhlangano zezombangazwe zakwamanye amazwe. Lo mbiko wabe usunikeza imininingwane ngomkhankaso wamaphoyisa futhi washo nezigwebo ezanikezwa oFakazi. Waphetha ngala mazwi amangalisayo: “Abalandeli bakaJehova baziphatha kahle kakhulu kubantu bangaphandle. Bazimisele ukusiza futhi bakhuthele, kodwa bagcina lapho. Abazimisele ukusebenzela i-Socialist Work Brigades nokunye okunjalo. Akukaze kuzwakale ukuthi umlandeli kaJehova uyantshontsha, uyabhema, usebenzisa kabi utshwala noma izidakamizwa. . . . Akekho noyedwa kubo owake waboshelwa icala lokuziphatha okubi noma waphula umthetho ophathelene nezindawo. Amalungu aleli hlelo alwela ukukhuluma iqiniso. Awalokothi akhiphe amagama abanye, kodwa amane ababize ngokuthi ‘mfowethu’ nokuthi ‘dadewethu.’ Akhuluma ngawo kuphela, futhi uma kuthiwa awadalule ukwaziswa okuthile ayathula, awathuli nje kuphela uma ebekwa icala, kodwa noma kuthiwa awafakaze.”

Yebo, ukuvalwa kwendawo yokunyathelisa eyodwa noma ezimbili akuzange kuwumise umsebenzi wokumemezela ngoMbuso kaNkulunkulu. Ngonyaka ka-1987 kwaba nokwanda okwengeziwe. Emazweni aseCzech kwaba nenani elisha labamemezeli abangu-9 870. Ngokwesilinganiso, bangu-699 abahlanganyela enkonzweni yamaphayona asizayo noma avamile.

Kwakungenzeka Yini Babhaliswe Ngokomthetho?

Ngo-1972 ngesikhathi kwenziwa ilungiselelo lokuba emhlabeni wonke indikimba yabadala iqondise imisebenzi ebandleni ngalinye loFakazi BakaJehova, leli lungiselelo laqala naseCzechoslovakia. Ngo-1976 kwamiswa ikomiti yezwe enamalungu ayisihlanu ukuze inakekele umsebenzi woFakazi BakaJehova kuleli zwe.

Phakathi koFakazi BakaJehova nenhlangano enakekela izindaba zabo zebhizinisi, akukho okwakubhaliswe ngokomthetho, futhi babengenalo ihhovisi ababengasebenzela kulo eCzechoslovakia. Ngakho ngo-March 1979 kwathengwa indlu engaphelile enezitezi ezintathu ePrague, ithengwa ngegama loFakazi ababili. Amaqembu ezisebenzi zokuzithandela ezingu-10 kuya ku-12 ayefika ngokushesha ezosebenza isonto lonke kule ndlu. Babeya ePrague besuka kude eSlovakia. Phakathi nezinyanga eziyisithupha, kwase kungahlalwa kule ndawo, futhi ngemva konyaka, ingxenye eyayizoba ihhovisi yayisilungile. Lesi sakhiwo saba ihhovisi elikahle kwaze kwaba sentwasahlobo ka-1994.

Ekupheleni kwawo-1970, kwabonakala sengathi izingxoxo zingaqalwa ngenjongo yokubhalisa ngokomthetho. Ngakho ngo-June 1, 1979, kwahanjiswa incwadi eSecretariat for Religious Affairs With the Presidium of the Czechoslovak Socialist Republic. Le ncwadi yayithi: “Sicela nisivumele sicele ukuba nezingxoxo nani egameni leqembu lenkolo elaziwa ngoFakazi BakaJehova. Sithanda ukunitshela ngesifiso sabantu abathile abaholayo phakathi enhlanganweni yoFakazi BakaJehova sokucabangela kanye nani ukulungisa ubuhlobo phakathi kwaleli qembu lenkolo nesimiso semithetho samanje seCzechoslovak Socialist Republic.”

Impendulo yafika cishe ngemva konyaka, futhi izingxoxo zaba ngo-April 22, 1980. Ngemva kwazo, kwafakwa isicelo sokubhalisa i-Watch Tower Bible and Tract Society eMnyango Wezangaphakathi. Ngaphandle komthetho-sisekelo, sasinamaphuzu angu-13 acatshangwe kahle. Iphuzu lesihlanu lalithi:

“Uma uHulumeni engabaqaphela oFakazi BakaJehova, wonke amabandla azoqhuba imihlangano ezindaweni ezenzelwe le njongo. Ngeke kudingeke amabandla ahlukaniswe abe amaqembu amancane. Imihlangano izoqhutshwa abantu abafanelekayo, futhi lokho kungenza i-Watch Tower Society iwaqondise kangcono amabandla ayo. Iziphathimandla zikaHulumeni nazo ziyochazelwa kahle ngemisebenzi yamabandla oFakazi BakaJehova. Amanxusa kaHulumeni angafika noma nini emihlanganweni yeningi ukuze aqiniseke ukuthi le mibuthano ayinangozi futhi iyazuzisa.”

Akutholakalanga mpendulo.

Ukuphenywa NgamaPhoyisa KaHulumeni

Ngo-1985 isimo sezombangazwe sashuba. Kwakungafuneki lutho olwalusongela ukuzinza kwaso. Ngenxa yalokho, abazalwane babephenywa njalo. Abaningi babephenyelwa ePrague. Umphathi wamaphoyisa wanikeza abazalwane abaningi lokho okubizwa ngokuthi isixwayiso. Lokhu kwafana nokuthi balengiselwe isigwebo unomphela.

Phakathi nalowo nyaka, amabandla athola izincwadi ezinhlanu zivela ehhovisi loFakazi BakaJehova lasePrague, zinesikhuthazo somusa kodwa esinamandla sokuba alandele isimiso esikweyabaseFilipi 4:5: “Ukuba nengqondo kwenu makwaziwe yibo bonke abantu.”

Ukusikisela Okuhle KwamaPhoyisa KaHulumeni

Kwathi ekuqaleni kuka-1988, amaPhoyisa KaHulumeni asikisela ukuba abazalwane bendawo abaholayo bahlele ukuba kuvakashe ummeleli wendlunkulu yeNhlangano yomhlaba wonke ukuze axoxe nezikhulu ezithile ze-Federal Ministry of Interior. Ezintweni ezazizodingidwa kwakukhona ‘nezici ezithile zobuhlobo bethu eziyisendlalela sengxoxo yesikhathi esizayo nezikhulu zikaHulumeni ezigunyaziwe.’ Ngempela kwakuwushintsho lolu.

Engakaphothulwa amalungiselelo alowo mhlangano, kwaba noMhlangano Wesigodi ‘Wokulunga Kwaphezulu’ eVienna, e-Austria. Iqembu elikhulu nje impela loFakazi baseCzechoslovakia laya, futhi iziphathimandla zazikwazi kahle lokho.

Phakathi naleso sikhathi, aqhubekela phambili kancane kancane amalungiselelo ezingxoxo phakathi kwamalungu ezisebenzi zasendlunkulu yeNhlangano nezicukuthwane zoMnyango Wezangaphakathi. Ekugcineni, lo mhlangano waba sekuseni ngo-December 20, 1988, egunjini lenguyazana eForum Hotel ePrague. INhlangano yayimelelwe uMilton Henschel noTheodore Jaracz beNdikimba Ebusayo noWilli Pohl wasegatsheni laseJalimane. Abazalwane beNdikimba Ebusayo babengalindele lutho olutheni. Babazi ukuthi kwakuzodingeka isineke nesikhathi. Noma kunjalo lesi kwakuyisinyathelo esikhulu senqubekela-phambili. Akungabazeki ukuthi lowo mhlangano waba nesandla kakhulu kulokho okwenzeka ngonyaka olandelayo.

Kwakuhlelwe imihlangano yezizwe emikhulu eyayizoba semadolobheni amathathu ePoland. OFakazi BakaJehova eCzechoslovakia babefuna ukuya. Le ndaba yaxoxwa namaPhoyisa KaHulumeni. Ave bajabula abazalwane lapho kukhishwa imvume yokuba abangu-10 000 baye ePoland! Lelo nani lalimelela oFakazi BakaJehova baseCzechoslovakia abangaphezu kwengxenye ngaleso sikhathi. Abanye bethuka lapho uMnyango Wezangaphakathi ufuna uhlu lwabo bonke ababezohamba. Kodwa labo abahamba bakhiwa ngendlela ababengayilindele neze—bakhiwa isimiso somhlangano owawunesihloko esithi “Ukuzinikela Kokwesaba UNkulunkulu,” umoya wentshiseko wababekhona nawumoya omuhle wokungenisa izihambi owaboniswa oFakazi basePoland.

Ukugxila Emsebenzini Wethu Esiwuphathiswe UNkulunkulu

Ngasekupheleni kwalowo nyaka, ngo-November 17, 1989, kwaba nesiteleka sabafundi ePrague. Umbuso wamaKhomanisi wasabela ngonya olubi kakhulu, wathumela amabutho akhethekile amaphoyisa ukuba ayohlakaza ababhikishi eNárodní třída (National Avenue) yasePrague. Umphumela waba ukwakhiwa ngokushesha kwenhlangano yokuthula elwa nohulumeni wamaKhomanisi. Kamuva yabizwa ngokuthi iVelvet Revolution. Lesi simo sasisho ukuqapha okukhethekile ngoFakazi BakaJehova ngoba amaphaphu ayephezulu, futhi kwakungelula ukulondoloza ukungathathi hlangothi kobuKristu.

Ngo-November 22, 1989, ihhovisi lakithi ePrague lathumela incwadi kuwo wonke amabandla eCzechoslovakia. Phakathi kokunye, yayithi: “Yeka indlela okuhle ngayo ukuthi abazalwane bagxile emsebenzini wabo wobuvangeli, abavumeli noma yini ibaphazamise. . . . Siwazisa kakhulu umsebenzi omuhle nokuqapha kwabafowethu nodadewethu abathandekayo. Inkonzo yabo nemiphumela yayo ifakazela ukuthi uJehova unoFakazi bakhe nakuleli zwe. Siyakwazisa lokho futhi sithandaza kuJehova uNkulunkulu ukuba sihlale sisemseni wakhe. Qinisekani ngothando lwethu futhi yamukelani imikhonzo yethu.” Ngonyaka wenkonzo owawusanda kuphela, inani labamemezeli emazweni aseCzech lalingu-11 394—okunye ukwanda okuhle.

Ekupheleni kuka-1989, iCzechoslovakia yayisinohulumeni omusha. Masinyane ikomiti yezwe lakithi yafuna izindlela zokubhalisa oFakazi BakaJehova ngokomthetho. Amanye amalungu ekomiti aya kobonana neKomiti Ephakeme KaHulumeni, futhi incwadi eyatholakala kulokhu kuhambela yayibaluleke kakhulu ngaleso sikhathi. Le ncwadi, eyayisayinwe isikhulu esiphethe, yayithi:

“Ngenxa yesaziso esenziwa ikomiti eyenza amalungiselelo yesonto loFakazi BakaJehova, siyavuma ukuba ngo-January 1, 1990, leli sonto livuselele umsebenzi walo owaphazanyiswa umbuso wobuFascist ngo-1939 futhi waphinde wavalwa ngo-April 4, 1949.” Leyo ncwadi yayiyisinyathelo sokuqala kweziningi ezaholela ekuqashelweni ngokomthetho.

Umzukuzuku Wokubhalisa

Nakuba uhulumeni wawukuvumele ukuvuselelwa kwemisebenzi ‘yesonto loFakazi BakaJehova,’ kwathatha cishe eminye iminyaka emine yomzamo wesineke ngaphambi kokuba iNhlangano ibhaliswe ngokomthetho eCzech Republic.

Ngo-January 12, 1990, kwafakwa isicelo sokubhaliswa kwe-Religious Society of Jehovah’s Witnesses eMnyango Wamasiko WaseCzech Republic. Konke okwenziwa, kwenziwa ngokubambisana phakathi kweNdikimba Ebusayo, umnyango wezomthetho endlunkulu nabameli bendawo. Ngo-March 1 no-2, uMfoweth’ uHenschel wafika ePrague. Ehamba noMfoweth’ uMurín noSobička, waya ehhovisi likandunankulu neloMnyango Wamasiko. Inhloso yalokhu kuhambela kwakuwukuba isicelo sethu sibhekwe njengesibalulekile futhi sisheshe sibhaliswe. Kodwa akwenzekanga lutho ngoba yayingakabi bikho imithetho emisha yokubhalisa. Ngemva kwalokhu, sazama izinto eziningi, kuhlanganise nezicelo ezibhalwe phansi nokuxoxa nondunankulu.

Ngo-March 19, 1992, kwaphasiswa umthetho wokubhaliswa kwamasonto amasha nezinhlangano zenkolo. Wawuthi inqubo yokubhalisa iyoqala kuphela uma isicelo senhlangano yenkolo sihambisana namasignesha abalandeli bayo abangu-10 000 abangabantu abadala. (Amasonto okuthiwa awendabuko ayevele esebenza ngokomthetho amashumi eminyaka ngaphansi kombuso wamaKhomanisi, wona abhaliswa nje ngaphandle kwemibandela.) Ngakho oFakazi BakaJehova batshelwa ukuthi kwakudingeka baqale phansi bafake isicelo, balethe konke okwakudingeka. Kwathi ngo-January 1, 1993, ngesikhathi kulungiselelwa ukubhalisa, kwaba nolunye ushintsho ngesikhathi iCzechoslovakia ihlukaniswa iba amazwe amabili, i-republic yaseCzech neyaseSlovak. Kodwa ekugcineni, ngoLwesithathu, ngo-September 1, 1993, iNhlangano Yabezindaba YaseCzech yathola lo mbiko olandelayo:

“Namuhla, ngo-September 1, 1993, ngo-10:00 ekuseni abameleli beNhlangano Engokwenkolo YoFakazi BakaJehova banikezwe izincwadi ezithi babhalisiwe eMnyango Wamasiko WaseCzech Republic. Abameleli boFakazi BakaJehova bazibongile izikhulu zomnyango futhi bazitshela ukuthi ngeke bafune izinzuzo ezingokwezimali, nokuthi ngeke bafune ukuxhaswa uHulumeni ngezimali. Kusukela namuhla babhalisiwe.”

Lesi senzakalo esibalulekile sabikwa ezindabeni. Kwamanye amaphephandaba, kwaba isaziso nje esifushane. Kwamanye lo mbiko wawunezihloko eziqavile njengesithi “AmaJehovist Akutholile Abekulindele” nesithi “OFakazi BakaJehova Bayinkolo Eqashelwayo.” Ingabe lokho kwasho ukuphela kokushushiswa koFakazi BakaJehova eCzech Republic? Phinde!

Ezinsukwini nje ezimbalwa, kwaqala umkhankaso wokuhlasela ngonya kusetshenziswa abezindaba. Akumangalisi ukuthi inkululeko enkudlwana yokuhlasela oFakazi BakaJehova yanikezwa emaphephandabeni enkolo. Izihloko ezichemile zazinemibuzo eyayibuzwa oFakazi ngesikhathi sokubhaliswa kanye namahemuhemu ayeshiwo yizintatheli ngokuphathelene nezimpendulo ezanikezwa. Ngakolunye uhlangothi, kwathiwa abakhulumeli beNhlangano babeqambe amanga lapho bethi oFakazi abaphoqwa ukuba bakholelwe noma benze izinto ezithile. Ngakolunye, izimpendulo ezanikezwa kwathiwa ziphikisana nezimiso zenhlangano uqobo.

Lo mkhankaso wokuphikiswa waqala inkathi entsha, hhayi inkathi yokuvalelwa ejele ngonya, kodwa inkathi yokuhlekwa usulu koFakazi BakaJehova. Lesi kwakuyisikhathi sokuba uFakazi KaJehova ngamunye abhekane nolunye uhlobo lokuvivinywa kokholo nobuqotho bakhe kuJehova uNkulunkulu nasenhlanganweni yaKhe.

Ukuthatha Isinyathelo Sokholo

OFakazi BakaJehova abazange balinde kuze kuphothulwe ukubhaliswa ngokomthetho andukuba baqale ukuqhuba imihlangano yasobala—ngisho nemikhulu—khona eCzechoslovakia. Babezitshelile izikhulu zikahulumeni ukuthi babezovuselela umsebenzi wabo wasobala ngo-January 1990. Ngayo leyo nyanga kwahlelwa isimiso esikhethekile sawo wonke amabandla. Sasinesihloko esithi “Ukuzuza Ngokulalela Imiyalo Yaphezulu.” Empeleni lona kwakuwumhlangano wesifunda wamahora amabili. Le mihlangano yayingemikhulu kakhulu, kodwa kwakuqashwe amahholo. Ibandla elilodwa noma amabili ahlangana endaweni eyodwa. Yalandelwa imihlangano yesifunda emikhudlwana entwasahlobo.

Yonke leyo mihlangano yahamba kahle, kwabe sekwenziwa amalungiselelo omhlangano wesigodi—umhlangano wezizwe wezinsuku ezine—owawuzoba sePrague ngalelo hlobo. Kwaqashwa i-Evžen Rošický Stadium ePrague okwakuzoqhutshelwa kuyo lo mhlangano, futhi esimisweni kwakukhona amalungu amabili eNdikimba Ebusayo, uMfoweth’ uHenschel noJaracz. Kwaba khona abangu-23 876, kwabhapathizwa abangu-1 824. Lo mhlangano wawuwukunqoba okuphelele kokukhulekela okumsulwa. Isimo sasifana nsé nesasemihlanganweni yasePoland eyayingonyaka ongaphambili, kodwa manje lokhu kwakwenzeka ekhaya ngolimi lwesiCzech neSlovak! Umphumela ongokomzwelo ojulile walesi senzakalo wabonakala ekumomothekeni ngenjabulo nasezinyembezini zokwazisa okusuka enhliziyweni.

Kwase kuphele iminyaka engu-40 amagama athi “oFakazi BakaJehova” engashiwo obala emphakathini waseCzechoslovakia. Kwakusakazwe amahemuhemu angakholeki ngaleli qembu, ngokuvamile elalibizwa ngokuthi “ihlelo elingekho emthethweni.” Manje wonk’ umuntu, kuhlanganise nezintatheli, base bengakwazi ukubabonela eduze oFakazi. Imibiko yabezindaba ngalo mhlangano yayimihle. Kwabamangaza lokho oFakazi ababekwenzile enkundleni ngaphambi komhlangano wabo. Babesebenze izinyanga ezimbili—izisebenzi zokuzithandela ezingu-9 500, zachitha amahora angu-58 000 ukuze ziyihlanze, zilungise amabhentshi, zenze ngcono isimiso sokuthutha indle futhi zicake yonke inkundla. Intatheli yephephandaba eliphuma njalo i-Večerní Praha (Prague Evening Newspaper) yamangaliswa ubuso obumomothekayo, ukuxubana ngokuzwana kwabantu bakuzo zonke izindawo zaseCzechoslovakia kanye nakwamanye amazwe, nenkulumo yabo ehlanzekile.

Ngalowo nyaka kwenzeka esinye isenzakalo esibalulekile. Ngo-August 30, 1990, kwanikezelwa iHholo LoMbuso Lebandla LaseBechyně—elalingelokuqala kuleli zwe.

Konke lokhu kwaholela kwesinye futhi isenzakalo, esimangalisa ngendlela ekhethekile.

Umhlangano Ongasoze Walibaleka

Kwahlelwa ukuba kube nomhlangano wezizwe woFakazi BakaJehova ePrague kusukela ngo-August 9 kuya ku-11, 1991! Isinyathelo sokuqala kwakuwukuqasha inkundla. Yiphi? ISpartakiad Stadium ePrague, enye yezinkulu kunazo zonke emhlabeni. Njengoba oFakazi BakaJehova babengakabhaliswa ngokomthetho eCzechoslovakia, yonke le nkundla yaqashwa umuntu oyedwa u-Anton Murín, ngaleso sikhathi owayengumqondisi wekomiti yezwe. Lesi kwakuyisinyathelo esidinga isibindi. Kwakuyisenzo esasibonisa ukumethemba kakhulu uJehova, futhi uJehova wasibusisa.

UMnyango Wezindawo Zokulala wawuzoba nomsebenzi omkhulu, futhi wabelwa uLubomír Müller ukuba awuphathe. Abazalwane beNdikimba Ebusayo babekwazi kahle ukubaluleka kwezindawo zokulala ezikahle. Ngakho uMfoweth’ uHenschel noJaracz baziyela mathupha beyohlola amahhotela okwakuhlongozwa ukuba asetshenziswe kulo lonke elasePrague. Bangena emakamelweni asemahhotela baze balala ngisho nasemibhedeni ukuze bayizwe. Bathi amahhotela anezindlu zokugezela nezangasese emaphaseshi ayengeke acatshangelwe nhlobo. Ngani? UMfoweth’ uHenschel wachaza: “Ngaphansi kwezimo ezivamile, bekuzolunga ngoba izivakashi ziphuma zingene ngezikhathi ezihlukahlukene. Kodwa izihambeli zomhlangano ngokuvamile zihamba futhi zibuye kanye kanye. Kuyoba njani ezindlini zokugezela? Ngeke sikwenze lokho kubafowethu.” Abahleli bendawo babethola ukuqeqeshwa okuwusizo lapho bebona amalungu eNdikimba Ebusayo ebonisa isithakazelo somuntu siqu enhlalakahleni yomuntu ngamunye.

Inani lababekhona kulo Mhlangano Wezizwe ‘Wabathandi Benkululeko KaNkulunkulu’ lalingu-74 587. Abangu-29 119 kulaba babevela eCzechoslovakia, abangu-26 716 bevela eJalimane, abangu-12 895 bevela ePoland. Ezinye izihambeli ezingu-5 857 zazivela emazweni angu-36. Kwakumnandi kakhulu ukubona kubhapathizwa abantu abasanda kuqala abangu-2 337, kuhlanganise nabangu-1 760 baseCzechoslovakia, abangu-480 baseJalimane nabangu-97 basePoland.

Akungabazeki ukuthi umvuthwandaba wawo wonke lo mhlangano yilokho okwenzeka ngoMgqibelo, mhla ka-August 10. Ingxenye eyayinabantu baseCzechoslovakia yasukuma yonke kanye kanye kwaduma ihlombe elikhulu—ihlombe elathatha imizuzu eyishumi yonke! Ubuso babugcwele injabulo. Sasiyini isizathu salokhu? Lapho ephetha inkulumo, u-Albert Schroeder, ilungu leNdikimba Ebusayo, wayeqale wakhulula incwadi entsha ngesiNgisi—okwazidumaza izilaleli—kodwa wabe esezimangaza ngokumemezela ukukhululwa kwe-New World Translation of the Holy Scriptures eyayisanda kunyatheliswa ngolimi lwesiCzech nolweSlovak! Izinyembezi zenjabulo zehla ebusweni bezihambeli eziningi.

Lo mhlangano wazithinta ngokujulile izinhliziyo zezihambeli. Kuthiwani ngabezindaba? Njengenhlalayenza, eminye imibiko yayigxeka, eminye imihle. NgoMsombuluko, ngo-August 12, ngaphansi kwesihloko esithi “IStrahov Ibigcwele Pháma,” i-Venkov, deník českého a moravskoslezského venkova (Countryside, a Daily of the Czech and Moravian-Silesian Countryside) yabika:

“Kusukela ngoLwesihlanu kuze kube yiSonto, bekunomhlangano wezizwe woFakazi BakaJehova ePrague, kukhona izihambeli ezingu-75 000 zivela kuzo zonke izindawo zaseYurophu, eMelika naseJapane. OFakazi BakaJehova bebelokhu bekhuthele eCzechoslovakia kusukela ngo-1912. Izihambeli ezingoFakazi BakaJehova beziphawuleka ngokucabangela kwazo nokuzithiba kwazo. Umhlangano ngokwawo ubuhlelekile futhi ulungiselelwe kahle. Nakuba liqale ukuna ngesikhathi sobhapathizo ngoMgqibelo, izilaleli zihlale ezindaweni zazo futhi zamukela amalungu amasha ngehlombe elidonse isikhathi eside.”

Naphezu kwakho konke lokhu—abakwazanga ukubhaliswa ngokomthetho kwaze kwaba ngemva kweminyaka emibili.

Isikhathi Sokwanda

Nakuba inqubo engokomthetho yayihamba kancane, izidingo zenhlangano engokwasezulwini zazanda njengoba umsebenzi wawanda kuleli zwe. Kusukela ngo-1980 abazalwane babesebenzisa indlu enezitezi ezintathu ePrague njengehhovisi eliyinhloko, linendawo encane yokuhlala. Lapho umsebenzi uqala ukwenziwa ngokukhululeka okwengeziwe ngo-1990, baphinde basilungisa leso sakhiwo. Amakamelo okulala awabange esaba khona, sonke isakhiwo sashintshwa saba amahhovisi. Kodwa amahhovisi anjani? Amagumbi amakhulu ahlukaniswa ngodonga lwamapulangwe ukuze abe izindawo ezincane zokusebenzela. Zazingabi amahhovisi nje kuphela kodwa zaziba nangamakamelo okulala ezisebenzi, ngakho imibhede yabo yayiseduze kwamadeski asehhovisi. Kwakudingeka indawo eyengeziwe.

Entwasahlobo ka-1993, kwanikelwa eNhlanganweni ngesakhiwo esisha esinezitezi eziyishumi esisePrague ukuze sisetshenziselwe ukuthuthukisa imfundo yeBhayibheli. Izisebenzi zokuzithandela zakuzo zonke izindawo zezwe zahlanganyela ekusilungiseni. Ngo-May 28 no-29, 1994, kwaba nesimiso sokusinikezela. Kwamenywa oFakazi BakaJehova abaningi ababeye balondoloza ubuqotho babo kuJehova iminyaka eminingi ngaphansi kombuso wamaKhomanisi. U-Albert Schroeder, weNdikimba Ebusayo, waba nengxenye esimisweni, futhi kwakukhona nabanye base-Austria, Brithani, Denmark, Italy, Jalimane, Netherlands, Poland, Slovakia, Switzerland, Ukraine, nase-United States.

Ngesikhathi iCzechoslovakia ihlukaniswa iba amazwe amabili ngo-1993, womabili la mazwe ayesakhonzwa ikomiti yezwe eyodwa, iqondiswa igatsha lase-Austria. Kodwa izimo kuwo womabili la mazwe zazishintsha. Ngonyaka olandelayo izwe ngalinye laba nekomiti yalo. Kwathi ngo-September 1, 1995, ihhovisi legatsha laqala ukusebenza eCzech Republic. UJan Glückselig, u-Ondřej Kadlec, uJaromír Leneček, uLubomír Müller no-Eduard Sobička babelwa iNdikimba Ebusayo ukuba bakhonze eKomitini Yegatsha. Kamuva, uLubomír Müller wabelwa enkonzweni ekhethekile eRussia, kwathi uPetr Žitník wamiswa njengelungu elisha leKomiti Yegatsha eCzech Republic.

AmaHholo OMbuso “Akhiwa Ngokushesha”

Amabandla oFakazi BakaJehova ayedinga izindawo zokuhlanganyela. Ukuthola izindawo ezikahle zaleyo mihlangano akuyona into elula eCzech Republic. Abanini mahholo abaningi bayenqaba ukuqashisela oFakazi BakaJehova. Phakathi kokunye, lokhu kubangelwa inkulumo-ze edukisayo ngoFakazi, entsha nendala. Ngakho amabandla amaningi afuna amathuba okwakha ihholo noma okulungisa isakhiwo esidala. Kuzo zonke izindlela zokwakha izakhiwo ezintsha ezizanyiwe, elula kunazo zonke yindlela yokwakha ngokushesha. Ngo-November 20, 1993, kwanikezelwa iHholo LoMbuso lokuqala elakhiwa ngale ndlela eCzech Republic. Leli hholo lakhiwa edolobheni laseSezimovo Ústí futhi lisetshenziswa amabandla amabili endawo.

Inani lamaHholo OMbuso liye laqhubeka landa. Ngo-May 1999, amabandla angu-242 kulo lonke izwe ayesebenzisa amaHholo OMbuso angu-84 angawoFakazi. Abazalwane nodade baseCzech Republic bayaqaphela ukuthi ngaphandle kosizo olungokwezimali oluvele ezincekwini zikaJehova zakwamanye amazwe abakanye nazo, bebengeke bakwazi ukwakha amaHholo OMbuso amaningi kangaka amahle. Ukupha kwabazalwane bomhlaba wonke kuzithinte ngokujulile izinhliziyo zabazalwane baseCzech. Ngobuqotho bafisa ukubonga abafowabo bakwamanye amazwe noJehova, ofaka lo moya ezinhliziyweni zezinceku zakhe nowenze inhlangano enhle kangaka.—2 Kor. 8:13-15.

Izingibe Ezicashile Zenkululeko

Isasasa lokuwa kobuKhomanisi ngo-1989 kade laphela, futhi sekuye kwavela izinkinga eziningi ezintsha. Kolunye uhlangothi kunethuba elalingaziwa ngaphambili lokuthola ingcebo ngokusebenza kanzima. Ngakolunye, kunokungalondeki kwezenhlalo, izinga lobugebengu elikhula ngokushesha, ukuwa kwamandla emali, nezinye izici ezimbi ezithonya ubuhlobo babantu. Izinga lokuphila elikhuphukayo ligqugquzela ukuthanda izinto ezibonakalayo, ukuncintisana nomona. Abantu abaningi abahlala emadolobheni banemizi ngaphandle kwedolobha lapho bethanda ukungcebeleka khona. Inani elandayo labantu lithatha amaholide abizayo okuya phesheya. Intando yeningi esanda kutholakala ilethe inkululeko yokugxeka noma yini noma nini. Ivumele inkulumo-ze ephathelene nezindlela zokuphila okuxekethile. Ngaphansi kobuKhomanisi kwakungaphushwa nakuphushwa lokhu. Abantu bebengalindele, lesi simo esisha sibazumile, futhi abanye siye sabanqoba.

Lo moya ubathonyile nabanye oFakazi BakaJehova. Iningi liyekile ukukhonza uJehova ngenxa yokungena shí endleleni yokuphila yokuthanda izinto ezibonakalayo, bazinaka ngokweqile ezikaqed’ isizungu, balahla indinganiso ephakeme yeBhayibheli ngomshado, noma bagxeka noma yini—kuhlanganise namalungiselelo kaJehova angokwasezulwini. Abanye abakhetha ukuhlala enhlanganweni, bazama ukwenza amabandla avumelane nendlela yabo yokucabanga. Yebo, lokhu kwenza isimo sashuba kwaze kwaba yilapho silungiswa ababonisi abaqinile.

Labo abazama ukukhonza uNkulunkulu namuhla eCzech Republic bathola ukuthi bazungezwe umphakathi ophika ukuthi uNkulunkulu ukhona nokholelwa ekuziphendukeleni kwemvelo. Umphakathi obheka inkolo njengesiko lobungane noma ifilosofi eyinqaba. Abezindaba abanonya bahlale behlasela oFakazi BakaJehova. Lokhu kuwuvivinyo lokholo olunamandla njengalolo lwasemajele amaNazi namaKhomanisi nobuqili balabo ababesebenzisa lezi zinto. Iningi loFakazi BakaJehova lima liqine ngenxa yokholo lapho libhekana nalolu vivinyo.

Naphezu kwesimo sengqondo sabaningi ngokuqondene nezenkolo, kwakhishwa isinqumo esingokomthetho esihle kakhulu eNkantolo Yomthetho-sisekelo YaseCzech entwasahlobo ka-1999. Isihloko esisephephandabeni laseCzech elithi Lidové Noviny (People’s Daily) lango-March 11, 1999, samemezela: “IBrno Ibonisa Ukuhluzeka Kwengqondo,” eBrno yilapho kukhona khona iNkantolo Yomthetho-sisekelo. Isinqumo senkantolo sathi akukho muntu onqaba ukungenela ezempi ngenxa kanembeza okumelwe lithethwe kabili icala lakhe. Lokhu kunikeza oFakazi BakaJehova abaningi impumuzo. Kuye kwavunywa ukuthi umphumela waleli cala ubangelwe ukufaka isandla koFakazi BakaJehova esimisweni somthetho saseCzech.

Baqhutshwa Uthando

OFakazi BakaJehova eCzech Republic bayaqhubeka behlanganyela nomakhelwane babo izindaba ezinhle zoMbuso kaNkulunkulu. Isifiso sabo siwukusiza abaningi ngokwengeziwe ukuba bazi ngoNkulunkulu wethu onothando, uJehova, futhi baqaphele amalungiselelo amangalisayo awenzele bonke ababonisa ukholo. Kodwa ukuze baxoxe nabo, oFakazi kudingeka banqobe indlela abantu abazizwa ngayo—ethonywe ukunyundela okuphindaphindwayo—ukuthi oFakazi BakaJehova “bayihlelo eliyingozi.” Kungase kudingeke banqobe nomuzwa wokungayifuni inkolo iyonke, owabangelwa amashumi eminyaka okuphila ngaphansi kombuso ophika ukuthi uNkulunkulu ukhona. Bayaphumelela kulokhu?

Kuyaphawuleka ukuthi ngo-1999 lapho labo ababengoFakazi BakaJehova abangu-16 054 bebuthene emabandleni abo angu-242 bezogubha ukufa kukaJesu Kristu, izinkulungwane zabanye zahlanganyela nabo. Ingqikithi yababa khona yayingu-31 435.

Isifiso soFakazi BakaJehova siwukusiza ngamunye walaba ukuba agijime ngempumelelo nangokukhuthazela emzileni wobuKristu. Bathi beshumayela emphakathini, bebe bezama nokusizana ukuba bahlale beqinile okholweni. Bazi kahle ukuthi lapho echaza izenzakalo zosuku lwethu, uJesu wathi: “Ngokukhuthazela kwenu niyozuza imiphefumulo yenu.” (Luka 21:19) Futhi umphostoli uPetru waphefumulelwa ukuba alobe: “Ukuphela kwezinto zonke sekusondele. Ngakho-ke, yibani abahluzekile engqondweni, futhi nibe abaqaphile ngokuqondene nemithandazo. Ngaphezu kwakho konke, yibani nothando olukhulu ngomunye nomunye.” (1 Pet. 4:7, 8) Lolo thando lusabaqhubekisela phambili ekubeni bahlanganyele nabanye amaqiniso ayigugu eBhayibheli futhi bahlanganiswe ndawonye ubunye bobuKristu obungagqashuki.

[Amazwi acashunwe esihlokweni ekhasini 165]

“Angizange ngizisole ngokuhlala. Ngokuhamba kwesikhathi ngaqaphela ukuthi kwakumelwe ngibe lapha”

[Amazwi acashunwe esihlokweni ekhasini 168]

“‘Uma nifuna ukudubula laba, sidubuleni sonke!’ Lonke ikamu lakhexa”

[Amazwi acashunwe esihlokweni ekhasini 184]

“Sasihlekwa usulu futhi sithukwa kodwa . . . sihlonishwa ngasese”

[Amazwi acashunwe esihlokweni ekhasini 187]

“Yayingabonisi kuhlehla, kodwa yayi-bonisa ukuba nengqondo kobuKristu!”

[Ibalazwe ekhasini 150]

(Ukuze ubone ukuthi indaba ihlelwe kanjani, bheka encwadini)

GERMANY

POLAND

SLOVAKIA

AUSTRIA

CZECH REPUBLIC

BOHEMIA

Prague

Lidice

Kladno

Karlovy Vary

Most

Teplice

Liberec

MORAVIA

Brno

SILESIA

[Isithombe esigcwele ikhasi 148]

[Isithombe ekhasini 153]

UMfoweth’ u-Erler, waseDresden

[Izithombe ekhasini 155]

U-Otto Estelmann wabukisa i-“Photo-Drama of Creation” kulo lonke izwe

[Isithombe ekhasini 157]

UBohumil Müller

[Isithombe ekhasini 167]

UBožena Vodrážková wathola iqiniso ekamu lokuhlushwa

[Izithombe ekhasini 169]

UFrantišek Šnajdr no-Alois Miczek—bobabili bavalelwa ekamu lokuhlushwa laseMauthausen

[Isithombe ekhasini 173]

Abaningi babuthana bezolalela izinkulumo zeningi ngemva kweMpi Yezwe II

[Izithombe ekhasini 175]

Umkhaya waseBethel nehhovisi legatsha ngemva kweMpi Yezwe II

[Isithombe ekhasini 178]

Ukuhlangana ehlathini ngo-1949

[Isithombe ekhasini 185]

Amaholide ayejatshulelwa amaqembu ayevula amathuba okwakhana ngokomoya

[Isithombe ekhasini 194]

UJaromír Leneček, ilungu leKomiti Yegatsha, ubelokhu eshiseka enkonzweni kusukela eseyibhungu

[Izithombe ekhasini 207]

UMilton Henschel noTheodore Jaracz, kanye nabanye, basebenzela ukuthola ukuqashelwa ngokomthetho

[Isithombe ekhasini 210]

Izihambeli zaseCzech emhlanganweni ePoland ngo-1989

[Izithombe ekhasini 216]

Umhlangano wezizwe ePrague ngo-1991—isenzakalo esiyingqayizivele

[Isithombe ekhasini 218]

Iqembu labahumushi baseCzech

[Isithombe ekhasini 223]

Ihhovisi Legatsha ePrague

[Isithombe ekhasini 223]

Ngezansi: IKomiti Yegatsha (kusukela kwesobunxele kuya kwesokudla): UJan Glückselig, Jaromír Leneček, Ondřej Kadlec, Petr Žitník no-Eduard Sobička